Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi

๑๘๘. อาทายสตฺตกกถา

188. Ādāyasattakakathā

๓๑๑. น ปเจฺจสฺสนฺติ เอตฺถ ปตีตฺยูปสคฺคสฺส ปุนตฺถํ, อิธาตุยา จ คตฺยตฺถํ ทเสฺสโนฺต อาห ‘‘น ปุน อาคมิสฺส’’นฺติฯ เอวํ ปกฺกมโต ฉิชฺชตีติ สมฺพโนฺธฯ

311.Na paccessanti ettha patītyūpasaggassa punatthaṃ, idhātuyā ca gatyatthaṃ dassento āha ‘‘na puna āgamissa’’nti. Evaṃ pakkamato chijjatīti sambandho.

เอตญฺจาติ ปกฺกมนนฺติกํ, กถินุทฺธารญฺจฯ ตาหนฺติ เต อหํฯ เตติ ตุยฺหํฯ

Etañcāti pakkamanantikaṃ, kathinuddhārañca. Tāhanti te ahaṃ. Teti tuyhaṃ.

อญฺญนฺติ อตฺตโน วิหารโต อญฺญํฯ เอวํ โหตีติ เอโส ปริวิตโกฺก โหติฯ โสติ อาวาสปลิโพโธฯ อาทิจฺจพนฺธุนา วุโตฺตติ โยชนาฯ

Aññanti attano vihārato aññaṃ. Evaṃ hotīti eso parivitakko hoti. Soti āvāsapalibodho. Ādiccabandhunā vuttoti yojanā.

เทฺว ปลิโพธา เอกโต ฉิชฺชนฺตีติ สมฺพโนฺธฯ อปุพฺพํ อจริมนฺติ เอกปหาเรเนวฯ โส ปลิโพธูปเจฺฉโท กสฺมา วิตฺถารโต น วุโตฺตติ อาห ‘‘โส ปนา’’ติอาทิฯ โส ปนาติ ปลิโพธูปเจฺฉโท ปนฯ น วุโตฺตติ สมฺพโนฺธฯ เอตฺถาติ อิมสฺมิํ กถินุพฺภาเรฯ กสฺมา อยํ กถินุทฺธาโร ‘‘นาสนนฺติโก’’ติ วุโตฺตติ อาห ‘‘ยสฺมา’’ติอาทิฯ ตสฺสาติ ภิกฺขุโนฯ

Dve palibodhā ekato chijjantīti sambandho. Apubbaṃ acarimanti ekapahāreneva. So palibodhūpacchedo kasmā vitthārato na vuttoti āha ‘‘so panā’’tiādi. So panāti palibodhūpacchedo pana. Na vuttoti sambandho. Etthāti imasmiṃ kathinubbhāre. Kasmā ayaṃ kathinuddhāro ‘‘nāsanantiko’’ti vuttoti āha ‘‘yasmā’’tiādi. Tassāti bhikkhuno.

อาสาวเจฺฉทิเก ฉิชฺชตีติ สมฺพโนฺธฯ อยํ ปนาติ อาสาวเจฺฉทิโก กถินุทฺธาโร ปนฯ อเนกปเภโท โหตีติ สมฺพโนฺธฯ ตสฺสาติ ภิกฺขุสฺสฯ วุโตฺตติ อยํ อาสาวเจฺฉทิโก กถินุทฺธาโร วุโตฺตติ โยชนาฯ เอตฺถ ปนาติ อิมสฺมิํ ปน ฐาเนฯ ตตฺถาติ สีมาติกฺกนฺติเกฯ

Āsāvacchedike chijjatīti sambandho. Ayaṃ panāti āsāvacchediko kathinuddhāro pana. Anekapabhedo hotīti sambandho. Tassāti bhikkhussa. Vuttoti ayaṃ āsāvacchediko kathinuddhāro vuttoti yojanā. Ettha panāti imasmiṃ pana ṭhāne. Tatthāti sīmātikkantike.

๓๑๒-๓๒๕. เอวนฺติอาทิ นิคมนํฯ สตฺตเกติ อฎฺฐสุ มาติกาสุ อาสาวเจฺฉทโต เสเส สตฺตปมาเณ, สตฺตสมูเห วาฯ เตเยวาติ สตฺตเก เอวฯ ตโตติ วารโตฯ เย เยติ กถินุทฺธาราฯ อิตเรหีติ อาสาวเจฺฉทโต อเญฺญหิฯ เย ปลิโพธา วุตฺตาติ สมฺพโนฺธฯ อาวาโส จชียติ อเนนาติ จตฺตนฺติ วจนตฺถํ ทเสฺสโนฺต อาห ‘‘เยน จิเตฺตนา’’ติอาทิฯ ตนฺติ จิตฺตํฯ ‘‘เอเสว นโย’’ติ อิมินา อาวาโส วมียติ อเนนาติ วนฺตํฯ อาวาสโต มุจฺจติ อเนนาติ มุตฺตนฺติ วจนตฺถํ อติทิสติฯ สพฺพตฺถาติ สพฺพสฺมิํ กถินกฺขนฺธเกฯ

312-325.Evantiādi nigamanaṃ. Sattaketi aṭṭhasu mātikāsu āsāvacchedato sese sattapamāṇe, sattasamūhe vā. Teyevāti sattake eva. Tatoti vārato. Ye yeti kathinuddhārā. Itarehīti āsāvacchedato aññehi. Ye palibodhā vuttāti sambandho. Āvāso cajīyati anenāti cattanti vacanatthaṃ dassento āha ‘‘yena cittenā’’tiādi. Tanti cittaṃ. ‘‘Eseva nayo’’ti iminā āvāso vamīyati anenāti vantaṃ. Āvāsato muccati anenāti muttanti vacanatthaṃ atidisati. Sabbatthāti sabbasmiṃ kathinakkhandhake.

อิติ กถินกฺขนฺธกวณฺณนาย โยชนา สมตฺตาฯ

Iti kathinakkhandhakavaṇṇanāya yojanā samattā.

Next: ๘. จีวรกฺขนฺธกํ • 8. Cīvarakkhandhakaṃ

อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / อาทายสตฺตกกถา • Ādāyasattakakathā

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / อาทายสตฺตกาทิกถาวณฺณนา • Ādāyasattakādikathāvaṇṇanā

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / อาทายสตฺตกกถาวณฺณนา • Ādāyasattakakathāvaṇṇanā

ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / อาทายสตฺตกกถาวณฺณนา • Ādāyasattakakathāvaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact