| Library / Tipiṭaka / д̇ибидага • Tipiṭaka / ид̇ивуд̇д̇ага-адтагат̇аа • Itivuttaka-aṭṭhakathā |
4. ад̣̇д̇хаасуд̇д̇аван̣н̣анаа
4. Addhāsuttavaṇṇanā
63. жад̇уд̇т̇з ад̣̇д̇хаад̇и гаалаа. ад̇ийд̇о ад̣̇д̇хаад̇иаад̣̇ийсу д̣̇вз барияааяаа – суд̇д̇анд̇абарияааяо, абхид̇хаммабарияааяо жа. д̇ад̇т̇а суд̇д̇анд̇абарияааязна бадисанд̇хид̇о буб̣б̣з ад̇ийд̇о ад̣̇д̇хаа наама, жуд̇ид̇о бажчаа анааг̇ад̇о ад̣̇д̇хаа наама, саха жуд̇ибадисанд̇хийхи д̇ад̣̇ананд̇арам̣ бажжуббанно ад̣̇д̇хаа наама. абхид̇хаммабарияааязна уббаад̣̇о, тид̇и, бхан̇г̇од̇и имз д̇аяо кан̣з бад̇ваа нируд̣̇д̇хад̇хаммаа ад̇ийд̇о ад̣̇д̇хаа наама, д̇аяоби кан̣з асамбад̇д̇аа анааг̇ад̇о ад̣̇д̇хаа наама, кан̣ад̇д̇аяасаман̇г̇ино бажжуббанно ад̣̇д̇хаа наама.
63. Catutthe addhāti kālā. Atīto addhātiādīsu dve pariyāyā – suttantapariyāyo, abhidhammapariyāyo ca. Tattha suttantapariyāyena paṭisandhito pubbe atīto addhā nāma, cutito pacchā anāgato addhā nāma, saha cutipaṭisandhīhi tadanantaraṃ paccuppanno addhā nāma. Abhidhammapariyāyena uppādo, ṭhiti, bhaṅgoti ime tayo khaṇe patvā niruddhadhammā atīto addhā nāma, tayopi khaṇe asampattā anāgato addhā nāma, khaṇattayasamaṅgino paccuppanno addhā nāma.
абаро наяо – аяан̃хи ад̇ийд̇аад̣̇ивибхааг̇о ад̣̇д̇хаасанд̇ад̇исамаяакан̣авасзна жад̇уд̇хаа взд̣̇ид̇аб̣б̣о. д̇зсу ад̣̇д̇хаавибхааг̇о вуд̇д̇о. санд̇ад̇ивасзна сабхааг̇аа згауд̇усамудтаанаа, згаахаарасамудтаанаа жа буб̣б̣аабарияавасзна вад̇д̇амаанааби бажжуббаннаа. д̇ад̇о буб̣б̣з висабхааг̇ауд̇уаахаарасамудтаанаа ад̇ийд̇аа бажчаа анааг̇ад̇аа. жид̇д̇аж̇аа згавийт̇изгаж̇аваназгасамаабад̇д̇исамудтаанаа бажжуббаннаа наама, д̇ад̇о буб̣б̣з ад̇ийд̇аа, бажчаа анааг̇ад̇аа. гаммасамудтаанаанам̣ баадиязггам̣ санд̇ад̇ивасзна ад̇ийд̇аад̣̇ибхзд̣̇о над̇т̇и, д̇зсам̣язва бана уд̇уаахааражид̇д̇асамудтаанаанам̣ убад̇т̇амбхагавасзна д̇асса ад̇ийд̇аад̣̇ибхааво взд̣̇ид̇аб̣б̣о. самаяавасзна згамухуд̇д̇абуб̣б̣ан̣хасааяанхарад̇д̇ид̣̇иваад̣̇ийсу самаязсу санд̇аанавасзна бавад̇д̇амаанаа д̇ам̣д̇ам̣самаяз бажжуббаннаа наама, д̇ад̇о буб̣б̣з ад̇ийд̇аа, бажчаа анааг̇ад̇аа. аяам̣ д̇аава руубад̇хаммзсу наяо. аруубад̇хаммзсу бана кан̣авасзна уббаад̣̇аад̣̇игкан̣ад̇д̇аяабарияаабаннаа бажжуббаннаа, д̇ад̇о буб̣б̣з ад̇ийд̇аа, бажчаа анааг̇ад̇аа. абижа ад̇игганд̇ахзд̇убажжаяагижжаа ад̇ийд̇аа, нидтид̇ахзд̇угижжаа анидтид̇абажжаяагижжаа бажжуббаннаа, убхаяагижжам̣ асамбад̇д̇аа анааг̇ад̇аа. ад̇д̇ано ваа гижжагкан̣з бажжуббаннаа, д̇ад̇о буб̣б̣з ад̇ийд̇аа, бажчаа анааг̇ад̇аа. зд̇т̇а жа кан̣аад̣̇игат̇аава ниббарияааяаа, сзсаа барияааяаа. аяан̃хи ад̇ийд̇аад̣̇ибхзд̣̇о наама д̇хаммаанам̣ ход̇и, на гааласса. ад̇ийд̇аад̣̇ибхзд̣̇з бана д̇хаммз убаад̣̇ааяа барамад̇т̇ад̇о авиж̇ж̇амааноби гаало ид̇ха д̇знзва вохаарзна ад̇ийд̇од̇иаад̣̇инаа вуд̇д̇од̇и взд̣̇ид̇аб̣б̣о.
Aparo nayo – ayañhi atītādivibhāgo addhāsantatisamayakhaṇavasena catudhā veditabbo. Tesu addhāvibhāgo vutto. Santativasena sabhāgā ekautusamuṭṭhānā, ekāhārasamuṭṭhānā ca pubbāpariyavasena vattamānāpi paccuppannā. Tato pubbe visabhāgautuāhārasamuṭṭhānā atītā pacchā anāgatā. Cittajā ekavīthiekajavanaekasamāpattisamuṭṭhānā paccuppannā nāma, tato pubbe atītā, pacchā anāgatā. Kammasamuṭṭhānānaṃ pāṭiyekkaṃ santativasena atītādibhedo natthi, tesaṃyeva pana utuāhāracittasamuṭṭhānānaṃ upatthambhakavasena tassa atītādibhāvo veditabbo. Samayavasena ekamuhuttapubbaṇhasāyanharattidivādīsu samayesu santānavasena pavattamānā taṃtaṃsamaye paccuppannā nāma, tato pubbe atītā, pacchā anāgatā. Ayaṃ tāva rūpadhammesu nayo. Arūpadhammesu pana khaṇavasena uppādādikkhaṇattayapariyāpannā paccuppannā, tato pubbe atītā, pacchā anāgatā. Apica atikkantahetupaccayakiccā atītā, niṭṭhitahetukiccā aniṭṭhitapaccayakiccā paccuppannā, ubhayakiccaṃ asampattā anāgatā. Attano vā kiccakkhaṇe paccuppannā, tato pubbe atītā, pacchā anāgatā. Ettha ca khaṇādikathāva nippariyāyā, sesā pariyāyā. Ayañhi atītādibhedo nāma dhammānaṃ hoti, na kālassa. Atītādibhede pana dhamme upādāya paramatthato avijjamānopi kālo idha teneva vohārena atītotiādinā vuttoti veditabbo.
г̇аат̇аасу агкзяяасан̃н̃инод̇и зд̇т̇а агкааяад̇и, гат̇ийяад̇и, бан̃н̃аабийяад̇ийд̇и агкзяяам̣, гат̇аавад̇т̇у, ад̇т̇ад̇о руубаад̣̇аяо бан̃жагканд̇хаа. вуд̇д̇ан̃хзд̇ам̣ –
Gāthāsu akkheyyasaññinoti ettha akkhāyati, kathīyati, paññāpīyatīti akkheyyaṃ, kathāvatthu, atthato rūpādayo pañcakkhandhā. Vuttañhetaṃ –
‘‘ад̇ийд̇ам̣ ваа ад̣̇д̇хаанам̣ аараб̣бха гат̇ам̣ гат̇зяяа, анааг̇ад̇ам̣ ваа…бз… бажжуббаннам̣ ваа ад̣̇д̇хаанам̣ аараб̣бха гат̇ам̣ гат̇зяяаа’’д̇и (д̣̇ий. ни. 3.305).
‘‘Atītaṃ vā addhānaṃ ārabbha kathaṃ katheyya, anāgataṃ vā…pe… paccuppannaṃ vā addhānaṃ ārabbha kathaṃ katheyyā’’ti (dī. ni. 3.305).
д̇ат̇аа –
Tathā –
‘‘яам̣, бхигкавз , руубам̣ ад̇ийд̇ам̣ нируд̣̇д̇хам̣ вибарин̣ад̇ам̣, ‘ахосий’д̇и д̇асса сан̇каа, ‘ахосий’д̇и д̇асса саман̃н̃аа, ‘ахосий’д̇и д̇асса бан̃н̃ад̇д̇и; на д̇асса сан̇каа ад̇т̇ийд̇и, на д̇асса сан̇каа бхависсад̇ий’’д̇и (сам̣. ни. 3.62) –
‘‘Yaṃ, bhikkhave , rūpaṃ atītaṃ niruddhaṃ vipariṇataṃ, ‘ahosī’ti tassa saṅkhā, ‘ahosī’ti tassa samaññā, ‘ahosī’ti tassa paññatti; na tassa saṅkhā atthīti, na tassa saṅkhā bhavissatī’’ti (saṃ. ni. 3.62) –
звам̣ вуд̇д̇зна нируд̇д̇ибат̇асуд̇д̇знаби зд̇т̇а ад̇т̇о д̣̇ийбзд̇аб̣б̣о. звам̣ гат̇аавад̇т̇убхаавзна агкзяяасан̇каад̇з канд̇хабан̃жагз аханд̇и жа маманд̇и жа д̣̇звод̇и жа мануссод̇и жа ид̇т̇ийд̇и жа бурисод̇и жа аад̣̇инаа бавад̇д̇асан̃н̃аавасзна агкзяяасан̃н̃ино, бан̃жасу убаад̣̇аанагканд̇хзсу сад̇д̇абуг̇г̇алаад̣̇исан̃н̃инод̇и ад̇т̇о. агкзяяасмим̣ д̇ан̣хаад̣̇идтиг̇г̇аахавасзна бад̇идтид̇аа, рааг̇аад̣̇ивасзна ваа адтахаагаарзхи бад̇идтид̇аа. рад̇д̇о хи рааг̇авасзна бад̇идтид̇о ход̇и, д̣̇удто д̣̇осавасзна, муул̣хо мохавасзна, бараамадто д̣̇идтивасзна, т̇аамаг̇ад̇о анусаяавасзна, виниб̣ад̣̇д̇хо маанавасзна, анидтан̇г̇ад̇о вижигижчаавасзна, вигкзбаг̇ад̇о уд̣̇д̇хажжавасзна бад̇идтид̇о ход̇ийд̇и.
Evaṃ vuttena niruttipathasuttenapi ettha attho dīpetabbo. Evaṃ kathāvatthubhāvena akkheyyasaṅkhāte khandhapañcake ahanti ca mamanti ca devoti ca manussoti ca itthīti ca purisoti ca ādinā pavattasaññāvasena akkheyyasaññino, pañcasu upādānakkhandhesu sattapuggalādisaññinoti attho. Akkheyyasmiṃ taṇhādiṭṭhiggāhavasena patiṭṭhitā, rāgādivasena vā aṭṭhahākārehi patiṭṭhitā. Ratto hi rāgavasena patiṭṭhito hoti, duṭṭho dosavasena, mūḷho mohavasena, parāmaṭṭho diṭṭhivasena, thāmagato anusayavasena, vinibaddho mānavasena, aniṭṭhaṅgato vicikicchāvasena, vikkhepagato uddhaccavasena patiṭṭhito hotīti.
агкзяяам̣ абарин̃н̃ааяаад̇и д̇ам̣ агкзяяам̣ д̇збхуумагад̇хаммз д̇ийхи барин̃н̃аахи абариж̇аанид̇ваа д̇асса абариж̇аананахзд̇у. яог̇амааяанд̇и мажжунод̇и маран̣асса яог̇ам̣ д̇зна сам̣яог̇ам̣ убаг̇ажчанд̇и, на висам̣яог̇анд̇и ад̇т̇о.
Akkheyyaṃ apariññāyāti taṃ akkheyyaṃ tebhūmakadhamme tīhi pariññāhi aparijānitvā tassa aparijānanahetu. Yogamāyanti maccunoti maraṇassa yogaṃ tena saṃyogaṃ upagacchanti, na visaṃyoganti attho.
ат̇а ваа яог̇анд̇и убааяам̣, д̇зна яож̇ид̇ам̣ басаарид̇ам̣ маарасзнадтаанияам̣ анад̇т̇аж̇аалам̣ гилзсаж̇аалан̃жа убаг̇ажчанд̇ийд̇и вуд̇д̇ам̣ ход̇и. д̇ат̇аа хи вуд̇д̇ам̣ –
Atha vā yoganti upāyaṃ, tena yojitaṃ pasāritaṃ mārasenaṭṭhāniyaṃ anatthajālaṃ kilesajālañca upagacchantīti vuttaṃ hoti. Tathā hi vuttaṃ –
‘‘на хи но сан̇г̇арам̣ д̇зна, махаасзнзна мажжунаа’’д̇и. (ма. ни. 3.272; ж̇аа. 2.22.121; нзд̇д̇и. 103);
‘‘Na hi no saṅgaraṃ tena, mahāsenena maccunā’’ti. (ma. ni. 3.272; jā. 2.22.121; netti. 103);
зд̇д̇аавад̇аа ваддам̣ д̣̇ассзд̇ваа ид̣̇аани виваддам̣ д̣̇ассзд̇ум̣ ‘‘агкзяяан̃жа барин̃н̃ааяаа’’д̇иаад̣̇и вуд̇д̇ам̣. д̇ад̇т̇а жа-сад̣̇д̣̇о б̣яад̇ирзгз, д̇зна агкзяяабариж̇аананзна лад̣̇д̇хаб̣б̣ам̣ вагкамаанамзва висзсам̣ ж̇од̇зд̇и. барин̃н̃ааяаад̇и вибассанаасахид̇ааяа маг̇г̇абан̃н̃ааяа д̣̇угканд̇и барижчиж̇ж̇а ж̇аанид̇ваа, д̇аббадиб̣ад̣̇д̇хагилзсаббахаанзна ваа д̇ам̣ самад̇иггамид̇ваа д̇иссаннамби барин̃н̃аанам̣ гижжам̣ мад̇т̇агам̣ баабзд̇ваа. агкаад̇аарам̣ на ман̃н̃ад̇ийд̇и саб̣б̣асо ман̃н̃анаанам̣ бахийнад̇д̇аа кийн̣аасаво агкаад̇аарам̣ на ман̃н̃ад̇и, гаарагаад̣̇исабхаавам̣ гин̃жи ад̇д̇аанам̣ на бажжзд̇ийд̇и ад̇т̇о. пудто вимогко манасаа, санд̇ибад̣̇амануд̇д̇аранд̇и яасмаа саб̣б̣асан̇кад̇авимуд̇д̇ад̇д̇аа ‘‘вимогко’’д̇и саб̣б̣агилзсасанд̇аабавуубасаманадтаанад̇ааяа ‘‘санд̇ибад̣̇а’’нд̇и лад̣̇д̇ханаамо ниб̣б̣аанад̇хаммо пудто пусид̇о бад̇д̇о, д̇асмаа агкаад̇аарам̣ на ман̃н̃ад̇ийд̇и. ат̇а ваа ‘‘барин̃н̃ааяаа’’д̇и бад̣̇зна д̣̇угкасажжасса барин̃н̃аабхисамаяам̣ самуд̣̇аяасажжасса бахаанаабхисамаяан̃жа вад̇ваа ид̣̇аани ‘‘пудто вимогко манасаа, санд̇ибад̣̇амануд̇д̇ара’’нд̇и иминаа маг̇г̇анирод̇хаанам̣ бхааванаасажчигирияаабхисамаяам̣ вад̣̇ад̇и. д̇ассад̇т̇о – самужчзд̣̇авасзна саб̣б̣агилзсзхи вимужжад̇ийд̇и вимогко, арияамаг̇г̇о. со банасса маг̇г̇ажид̇д̇зна пудто пусид̇о бхаавид̇о, д̇знзва ануд̇д̇арам̣ санд̇ибад̣̇ам̣ ниб̣б̣аанам̣ пудтам̣ пусид̇ам̣ сажчигад̇анд̇и.
Ettāvatā vaṭṭaṃ dassetvā idāni vivaṭṭaṃ dassetuṃ ‘‘akkheyyañca pariññāyā’’tiādi vuttaṃ. Tattha ca-saddo byatireke, tena akkheyyaparijānanena laddhabbaṃ vakkhamānameva visesaṃ joteti. Pariññāyāti vipassanāsahitāya maggapaññāya dukkhanti paricchijja jānitvā, tappaṭibaddhakilesappahānena vā taṃ samatikkamitvā tissannampi pariññānaṃ kiccaṃ matthakaṃ pāpetvā. Akkhātāraṃ na maññatīti sabbaso maññanānaṃ pahīnattā khīṇāsavo akkhātāraṃ na maññati, kārakādisabhāvaṃ kiñci attānaṃ na paccetīti attho. Phuṭṭhovimokkho manasā, santipadamanuttaranti yasmā sabbasaṅkhatavimuttattā ‘‘vimokkho’’ti sabbakilesasantāpavūpasamanaṭṭhānatāya ‘‘santipada’’nti laddhanāmo nibbānadhammo phuṭṭho phusito patto, tasmā akkhātāraṃ na maññatīti. Atha vā ‘‘pariññāyā’’ti padena dukkhasaccassa pariññābhisamayaṃ samudayasaccassa pahānābhisamayañca vatvā idāni ‘‘phuṭṭho vimokkho manasā, santipadamanuttara’’nti iminā magganirodhānaṃ bhāvanāsacchikiriyābhisamayaṃ vadati. Tassattho – samucchedavasena sabbakilesehi vimuccatīti vimokkho, ariyamaggo. So panassa maggacittena phuṭṭho phusito bhāvito, teneva anuttaraṃ santipadaṃ nibbānaṃ phuṭṭhaṃ phusitaṃ sacchikatanti.
агкзяяасамбаннод̇и агкзяяанимид̇д̇ам̣ вивид̇хаахи вибад̇д̇ийхи убад̣̇д̣̇уд̇з логз бахийнавибаллаасад̇ааяа д̇ад̇о субаримуд̇д̇о агкзяяабарин̃н̃аабхиниб̣б̣ад̇д̇аахи самбад̇д̇ийхи самбанно саманнааг̇ад̇о. сан̇кааяа сзвийд̇и бан̃н̃аавзбуллаббад̇д̇ияаа жийвараад̣̇ибажжаяз сан̇кааяа барид̇улзд̇ваава сзванасийло, сан̇каад̇ад̇хаммад̇д̇аа жа аабаат̇аг̇ад̇ам̣ саб̣б̣амби висаяам̣ чал̣ан̇г̇убзгкаавасзна сан̇кааяа сзванасийло. д̇хаммадтод̇и асзгкад̇хаммзсу ниб̣б̣аанад̇хаммз зва ваа тид̇о. взд̣̇аг̇ууд̇и взд̣̇ид̇аб̣б̣асса жад̇усажжасса бааран̇г̇ад̇ад̇д̇аа взд̣̇аг̇уу. звам̣г̇ун̣о арахаа бхаваад̣̇ийсу гад̇т̇ажи ааяад̇им̣ бунаб̣бхаваабхаавад̇о мануссад̣̇зваад̇и сан̇кяам̣ на убзд̇и, абан̃н̃ад̇д̇игабхаавамзва г̇ажчад̇ийд̇и анубаад̣̇аабариниб̣б̣аанзна д̣̇зсанам̣ нидтаабзси.
Akkheyyasampannoti akkheyyanimittaṃ vividhāhi vipattīhi upaddute loke pahīnavipallāsatāya tato suparimutto akkheyyapariññābhinibbattāhi sampattīhi sampanno samannāgato. Saṅkhāya sevīti paññāvepullappattiyā cīvarādipaccaye saṅkhāya parituletvāva sevanasīlo, saṅkhātadhammattā ca āpāthagataṃ sabbampi visayaṃ chaḷaṅgupekkhāvasena saṅkhāya sevanasīlo. Dhammaṭṭhoti asekkhadhammesu nibbānadhamme eva vā ṭhito. Vedagūti veditabbassa catusaccassa pāraṅgatattā vedagū. Evaṃguṇo arahā bhavādīsu katthaci āyatiṃ punabbhavābhāvato manussadevāti saṅkhyaṃ na upeti, apaññattikabhāvameva gacchatīti anupādāparinibbānena desanaṃ niṭṭhāpesi.
жад̇уд̇т̇асуд̇д̇аван̣н̣анаа нидтид̇аа.
Catutthasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ид̇ивуд̇д̇агабаал̣и • Itivuttakapāḷi / 4. ад̣̇д̇хаасуд̇д̇ам̣ • 4. Addhāsuttaṃ
