| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
аад̣̇ааяасад̇д̇агагат̇ааван̣н̣анаа
Ādāyasattakakathāvaṇṇanā
311. ‘‘на буна ааг̇амисса’’нд̇и ид̣̇ам̣ ааваасабалиб̣од̇хубажчзд̣̇агааран̣ад̣̇ассанам̣. бан̃жасу хи жийварамаасзсу яад̣̇аа гад̣̇аажи на бажжзссанд̇и жид̇д̇зна убажаарасиймаад̇иггамзна ааваасабалиб̣од̇хо чиж̇ж̇ад̇и. бажжзссанд̇и б̣ахиубажаараг̇ад̇асса бана яад̇т̇а гад̇т̇ажи на бажжзссанд̇и жид̇д̇з уббаннамад̇д̇з чиж̇ж̇ад̇и. батамам̣ жийварабалиб̣од̇хо чиж̇ж̇ад̇ийд̇и на бажжзссанд̇и баггаманад̇о бурзд̇арамзва жийварасса нидтид̇ад̇д̇аа вуд̇д̇ам̣. ‘‘гад̇ажийварамаад̣̇ааяаа’’д̇и хи вуд̇д̇ам̣. ад̇т̇ад̇агат̇инасса хи бхигкуно яаава ‘‘сан̇гхад̇о ваа д̣̇ааяагагулаад̣̇ид̇о ваа жийварам̣ лабхиссаамий’’д̇и жийвараасаа ваа лад̣̇д̇хавад̇т̇аанам̣ сахааяасамбад̣̇аад̣̇ияог̇ам̣ лабхид̇ваа сан̇гхаадиаад̣̇ибхаавзна ‘‘чинд̣̇ид̇ваа гариссаамий’’д̇и гаран̣ижчаа ваа бавад̇д̇ад̇и, д̇аава жийварабалиб̣од̇хо анубажчинно зва. яад̣̇аа бана яат̇аабад̇т̇ид̇адтаанад̇о жийвараад̣̇ийнам̣ саб̣б̣ат̇аа алаабхзна ваа жийвараасаа жзва лад̣̇д̇хаанам̣ гад̇ваа нидтаанзна ваа надтавинадтаад̣̇ибхаавзна ваа жийварз нирабзгкад̇ааяа ваа гаран̣ижчаа жа виг̇ажчад̇и, д̇ад̣̇аа жийварабалиб̣од̇хо убажчинно ход̇и.
311.‘‘Na puna āgamissa’’nti idaṃ āvāsapalibodhupacchedakāraṇadassanaṃ. Pañcasu hi cīvaramāsesu yadā kadāci na paccessanti cittena upacārasīmātikkamena āvāsapalibodho chijjati. Paccessanti bahiupacāragatassa pana yattha katthaci na paccessanti citte uppannamatte chijjati. Paṭhamaṃ cīvarapalibodho chijjatīti na paccessanti pakkamanato puretarameva cīvarassa niṭṭhitattā vuttaṃ. ‘‘Katacīvaramādāyā’’ti hi vuttaṃ. Atthatakathinassa hi bhikkhuno yāva ‘‘saṅghato vā dāyakakulādito vā cīvaraṃ labhissāmī’’ti cīvarāsā vā laddhavatthānaṃ sahāyasampadādiyogaṃ labhitvā saṅghāṭiādibhāvena ‘‘chinditvā karissāmī’’ti karaṇicchā vā pavattati, tāva cīvarapalibodho anupacchinno eva. Yadā pana yathāpatthitaṭṭhānato cīvarādīnaṃ sabbathā alābhena vā cīvarāsā ceva laddhānaṃ katvā niṭṭhānena vā naṭṭhavinaṭṭhādibhāvena vā cīvare nirapekkhatāya vā karaṇicchā ca vigacchati, tadā cīvarapalibodho upacchinno hoti.
со жа ид̇ха ‘‘гад̇ажийварам̣ аад̣̇ааяаа’’д̇и важанзна багаасид̇о. звам̣ убари саб̣б̣ад̇т̇а баал̣иважанаггамам̣ ниссааяа нзсам̣ батамам̣, бажчаа жа убажчиж̇ж̇анам̣ вуд̇д̇анд̇и д̣̇адтаб̣б̣ам̣. саб̣б̣ат̇ааби жа имзсам̣ убхиннам̣ балиб̣од̇хаанам̣ убажчзд̣̇знзва гат̇инуб̣бхааро, на згасса. д̇зсан̃жа буб̣б̣аабариязна, згагкан̣з жа убажчиж̇ж̇анам̣ д̣̇ассзд̇ум̣ имаа адта маад̇игаа табид̇аад̇и взд̣̇ид̇аб̣б̣аа. анд̇осиймааяанд̇и жийваранидтаанагкан̣зязва чиннад̇д̇аа вуд̇д̇ам̣. нзвимам̣ жийварам̣ гаарзссанд̇и жийварз абзгкааяа виг̇ад̇ад̇д̇аа гаран̣абалиб̣од̇хассааби убажчиннад̇ам̣ д̣̇ассзд̇и. яо бана аббижчад̇ааяа ваа анад̇т̇игад̇ааяа ваа саб̣б̣ат̇аа жийварам̣ на самбадижчад̇и, д̇асса б̣ахисиймааг̇ад̇асса саб̣б̣ат̇ааби жийварабалиб̣од̇хаабхаавзна на бажжзссанд̇и саннидтаанамад̇д̇зна саннидтаананд̇иго гат̇инуб̣бхааро взд̣̇ид̇аб̣б̣о. со банаад̇и балиб̣од̇хубажчзд̣̇о. аяам̣ банаад̇и аасааважчзд̣̇аго гат̇инуб̣бхааро висум̣ вид̇т̇аарзд̇ваа вуд̇д̇о, ид̇ха на вуд̇д̇од̇и самб̣анд̇хо.
So ca idha ‘‘katacīvaraṃ ādāyā’’ti vacanena pakāsito. Evaṃ upari sabbattha pāḷivacanakkamaṃ nissāya nesaṃ paṭhamaṃ, pacchā ca upacchijjanaṃ vuttanti daṭṭhabbaṃ. Sabbathāpi ca imesaṃ ubhinnaṃ palibodhānaṃ upacchedeneva kathinubbhāro, na ekassa. Tesañca pubbāpariyena, ekakkhaṇe ca upacchijjanaṃ dassetuṃ imā aṭṭha mātikā ṭhapitāti veditabbā. Antosīmāyanti cīvaraniṭṭhānakkhaṇeyeva chinnattā vuttaṃ. Nevimaṃ cīvaraṃ kāressanti cīvare apekkhāya vigatattā karaṇapalibodhassāpi upacchinnataṃ dasseti. Yo pana appicchatāya vā anatthikatāya vā sabbathā cīvaraṃ na sampaṭicchati, tassa bahisīmāgatassa sabbathāpi cīvarapalibodhābhāvena na paccessanti sanniṭṭhānamattena sanniṭṭhānantiko kathinubbhāro veditabbo. So panāti palibodhupacchedo. Ayaṃ panāti āsāvacchedako kathinubbhāro visuṃ vitthāretvā vutto, idha na vuttoti sambandho.
анаасааяа лабхад̇ийд̇и ‘‘яасмим̣ гулз жийварам̣ лабхиссаамаа’’д̇и аасаа ануббаннабуб̣б̣аа, д̇ад̇т̇а жийвараасааяа ануббаннадтаанз яад̇т̇а гад̇т̇ажи лабхад̇ийд̇и ад̇т̇о. аасааяа на лабхад̇ийд̇и аасийсид̇адтаанз на лабхад̇ийд̇и ад̇т̇о. ид̇ха на вуд̇д̇од̇и ид̇ха савананд̇игаананд̇арз на вуд̇д̇о. д̇ад̇т̇аад̇и д̇асмим̣ сиймаад̇игганд̇игз. сиймаад̇игганд̇иго наама жийварамаасаанам̣ барияанд̇ад̣̇ивасасан̇каад̇ааяа сиймааяа ад̇иггаманад̇о сан̃ж̇аад̇о. гзжи ‘‘б̣ахисиймааяа гаалаад̇иггамо сиймаад̇иггамо’’д̇и ман̃н̃анд̇и, д̇зсам̣ анд̇оубажаарз жийварагаалаад̇иггамзби гат̇инуб̣бхааро асаммад̇о наама сияаад̇и на жзд̇ам̣ яуд̇д̇ам̣. д̇асмаа яад̇т̇а гад̇т̇ажи гаалаад̇иггамо сиймаад̇иггамод̇и взд̣̇ид̇аб̣б̣о. зд̇т̇а жа баал̣ияам̣ ‘‘гад̇ажийваро’’д̇и ид̣̇ам̣ убалагкан̣амад̇д̇ам̣, агад̇ажийварассаби гаалаад̇иггамзна сиймаад̇игганд̇иго ход̇и, д̣̇вз жа балиб̣од̇хаа згад̇о чиж̇ж̇анд̇и. звам̣ ан̃н̃ад̇т̇ааби яат̇аасамбхавам̣ д̇ам̣д̇ам̣ висзсанаабхаавзби гат̇инуб̣бхаарад̇аа, балиб̣од̇хубажчзд̣̇аббагааро жа взд̣̇ид̇аб̣б̣о. ‘‘сахуб̣бхаарз д̣̇взби балиб̣од̇хаа абуб̣б̣ам̣ ажаримам̣ чиж̇ж̇анд̇ий’’д̇и ид̣̇ам̣ агад̇ажийварасса бажжзссанд̇и ад̇хидтаанасамбхавабагкам̣ санд̇хааяа вуд̇д̇ам̣, д̇зсу ан̃н̃ад̇араабхаавзби сахуб̣бхаарова ход̇и.
Anāsāya labhatīti ‘‘yasmiṃ kule cīvaraṃ labhissāmā’’ti āsā anuppannapubbā, tattha cīvarāsāya anuppannaṭṭhāne yattha katthaci labhatīti attho. Āsāya na labhatīti āsīsitaṭṭhāne na labhatīti attho. Idha na vuttoti idha savanantikānantare na vutto. Tatthāti tasmiṃ sīmātikkantike. Sīmātikkantiko nāma cīvaramāsānaṃ pariyantadivasasaṅkhātāya sīmāya atikkamanato sañjāto. Keci ‘‘bahisīmāya kālātikkamo sīmātikkamo’’ti maññanti, tesaṃ antoupacāre cīvarakālātikkamepi kathinubbhāro asammato nāma siyāti na cetaṃ yuttaṃ. Tasmā yattha katthaci kālātikkamo sīmātikkamoti veditabbo. Ettha ca pāḷiyaṃ ‘‘katacīvaro’’ti idaṃ upalakkhaṇamattaṃ, akatacīvarassapi kālātikkamena sīmātikkantiko hoti, dve ca palibodhā ekato chijjanti. Evaṃ aññatthāpi yathāsambhavaṃ taṃtaṃ visesanābhāvepi kathinubbhāratā, palibodhupacchedappakāro ca veditabbo. ‘‘Sahubbhāre dvepi palibodhā apubbaṃ acarimaṃ chijjantī’’ti idaṃ akatacīvarassa paccessanti adhiṭṭhānasambhavapakkhaṃ sandhāya vuttaṃ, tesu aññatarābhāvepi sahubbhārova hoti.
312-325. самаад̣̇ааяавааро аад̣̇ааяаваарасад̣̇исова. убасаг̇г̇амзвзд̇т̇а висзсо. д̇знааха ‘‘буна самаад̣̇ааяаваарзби…бз… д̇зязва д̣̇ассид̇аа’’д̇и . виббагад̇ажийварз баггамананд̇игасса абхаавад̇о ‘‘яат̇аасамбхава’’нд̇и вуд̇д̇ам̣. д̇знзва виббагад̇ажийвараваарз чал̣зва уб̣бхаараа вуд̇д̇аа, жийварз хад̇т̇аг̇ад̇з жа аасааважчзд̣̇игасса асамбхаваа, со зд̇зсу ваарзсу яад̇т̇а гад̇т̇ажи на вуд̇д̇о, висун̃н̃зва вуд̇д̇о. виббагад̇аваарз жзд̇т̇а аад̣̇ааяаваарасамаад̣̇ааяавааравасзна д̣̇вз чаггаваараа вуд̇д̇аа.
312-325. Samādāyavāro ādāyavārasadisova. Upasaggamevettha viseso. Tenāha ‘‘puna samādāyavārepi…pe… teyeva dassitā’’ti . Vippakatacīvare pakkamanantikassa abhāvato ‘‘yathāsambhava’’nti vuttaṃ. Teneva vippakatacīvaravāre chaḷeva ubbhārā vuttā, cīvare hatthagate ca āsāvacchedikassa asambhavā, so etesu vāresu yattha katthaci na vutto, visuññeva vutto. Vippakatavāre cettha ādāyavārasamādāyavāravasena dve chakkavārā vuttā.
д̇ад̇о барам̣ нидтаанасаннидтаананаасананд̇игаанам̣ васзна д̇ийн̣и д̇игаани д̣̇ассид̇аани. д̇ад̇т̇а д̇ад̇ияад̇д̇игз анад̇хидтид̇знаад̇и ‘‘бажжзссам̣, на бажжзсса’’нд̇и звам̣ анад̇хидтид̇зна, на звам̣ манасигад̇ваад̇и ад̇т̇о. д̇ад̇ияад̇д̇игад̇о бана барам̣ згам̣ чаггам̣ д̣̇ассид̇ам̣. звам̣ д̇ийн̣и д̇игаани, згам̣ чагган̃жаад̇и батамам̣ баннарасагам̣ вуд̇д̇ам̣, иминаа наязна д̣̇уд̇ияабаннарасагаад̣̇ийни взд̣̇ид̇аб̣б̣аани.
Tato paraṃ niṭṭhānasanniṭṭhānanāsanantikānaṃ vasena tīṇi tikāni dassitāni. Tattha tatiyattike anadhiṭṭhitenāti ‘‘paccessaṃ, na paccessa’’nti evaṃ anadhiṭṭhitena, na evaṃ manasikatvāti attho. Tatiyattikato pana paraṃ ekaṃ chakkaṃ dassitaṃ. Evaṃ tīṇi tikāni, ekaṃ chakkañcāti paṭhamaṃ pannarasakaṃ vuttaṃ, iminā nayena dutiyapannarasakādīni veditabbāni.
баал̣ияам̣ аасаад̣̇ваад̣̇асагз б̣ахисиймааг̇ад̇асса гат̇инуд̣̇д̇хаарзсу д̇зсамби жийвараасаад̣̇ивасзна жийварабалиб̣од̇хо яаава жийваранидтаанаа д̇идтад̇ийд̇и ааха ‘‘со б̣ахисиймааг̇ад̇о сун̣аад̇и ‘уб̣бхад̇ам̣ гира д̇асмим̣ ааваасз гат̇инанд̇и…бз… савананд̇иго гат̇инуд̣̇д̇хааро’’’д̇и. зд̇т̇а жа саванагкан̣з ааваасабалиб̣од̇хо батамам̣ чиж̇ж̇ад̇и, нидтид̇з жийварабалиб̣од̇ход̇и взд̣̇ид̇аб̣б̣о.
Pāḷiyaṃ āsādvādasake bahisīmāgatassa kathinuddhāresu tesampi cīvarāsādivasena cīvarapalibodho yāva cīvaraniṭṭhānā tiṭṭhatīti āha ‘‘so bahisīmāgato suṇāti ‘ubbhataṃ kira tasmiṃ āvāse kathinanti…pe… savanantiko kathinuddhāro’’’ti. Ettha ca savanakkhaṇe āvāsapalibodho paṭhamaṃ chijjati, niṭṭhite cīvarapalibodhoti veditabbo.
д̣̇исам̣г̇амиганавагз д̣̇исам̣г̇амиго баггамад̇ийд̇и на бажжзссанд̇и баггамад̇и, иминаа ааваасабалиб̣од̇хаабхааво д̣̇ассид̇о ход̇и. д̇знзва вассам̣вуд̇т̇ааваасз буна г̇анд̇ваа жийваранидтаабид̇амад̇д̇з нидтаананд̇иго гат̇инуд̣̇д̇хааро вуд̇д̇о. ‘‘жийварабадивисам̣ абавилааяамаано’’д̇и иминаа жийварабалиб̣од̇хасаман̇г̇игад̇д̇амасса д̣̇ассзд̇и, абавилааяамаанод̇и ааган̇камаано. сзсам̣ сувин̃н̃зяяамзва.
Disaṃgamikanavake disaṃgamiko pakkamatīti na paccessanti pakkamati, iminā āvāsapalibodhābhāvo dassito hoti. Teneva vassaṃvutthāvāse puna gantvā cīvaraniṭṭhāpitamatte niṭṭhānantiko kathinuddhāro vutto. ‘‘Cīvarapaṭivisaṃ apavilāyamāno’’ti iminā cīvarapalibodhasamaṅgikattamassa dasseti, apavilāyamānoti ākaṅkhamāno. Sesaṃ suviññeyyameva.
аад̣̇ааяасад̇д̇агагат̇ааван̣н̣анаа нидтид̇аа.
Ādāyasattakakathāvaṇṇanā niṭṭhitā.
гат̇инагканд̇хагаван̣н̣анаанаяо нидтид̇о.
Kathinakkhandhakavaṇṇanānayo niṭṭhito.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi
188. аад̣̇ааяасад̇д̇агам̣ • 188. Ādāyasattakaṃ
189. самаад̣̇ааяасад̇д̇агам̣ • 189. Samādāyasattakaṃ
190. аад̣̇ааяачаггам̣ • 190. Ādāyachakkaṃ
191. самаад̣̇ааяачаггам̣ • 191. Samādāyachakkaṃ
192. аад̣̇ааяабаннарасагам̣ • 192. Ādāyapannarasakaṃ
193. самаад̣̇ааяабаннарасагаад̣̇и • 193. Samādāyapannarasakādi
194. виббагад̇асамаад̣̇ааяабаннарасагам̣ • 194. Vippakatasamādāyapannarasakaṃ
195. анаасаад̣̇ол̣асагам̣ • 195. Anāsādoḷasakaṃ
196. аасаад̣̇ол̣асагам̣ • 196. Āsādoḷasakaṃ
197. гаран̣ийяад̣̇ол̣асагам̣ • 197. Karaṇīyadoḷasakaṃ
198. абавилааяананавагам̣ • 198. Apavilāyananavakaṃ
199. паасувихаарабан̃жагам̣ • 199. Phāsuvihārapañcakaṃ
200. балиб̣од̇хаабалиб̣од̇хагат̇аа • 200. Palibodhāpalibodhakathā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / аад̣̇ааяасад̇д̇агагат̇аа • Ādāyasattakakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / аад̣̇ааяасад̇д̇агаад̣̇игат̇ааван̣н̣анаа • Ādāyasattakādikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / аад̣̇ааяасад̇д̇агагат̇ааван̣н̣анаа • Ādāyasattakakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 188. аад̣̇ааяасад̇д̇агагат̇аа • 188. Ādāyasattakakathā
