| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
3. විචාරවග්‌ගො
3. Vicāravaggo
1. අද්‌ධානමූලපඤ්‌හො
1. Addhānamūlapañho
1. රාජා ආහ ‘‘භන්‌තෙ නාගසෙන, අතීතස්‌ස අද්‌ධානස්‌ස කිං මූලං, අනාගතස්‌ස අද්‌ධානස්‌ස කිං මූලං, පච්‌චුප්‌පන්‌නස්‌ස අද්‌ධානස්‌ස කිං මූල’’න්‌ති? ‘‘අතීතස්‌ස ච, මහාරාජ, අද්‌ධානස්‌ස අනාගතස්‌ස ච අද්‌ධානස්‌ස පච්‌චුප්‌පන්‌නස්‌ස ච අද්‌ධානස්‌ස අවිජ්‌ජා මූලං. අවිජ්‌ජාපච්‌චයා සඞ්‌ඛාරා, සඞ්‌ඛාරපච්‌චයා විඤ්‌ඤාණං, විඤ්‌ඤාණපච්‌චයා නාමරූපං, නාමරූපපච්‌චයා සළායතනං, සළායතනපච්‌චයා ඵස්‌සො, ඵස්‌සපච්‌චයා වෙදනා, වෙදනාපච්‌චයා තණ්‌හා, තණ්‌හාපච්‌චයා උපාදානං, උපාදානපච්‌චයා භවො, භවපච්‌චයා ජාති, ජාතිපච්‌චයා ජරාමරණං සොකපරිදෙවදුක්‌ඛදොමනස්‌සුපායාසා සම්‌භවන්‌ති. එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස අද්‌ධානස්‌ස 1 පුරිමා කොටි න පඤ්‌ඤායතී’’ති.
1. Rājā āha ‘‘bhante nāgasena, atītassa addhānassa kiṃ mūlaṃ, anāgatassa addhānassa kiṃ mūlaṃ, paccuppannassa addhānassa kiṃ mūla’’nti? ‘‘Atītassa ca, mahārāja, addhānassa anāgatassa ca addhānassa paccuppannassa ca addhānassa avijjā mūlaṃ. Avijjāpaccayā saṅkhārā, saṅkhārapaccayā viññāṇaṃ, viññāṇapaccayā nāmarūpaṃ, nāmarūpapaccayā saḷāyatanaṃ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa addhānassa 2 purimā koṭi na paññāyatī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
අද්‌ධානමූලපඤ්‌හො පඨමො.
Addhānamūlapañho paṭhamo.
Footnotes:
