| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. অড্ডকরণসুত্তং
7. Aḍḍakaraṇasuttaṃ
১১৮. সাৰত্থিনিদানং । একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধাহং, ভন্তে, অড্ডকরণে 1 নিসিন্নো পস্সামি খত্তিযমহাসালেপি ব্রাহ্মণমহাসালেপি গহপতিমহাসালেপি অড্ঢে মহদ্ধনে মহাভোগে পহূতজাতরূপরজতে পহূতৰিত্তূপকরণে পহূতধনধঞ্ঞে কামহেতু কামনিদানং কামাধিকরণং সম্পজানমুসা ভাসন্তে। তস্স ময্হং, ভন্তে, এতদহোসি – ‘অলং দানি মে অড্ডকরণেন, ভদ্রমুখো দানি অড্ডকরণেন পঞ্ঞাযিস্সতী’’’তি।
118. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, aḍḍakaraṇe 2 nisinno passāmi khattiyamahāsālepi brāhmaṇamahāsālepi gahapatimahāsālepi aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe kāmahetu kāmanidānaṃ kāmādhikaraṇaṃ sampajānamusā bhāsante. Tassa mayhaṃ, bhante, etadahosi – ‘alaṃ dāni me aḍḍakaraṇena, bhadramukho dāni aḍḍakaraṇena paññāyissatī’’’ti.
‘‘(এৰমেতং, মহারাজ, এৰমেতং মহারাজ!) 3 যেপি তে, মহারাজ, খত্তিযমহাসালা ব্রাহ্মণমহাসালা গহপতিমহাসালা অড্ঢা মহদ্ধনা মহাভোগা পহূতজাতরূপরজতা পহূতৰিত্তূপকরণা পহূতধনধঞ্ঞা কামহেতু কামনিদানং কামাধিকরণং সম্পজানমুসা ভাসন্তি; তেসং তং ভৰিস্সতি দীঘরত্তং অহিতায দুক্খাযা’’তি। ইদমৰোচ…পে॰…
‘‘(Evametaṃ, mahārāja, evametaṃ mahārāja!) 4 Yepi te, mahārāja, khattiyamahāsālā brāhmaṇamahāsālā gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā kāmahetu kāmanidānaṃ kāmādhikaraṇaṃ sampajānamusā bhāsanti; tesaṃ taṃ bhavissati dīgharattaṃ ahitāya dukkhāyā’’ti. Idamavoca…pe…
‘‘সারত্তা কামভোগেসু, গিদ্ধা কামেসু মুচ্ছিতা।
‘‘Sārattā kāmabhogesu, giddhā kāmesu mucchitā;
অতিসারং ন বুজ্ঝন্তি, মচ্ছা খিপ্পংৰ ওড্ডিতং।
Atisāraṃ na bujjhanti, macchā khippaṃva oḍḍitaṃ;
পচ্ছাসং কটুকং হোতি, ৰিপাকো হিস্স পাপকো’’তি॥
Pacchāsaṃ kaṭukaṃ hoti, vipāko hissa pāpako’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. অড্ডকরণসুত্তৰণ্ণনা • 7. Aḍḍakaraṇasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. অড্ডকরণসুত্তৰণ্ণনা • 7. Aḍḍakaraṇasuttavaṇṇanā
