| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. ဝိစာရဝဂ္ဂော
3. Vicāravaggo
၁. အဒ္ဓာနမူလပဉ္ဟော
1. Addhānamūlapañho
၁. ရာဇာ အာဟ ‘‘ဘန္တေ နာဂသေန, အတီတသ္သ အဒ္ဓာနသ္သ ကိံ မူလံ, အနာဂတသ္သ အဒ္ဓာနသ္သ ကိံ မူလံ, ပစ္စုပ္ပန္နသ္သ အဒ္ဓာနသ္သ ကိံ မူလ’’န္တိ? ‘‘အတီတသ္သ စ, မဟာရာဇ, အဒ္ဓာနသ္သ အနာဂတသ္သ စ အဒ္ဓာနသ္သ ပစ္စုပ္ပန္နသ္သ စ အဒ္ဓာနသ္သ အဝိဇ္ဇာ မူလံ။ အဝိဇ္ဇာပစ္စယာ သင္ခာရာ, သင္ခာရပစ္စယာ ဝိညာဏံ, ဝိညာဏပစ္စယာ နာမရူပံ, နာမရူပပစ္စယာ သဠာယတနံ, သဠာယတနပစ္စယာ ဖသ္သော, ဖသ္သပစ္စယာ ဝေဒနာ, ဝေဒနာပစ္စယာ တဏ္ဟာ, တဏ္ဟာပစ္စယာ ဥပာဒာနံ, ဥပာဒာနပစ္စယာ ဘဝော, ဘဝပစ္စယာ ဇာတိ, ဇာတိပစ္စယာ ဇရာမရဏံ သောကပရိဒေဝဒုက္ခဒောမနသ္သုပာယာသာ သမ္ဘဝန္တိ။ ဧဝမေတသ္သ ကေဝလသ္သ ဒုက္ခက္ခန္ဓသ္သ အဒ္ဓာနသ္သ 1 ပုရိမာ ကောဋိ န ပညာယတီ’’တိ။
1. Rājā āha ‘‘bhante nāgasena, atītassa addhānassa kiṃ mūlaṃ, anāgatassa addhānassa kiṃ mūlaṃ, paccuppannassa addhānassa kiṃ mūla’’nti? ‘‘Atītassa ca, mahārāja, addhānassa anāgatassa ca addhānassa paccuppannassa ca addhānassa avijjā mūlaṃ. Avijjāpaccayā saṅkhārā, saṅkhārapaccayā viññāṇaṃ, viññāṇapaccayā nāmarūpaṃ, nāmarūpapaccayā saḷāyatanaṃ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa addhānassa 2 purimā koṭi na paññāyatī’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
အဒ္ဓာနမူလပဉ္ဟော ပဌမော။
Addhānamūlapañho paṭhamo.
Footnotes:
