| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. අද්‌ධානපඤ්‌හො
9. Addhānapañho
9. රාජා ආහ ‘‘භන්‌තෙ නාගසෙන, යං පනෙතං බ්‍රූසි ‘දීඝමද්‌ධාන’න්‌ති, කිමෙතං අද්‌ධානං නාමා’’ති ? ‘‘අතීතො, මහාරාජ, අද්‌ධා, අනාගතො අද්‌ධා, පච්‌චුප්‌පන්‌නො අද්‌ධා’’ති. ‘‘කිං පන, භන්‌තෙ, සබ්‌බෙ අද්‌ධා අත්‌ථී’’ති? ‘‘කොචි, මහාරාජ , අද්‌ධා අත්‌ථි, කොචි නත්‌ථී’’ති. ‘‘කතමො පන, භන්‌තෙ, අත්‌ථි, කතමො නත්‌ථී’’ති? ‘‘යෙ තෙ, මහාරාජ, සඞ්‌ඛාරා අතීතා විගතා නිරුද්‌ධා විපරිණතා, සො අද්‌ධා නත්‌ථි, යෙ ධම්‌මා විපාකා, යෙ ච විපාකධම්‌මධම්‌මා, යෙ ච අඤ්‌ඤත්‍ර පටිසන්‌ධිං දෙන්‌ති, සො අද්‌ධා අත්‌ථි. යෙ සත්‌තා කාලඞ්‌කතා අඤ්‌ඤත්‍ර උප්‌පන්‌නා, සො ච අද්‌ධා අත්‌ථි. යෙ සත්‌තා කාලඞ්‌කතා අඤ්‌ඤත්‍ර අනුප්‌පන්‌නා, සො අද්‌ධා නත්‌ථි. යෙ ච සත්‌තා පරිනිබ්‌බුතා, සො ච අද්‌ධා නත්‌ථි පරිනිබ්‌බුතත්‌තා’’ති.
9. Rājā āha ‘‘bhante nāgasena, yaṃ panetaṃ brūsi ‘dīghamaddhāna’nti, kimetaṃ addhānaṃ nāmā’’ti ? ‘‘Atīto, mahārāja, addhā, anāgato addhā, paccuppanno addhā’’ti. ‘‘Kiṃ pana, bhante, sabbe addhā atthī’’ti? ‘‘Koci, mahārāja , addhā atthi, koci natthī’’ti. ‘‘Katamo pana, bhante, atthi, katamo natthī’’ti? ‘‘Ye te, mahārāja, saṅkhārā atītā vigatā niruddhā vipariṇatā, so addhā natthi, ye dhammā vipākā, ye ca vipākadhammadhammā, ye ca aññatra paṭisandhiṃ denti, so addhā atthi. Ye sattā kālaṅkatā aññatra uppannā, so ca addhā atthi. Ye sattā kālaṅkatā aññatra anuppannā, so addhā natthi. Ye ca sattā parinibbutā, so ca addhā natthi parinibbutattā’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
අද්‌ධානපඤ්‌හො නවමො.
Addhānapañho navamo.
අද්‌ධානවග්‌ගො දුතියො.
Addhānavaggo dutiyo.
ඉමස්‌මිං වග්‌ගෙ නව පඤ්‌හා.
Imasmiṃ vagge nava pañhā.
