| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၉. အဒ္ဓာနပဉ္ဟော
9. Addhānapañho
၉. ရာဇာ အာဟ ‘‘ဘန္တေ နာဂသေန, ယံ ပနေတံ ဗ္ရူသိ ‘ဒီဃမဒ္ဓာန’န္တိ, ကိမေတံ အဒ္ဓာနံ နာမာ’’တိ ? ‘‘အတီတော, မဟာရာဇ, အဒ္ဓာ, အနာဂတော အဒ္ဓာ, ပစ္စုပ္ပန္နော အဒ္ဓာ’’တိ။ ‘‘ကိံ ပန, ဘန္တေ, သဗ္ဗေ အဒ္ဓာ အတ္ထီ’’တိ? ‘‘ကောစိ, မဟာရာဇ , အဒ္ဓာ အတ္ထိ, ကောစိ နတ္ထီ’’တိ။ ‘‘ကတမော ပန, ဘန္တေ, အတ္ထိ, ကတမော နတ္ထီ’’တိ? ‘‘ယေ တေ, မဟာရာဇ, သင္ခာရာ အတီတာ ဝိဂတာ နိရုဒ္ဓာ ဝိပရိဏတာ, သော အဒ္ဓာ နတ္ထိ, ယေ ဓမ္မာ ဝိပာကာ, ယေ စ ဝိပာကဓမ္မဓမ္မာ, ယေ စ အညတ္ရ ပဋိသန္ဓိံ ဒေန္တိ, သော အဒ္ဓာ အတ္ထိ။ ယေ သတ္တာ ကာလင္ကတာ အညတ္ရ ဥပ္ပန္နာ, သော စ အဒ္ဓာ အတ္ထိ။ ယေ သတ္တာ ကာလင္ကတာ အညတ္ရ အနုပ္ပန္နာ, သော အဒ္ဓာ နတ္ထိ။ ယေ စ သတ္တာ ပရိနိဗ္ဗုတာ, သော စ အဒ္ဓာ နတ္ထိ ပရိနိဗ္ဗုတတ္တာ’’တိ။
9. Rājā āha ‘‘bhante nāgasena, yaṃ panetaṃ brūsi ‘dīghamaddhāna’nti, kimetaṃ addhānaṃ nāmā’’ti ? ‘‘Atīto, mahārāja, addhā, anāgato addhā, paccuppanno addhā’’ti. ‘‘Kiṃ pana, bhante, sabbe addhā atthī’’ti? ‘‘Koci, mahārāja , addhā atthi, koci natthī’’ti. ‘‘Katamo pana, bhante, atthi, katamo natthī’’ti? ‘‘Ye te, mahārāja, saṅkhārā atītā vigatā niruddhā vipariṇatā, so addhā natthi, ye dhammā vipākā, ye ca vipākadhammadhammā, ye ca aññatra paṭisandhiṃ denti, so addhā atthi. Ye sattā kālaṅkatā aññatra uppannā, so ca addhā atthi. Ye sattā kālaṅkatā aññatra anuppannā, so addhā natthi. Ye ca sattā parinibbutā, so ca addhā natthi parinibbutattā’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
အဒ္ဓာနပဉ္ဟော နဝမော။
Addhānapañho navamo.
အဒ္ဓာနဝဂ္ဂော ဒုတိယော။
Addhānavaggo dutiyo.
ဣမသ္မိံ ဝဂ္ဂေ နဝ ပဉ္ဟာ။
Imasmiṃ vagge nava pañhā.
