| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
240. அத⁴ம்மகம்மாதி³கதா²
240. Adhammakammādikathā
397. இத⁴ பன, பி⁴க்க²வே, பி⁴க்கு²ஸ்ஸ ந ஹோதி ஆபத்தி த³ட்ட²ப்³பா³. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்தி’’ந்தி? ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் பஸ்ஸெய்ய’’ந்தி. தங் ஸங்கோ⁴ ஆபத்தியா அத³ஸ்ஸனே உக்கி²பதி – அத⁴ம்மகம்மங்.
397. Idha pana, bhikkhave, bhikkhussa na hoti āpatti daṭṭhabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti’’nti? So evaṃ vadeti – ‘‘natthi me, āvuso, āpatti, yamahaṃ passeyya’’nti. Taṃ saṅgho āpattiyā adassane ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ந ஹோதி ஆபத்தி படிகாதப்³பா³. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, படிகரோஹி தங் ஆபத்தி’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமயங் படிகரெய்ய’’ந்தி. தங் ஸங்கோ⁴ ஆபத்தியா அப்படிகம்மே உக்கி²பதி – அத⁴ம்மகம்மங்.
Idha pana, bhikkhave, bhikkhussa na hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamayaṃ paṭikareyya’’nti. Taṃ saṅgho āpattiyā appaṭikamme ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ந ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘பாபிகா தே, ஆவுஸோ, தி³ட்டி², படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, பாபிகா தி³ட்டி², யமஹங் படினிஸ்ஸஜ்ஜெய்ய’’ந்தி. தங் ஸங்கோ⁴ பாபிகாய தி³ட்டி²யா அப்படினிஸ்ஸக்³கே³ உக்கி²பதி – அத⁴ம்மகம்மங்.
Idha pana, bhikkhave, bhikkhussa na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho pāpikāya diṭṭhiyā appaṭinissagge ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ந ஹோதி ஆபத்தி த³ட்ட²ப்³பா³, ந ஹோதி ஆபத்தி படிகாதப்³பா³. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்தி? படிகரோஹி தங் ஆபத்தி’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் பஸ்ஸெய்யங். நத்தி² மே, ஆவுஸோ, ஆபத்தி, யமஹங் படிகரெய்ய’’ந்தி. தங் ஸங்கோ⁴ அத³ஸ்ஸனே வா அப்படிகம்மே வா உக்கி²பதி – அத⁴ம்மகம்மங்.
Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti? Paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyya’’nti. Taṃ saṅgho adassane vā appaṭikamme vā ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ந ஹோதி ஆபத்தி த³ட்ட²ப்³பா³, ந ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்திங்? பாபிகா தே தி³ட்டி², படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் பஸ்ஸெய்யங்; நத்தி² மே, ஆவுஸோ, பாபிகா தி³ட்டி², யமஹங் படினிஸ்ஸஜ்ஜெய்ய’’ந்தி. தங் ஸங்கோ⁴ அத³ஸ்ஸனே வா அப்படினிஸ்ஸக்³கே³ வா உக்கி²பதி – அத⁴ம்மகம்மங்.
Idha pana, bhikkhave, bhikkhussa na hoti āpatti daṭṭhabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ; natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭinissagge vā ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ந ஹோதி ஆபத்தி படிகாதப்³பா³, ந ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, படிகரோஹி தங் ஆபத்திங்; பாபிகா தே தி³ட்டி², படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் படிகரெய்யங். நத்தி² மே, ஆவுஸோ, பாபிகா தி³ட்டி², யமஹங் படினிஸ்ஸஜ்ஜெய்ய’’ந்தி. தங் ஸங்கோ⁴ அப்படிகம்மே வா அப்படினிஸ்ஸக்³கே³ வா உக்கி²பதி – அத⁴ம்மகம்மங்.
Idha pana, bhikkhave, bhikkhussa na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho appaṭikamme vā appaṭinissagge vā ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ந ஹோதி ஆபத்தி த³ட்ட²ப்³பா³, ந ஹோதி ஆபத்தி படிகாதப்³பா³, ந ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்திங்? படிகரோஹி தங் ஆபத்திங்; பாபிகா தே தி³ட்டி², படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் பஸ்ஸெய்யங். நத்தி² மே, ஆவுஸோ, ஆபத்தி, யமஹங் படிகரெய்யங். நத்தி² மே, ஆவுஸோ, பாபிகா தி³ட்டி², யமஹங் படினிஸ்ஸஜ்ஜெய்ய’’ந்தி. தங் ஸங்கோ⁴ அத³ஸ்ஸனே வா அப்படிகம்மே வா அப்படினிஸ்ஸக்³கே³ வா உக்கி²பதி – அத⁴ம்மகம்மங்.
Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭikamme vā appaṭinissagge vā ukkhipati – adhammakammaṃ.
398. இத⁴ பன, பி⁴க்க²வே, பி⁴க்கு²ஸ்ஸ ஹோதி ஆபத்தி த³ட்ட²ப்³பா³. தமேனங் சோதே³தி. ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங் , ஆவுஸோ, ஆபன்னோ, பஸ்ஸஸேதங் ஆபத்தி’’ந்தி? ஸோ ஏவங் வதே³தி – ‘‘ஆமாவுஸோ, பஸ்ஸாமீ’’தி. தங் ஸங்கோ⁴ ஆபத்தியா அத³ஸ்ஸனே உக்கி²பதி – அத⁴ம்மகம்மங்.
398. Idha pana, bhikkhave, bhikkhussa hoti āpatti daṭṭhabbā. Tamenaṃ codeti. Saṅgho vā sambahulā vā ekapuggalo vā – ‘‘āpattiṃ tvaṃ , āvuso, āpanno, passasetaṃ āpatti’’nti? So evaṃ vadeti – ‘‘āmāvuso, passāmī’’ti. Taṃ saṅgho āpattiyā adassane ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ஹோதி ஆபத்தி படிகாதப்³பா³. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, படிகரோஹி தங் ஆபத்தி’’ந்தி. ஸோ ஏவங் வதே³தி – ‘‘ஆமாவுஸோ, படிகரிஸ்ஸாமீ’’தி. தங் ஸங்கோ⁴ ஆபத்தியா அப்படிகம்மே உக்கி²பதி – அத⁴ம்மகம்மங்.
Idha pana, bhikkhave, bhikkhussa hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘āmāvuso, paṭikarissāmī’’ti. Taṃ saṅgho āpattiyā appaṭikamme ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘பாபிகா தே, ஆவுஸோ, தி³ட்டி²; படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘ஆமாவுஸோ , படினிஸ்ஸஜ்ஜிஸ்ஸாமீ’’தி. தங் ஸங்கோ⁴ பாபிகாய தி³ட்டி²யா அப்படினிஸ்ஸக்³கே³ உக்கி²பதி – அத⁴ம்மகம்மங்.
Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi; paṭinissajjetaṃ pāpikaṃ diṭṭhi’’nti. So evaṃ vadeti – ‘‘āmāvuso , paṭinissajjissāmī’’ti. Taṃ saṅgho pāpikāya diṭṭhiyā appaṭinissagge ukkhipati – adhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ஹோதி ஆபத்தி த³ட்ட²ப்³பா³, ஹோதி ஆபத்தி படிகாதப்³பா³…பே॰… ஹோதி ஆபத்தி த³ட்ட²ப்³பா³, ஹோதி பாபிகா தி³ட்டி² படினிஸ்ஸஜ்ஜேதா…பே॰… ஹோதி ஆபத்தி படிகாதப்³பா³, ஹோதி பாபிகா தி³ட்டி² படினிஸ்ஸஜ்ஜேதா…பே॰… ஹோதி ஆபத்தி த³ட்ட²ப்³பா³, ஹோதி ஆபத்தி படிகாதப்³பா³, ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்திங்? படிகரோஹி தங் ஆபத்திங்; பாபிகா தே தி³ட்டி², படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘ஆமாவுஸோ, பஸ்ஸாமி, ஆம படிகரிஸ்ஸாமி, ஆம படினிஸ்ஸஜ்ஜிஸ்ஸாமீ’’தி . தங் ஸங்கோ⁴ அத³ஸ்ஸனே வா அப்படிகம்மே வா அப்படினிஸ்ஸக்³கே³ வா உக்கி²பதி – அத⁴ம்மகம்மங்.
Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe… hoti āpatti daṭṭhabbā, hoti pāpikā diṭṭhi paṭinissajjetā…pe… hoti āpatti paṭikātabbā, hoti pāpikā diṭṭhi paṭinissajjetā…pe… hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘āmāvuso, passāmi, āma paṭikarissāmi, āma paṭinissajjissāmī’’ti . Taṃ saṅgho adassane vā appaṭikamme vā appaṭinissagge vā ukkhipati – adhammakammaṃ.
399. இத⁴ பன, பி⁴க்க²வே, பி⁴க்கு²ஸ்ஸ ஹோதி ஆபத்தி த³ட்ட²ப்³பா³. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்தி’’ந்தி? ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் பஸ்ஸெய்ய’’ந்தி. தங் ஸங்கோ⁴ ஆபத்தியா அத³ஸ்ஸனே உக்கி²பதி – த⁴ம்மகம்மங்.
399. Idha pana, bhikkhave, bhikkhussa hoti āpatti daṭṭhabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti’’nti? So evaṃ vadeti – ‘‘natthi me, āvuso, āpatti, yamahaṃ passeyya’’nti. Taṃ saṅgho āpattiyā adassane ukkhipati – dhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ஹோதி ஆபத்தி படிகாதப்³பா³. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, படிகரோஹி தங் ஆபத்தி’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் படிகரெய்ய’’ந்தி. தங் ஸங்கோ⁴ ஆபத்தியா அப்படிகம்மே உக்கி²பதி – த⁴ம்மகம்மங்.
Idha pana, bhikkhave, bhikkhussa hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamahaṃ paṭikareyya’’nti. Taṃ saṅgho āpattiyā appaṭikamme ukkhipati – dhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘பாபிகா தே, ஆவுஸோ, தி³ட்டி², படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, பாபிகா தி³ட்டி², யமஹங் படினிஸ்ஸஜ்ஜெய்ய’’ந்தி. தங் ஸங்கோ⁴ பாபிகாய தி³ட்டி²யா அப்படினிஸ்ஸக்³கே³ உக்கி²பதி – த⁴ம்மகம்மங்.
Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho pāpikāya diṭṭhiyā appaṭinissagge ukkhipati – dhammakammaṃ.
இத⁴ பன, பி⁴க்க²வே, பி⁴க்கு²ஸ்ஸ ஹோதி ஆபத்தி த³ட்ட²ப்³பா³, ஹோதி ஆபத்தி படிகாதப்³பா³…பே॰…
Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe…
ஹோதி ஆபத்தி த³ட்ட²ப்³பா³, ஹோதி பாபிகா தி³ட்டி² படினிஸ்ஸஜ்ஜேதா…பே॰… ஹோதி ஆபத்தி படிகாதப்³பா³, ஹோதி பாபிகா தி³ட்டி² படினிஸ்ஸஜ்ஜேதா …பே॰… ஹோதி ஆபத்தி த³ட்ட²ப்³பா³, ஹோதி ஆபத்தி படிகாதப்³பா³, ஹோதி பாபிகா தி³ட்டி² படினிஸ்ஸஜ்ஜேதா. தமேனங் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா – ‘‘ஆபத்திங் த்வங், ஆவுஸோ, ஆபன்னோ, பஸ்ஸஸேதங் ஆபத்திங்? படிகரோஹி தங் ஆபத்திங். பாபிகா தே தி³ட்டி², படினிஸ்ஸஜ்ஜேதங் பாபிகங் தி³ட்டி²’’ந்தி. ஸோ ஏவங் வதே³தி – ‘‘நத்தி² மே, ஆவுஸோ, ஆபத்தி, யமஹங் பஸ்ஸெய்யங். நத்தி² மே, ஆவுஸோ, ஆபத்தி யமஹங் படிகரெய்யங். நத்தி² மே, ஆவுஸோ, பாபிகா தி³ட்டி², யமஹங் படினிஸ்ஸஜ்ஜெய்ய’’ந்தி. தங் ஸங்கோ⁴ அத³ஸ்ஸனே வா அப்படிகம்மே வா அப்படினிஸ்ஸக்³கே³ வா உக்கி²பதி – த⁴ம்மகம்மந்தி.
Hoti āpatti daṭṭhabbā, hoti pāpikā diṭṭhi paṭinissajjetā…pe… hoti āpatti paṭikātabbā, hoti pāpikā diṭṭhi paṭinissajjetā …pe… hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ. Pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭikamme vā appaṭinissagge vā ukkhipati – dhammakammanti.
அத⁴ம்மகம்மாதி³கதா² நிட்டி²தா.
Adhammakammādikathā niṭṭhitā.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / த்³வேனிஸ்ஸாரணாதி³கதா² • Dvenissāraṇādikathā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 239. த்³வேனிஸ்ஸாரணாதி³கதா² • 239. Dvenissāraṇādikathā
