Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi

১৮৮. আদাযসত্তককথা

188. Ādāyasattakakathā

৩১১. ন পচ্চেস্সন্তি এত্থ পতীত্যূপসগ্গস্স পুনত্থং, ইধাতুযা চ গত্যত্থং দস্সেন্তো আহ ‘‘ন পুন আগমিস্স’’ন্তি। এৰং পক্কমতো ছিজ্জতীতি সম্বন্ধো।

311.Na paccessanti ettha patītyūpasaggassa punatthaṃ, idhātuyā ca gatyatthaṃ dassento āha ‘‘na puna āgamissa’’nti. Evaṃ pakkamato chijjatīti sambandho.

এতঞ্চাতি পক্কমনন্তিকং, কথিনুদ্ধারঞ্চ। তাহন্তি তে অহং। তেতি তুয্হং।

Etañcāti pakkamanantikaṃ, kathinuddhārañca. Tāhanti te ahaṃ. Teti tuyhaṃ.

অঞ্ঞন্তি অত্তনো ৰিহারতো অঞ্ঞং। এৰং হোতীতি এসো পরিৰিতক্কো হোতি। সোতি আৰাসপলিবোধো। আদিচ্চবন্ধুনা ৰুত্তোতি যোজনা।

Aññanti attano vihārato aññaṃ. Evaṃ hotīti eso parivitakko hoti. Soti āvāsapalibodho. Ādiccabandhunā vuttoti yojanā.

দ্ৰে পলিবোধা একতো ছিজ্জন্তীতি সম্বন্ধো। অপুব্বং অচরিমন্তি একপহারেনেৰ। সো পলিবোধূপচ্ছেদো কস্মা ৰিত্থারতো ন ৰুত্তোতি আহ ‘‘সো পনা’’তিআদি। সো পনাতি পলিবোধূপচ্ছেদো পন। ন ৰুত্তোতি সম্বন্ধো। এত্থাতি ইমস্মিং কথিনুব্ভারে। কস্মা অযং কথিনুদ্ধারো ‘‘নাসনন্তিকো’’তি ৰুত্তোতি আহ ‘‘যস্মা’’তিআদি। তস্সাতি ভিক্খুনো।

Dve palibodhā ekato chijjantīti sambandho. Apubbaṃ acarimanti ekapahāreneva. So palibodhūpacchedo kasmā vitthārato na vuttoti āha ‘‘so panā’’tiādi. So panāti palibodhūpacchedo pana. Na vuttoti sambandho. Etthāti imasmiṃ kathinubbhāre. Kasmā ayaṃ kathinuddhāro ‘‘nāsanantiko’’ti vuttoti āha ‘‘yasmā’’tiādi. Tassāti bhikkhuno.

আসাৰচ্ছেদিকে ছিজ্জতীতি সম্বন্ধো। অযং পনাতি আসাৰচ্ছেদিকো কথিনুদ্ধারো পন। অনেকপভেদো হোতীতি সম্বন্ধো। তস্সাতি ভিক্খুস্স। ৰুত্তোতি অযং আসাৰচ্ছেদিকো কথিনুদ্ধারো ৰুত্তোতি যোজনা। এত্থ পনাতি ইমস্মিং পন ঠানে। তত্থাতি সীমাতিক্কন্তিকে।

Āsāvacchedike chijjatīti sambandho. Ayaṃ panāti āsāvacchediko kathinuddhāro pana. Anekapabhedo hotīti sambandho. Tassāti bhikkhussa. Vuttoti ayaṃ āsāvacchediko kathinuddhāro vuttoti yojanā. Ettha panāti imasmiṃ pana ṭhāne. Tatthāti sīmātikkantike.

৩১২-৩২৫. এৰন্তিআদি নিগমনং। সত্তকেতি অট্ঠসু মাতিকাসু আসাৰচ্ছেদতো সেসে সত্তপমাণে, সত্তসমূহে ৰা। তেযেৰাতি সত্তকে এৰ। ততোতি ৰারতো। যে যেতি কথিনুদ্ধারা। ইতরেহীতি আসাৰচ্ছেদতো অঞ্ঞেহি। যে পলিবোধা ৰুত্তাতি সম্বন্ধো। আৰাসো চজীযতি অনেনাতি চত্তন্তি ৰচনত্থং দস্সেন্তো আহ ‘‘যেন চিত্তেনা’’তিআদি। তন্তি চিত্তং। ‘‘এসেৰ নযো’’তি ইমিনা আৰাসো ৰমীযতি অনেনাতি ৰন্তং। আৰাসতো মুচ্চতি অনেনাতি মুত্তন্তি ৰচনত্থং অতিদিসতি। সব্বত্থাতি সব্বস্মিং কথিনক্খন্ধকে।

312-325.Evantiādi nigamanaṃ. Sattaketi aṭṭhasu mātikāsu āsāvacchedato sese sattapamāṇe, sattasamūhe vā. Teyevāti sattake eva. Tatoti vārato. Ye yeti kathinuddhārā. Itarehīti āsāvacchedato aññehi. Ye palibodhā vuttāti sambandho. Āvāso cajīyati anenāti cattanti vacanatthaṃ dassento āha ‘‘yena cittenā’’tiādi. Tanti cittaṃ. ‘‘Eseva nayo’’ti iminā āvāso vamīyati anenāti vantaṃ. Āvāsato muccati anenāti muttanti vacanatthaṃ atidisati. Sabbatthāti sabbasmiṃ kathinakkhandhake.

ইতি কথিনক্খন্ধকৰণ্ণনায যোজনা সমত্তা।

Iti kathinakkhandhakavaṇṇanāya yojanā samattā.

Next: ৮. চীৰরক্খন্ধকং • 8. Cīvarakkhandhakaṃ

অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / আদাযসত্তককথা • Ādāyasattakakathā

টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / আদাযসত্তকাদিকথাৰণ্ণনা • Ādāyasattakādikathāvaṇṇanā

টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আদাযসত্তককথাৰণ্ণনা • Ādāyasattakakathāvaṇṇanā

টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / আদাযসত্তককথাৰণ্ণনা • Ādāyasattakakathāvaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact