| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২৪০. অধম্মকম্মাদিকথা
240. Adhammakammādikathā
৩৯৭. ইধ পন, ভিক্খৰে, ভিক্খুস্স ন হোতি আপত্তি দট্ঠব্বা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তি’’ন্তি? সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্য’’ন্তি। তং সঙ্ঘো আপত্তিযা অদস্সনে উক্খিপতি – অধম্মকম্মং।
397. Idha pana, bhikkhave, bhikkhussa na hoti āpatti daṭṭhabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti’’nti? So evaṃ vadeti – ‘‘natthi me, āvuso, āpatti, yamahaṃ passeyya’’nti. Taṃ saṅgho āpattiyā adassane ukkhipati – adhammakammaṃ.
ইধ পন, ভিক্খৰে, ভিক্খুস্স ন হোতি আপত্তি পটিকাতব্বা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তি’’ন্তি। সো এৰং ৰদেতি – ‘‘নত্থি মে, আৰুসো, আপত্তি, যমযং পটিকরেয্য’’ন্তি। তং সঙ্ঘো আপত্তিযা অপ্পটিকম্মে উক্খিপতি – অধম্মকম্মং।
Idha pana, bhikkhave, bhikkhussa na hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamayaṃ paṭikareyya’’nti. Taṃ saṅgho āpattiyā appaṭikamme ukkhipati – adhammakammaṃ.
ইধ পন, ভিক্খৰে, ভিক্খুস্স ন হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘পাপিকা তে, আৰুসো, দিট্ঠি, পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি। তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – অধম্মকম্মং।
Idha pana, bhikkhave, bhikkhussa na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho pāpikāya diṭṭhiyā appaṭinissagge ukkhipati – adhammakammaṃ.
ইধ পন, ভিক্খৰে, ভিক্খুস্স ন হোতি আপত্তি দট্ঠব্বা, ন হোতি আপত্তি পটিকাতব্বা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তি? পটিকরোহি তং আপত্তি’’ন্তি। সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং। নত্থি মে, আৰুসো, আপত্তি, যমহং পটিকরেয্য’’ন্তি। তং সঙ্ঘো অদস্সনে ৰা অপ্পটিকম্মে ৰা উক্খিপতি – অধম্মকম্মং।
Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti? Paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyya’’nti. Taṃ saṅgho adassane vā appaṭikamme vā ukkhipati – adhammakammaṃ.
ইধ পন, ভিক্খৰে, ভিক্খুস্স ন হোতি আপত্তি দট্ঠব্বা, ন হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং; নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি। তং সঙ্ঘো অদস্সনে ৰা অপ্পটিনিস্সগ্গে ৰা উক্খিপতি – অধম্মকম্মং।
Idha pana, bhikkhave, bhikkhussa na hoti āpatti daṭṭhabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ; natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭinissagge vā ukkhipati – adhammakammaṃ.
ইধ পন, ভিক্খৰে, ভিক্খুস্স ন হোতি আপত্তি পটিকাতব্বা, ন হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘নত্থি মে, আৰুসো, আপত্তি, যমহং পটিকরেয্যং। নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি। তং সঙ্ঘো অপ্পটিকম্মে ৰা অপ্পটিনিস্সগ্গে ৰা উক্খিপতি – অধম্মকম্মং।
Idha pana, bhikkhave, bhikkhussa na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho appaṭikamme vā appaṭinissagge vā ukkhipati – adhammakammaṃ.
ইধ পন, ভিক্খৰে, ভিক্খুস্স ন হোতি আপত্তি দট্ঠব্বা, ন হোতি আপত্তি পটিকাতব্বা, ন হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পটিকরোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং। নত্থি মে, আৰুসো, আপত্তি, যমহং পটিকরেয্যং। নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি। তং সঙ্ঘো অদস্সনে ৰা অপ্পটিকম্মে ৰা অপ্পটিনিস্সগ্গে ৰা উক্খিপতি – অধম্মকম্মং।
Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭikamme vā appaṭinissagge vā ukkhipati – adhammakammaṃ.
৩৯৮. ইধ পন, ভিক্খৰে, ভিক্খুস্স হোতি আপত্তি দট্ঠব্বা। তমেনং চোদেতি। সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং , আৰুসো, আপন্নো, পস্সসেতং আপত্তি’’ন্তি? সো এৰং ৰদেতি – ‘‘আমাৰুসো, পস্সামী’’তি। তং সঙ্ঘো আপত্তিযা অদস্সনে উক্খিপতি – অধম্মকম্মং।
398. Idha pana, bhikkhave, bhikkhussa hoti āpatti daṭṭhabbā. Tamenaṃ codeti. Saṅgho vā sambahulā vā ekapuggalo vā – ‘‘āpattiṃ tvaṃ , āvuso, āpanno, passasetaṃ āpatti’’nti? So evaṃ vadeti – ‘‘āmāvuso, passāmī’’ti. Taṃ saṅgho āpattiyā adassane ukkhipati – adhammakammaṃ.
ইধ পন, ভিক্খৰে, ভিক্খুস্স হোতি আপত্তি পটিকাতব্বা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তি’’ন্তি। সো এৰং ৰদেতি – ‘‘আমাৰুসো, পটিকরিস্সামী’’তি। তং সঙ্ঘো আপত্তিযা অপ্পটিকম্মে উক্খিপতি – অধম্মকম্মং।
Idha pana, bhikkhave, bhikkhussa hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘āmāvuso, paṭikarissāmī’’ti. Taṃ saṅgho āpattiyā appaṭikamme ukkhipati – adhammakammaṃ.
ইধ পন, ভিক্খৰে, ভিক্খুস্স হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘পাপিকা তে, আৰুসো, দিট্ঠি; পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘আমাৰুসো , পটিনিস্সজ্জিস্সামী’’তি। তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – অধম্মকম্মং।
Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi; paṭinissajjetaṃ pāpikaṃ diṭṭhi’’nti. So evaṃ vadeti – ‘‘āmāvuso , paṭinissajjissāmī’’ti. Taṃ saṅgho pāpikāya diṭṭhiyā appaṭinissagge ukkhipati – adhammakammaṃ.
ইধ পন, ভিক্খৰে, ভিক্খুস্স হোতি আপত্তি দট্ঠব্বা, হোতি আপত্তি পটিকাতব্বা…পে॰… হোতি আপত্তি দট্ঠব্বা, হোতি পাপিকা দিট্ঠি পটিনিস্সজ্জেতা…পে॰… হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা…পে॰… হোতি আপত্তি দট্ঠব্বা, হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পটিকরোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘আমাৰুসো, পস্সামি, আম পটিকরিস্সামি, আম পটিনিস্সজ্জিস্সামী’’তি । তং সঙ্ঘো অদস্সনে ৰা অপ্পটিকম্মে ৰা অপ্পটিনিস্সগ্গে ৰা উক্খিপতি – অধম্মকম্মং।
Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe… hoti āpatti daṭṭhabbā, hoti pāpikā diṭṭhi paṭinissajjetā…pe… hoti āpatti paṭikātabbā, hoti pāpikā diṭṭhi paṭinissajjetā…pe… hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘āmāvuso, passāmi, āma paṭikarissāmi, āma paṭinissajjissāmī’’ti . Taṃ saṅgho adassane vā appaṭikamme vā appaṭinissagge vā ukkhipati – adhammakammaṃ.
৩৯৯. ইধ পন, ভিক্খৰে, ভিক্খুস্স হোতি আপত্তি দট্ঠব্বা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তি’’ন্তি? সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্য’’ন্তি। তং সঙ্ঘো আপত্তিযা অদস্সনে উক্খিপতি – ধম্মকম্মং।
399. Idha pana, bhikkhave, bhikkhussa hoti āpatti daṭṭhabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti’’nti? So evaṃ vadeti – ‘‘natthi me, āvuso, āpatti, yamahaṃ passeyya’’nti. Taṃ saṅgho āpattiyā adassane ukkhipati – dhammakammaṃ.
ইধ পন, ভিক্খৰে, ভিক্খুস্স হোতি আপত্তি পটিকাতব্বা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তি’’ন্তি। সো এৰং ৰদেতি – ‘‘নত্থি মে, আৰুসো, আপত্তি, যমহং পটিকরেয্য’’ন্তি। তং সঙ্ঘো আপত্তিযা অপ্পটিকম্মে উক্খিপতি – ধম্মকম্মং।
Idha pana, bhikkhave, bhikkhussa hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamahaṃ paṭikareyya’’nti. Taṃ saṅgho āpattiyā appaṭikamme ukkhipati – dhammakammaṃ.
ইধ পন, ভিক্খৰে, ভিক্খুস্স হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘পাপিকা তে, আৰুসো, দিট্ঠি, পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি। তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – ধম্মকম্মং।
Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho pāpikāya diṭṭhiyā appaṭinissagge ukkhipati – dhammakammaṃ.
ইধ পন, ভিক্খৰে, ভিক্খুস্স হোতি আপত্তি দট্ঠব্বা, হোতি আপত্তি পটিকাতব্বা…পে॰…
Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe…
হোতি আপত্তি দট্ঠব্বা, হোতি পাপিকা দিট্ঠি পটিনিস্সজ্জেতা…পে॰… হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা …পে॰… হোতি আপত্তি দট্ঠব্বা, হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা। তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পটিকরোহি তং আপত্তিং। পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি। সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং। নত্থি মে, আৰুসো, আপত্তি যমহং পটিকরেয্যং। নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি। তং সঙ্ঘো অদস্সনে ৰা অপ্পটিকম্মে ৰা অপ্পটিনিস্সগ্গে ৰা উক্খিপতি – ধম্মকম্মন্তি।
Hoti āpatti daṭṭhabbā, hoti pāpikā diṭṭhi paṭinissajjetā…pe… hoti āpatti paṭikātabbā, hoti pāpikā diṭṭhi paṭinissajjetā …pe… hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ. Pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭikamme vā appaṭinissagge vā ukkhipati – dhammakammanti.
অধম্মকম্মাদিকথা নিট্ঠিতা।
Adhammakammādikathā niṭṭhitā.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / দ্ৰেনিস্সারণাদিকথা • Dvenissāraṇādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৩৯. দ্ৰেনিস্সারণাদিকথা • 239. Dvenissāraṇādikathā
