| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. අඩ්‌ඩකරණසුත්‌තං
7. Aḍḍakaraṇasuttaṃ
118. සාවත්‌ථිනිදානං . එකමන්‌තං නිසින්‌නො ඛො රාජා පසෙනදි කොසලො භගවන්‌තං එතදවොච – ‘‘ඉධාහං, භන්‌තෙ, අඩ්‌ඩකරණෙ 1 නිසින්‌නො පස්‌සාමි ඛත්‌තියමහාසාලෙපි බ්‍රාහ්‌මණමහාසාලෙපි ගහපතිමහාසාලෙපි අඩ්‌ඪෙ මහද්‌ධනෙ මහාභොගෙ පහූතජාතරූපරජතෙ පහූතවිත්‌තූපකරණෙ පහූතධනධඤ්‌ඤෙ කාමහෙතු කාමනිදානං කාමාධිකරණං සම්‌පජානමුසා භාසන්‌තෙ. තස්‌ස මය්‌හං, භන්‌තෙ, එතදහොසි – ‘අලං දානි මෙ අඩ්‌ඩකරණෙන, භද්‍රමුඛො දානි අඩ්‌ඩකරණෙන පඤ්‌ඤායිස්‌සතී’’’ති.
118. Sāvatthinidānaṃ . Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, aḍḍakaraṇe 2 nisinno passāmi khattiyamahāsālepi brāhmaṇamahāsālepi gahapatimahāsālepi aḍḍhe mahaddhane mahābhoge pahūtajātarūparajate pahūtavittūpakaraṇe pahūtadhanadhaññe kāmahetu kāmanidānaṃ kāmādhikaraṇaṃ sampajānamusā bhāsante. Tassa mayhaṃ, bhante, etadahosi – ‘alaṃ dāni me aḍḍakaraṇena, bhadramukho dāni aḍḍakaraṇena paññāyissatī’’’ti.
‘‘(එවමෙතං, මහාරාජ, එවමෙතං මහාරාජ!) 3 යෙපි තෙ, මහාරාජ, ඛත්‌තියමහාසාලා බ්‍රාහ්‌මණමහාසාලා ගහපතිමහාසාලා අඩ්‌ඪා මහද්‌ධනා මහාභොගා පහූතජාතරූපරජතා පහූතවිත්‌තූපකරණා පහූතධනධඤ්‌ඤා කාමහෙතු කාමනිදානං කාමාධිකරණං සම්‌පජානමුසා භාසන්‌ති; තෙසං තං භවිස්‌සති දීඝරත්‌තං අහිතාය දුක්‌ඛායා’’ති. ඉදමවොච…පෙ.…
‘‘(Evametaṃ, mahārāja, evametaṃ mahārāja!) 4 Yepi te, mahārāja, khattiyamahāsālā brāhmaṇamahāsālā gahapatimahāsālā aḍḍhā mahaddhanā mahābhogā pahūtajātarūparajatā pahūtavittūpakaraṇā pahūtadhanadhaññā kāmahetu kāmanidānaṃ kāmādhikaraṇaṃ sampajānamusā bhāsanti; tesaṃ taṃ bhavissati dīgharattaṃ ahitāya dukkhāyā’’ti. Idamavoca…pe…
‘‘සාරත්‌තා කාමභොගෙසු, ගිද්‌ධා කාමෙසු මුච්‌ඡිතා;
‘‘Sārattā kāmabhogesu, giddhā kāmesu mucchitā;
අතිසාරං න බුජ්‌ඣන්‌ති, මච්‌ඡා ඛිප්‌පංව ඔඩ්‌ඩිතං;
Atisāraṃ na bujjhanti, macchā khippaṃva oḍḍitaṃ;
පච්‌ඡාසං කටුකං හොති, විපාකො හිස්‌ස පාපකො’’ති.
Pacchāsaṃ kaṭukaṃ hoti, vipāko hissa pāpako’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 7. අඩ්‌ඩකරණසුත්‌තවණ්‌ණනා • 7. Aḍḍakaraṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 7. අඩ්‌ඩකරණසුත්‌තවණ්‌ණනා • 7. Aḍḍakaraṇasuttavaṇṇanā
