| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
260. අදස්‌සනෙ උක්‌ඛෙපනීයකම්‌මවිවාදකථා
260. Adassane ukkhepanīyakammavivādakathā
437. ඉධ පන, භික්‌ඛවෙ, භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු ආපත්‌තිං ආපජ්‌ජිත්‌වා න ඉච්‌ඡති ආපත්‌තිං පස්‌සිතුං. හන්‌දස්‌ස මයං ආපත්‌තියා අදස්‌සනෙ උක්‌ඛෙපනීයකම්‌මං කරොමා’’ති. තෙ තස්‌ස ආපත්‌තියා අදස්‌සනෙ උක්‌ඛෙපනීයකම්‌මං කරොන්‌ති – අධම්‌මෙන වග්‌ගා…පෙ.… අධම්‌මෙන සමග්‌ගා… ධම්‌මෙන වග්‌ගා… ධම්‌මපතිරූපකෙන වග්‌ගා… ධම්‌මපතිරූපකෙන සමග්‌ගා. තත්‍රට්‌ඨො සඞ්‌ඝො විවදති – ‘‘අධම්‌මෙන වග්‌ගකම්‌මං, අධම්‌මෙන සමග්‌ගකම්‌මං, ධම්‌මෙන වග්‌ගකම්‌මං, ධම්‌මපතිරූපකෙන වග්‌ගකම්‌මං, ධම්‌මපතිරූපකෙන සමග්‌ගකම්‌මං, අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති. තත්‍ර, භික්‌ඛවෙ, යෙ තෙ භික්‌ඛූ එවමාහංසු – ‘‘ධම්‌මපතිරූපකෙන සමග්‌ගකම්‌ම’’න්‌ති, යෙ ච තෙ භික්‌ඛූ එවමාහංසු – ‘‘අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති, ඉමෙ තත්‌ථ භික්‌ඛූ ධම්‌මවාදිනො. ඉමෙ පඤ්‌ච වාරා සංඛිත්‌තා.
437. Idha pana, bhikkhave, bhikkhu āpattiṃ āpajjitvā na icchati āpattiṃ passituṃ. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu āpattiṃ āpajjitvā na icchati āpattiṃ passituṃ. Handassa mayaṃ āpattiyā adassane ukkhepanīyakammaṃ karomā’’ti. Te tassa āpattiyā adassane ukkhepanīyakammaṃ karonti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Ime pañca vārā saṃkhittā.
අදස්‌සනෙ උක්‌ඛෙපනීයකම්‌මවිවාදකථා නිට්‌ඨිතා.
Adassane ukkhepanīyakammavivādakathā niṭṭhitā.
