| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
আদাযসত্তককথাৰণ্ণনা
Ādāyasattakakathāvaṇṇanā
৩১১. ‘‘ন পুন আগমিস্স’’ন্তি ইদং আৰাসপলিবোধুপচ্ছেদকারণদস্সনং। পঞ্চসু হি চীৰরমাসেসু যদা কদাচি ন পচ্চেস্সন্তি চিত্তেন উপচারসীমাতিক্কমেন আৰাসপলিবোধো ছিজ্জতি। পচ্চেস্সন্তি বহিউপচারগতস্স পন যত্থ কত্থচি ন পচ্চেস্সন্তি চিত্তে উপ্পন্নমত্তে ছিজ্জতি। পঠমং চীৰরপলিবোধো ছিজ্জতীতি ন পচ্চেস্সন্তি পক্কমনতো পুরেতরমেৰ চীৰরস্স নিট্ঠিতত্তা ৰুত্তং। ‘‘কতচীৰরমাদাযা’’তি হি ৰুত্তং। অত্থতকথিনস্স হি ভিক্খুনো যাৰ ‘‘সঙ্ঘতো ৰা দাযককুলাদিতো ৰা চীৰরং লভিস্সামী’’তি চীৰরাসা ৰা লদ্ধৰত্থানং সহাযসম্পদাদিযোগং লভিত্ৰা সঙ্ঘাটিআদিভাৰেন ‘‘ছিন্দিত্ৰা করিস্সামী’’তি করণিচ্ছা ৰা পৰত্ততি, তাৰ চীৰরপলিবোধো অনুপচ্ছিন্নো এৰ। যদা পন যথাপত্থিতট্ঠানতো চীৰরাদীনং সব্বথা অলাভেন ৰা চীৰরাসা চেৰ লদ্ধানং কত্ৰা নিট্ঠানেন ৰা নট্ঠৰিনট্ঠাদিভাৰেন ৰা চীৰরে নিরপেক্খতায ৰা করণিচ্ছা চ ৰিগচ্ছতি, তদা চীৰরপলিবোধো উপচ্ছিন্নো হোতি।
311.‘‘Na puna āgamissa’’nti idaṃ āvāsapalibodhupacchedakāraṇadassanaṃ. Pañcasu hi cīvaramāsesu yadā kadāci na paccessanti cittena upacārasīmātikkamena āvāsapalibodho chijjati. Paccessanti bahiupacāragatassa pana yattha katthaci na paccessanti citte uppannamatte chijjati. Paṭhamaṃ cīvarapalibodho chijjatīti na paccessanti pakkamanato puretarameva cīvarassa niṭṭhitattā vuttaṃ. ‘‘Katacīvaramādāyā’’ti hi vuttaṃ. Atthatakathinassa hi bhikkhuno yāva ‘‘saṅghato vā dāyakakulādito vā cīvaraṃ labhissāmī’’ti cīvarāsā vā laddhavatthānaṃ sahāyasampadādiyogaṃ labhitvā saṅghāṭiādibhāvena ‘‘chinditvā karissāmī’’ti karaṇicchā vā pavattati, tāva cīvarapalibodho anupacchinno eva. Yadā pana yathāpatthitaṭṭhānato cīvarādīnaṃ sabbathā alābhena vā cīvarāsā ceva laddhānaṃ katvā niṭṭhānena vā naṭṭhavinaṭṭhādibhāvena vā cīvare nirapekkhatāya vā karaṇicchā ca vigacchati, tadā cīvarapalibodho upacchinno hoti.
সো চ ইধ ‘‘কতচীৰরং আদাযা’’তি ৰচনেন পকাসিতো। এৰং উপরি সব্বত্থ পাল়িৰচনক্কমং নিস্সায নেসং পঠমং, পচ্ছা চ উপচ্ছিজ্জনং ৰুত্তন্তি দট্ঠব্বং। সব্বথাপি চ ইমেসং উভিন্নং পলিবোধানং উপচ্ছেদেনেৰ কথিনুব্ভারো, ন একস্স। তেসঞ্চ পুব্বাপরিযেন, একক্খণে চ উপচ্ছিজ্জনং দস্সেতুং ইমা অট্ঠ মাতিকা ঠপিতাতি ৰেদিতব্বা। অন্তোসীমাযন্তি চীৰরনিট্ঠানক্খণেযেৰ ছিন্নত্তা ৰুত্তং। নেৰিমং চীৰরং কারেস্সন্তি চীৰরে অপেক্খায ৰিগতত্তা করণপলিবোধস্সাপি উপচ্ছিন্নতং দস্সেতি। যো পন অপ্পিচ্ছতায ৰা অনত্থিকতায ৰা সব্বথা চীৰরং ন সম্পটিচ্ছতি, তস্স বহিসীমাগতস্স সব্বথাপি চীৰরপলিবোধাভাৰেন ন পচ্চেস্সন্তি সন্নিট্ঠানমত্তেন সন্নিট্ঠানন্তিকো কথিনুব্ভারো ৰেদিতব্বো। সো পনাতি পলিবোধুপচ্ছেদো। অযং পনাতি আসাৰচ্ছেদকো কথিনুব্ভারো ৰিসুং ৰিত্থারেত্ৰা ৰুত্তো, ইধ ন ৰুত্তোতি সম্বন্ধো।
So ca idha ‘‘katacīvaraṃ ādāyā’’ti vacanena pakāsito. Evaṃ upari sabbattha pāḷivacanakkamaṃ nissāya nesaṃ paṭhamaṃ, pacchā ca upacchijjanaṃ vuttanti daṭṭhabbaṃ. Sabbathāpi ca imesaṃ ubhinnaṃ palibodhānaṃ upacchedeneva kathinubbhāro, na ekassa. Tesañca pubbāpariyena, ekakkhaṇe ca upacchijjanaṃ dassetuṃ imā aṭṭha mātikā ṭhapitāti veditabbā. Antosīmāyanti cīvaraniṭṭhānakkhaṇeyeva chinnattā vuttaṃ. Nevimaṃ cīvaraṃ kāressanti cīvare apekkhāya vigatattā karaṇapalibodhassāpi upacchinnataṃ dasseti. Yo pana appicchatāya vā anatthikatāya vā sabbathā cīvaraṃ na sampaṭicchati, tassa bahisīmāgatassa sabbathāpi cīvarapalibodhābhāvena na paccessanti sanniṭṭhānamattena sanniṭṭhānantiko kathinubbhāro veditabbo. So panāti palibodhupacchedo. Ayaṃ panāti āsāvacchedako kathinubbhāro visuṃ vitthāretvā vutto, idha na vuttoti sambandho.
অনাসায লভতীতি ‘‘যস্মিং কুলে চীৰরং লভিস্সামা’’তি আসা অনুপ্পন্নপুব্বা, তত্থ চীৰরাসায অনুপ্পন্নট্ঠানে যত্থ কত্থচি লভতীতি অত্থো। আসায ন লভতীতি আসীসিতট্ঠানে ন লভতীতি অত্থো। ইধ ন ৰুত্তোতি ইধ সৰনন্তিকানন্তরে ন ৰুত্তো। তত্থাতি তস্মিং সীমাতিক্কন্তিকে। সীমাতিক্কন্তিকো নাম চীৰরমাসানং পরিযন্তদিৰসসঙ্খাতায সীমায অতিক্কমনতো সঞ্জাতো। কেচি ‘‘বহিসীমায কালাতিক্কমো সীমাতিক্কমো’’তি মঞ্ঞন্তি, তেসং অন্তোউপচারে চীৰরকালাতিক্কমেপি কথিনুব্ভারো অসম্মতো নাম সিযাতি ন চেতং যুত্তং। তস্মা যত্থ কত্থচি কালাতিক্কমো সীমাতিক্কমোতি ৰেদিতব্বো। এত্থ চ পাল়িযং ‘‘কতচীৰরো’’তি ইদং উপলক্খণমত্তং, অকতচীৰরস্সপি কালাতিক্কমেন সীমাতিক্কন্তিকো হোতি, দ্ৰে চ পলিবোধা একতো ছিজ্জন্তি। এৰং অঞ্ঞত্থাপি যথাসম্ভৰং তংতং ৰিসেসনাভাৰেপি কথিনুব্ভারতা, পলিবোধুপচ্ছেদপ্পকারো চ ৰেদিতব্বো। ‘‘সহুব্ভারে দ্ৰেপি পলিবোধা অপুব্বং অচরিমং ছিজ্জন্তী’’তি ইদং অকতচীৰরস্স পচ্চেস্সন্তি অধিট্ঠানসম্ভৰপক্খং সন্ধায ৰুত্তং, তেসু অঞ্ঞতরাভাৰেপি সহুব্ভারোৰ হোতি।
Anāsāya labhatīti ‘‘yasmiṃ kule cīvaraṃ labhissāmā’’ti āsā anuppannapubbā, tattha cīvarāsāya anuppannaṭṭhāne yattha katthaci labhatīti attho. Āsāya na labhatīti āsīsitaṭṭhāne na labhatīti attho. Idha na vuttoti idha savanantikānantare na vutto. Tatthāti tasmiṃ sīmātikkantike. Sīmātikkantiko nāma cīvaramāsānaṃ pariyantadivasasaṅkhātāya sīmāya atikkamanato sañjāto. Keci ‘‘bahisīmāya kālātikkamo sīmātikkamo’’ti maññanti, tesaṃ antoupacāre cīvarakālātikkamepi kathinubbhāro asammato nāma siyāti na cetaṃ yuttaṃ. Tasmā yattha katthaci kālātikkamo sīmātikkamoti veditabbo. Ettha ca pāḷiyaṃ ‘‘katacīvaro’’ti idaṃ upalakkhaṇamattaṃ, akatacīvarassapi kālātikkamena sīmātikkantiko hoti, dve ca palibodhā ekato chijjanti. Evaṃ aññatthāpi yathāsambhavaṃ taṃtaṃ visesanābhāvepi kathinubbhāratā, palibodhupacchedappakāro ca veditabbo. ‘‘Sahubbhāre dvepi palibodhā apubbaṃ acarimaṃ chijjantī’’ti idaṃ akatacīvarassa paccessanti adhiṭṭhānasambhavapakkhaṃ sandhāya vuttaṃ, tesu aññatarābhāvepi sahubbhārova hoti.
৩১২-৩২৫. সমাদাযৰারো আদাযৰারসদিসোৰ। উপসগ্গমেৰেত্থ ৰিসেসো। তেনাহ ‘‘পুন সমাদাযৰারেপি…পে॰… তেযেৰ দস্সিতা’’তি । ৰিপ্পকতচীৰরে পক্কমনন্তিকস্স অভাৰতো ‘‘যথাসম্ভৰ’’ন্তি ৰুত্তং। তেনেৰ ৰিপ্পকতচীৰরৰারে ছল়েৰ উব্ভারা ৰুত্তা, চীৰরে হত্থগতে চ আসাৰচ্ছেদিকস্স অসম্ভৰা, সো এতেসু ৰারেসু যত্থ কত্থচি ন ৰুত্তো, ৰিসুঞ্ঞেৰ ৰুত্তো। ৰিপ্পকতৰারে চেত্থ আদাযৰারসমাদাযৰারৰসেন দ্ৰে ছক্কৰারা ৰুত্তা।
312-325. Samādāyavāro ādāyavārasadisova. Upasaggamevettha viseso. Tenāha ‘‘puna samādāyavārepi…pe… teyeva dassitā’’ti . Vippakatacīvare pakkamanantikassa abhāvato ‘‘yathāsambhava’’nti vuttaṃ. Teneva vippakatacīvaravāre chaḷeva ubbhārā vuttā, cīvare hatthagate ca āsāvacchedikassa asambhavā, so etesu vāresu yattha katthaci na vutto, visuññeva vutto. Vippakatavāre cettha ādāyavārasamādāyavāravasena dve chakkavārā vuttā.
ততো পরং নিট্ঠানসন্নিট্ঠাননাসনন্তিকানং ৰসেন তীণি তিকানি দস্সিতানি। তত্থ ততিযত্তিকে অনধিট্ঠিতেনাতি ‘‘পচ্চেস্সং, ন পচ্চেস্স’’ন্তি এৰং অনধিট্ঠিতেন, ন এৰং মনসিকত্ৰাতি অত্থো। ততিযত্তিকতো পন পরং একং ছক্কং দস্সিতং। এৰং তীণি তিকানি, একং ছক্কঞ্চাতি পঠমং পন্নরসকং ৰুত্তং, ইমিনা নযেন দুতিযপন্নরসকাদীনি ৰেদিতব্বানি।
Tato paraṃ niṭṭhānasanniṭṭhānanāsanantikānaṃ vasena tīṇi tikāni dassitāni. Tattha tatiyattike anadhiṭṭhitenāti ‘‘paccessaṃ, na paccessa’’nti evaṃ anadhiṭṭhitena, na evaṃ manasikatvāti attho. Tatiyattikato pana paraṃ ekaṃ chakkaṃ dassitaṃ. Evaṃ tīṇi tikāni, ekaṃ chakkañcāti paṭhamaṃ pannarasakaṃ vuttaṃ, iminā nayena dutiyapannarasakādīni veditabbāni.
পাল়িযং আসাদ্ৰাদসকে বহিসীমাগতস্স কথিনুদ্ধারেসু তেসম্পি চীৰরাসাদিৰসেন চীৰরপলিবোধো যাৰ চীৰরনিট্ঠানা তিট্ঠতীতি আহ ‘‘সো বহিসীমাগতো সুণাতি ‘উব্ভতং কির তস্মিং আৰাসে কথিনন্তি…পে॰… সৰনন্তিকো কথিনুদ্ধারো’’’তি। এত্থ চ সৰনক্খণে আৰাসপলিবোধো পঠমং ছিজ্জতি, নিট্ঠিতে চীৰরপলিবোধোতি ৰেদিতব্বো।
Pāḷiyaṃ āsādvādasake bahisīmāgatassa kathinuddhāresu tesampi cīvarāsādivasena cīvarapalibodho yāva cīvaraniṭṭhānā tiṭṭhatīti āha ‘‘so bahisīmāgato suṇāti ‘ubbhataṃ kira tasmiṃ āvāse kathinanti…pe… savanantiko kathinuddhāro’’’ti. Ettha ca savanakkhaṇe āvāsapalibodho paṭhamaṃ chijjati, niṭṭhite cīvarapalibodhoti veditabbo.
দিসংগমিকনৰকে দিসংগমিকো পক্কমতীতি ন পচ্চেস্সন্তি পক্কমতি, ইমিনা আৰাসপলিবোধাভাৰো দস্সিতো হোতি। তেনেৰ ৰস্সংৰুত্থাৰাসে পুন গন্ত্ৰা চীৰরনিট্ঠাপিতমত্তে নিট্ঠানন্তিকো কথিনুদ্ধারো ৰুত্তো। ‘‘চীৰরপটিৰিসং অপৰিলাযমানো’’তি ইমিনা চীৰরপলিবোধসমঙ্গিকত্তমস্স দস্সেতি, অপৰিলাযমানোতি আকঙ্খমানো। সেসং সুৰিঞ্ঞেয্যমেৰ।
Disaṃgamikanavake disaṃgamiko pakkamatīti na paccessanti pakkamati, iminā āvāsapalibodhābhāvo dassito hoti. Teneva vassaṃvutthāvāse puna gantvā cīvaraniṭṭhāpitamatte niṭṭhānantiko kathinuddhāro vutto. ‘‘Cīvarapaṭivisaṃ apavilāyamāno’’ti iminā cīvarapalibodhasamaṅgikattamassa dasseti, apavilāyamānoti ākaṅkhamāno. Sesaṃ suviññeyyameva.
আদাযসত্তককথাৰণ্ণনা নিট্ঠিতা।
Ādāyasattakakathāvaṇṇanā niṭṭhitā.
কথিনক্খন্ধকৰণ্ণনানযো নিট্ঠিতো।
Kathinakkhandhakavaṇṇanānayo niṭṭhito.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৮৮. আদাযসত্তকং • 188. Ādāyasattakaṃ
১৮৯. সমাদাযসত্তকং • 189. Samādāyasattakaṃ
১৯০. আদাযছক্কং • 190. Ādāyachakkaṃ
১৯১. সমাদাযছক্কং • 191. Samādāyachakkaṃ
১৯২. আদাযপন্নরসকং • 192. Ādāyapannarasakaṃ
১৯৩. সমাদাযপন্নরসকাদি • 193. Samādāyapannarasakādi
১৯৪. ৰিপ্পকতসমাদাযপন্নরসকং • 194. Vippakatasamādāyapannarasakaṃ
১৯৫. অনাসাদোল়সকং • 195. Anāsādoḷasakaṃ
১৯৬. আসাদোল়সকং • 196. Āsādoḷasakaṃ
১৯৭. করণীযদোল়সকং • 197. Karaṇīyadoḷasakaṃ
১৯৮. অপৰিলাযননৰকং • 198. Apavilāyananavakaṃ
১৯৯. ফাসুৰিহারপঞ্চকং • 199. Phāsuvihārapañcakaṃ
২০০. পলিবোধাপলিবোধকথা • 200. Palibodhāpalibodhakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / আদাযসত্তককথা • Ādāyasattakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / আদাযসত্তকাদিকথাৰণ্ণনা • Ādāyasattakādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / আদাযসত্তককথাৰণ্ণনা • Ādāyasattakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৮৮. আদাযসত্তককথা • 188. Ādāyasattakakathā
