| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
ஆதா³யஸத்தககதா²வண்ணனா
Ādāyasattakakathāvaṇṇanā
311. ஸன்னிட்டா²னந்திகே த்³வேபி பலிபோ³தா⁴ ஏகதோ சி²ஜ்ஜந்தீதி இத⁴, பரிவாரட்ட²கதா²யஞ்ச வுத்தங் இமிஸ்ஸா க²ந்த⁴கபாளியா ஸமேதி ஏகதோ உபி⁴ன்னம்பி து⁴ரனிக்கே²பஸ்ஸ கதத்தா. ‘‘இத³ங் ப³ஹிஸீமாயமேவ வுத்தங் ஸன்னிட்டா²னந்திகங் ஸந்தா⁴ய வுத்தங். யங் பன வுத்தங் பரிவாரே ‘சத்தாரோ கதி²னுத்³தா⁴ரா ஸியா அந்தோஸீமாய உத்³த⁴ரிய்யந்தி, ஸியா ப³ஹிஸீமாய உத்³த⁴ரிய்யந்தி, நிட்டா²னந்திகோ ஸன்னிட்டா²னந்திகோ நாஸனந்திகோ ஆஸாவச்சே²தி³கோ’தி (பரி॰ 416). தத்த² ப³ஹிஸீமாய ஸன்னிட்டா²னந்திகோ உத்³த⁴ரிய்யதீதி இத⁴ த³ஸ்ஸிதனயோவ. கத²ங் அந்தோஸீமாய ஸன்னிட்டா²னந்திகோ? அகதசீவரமாதா³ய ‘ந பச்செஸ்ஸ’ந்தி க³தோ, க³தக³தட்டா²னே பா²ஸுவிஹாரங் அலப⁴ந்தோ தமேவ விஹாரங் ஆக³ச்ச²தி, தஸ்ஸ சீவரபலிபோ³தோ⁴ டி²தோ. ஸோ ச ‘நேவிமங் சீவரங் காரெஸ்ஸ’ந்தி சித்தே உப்பன்னமத்தே சி²ஜ்ஜதி, தஸ்மா அந்தோஸீமாய உத்³த⁴ரிய்யதி, தஸ்மா து³விதோ⁴ ஸன்னிட்டா²னந்திகோ’’தி போராணக³ண்டி²பதே³ லிகி²தங், தங் யுத்தங், அஞ்ஞதா² அந்தோஸீமாய ‘‘நேவிமங் சீவரங் காரெஸ்ஸ’’ந்தி பவத்தஉப்³பா⁴ரோ இதரேஸு ஸமோதா⁴னங் ந க³ச்ச²தீதி அதிரித்தோ ஸியா. ஸீமாதிக்கந்திகோதி சீவரகாலஸீமாதிக்கந்திகோ. ஸஉப்³பா⁴ரே சீவரபலிபோ³தோ⁴ பட²மங் சி²ஜ்ஜந்தோ விய கா²யதி, அத² கோ² ஸாபெக்க²தாய சீவரகரணே ஸஉஸ்ஸாஹோவ ஹோதீதி லேஸங் ஸந்தா⁴ய பரிவாரவஸேன ‘‘த்³வே பலிபோ³தா⁴ அபுப்³ப³ங் அசரிமங் சி²ஜ்ஜந்தீ’’தி (மஹாவ॰ அட்ட²॰ 311) வுத்தங். ‘‘கதசீவரோ’’தி வுத்தத்தா இத⁴ ந ஸம்ப⁴வதி.
311.Sanniṭṭhānantike dvepi palibodhā ekato chijjantīti idha, parivāraṭṭhakathāyañca vuttaṃ imissā khandhakapāḷiyā sameti ekato ubhinnampi dhuranikkhepassa katattā. ‘‘Idaṃ bahisīmāyameva vuttaṃ sanniṭṭhānantikaṃ sandhāya vuttaṃ. Yaṃ pana vuttaṃ parivāre ‘cattāro kathinuddhārā siyā antosīmāya uddhariyyanti, siyā bahisīmāya uddhariyyanti, niṭṭhānantiko sanniṭṭhānantiko nāsanantiko āsāvacchediko’ti (pari. 416). Tattha bahisīmāya sanniṭṭhānantiko uddhariyyatīti idha dassitanayova. Kathaṃ antosīmāya sanniṭṭhānantiko? Akatacīvaramādāya ‘na paccessa’nti gato, gatagataṭṭhāne phāsuvihāraṃ alabhanto tameva vihāraṃ āgacchati, tassa cīvarapalibodho ṭhito. So ca ‘nevimaṃ cīvaraṃ kāressa’nti citte uppannamatte chijjati, tasmā antosīmāya uddhariyyati, tasmā duvidho sanniṭṭhānantiko’’ti porāṇagaṇṭhipade likhitaṃ, taṃ yuttaṃ, aññathā antosīmāya ‘‘nevimaṃ cīvaraṃ kāressa’’nti pavattaubbhāro itaresu samodhānaṃ na gacchatīti atiritto siyā. Sīmātikkantikoti cīvarakālasīmātikkantiko. Saubbhāre cīvarapalibodho paṭhamaṃ chijjanto viya khāyati, atha kho sāpekkhatāya cīvarakaraṇe saussāhova hotīti lesaṃ sandhāya parivāravasena ‘‘dve palibodhā apubbaṃ acarimaṃ chijjantī’’ti (mahāva. aṭṭha. 311) vuttaṃ. ‘‘Katacīvaro’’ti vuttattā idha na sambhavati.
316. ஸப்³ப³ங் அத்தனோ பரிக்கா²ரங் அனவஸேஸெத்வா பக்கமந்தோ ‘‘ஸமாதா³ய பக்கமதீ’’தி வுச்சதி. ‘‘கதி²னுத்³தா⁴ரே விஸேஸோ நத்தி². புக்³க³லாதி⁴ப்பாயவிஸேஸேன கேவலங் வாரத³ஸ்ஸனத்த²ங் ஸமாதா³யவாரா வுத்தா’’தி ஸப்³பே³ஸு க³ண்டி²பதே³ஸு லிகி²தங். இத⁴ பன புக்³க³லாதி⁴ப்பாயேன பயோஜனங் வீமங்ஸிதப்³ப³ங். பக்கமனந்திகஸ்ஸ அபா⁴வா ‘‘யதா²ஸம்ப⁴வ’’ந்தி வுத்தங். விப்பகதேபி து⁴ரனிக்கே²பவஸேன பக்கமனந்திகதா ஸம்ப⁴வதி, தஸ்மா பக்கமனந்திகவாரோபி வத்தப்³போ³தி சே? ந, ஸன்னிட்டா²னந்திகலக்க²ணப்பஸங்க³தோ. அகதசீவரஸ்ஸ ந ஸவனந்திகதா ச.
316. Sabbaṃ attano parikkhāraṃ anavasesetvā pakkamanto ‘‘samādāya pakkamatī’’ti vuccati. ‘‘Kathinuddhāre viseso natthi. Puggalādhippāyavisesena kevalaṃ vāradassanatthaṃ samādāyavārā vuttā’’ti sabbesu gaṇṭhipadesu likhitaṃ. Idha pana puggalādhippāyena payojanaṃ vīmaṃsitabbaṃ. Pakkamanantikassa abhāvā ‘‘yathāsambhava’’nti vuttaṃ. Vippakatepi dhuranikkhepavasena pakkamanantikatā sambhavati, tasmā pakkamanantikavāropi vattabboti ce? Na, sanniṭṭhānantikalakkhaṇappasaṅgato. Akatacīvarassa na savanantikatā ca.
தத்ராயங் ஆதி³தோ பட்டா²ய வாரவிபா⁴வனா – ஆதா³யவாரா ஸத்த, ததா² ஸமாதா³யவாராதி த்³வே ஸத்தகவாரா. ததோ பக்கமனந்திகங் வஜ்ஜெத்வா விப்பகதசீவரஸ்ஸ ஆதா³யவாரா, ஸமாதா³யவாரா சாதி த்³வே ச²க்கவாரா. ததோ பரங் நிட்டா²னஸன்னிட்டா²னநாஸனந்திகானங் வஸேன தீணி திகானி த³ஸ்ஸிதானி, தத்த² பட²மத்திகங் அந்தோஸீமாய ‘‘ந பச்செஸ்ஸ’’ந்தி இமங் விதி⁴ங் அனாமஸித்வா ப³ஹிஸீமாயங் ஏவ ‘‘ந பச்செஸ்ஸ’’ந்தி பவத்தங், தஸ்மா பக்கமனந்திகஸீமாதிக்கந்திகஸஉப்³பா⁴ரா தத்த² ந யுஜ்ஜந்தி. ‘‘ஆஸாவச்சே²தி³கோ ஸம்ப⁴வந்தோபி யதா²வுத்தகாரணேன ந வுத்தோ. து³தியத்திகங் அந்தோஸீமாய ‘ந பச்செஸ்ஸ’ந்தி பவத்தங், எத்த² கிஞ்சாபி பக்கமனந்திகோ ஸம்ப⁴வதி, ததா²பி யேஹி சீவரபலிபோ³தோ⁴ சி²ஜ்ஜதி, தேஸங்யேவாதி⁴ப்பேதத்தா ந வுத்தோ’’தி போராணக³ண்டி²பதே³ வுத்தங். ஸப்³ப³ஸ்மிம்பி பன்னரஸகே விப்பகதசீவரஸ்ஸேவாதி⁴ப்பேதத்தாதி தக்கோ. அதி⁴ட்டா²னுபகே³ ச விப்பகதே ஸதி ந நிட்டா²னந்திகோ. நிட்டா²னாவஸேஸே ஸதி ந நாஸனந்திகோதி போராணா. ததியத்திகங் அனதி⁴ட்டி²த-பதே³ன விஸேஸெத்வா பவத்தங், அத்த²தோ பட²மத்திகேன ஸமேதி. தஸ்ஸ அத்த²த³ஸ்ஸனபயோஜனங் கிர தங். யஸ்மா இமே தயோ அத்த²விகப்பா இமேஹி ஏவ தீஹி கதி²னுத்³தா⁴ரேஹி ஸக்கா த³ஸ்ஸேதுங், தஸ்மா இமேவ யோஜிதா ஏகஸம்ப³ந்த⁴வஸேன, அஞ்ஞதா² பட²மத்திகங் ச²க்கங் ப⁴வெய்ய இமஸ்ஸ பன்னரஸகஸ்ஸ அந்தே ச²க்கங் விய. ததியத்திகானந்தரங் சதுத்த²த்திகங் ஸம்ப⁴வந்தங் ‘‘அந்தோஸீமாயங் ‘பச்செஸ்ஸ’’ந்தி வசனவிஸேஸேன ஸம்ப⁴வதி. ததா² ச யோஜியமானங் இதரேஹி ஸவனந்திகாதீ³ஹி அவிருத்³த⁴க்கமங் ஹோதி, தஸ்மா சதுத்த²த்திகங் அஹுத்வா ச²க்கங் ஜாதந்தி வேதி³தப்³ப³ங். ஏவங் தீணி திகானி ஏகங் ச²க்கஞ்சாதி பட²மங் பன்னரஸகங் வேதி³தப்³ப³ங். இதா³னி இத³மேவ பன்னரஸகங் உபஸக்³க³விஸேஸேன து³தியங் ஸமாதா³யபன்னரஸகங் நாம கதங். புன விப்பகதசீவரங் ஆதா³யாதி ததியங் பன்னரஸகங், ஸமாதா³யாதி சதுத்த²ங் பன்னரஸகங் த³ஸ்ஸிதங். ஏவங் சத்தாரி பன்னரஸகானி வேதி³தப்³பா³னி . தத்த² பட²மது³தியேஸு பன்னரஸகேஸு ஸப்³பே³ன ஸப்³ப³ங் அகதசீவரங் அதி⁴ப்பேதங், இதரேஸு த்³வீஸு விப்பகதந்தி யோஜேதப்³ப³ங். ‘‘புப்³பே³ நிப³த்³த⁴ட்டா²னே சீவராஸாய க³ஹேதப்³ப³ங், அஞ்ஞத்த² ந வட்டதி. உபச்சி²ன்னாய சே சீவராஸாய சீவரங் உப்பன்னங், ந தங் சீவரபலிபோ³த⁴ங் கரோதீ’’தி போராணக³ண்டி²பதே³ வுத்தங். நிஸ்ஸக்³கி³யேஸு ததியகதி²னே ஆக³தசீவரபச்சாஸா இத⁴ சீவராஸாதி தக்கோ. யத்த² சீவராஸா, தங் டா²னங் அதி⁴கரணூபசாரேன ‘‘சீவராஸா’’த்வேவ வுச்சதீதி கத்வா ‘‘தங் சீவராஸங் பயிருபாஸதீ’’திஆதி³ வுத்தங், தஸ்மா அனாஸாய லப⁴தீதி அனாஸாயிதட்டா²னே லப⁴தீதிஆதி³னா அத்தோ² க³ஹேதப்³போ³. எத்த² நிட்டா²னஸன்னிட்டா²னநாஸனஆஸாவச்சே²தி³கவஸேன ஏகோ வாரோதி இத³மேகங் சதுக்கங் ஜாதங், தஸ்மா புப்³பே³ வுத்தானி தீணி திகானி ஆஸாவச்சே²தி³காதி⁴கானி தீணி சதுக்கானீதி ஏகங் அனாஸாயத்³வாத³ஸகந்தி வேதி³தப்³ப³ங். தத³னந்தரே ஆஸாயத்³வாத³ஸகே கிஞ்சாபி பட²மத்³வாத³ஸக்கமோ லப்³ப⁴தி, ததா²பி தங் நிப்³பி³ஸேஸந்தி தமேகங் த்³வாத³ஸகங் அவுத்தஸித்³த⁴ங் கத்வா விஸேஸதோ த³ஸ்ஸேதுங் ஆதி³தோ பட்டா²ய ‘‘அந்தோஸீமாய பச்செஸ்ஸ’’ந்தி வுத்தங், தங் து³தியசதுக்கே ‘‘ஸோ ப³ஹிஸீமக³தோ ஸுணாதீ’’திஆதி³வசனஸ்ஸ ததியசதுக்கே ஸவனந்திகாதீ³னஞ்ச ஓகாஸகரணத்த²ந்தி வேதி³தப்³ப³ங். இத³ங் பன த்³வாத³ஸகங் அனாஸாய வஸேன லப்³ப⁴மானம்பி இமினா அவுத்தஸித்³த⁴ங் கத்வா ந த³ஸ்ஸிதந்தி வேதி³தப்³ப³ங். ஏவமெத்த² த்³வே த்³வாத³ஸகானி உத்³த⁴ரிதானி. கரணீயத்³வாத³ஸகேபி யதா²த³ஸ்ஸிதஅனாஸாயத்³வாத³ஸகங், அவுத்தஸித்³த⁴ங் ஆஸாயத்³வாத³ஸகஞ்சாதி த்³வே த்³வாத³ஸகானி உத்³த⁴ரிதப்³பா³னி. இதா³னி தி³ஸங்க³மிகனவகங் ஹோதி. தத்த² யஸ்மா ‘‘தி³ஸங்க³மிகோ பக்கமதீ’’தி வசனேனேவ ‘‘ந பச்செஸ்ஸ’’ந்தி இத³ங் அவுத்தஸித்³த⁴மேவ, தஸ்மா தங் ந வுத்தங். எத்தாவதா ஆவாஸபலிபோ³தா⁴பா⁴வோ த³ஸ்ஸிதோ.
Tatrāyaṃ ādito paṭṭhāya vāravibhāvanā – ādāyavārā satta, tathā samādāyavārāti dve sattakavārā. Tato pakkamanantikaṃ vajjetvā vippakatacīvarassa ādāyavārā, samādāyavārā cāti dve chakkavārā. Tato paraṃ niṭṭhānasanniṭṭhānanāsanantikānaṃ vasena tīṇi tikāni dassitāni, tattha paṭhamattikaṃ antosīmāya ‘‘na paccessa’’nti imaṃ vidhiṃ anāmasitvā bahisīmāyaṃ eva ‘‘na paccessa’’nti pavattaṃ, tasmā pakkamanantikasīmātikkantikasaubbhārā tattha na yujjanti. ‘‘Āsāvacchediko sambhavantopi yathāvuttakāraṇena na vutto. Dutiyattikaṃ antosīmāya ‘na paccessa’nti pavattaṃ, ettha kiñcāpi pakkamanantiko sambhavati, tathāpi yehi cīvarapalibodho chijjati, tesaṃyevādhippetattā na vutto’’ti porāṇagaṇṭhipade vuttaṃ. Sabbasmimpi pannarasake vippakatacīvarassevādhippetattāti takko. Adhiṭṭhānupage ca vippakate sati na niṭṭhānantiko. Niṭṭhānāvasese sati na nāsanantikoti porāṇā. Tatiyattikaṃ anadhiṭṭhita-padena visesetvā pavattaṃ, atthato paṭhamattikena sameti. Tassa atthadassanapayojanaṃ kira taṃ. Yasmā ime tayo atthavikappā imehi eva tīhi kathinuddhārehi sakkā dassetuṃ, tasmā imeva yojitā ekasambandhavasena, aññathā paṭhamattikaṃ chakkaṃ bhaveyya imassa pannarasakassa ante chakkaṃ viya. Tatiyattikānantaraṃ catutthattikaṃ sambhavantaṃ ‘‘antosīmāyaṃ ‘paccessa’’nti vacanavisesena sambhavati. Tathā ca yojiyamānaṃ itarehi savanantikādīhi aviruddhakkamaṃ hoti, tasmā catutthattikaṃ ahutvā chakkaṃ jātanti veditabbaṃ. Evaṃ tīṇi tikāni ekaṃ chakkañcāti paṭhamaṃ pannarasakaṃ veditabbaṃ. Idāni idameva pannarasakaṃ upasaggavisesena dutiyaṃ samādāyapannarasakaṃ nāma kataṃ. Puna vippakatacīvaraṃ ādāyāti tatiyaṃ pannarasakaṃ, samādāyāti catutthaṃ pannarasakaṃ dassitaṃ. Evaṃ cattāri pannarasakāni veditabbāni . Tattha paṭhamadutiyesu pannarasakesu sabbena sabbaṃ akatacīvaraṃ adhippetaṃ, itaresu dvīsu vippakatanti yojetabbaṃ. ‘‘Pubbe nibaddhaṭṭhāne cīvarāsāya gahetabbaṃ, aññattha na vaṭṭati. Upacchinnāya ce cīvarāsāya cīvaraṃ uppannaṃ, na taṃ cīvarapalibodhaṃ karotī’’ti porāṇagaṇṭhipade vuttaṃ. Nissaggiyesu tatiyakathine āgatacīvarapaccāsā idha cīvarāsāti takko. Yattha cīvarāsā, taṃ ṭhānaṃ adhikaraṇūpacārena ‘‘cīvarāsā’’tveva vuccatīti katvā ‘‘taṃ cīvarāsaṃ payirupāsatī’’tiādi vuttaṃ, tasmā anāsāya labhatīti anāsāyitaṭṭhāne labhatītiādinā attho gahetabbo. Ettha niṭṭhānasanniṭṭhānanāsanaāsāvacchedikavasena eko vāroti idamekaṃ catukkaṃ jātaṃ, tasmā pubbe vuttāni tīṇi tikāni āsāvacchedikādhikāni tīṇi catukkānīti ekaṃ anāsāyadvādasakanti veditabbaṃ. Tadanantare āsāyadvādasake kiñcāpi paṭhamadvādasakkamo labbhati, tathāpi taṃ nibbisesanti tamekaṃ dvādasakaṃ avuttasiddhaṃ katvā visesato dassetuṃ ādito paṭṭhāya ‘‘antosīmāya paccessa’’nti vuttaṃ, taṃ dutiyacatukke ‘‘so bahisīmagato suṇātī’’tiādivacanassa tatiyacatukke savanantikādīnañca okāsakaraṇatthanti veditabbaṃ. Idaṃ pana dvādasakaṃ anāsāya vasena labbhamānampi iminā avuttasiddhaṃ katvā na dassitanti veditabbaṃ. Evamettha dve dvādasakāni uddharitāni. Karaṇīyadvādasakepi yathādassitaanāsāyadvādasakaṃ, avuttasiddhaṃ āsāyadvādasakañcāti dve dvādasakāni uddharitabbāni. Idāni disaṃgamikanavakaṃ hoti. Tattha yasmā ‘‘disaṃgamiko pakkamatī’’ti vacaneneva ‘‘na paccessa’’nti idaṃ avuttasiddhameva, tasmā taṃ na vuttaṃ. Ettāvatā āvāsapalibodhābhāvo dassito.
321. ‘‘சீவரபடிவீஸங் அபவிலாயமானோ’’தி இமினா சீவரபலிபோ³த⁴ஸமங்கி³தமஸ்ஸ த³ஸ்ஸேதி. படிவீஸோதி அத்தனோ பத்தப்³போ³ சீவரபா⁴கோ³. அபவிலாயமானோதி ஆகங்க²மானோ. தஸ்ஸ சீவரலாபே⁴ ஸதி வஸ்ஸங்வுத்தா²வாஸே நிட்டா²னஸன்னிட்டா²னநாஸனந்திகானங் வஸேன ஏகங் திகங், தேஸங்யேவ வஸேன அந்தராமக்³கே³ ஏகங், க³தட்டா²னே ஏகந்தி திண்ணங் திகானங் வஸேன ஏகங் நவகங் வேதி³தப்³ப³ங். ததோ பரங் நிட்டா²னஸன்னிட்டா²னநாஸனந்தி கஸீமாதிக்கந்திகஸஉப்³பா⁴ரானங் வஸேன பா²ஸுவிஹாரபஞ்சகங் வுத்தங். உப⁴யத்த² ஸேஸகதி²னுத்³தா⁴ராஸம்ப⁴வோ பாகடோவ. அயங் பனெத்த² பஞ்சகே விஸேஸோ – ஸமாதா³யவாரோ ந ஸம்ப⁴வதி ‘‘பச்செஸ்ஸ’’ந்தி பச்சாக³மனாதி⁴ப்பாயதோ.
321. ‘‘Cīvarapaṭivīsaṃ apavilāyamāno’’ti iminā cīvarapalibodhasamaṅgitamassa dasseti. Paṭivīsoti attano pattabbo cīvarabhāgo. Apavilāyamānoti ākaṅkhamāno. Tassa cīvaralābhe sati vassaṃvutthāvāse niṭṭhānasanniṭṭhānanāsanantikānaṃ vasena ekaṃ tikaṃ, tesaṃyeva vasena antarāmagge ekaṃ, gataṭṭhāne ekanti tiṇṇaṃ tikānaṃ vasena ekaṃ navakaṃ veditabbaṃ. Tato paraṃ niṭṭhānasanniṭṭhānanāsananti kasīmātikkantikasaubbhārānaṃ vasena phāsuvihārapañcakaṃ vuttaṃ. Ubhayattha sesakathinuddhārāsambhavo pākaṭova. Ayaṃ panettha pañcake viseso – samādāyavāro na sambhavati ‘‘paccessa’’nti paccāgamanādhippāyato.
325. த்³வேமே பி⁴க்க²வே கதி²னஸ்ஸ பலிபோ³தா⁴தி கதி²னத்தா²ரஸ்ஸ அனுபப³ந்த⁴னபச்சயாதி.
325.Dveme bhikkhave kathinassa palibodhāti kathinatthārassa anupabandhanapaccayāti.
கதி²னக்க²ந்த⁴கவண்ணனா நிட்டி²தா.
Kathinakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
188. ஆதா³யஸத்தகங் • 188. Ādāyasattakaṃ
193. ஸமாதா³யபன்னரஸகாதி³ • 193. Samādāyapannarasakādi
198. அபவிலாயனநவகங் • 198. Apavilāyananavakaṃ
200. பலிபோ³தா⁴பலிபோ³த⁴கதா² • 200. Palibodhāpalibodhakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஆதா³யஸத்தககதா² • Ādāyasattakakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆதா³யஸத்தகாதி³கதா²வண்ணனா • Ādāyasattakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஆதா³யஸத்தககதா²வண்ணனா • Ādāyasattakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 188. ஆதா³யஸத்தககதா² • 188. Ādāyasattakakathā
