| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
аад̣̇ааяасад̇д̇агагат̇ааван̣н̣анаа
Ādāyasattakakathāvaṇṇanā
311. саннидтаананд̇игз д̣̇взби балиб̣од̇хаа згад̇о чиж̇ж̇анд̇ийд̇и ид̇ха, бариваарадтагат̇ааяан̃жа вуд̇д̇ам̣ имиссаа канд̇хагабаал̣ияаа самзд̇и згад̇о убхиннамби д̇хуранигкзбасса гад̇ад̇д̇аа. ‘‘ид̣̇ам̣ б̣ахисиймааяамзва вуд̇д̇ам̣ саннидтаананд̇игам̣ санд̇хааяа вуд̇д̇ам̣. яам̣ бана вуд̇д̇ам̣ бариваарз ‘жад̇д̇ааро гат̇инуд̣̇д̇хаараа сияаа анд̇осиймааяа уд̣̇д̇харияяанд̇и, сияаа б̣ахисиймааяа уд̣̇д̇харияяанд̇и, нидтаананд̇иго саннидтаананд̇иго наасананд̇иго аасааважчзд̣̇иго’д̇и (бари. 416). д̇ад̇т̇а б̣ахисиймааяа саннидтаананд̇иго уд̣̇д̇харияяад̇ийд̇и ид̇ха д̣̇ассид̇анаяова. гат̇ам̣ анд̇осиймааяа саннидтаананд̇иго? агад̇ажийварамаад̣̇ааяа ‘на бажжзсса’нд̇и г̇ад̇о, г̇ад̇аг̇ад̇адтаанз паасувихаарам̣ алабханд̇о д̇амзва вихаарам̣ ааг̇ажчад̇и, д̇асса жийварабалиб̣од̇хо тид̇о. со жа ‘нзвимам̣ жийварам̣ гаарзсса’нд̇и жид̇д̇з уббаннамад̇д̇з чиж̇ж̇ад̇и, д̇асмаа анд̇осиймааяа уд̣̇д̇харияяад̇и, д̇асмаа д̣̇увид̇хо саннидтаананд̇иго’’д̇и бораан̣аг̇ан̣тибад̣̇з ликид̇ам̣, д̇ам̣ яуд̇д̇ам̣, ан̃н̃ат̇аа анд̇осиймааяа ‘‘нзвимам̣ жийварам̣ гаарзсса’’нд̇и бавад̇д̇ауб̣бхааро ид̇арзсу самод̇хаанам̣ на г̇ажчад̇ийд̇и ад̇ирид̇д̇о сияаа. сиймаад̇игганд̇игод̇и жийварагааласиймаад̇игганд̇иго. сауб̣бхаарз жийварабалиб̣од̇хо батамам̣ чиж̇ж̇анд̇о вияа кааяад̇и, ат̇а ко саабзгкад̇ааяа жийварагаран̣з сауссаахова ход̇ийд̇и лзсам̣ санд̇хааяа баривааравасзна ‘‘д̣̇вз балиб̣од̇хаа абуб̣б̣ам̣ ажаримам̣ чиж̇ж̇анд̇ий’’д̇и (махаава. адта. 311) вуд̇д̇ам̣. ‘‘гад̇ажийваро’’д̇и вуд̇д̇ад̇д̇аа ид̇ха на самбхавад̇и.
311.Sanniṭṭhānantike dvepi palibodhā ekato chijjantīti idha, parivāraṭṭhakathāyañca vuttaṃ imissā khandhakapāḷiyā sameti ekato ubhinnampi dhuranikkhepassa katattā. ‘‘Idaṃ bahisīmāyameva vuttaṃ sanniṭṭhānantikaṃ sandhāya vuttaṃ. Yaṃ pana vuttaṃ parivāre ‘cattāro kathinuddhārā siyā antosīmāya uddhariyyanti, siyā bahisīmāya uddhariyyanti, niṭṭhānantiko sanniṭṭhānantiko nāsanantiko āsāvacchediko’ti (pari. 416). Tattha bahisīmāya sanniṭṭhānantiko uddhariyyatīti idha dassitanayova. Kathaṃ antosīmāya sanniṭṭhānantiko? Akatacīvaramādāya ‘na paccessa’nti gato, gatagataṭṭhāne phāsuvihāraṃ alabhanto tameva vihāraṃ āgacchati, tassa cīvarapalibodho ṭhito. So ca ‘nevimaṃ cīvaraṃ kāressa’nti citte uppannamatte chijjati, tasmā antosīmāya uddhariyyati, tasmā duvidho sanniṭṭhānantiko’’ti porāṇagaṇṭhipade likhitaṃ, taṃ yuttaṃ, aññathā antosīmāya ‘‘nevimaṃ cīvaraṃ kāressa’’nti pavattaubbhāro itaresu samodhānaṃ na gacchatīti atiritto siyā. Sīmātikkantikoti cīvarakālasīmātikkantiko. Saubbhāre cīvarapalibodho paṭhamaṃ chijjanto viya khāyati, atha kho sāpekkhatāya cīvarakaraṇe saussāhova hotīti lesaṃ sandhāya parivāravasena ‘‘dve palibodhā apubbaṃ acarimaṃ chijjantī’’ti (mahāva. aṭṭha. 311) vuttaṃ. ‘‘Katacīvaro’’ti vuttattā idha na sambhavati.
316. саб̣б̣ам̣ ад̇д̇ано баригкаарам̣ анавасзсзд̇ваа баггаманд̇о ‘‘самаад̣̇ааяа баггамад̇ий’’д̇и вужжад̇и. ‘‘гат̇инуд̣̇д̇хаарз висзсо над̇т̇и. буг̇г̇алаад̇хиббааяависзсзна гзвалам̣ ваарад̣̇ассанад̇т̇ам̣ самаад̣̇ааяаваараа вуд̇д̇аа’’д̇и саб̣б̣зсу г̇ан̣тибад̣̇зсу ликид̇ам̣. ид̇ха бана буг̇г̇алаад̇хиббааязна баяож̇анам̣ виймам̣сид̇аб̣б̣ам̣. баггамананд̇игасса абхааваа ‘‘яат̇аасамбхава’’нд̇и вуд̇д̇ам̣. виббагад̇зби д̇хуранигкзбавасзна баггамананд̇игад̇аа самбхавад̇и, д̇асмаа баггамананд̇игаваароби вад̇д̇аб̣б̣од̇и жз? на, саннидтаананд̇игалагкан̣аббасан̇г̇ад̇о. агад̇ажийварасса на савананд̇игад̇аа жа.
316. Sabbaṃ attano parikkhāraṃ anavasesetvā pakkamanto ‘‘samādāya pakkamatī’’ti vuccati. ‘‘Kathinuddhāre viseso natthi. Puggalādhippāyavisesena kevalaṃ vāradassanatthaṃ samādāyavārā vuttā’’ti sabbesu gaṇṭhipadesu likhitaṃ. Idha pana puggalādhippāyena payojanaṃ vīmaṃsitabbaṃ. Pakkamanantikassa abhāvā ‘‘yathāsambhava’’nti vuttaṃ. Vippakatepi dhuranikkhepavasena pakkamanantikatā sambhavati, tasmā pakkamanantikavāropi vattabboti ce? Na, sanniṭṭhānantikalakkhaṇappasaṅgato. Akatacīvarassa na savanantikatā ca.
д̇ад̇рааяам̣ аад̣̇ид̇о бадтааяа вааравибхааванаа – аад̣̇ааяаваараа сад̇д̇а, д̇ат̇аа самаад̣̇ааяаваараад̇и д̣̇вз сад̇д̇агаваараа. д̇ад̇о баггамананд̇игам̣ важ̇ж̇зд̇ваа виббагад̇ажийварасса аад̣̇ааяаваараа, самаад̣̇ааяаваараа жаад̇и д̣̇вз чаггаваараа. д̇ад̇о барам̣ нидтаанасаннидтаананаасананд̇игаанам̣ васзна д̇ийн̣и д̇игаани д̣̇ассид̇аани, д̇ад̇т̇а батамад̇д̇игам̣ анд̇осиймааяа ‘‘на бажжзсса’’нд̇и имам̣ вид̇хим̣ анаамасид̇ваа б̣ахисиймааяам̣ зва ‘‘на бажжзсса’’нд̇и бавад̇д̇ам̣, д̇асмаа баггамананд̇игасиймаад̇игганд̇игасауб̣бхаараа д̇ад̇т̇а на яуж̇ж̇анд̇и. ‘‘аасааважчзд̣̇иго самбхаванд̇оби яат̇аавуд̇д̇агааран̣зна на вуд̇д̇о. д̣̇уд̇ияад̇д̇игам̣ анд̇осиймааяа ‘на бажжзсса’нд̇и бавад̇д̇ам̣, зд̇т̇а гин̃жааби баггамананд̇иго самбхавад̇и, д̇ат̇ааби язхи жийварабалиб̣од̇хо чиж̇ж̇ад̇и, д̇зсам̣язваад̇хиббзд̇ад̇д̇аа на вуд̇д̇о’’д̇и бораан̣аг̇ан̣тибад̣̇з вуд̇д̇ам̣. саб̣б̣асмимби баннарасагз виббагад̇ажийварассзваад̇хиббзд̇ад̇д̇аад̇и д̇агго. ад̇хидтаанубаг̇з жа виббагад̇з сад̇и на нидтаананд̇иго. нидтаанаавасзсз сад̇и на наасананд̇игод̇и бораан̣аа. д̇ад̇ияад̇д̇игам̣ анад̇хидтид̇а-бад̣̇зна висзсзд̇ваа бавад̇д̇ам̣, ад̇т̇ад̇о батамад̇д̇игзна самзд̇и. д̇асса ад̇т̇ад̣̇ассанабаяож̇анам̣ гира д̇ам̣. яасмаа имз д̇аяо ад̇т̇авигаббаа имзхи зва д̇ийхи гат̇инуд̣̇д̇хаарзхи саггаа д̣̇ассзд̇ум̣, д̇асмаа имзва яож̇ид̇аа згасамб̣анд̇хавасзна, ан̃н̃ат̇аа батамад̇д̇игам̣ чаггам̣ бхавзяяа имасса баннарасагасса анд̇з чаггам̣ вияа. д̇ад̇ияад̇д̇игаананд̇арам̣ жад̇уд̇т̇ад̇д̇игам̣ самбхаванд̇ам̣ ‘‘анд̇осиймааяам̣ ‘бажжзсса’’нд̇и важанависзсзна самбхавад̇и. д̇ат̇аа жа яож̇ияамаанам̣ ид̇арзхи савананд̇игаад̣̇ийхи авируд̣̇д̇хаггамам̣ ход̇и, д̇асмаа жад̇уд̇т̇ад̇д̇игам̣ ахуд̇ваа чаггам̣ ж̇аад̇анд̇и взд̣̇ид̇аб̣б̣ам̣. звам̣ д̇ийн̣и д̇игаани згам̣ чагган̃жаад̇и батамам̣ баннарасагам̣ взд̣̇ид̇аб̣б̣ам̣. ид̣̇аани ид̣̇амзва баннарасагам̣ убасаг̇г̇ависзсзна д̣̇уд̇ияам̣ самаад̣̇ааяабаннарасагам̣ наама гад̇ам̣. буна виббагад̇ажийварам̣ аад̣̇ааяаад̇и д̇ад̇ияам̣ баннарасагам̣, самаад̣̇ааяаад̇и жад̇уд̇т̇ам̣ баннарасагам̣ д̣̇ассид̇ам̣. звам̣ жад̇д̇аари баннарасагаани взд̣̇ид̇аб̣б̣аани . д̇ад̇т̇а батамад̣̇уд̇иязсу баннарасагзсу саб̣б̣зна саб̣б̣ам̣ агад̇ажийварам̣ ад̇хиббзд̇ам̣, ид̇арзсу д̣̇вийсу виббагад̇анд̇и яож̇зд̇аб̣б̣ам̣. ‘‘буб̣б̣з ниб̣ад̣̇д̇хадтаанз жийвараасааяа г̇ахзд̇аб̣б̣ам̣, ан̃н̃ад̇т̇а на ваддад̇и. убажчиннааяа жз жийвараасааяа жийварам̣ уббаннам̣, на д̇ам̣ жийварабалиб̣од̇хам̣ гарод̇ий’’д̇и бораан̣аг̇ан̣тибад̣̇з вуд̇д̇ам̣. ниссаг̇г̇иязсу д̇ад̇ияагат̇инз ааг̇ад̇ажийварабажжаасаа ид̇ха жийвараасаад̇и д̇агго. яад̇т̇а жийвараасаа, д̇ам̣ таанам̣ ад̇хигаран̣уубажаарзна ‘‘жийвараасаа’’д̇взва вужжад̇ийд̇и гад̇ваа ‘‘д̇ам̣ жийвараасам̣ баяирубаасад̇ий’’д̇иаад̣̇и вуд̇д̇ам̣, д̇асмаа анаасааяа лабхад̇ийд̇и анаасааяид̇адтаанз лабхад̇ийд̇иаад̣̇инаа ад̇т̇о г̇ахзд̇аб̣б̣о. зд̇т̇а нидтаанасаннидтаананаасанааасааважчзд̣̇игавасзна зго ваарод̇и ид̣̇амзгам̣ жад̇уггам̣ ж̇аад̇ам̣, д̇асмаа буб̣б̣з вуд̇д̇аани д̇ийн̣и д̇игаани аасааважчзд̣̇игаад̇хигаани д̇ийн̣и жад̇уггаанийд̇и згам̣ анаасааяад̣̇ваад̣̇асаганд̇и взд̣̇ид̇аб̣б̣ам̣. д̇ад̣̇ананд̇арз аасааяад̣̇ваад̣̇асагз гин̃жааби батамад̣̇ваад̣̇асаггамо лаб̣бхад̇и, д̇ат̇ааби д̇ам̣ ниб̣б̣исзсанд̇и д̇амзгам̣ д̣̇ваад̣̇асагам̣ авуд̇д̇асид̣̇д̇хам̣ гад̇ваа висзсад̇о д̣̇ассзд̇ум̣ аад̣̇ид̇о бадтааяа ‘‘анд̇осиймааяа бажжзсса’’нд̇и вуд̇д̇ам̣, д̇ам̣ д̣̇уд̇ияажад̇уггз ‘‘со б̣ахисиймаг̇ад̇о сун̣аад̇ий’’д̇иаад̣̇иважанасса д̇ад̇ияажад̇уггз савананд̇игаад̣̇ийнан̃жа огаасагаран̣ад̇т̇анд̇и взд̣̇ид̇аб̣б̣ам̣. ид̣̇ам̣ бана д̣̇ваад̣̇асагам̣ анаасааяа васзна лаб̣бхамаанамби иминаа авуд̇д̇асид̣̇д̇хам̣ гад̇ваа на д̣̇ассид̇анд̇и взд̣̇ид̇аб̣б̣ам̣. звамзд̇т̇а д̣̇вз д̣̇ваад̣̇асагаани уд̣̇д̇харид̇аани. гаран̣ийяад̣̇ваад̣̇асагзби яат̇аад̣̇ассид̇аанаасааяад̣̇ваад̣̇асагам̣, авуд̇д̇асид̣̇д̇хам̣ аасааяад̣̇ваад̣̇асаган̃жаад̇и д̣̇вз д̣̇ваад̣̇асагаани уд̣̇д̇харид̇аб̣б̣аани. ид̣̇аани д̣̇исам̣г̇амиганавагам̣ ход̇и. д̇ад̇т̇а яасмаа ‘‘д̣̇исам̣г̇амиго баггамад̇ий’’д̇и важанзнзва ‘‘на бажжзсса’’нд̇и ид̣̇ам̣ авуд̇д̇асид̣̇д̇хамзва, д̇асмаа д̇ам̣ на вуд̇д̇ам̣. зд̇д̇аавад̇аа ааваасабалиб̣од̇хаабхааво д̣̇ассид̇о.
Tatrāyaṃ ādito paṭṭhāya vāravibhāvanā – ādāyavārā satta, tathā samādāyavārāti dve sattakavārā. Tato pakkamanantikaṃ vajjetvā vippakatacīvarassa ādāyavārā, samādāyavārā cāti dve chakkavārā. Tato paraṃ niṭṭhānasanniṭṭhānanāsanantikānaṃ vasena tīṇi tikāni dassitāni, tattha paṭhamattikaṃ antosīmāya ‘‘na paccessa’’nti imaṃ vidhiṃ anāmasitvā bahisīmāyaṃ eva ‘‘na paccessa’’nti pavattaṃ, tasmā pakkamanantikasīmātikkantikasaubbhārā tattha na yujjanti. ‘‘Āsāvacchediko sambhavantopi yathāvuttakāraṇena na vutto. Dutiyattikaṃ antosīmāya ‘na paccessa’nti pavattaṃ, ettha kiñcāpi pakkamanantiko sambhavati, tathāpi yehi cīvarapalibodho chijjati, tesaṃyevādhippetattā na vutto’’ti porāṇagaṇṭhipade vuttaṃ. Sabbasmimpi pannarasake vippakatacīvarassevādhippetattāti takko. Adhiṭṭhānupage ca vippakate sati na niṭṭhānantiko. Niṭṭhānāvasese sati na nāsanantikoti porāṇā. Tatiyattikaṃ anadhiṭṭhita-padena visesetvā pavattaṃ, atthato paṭhamattikena sameti. Tassa atthadassanapayojanaṃ kira taṃ. Yasmā ime tayo atthavikappā imehi eva tīhi kathinuddhārehi sakkā dassetuṃ, tasmā imeva yojitā ekasambandhavasena, aññathā paṭhamattikaṃ chakkaṃ bhaveyya imassa pannarasakassa ante chakkaṃ viya. Tatiyattikānantaraṃ catutthattikaṃ sambhavantaṃ ‘‘antosīmāyaṃ ‘paccessa’’nti vacanavisesena sambhavati. Tathā ca yojiyamānaṃ itarehi savanantikādīhi aviruddhakkamaṃ hoti, tasmā catutthattikaṃ ahutvā chakkaṃ jātanti veditabbaṃ. Evaṃ tīṇi tikāni ekaṃ chakkañcāti paṭhamaṃ pannarasakaṃ veditabbaṃ. Idāni idameva pannarasakaṃ upasaggavisesena dutiyaṃ samādāyapannarasakaṃ nāma kataṃ. Puna vippakatacīvaraṃ ādāyāti tatiyaṃ pannarasakaṃ, samādāyāti catutthaṃ pannarasakaṃ dassitaṃ. Evaṃ cattāri pannarasakāni veditabbāni . Tattha paṭhamadutiyesu pannarasakesu sabbena sabbaṃ akatacīvaraṃ adhippetaṃ, itaresu dvīsu vippakatanti yojetabbaṃ. ‘‘Pubbe nibaddhaṭṭhāne cīvarāsāya gahetabbaṃ, aññattha na vaṭṭati. Upacchinnāya ce cīvarāsāya cīvaraṃ uppannaṃ, na taṃ cīvarapalibodhaṃ karotī’’ti porāṇagaṇṭhipade vuttaṃ. Nissaggiyesu tatiyakathine āgatacīvarapaccāsā idha cīvarāsāti takko. Yattha cīvarāsā, taṃ ṭhānaṃ adhikaraṇūpacārena ‘‘cīvarāsā’’tveva vuccatīti katvā ‘‘taṃ cīvarāsaṃ payirupāsatī’’tiādi vuttaṃ, tasmā anāsāya labhatīti anāsāyitaṭṭhāne labhatītiādinā attho gahetabbo. Ettha niṭṭhānasanniṭṭhānanāsanaāsāvacchedikavasena eko vāroti idamekaṃ catukkaṃ jātaṃ, tasmā pubbe vuttāni tīṇi tikāni āsāvacchedikādhikāni tīṇi catukkānīti ekaṃ anāsāyadvādasakanti veditabbaṃ. Tadanantare āsāyadvādasake kiñcāpi paṭhamadvādasakkamo labbhati, tathāpi taṃ nibbisesanti tamekaṃ dvādasakaṃ avuttasiddhaṃ katvā visesato dassetuṃ ādito paṭṭhāya ‘‘antosīmāya paccessa’’nti vuttaṃ, taṃ dutiyacatukke ‘‘so bahisīmagato suṇātī’’tiādivacanassa tatiyacatukke savanantikādīnañca okāsakaraṇatthanti veditabbaṃ. Idaṃ pana dvādasakaṃ anāsāya vasena labbhamānampi iminā avuttasiddhaṃ katvā na dassitanti veditabbaṃ. Evamettha dve dvādasakāni uddharitāni. Karaṇīyadvādasakepi yathādassitaanāsāyadvādasakaṃ, avuttasiddhaṃ āsāyadvādasakañcāti dve dvādasakāni uddharitabbāni. Idāni disaṃgamikanavakaṃ hoti. Tattha yasmā ‘‘disaṃgamiko pakkamatī’’ti vacaneneva ‘‘na paccessa’’nti idaṃ avuttasiddhameva, tasmā taṃ na vuttaṃ. Ettāvatā āvāsapalibodhābhāvo dassito.
321. ‘‘жийварабадивийсам̣ абавилааяамаано’’д̇и иминаа жийварабалиб̣од̇хасаман̇г̇ид̇амасса д̣̇ассзд̇и. бадивийсод̇и ад̇д̇ано бад̇д̇аб̣б̣о жийварабхааг̇о. абавилааяамаанод̇и ааган̇камаано. д̇асса жийваралаабхз сад̇и вассам̣вуд̇т̇ааваасз нидтаанасаннидтаананаасананд̇игаанам̣ васзна згам̣ д̇игам̣, д̇зсам̣язва васзна анд̇араамаг̇г̇з згам̣, г̇ад̇адтаанз зганд̇и д̇ин̣н̣ам̣ д̇игаанам̣ васзна згам̣ навагам̣ взд̣̇ид̇аб̣б̣ам̣. д̇ад̇о барам̣ нидтаанасаннидтаананаасананд̇и гасиймаад̇игганд̇игасауб̣бхаараанам̣ васзна паасувихаарабан̃жагам̣ вуд̇д̇ам̣. убхаяад̇т̇а сзсагат̇инуд̣̇д̇хаараасамбхаво баагадова. аяам̣ банзд̇т̇а бан̃жагз висзсо – самаад̣̇ааяавааро на самбхавад̇и ‘‘бажжзсса’’нд̇и бажжааг̇аманаад̇хиббааяад̇о.
321. ‘‘Cīvarapaṭivīsaṃ apavilāyamāno’’ti iminā cīvarapalibodhasamaṅgitamassa dasseti. Paṭivīsoti attano pattabbo cīvarabhāgo. Apavilāyamānoti ākaṅkhamāno. Tassa cīvaralābhe sati vassaṃvutthāvāse niṭṭhānasanniṭṭhānanāsanantikānaṃ vasena ekaṃ tikaṃ, tesaṃyeva vasena antarāmagge ekaṃ, gataṭṭhāne ekanti tiṇṇaṃ tikānaṃ vasena ekaṃ navakaṃ veditabbaṃ. Tato paraṃ niṭṭhānasanniṭṭhānanāsananti kasīmātikkantikasaubbhārānaṃ vasena phāsuvihārapañcakaṃ vuttaṃ. Ubhayattha sesakathinuddhārāsambhavo pākaṭova. Ayaṃ panettha pañcake viseso – samādāyavāro na sambhavati ‘‘paccessa’’nti paccāgamanādhippāyato.
325. д̣̇взмз бхигкавз гат̇инасса балиб̣од̇хаад̇и гат̇инад̇т̇аарасса анубаб̣анд̇ханабажжаяаад̇и.
325.Dveme bhikkhave kathinassa palibodhāti kathinatthārassa anupabandhanapaccayāti.
гат̇инагканд̇хагаван̣н̣анаа нидтид̇аа.
Kathinakkhandhakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi
188. аад̣̇ааяасад̇д̇агам̣ • 188. Ādāyasattakaṃ
193. самаад̣̇ааяабаннарасагаад̣̇и • 193. Samādāyapannarasakādi
198. абавилааяананавагам̣ • 198. Apavilāyananavakaṃ
200. балиб̣од̇хаабалиб̣од̇хагат̇аа • 200. Palibodhāpalibodhakathā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / аад̣̇ааяасад̇д̇агагат̇аа • Ādāyasattakakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / аад̣̇ааяасад̇д̇агаад̣̇игат̇ааван̣н̣анаа • Ādāyasattakādikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / аад̣̇ааяасад̇д̇агагат̇ааван̣н̣анаа • Ādāyasattakakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 188. аад̣̇ааяасад̇д̇агагат̇аа • 188. Ādāyasattakakathā
