| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
240. අධම්‌මකම්‌මාදිකථා
240. Adhammakammādikathā
397. ඉධ පන, භික්‌ඛවෙ, භික්‌ඛුස්‌ස න හොති ආපත්‌ති දට්‌ඨබ්‌බා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පස්‌සසෙතං ආපත්‌ති’’න්‌ති? සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පස්‌සෙය්‍ය’’න්‌ති. තං සඞ්‌ඝො ආපත්‌තියා අදස්‌සනෙ උක්‌ඛිපති – අධම්‌මකම්‌මං.
397. Idha pana, bhikkhave, bhikkhussa na hoti āpatti daṭṭhabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti’’nti? So evaṃ vadeti – ‘‘natthi me, āvuso, āpatti, yamahaṃ passeyya’’nti. Taṃ saṅgho āpattiyā adassane ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස න හොති ආපත්‌ති පටිකාතබ්‌බා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පටිකරොහි තං ආපත්‌ති’’න්‌ති. සො එවං වදෙති – ‘‘නත්‌ථි මෙ, ආවුසො, ආපත්‌ති, යමයං පටිකරෙය්‍ය’’න්‌ති. තං සඞ්‌ඝො ආපත්‌තියා අප්‌පටිකම්‌මෙ උක්‌ඛිපති – අධම්‌මකම්‌මං.
Idha pana, bhikkhave, bhikkhussa na hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamayaṃ paṭikareyya’’nti. Taṃ saṅgho āpattiyā appaṭikamme ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස න හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘පාපිකා තෙ, ආවුසො, දිට්‌ඨි, පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘නත්‌ථි මෙ, ආවුසො, පාපිකා දිට්‌ඨි, යමහං පටිනිස්‌සජ්‌ජෙය්‍ය’’න්‌ති. තං සඞ්‌ඝො පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිපති – අධම්‌මකම්‌මං.
Idha pana, bhikkhave, bhikkhussa na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho pāpikāya diṭṭhiyā appaṭinissagge ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස න හොති ආපත්‌ති දට්‌ඨබ්‌බා, න හොති ආපත්‌ති පටිකාතබ්‌බා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පස්‌සසෙතං ආපත්‌ති? පටිකරොහි තං ආපත්‌ති’’න්‌ති. සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පස්‌සෙය්‍යං. නත්‌ථි මෙ, ආවුසො, ආපත්‌ති, යමහං පටිකරෙය්‍ය’’න්‌ති. තං සඞ්‌ඝො අදස්‌සනෙ වා අප්‌පටිකම්‌මෙ වා උක්‌ඛිපති – අධම්‌මකම්‌මං.
Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti? Paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyya’’nti. Taṃ saṅgho adassane vā appaṭikamme vā ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස න හොති ආපත්‌ති දට්‌ඨබ්‌බා, න හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පස්‌සසෙතං ආපත්‌තිං? පාපිකා තෙ දිට්‌ඨි, පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පස්‌සෙය්‍යං; නත්‌ථි මෙ, ආවුසො, පාපිකා දිට්‌ඨි, යමහං පටිනිස්‌සජ්‌ජෙය්‍ය’’න්‌ති. තං සඞ්‌ඝො අදස්‌සනෙ වා අප්‌පටිනිස්‌සග්‌ගෙ වා උක්‌ඛිපති – අධම්‌මකම්‌මං.
Idha pana, bhikkhave, bhikkhussa na hoti āpatti daṭṭhabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ; natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭinissagge vā ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස න හොති ආපත්‌ති පටිකාතබ්‌බා, න හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පටිකරොහි තං ආපත්‌තිං; පාපිකා තෙ දිට්‌ඨි, පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පටිකරෙය්‍යං. නත්‌ථි මෙ, ආවුසො, පාපිකා දිට්‌ඨි, යමහං පටිනිස්‌සජ්‌ජෙය්‍ය’’න්‌ති. තං සඞ්‌ඝො අප්‌පටිකම්‌මෙ වා අප්‌පටිනිස්‌සග්‌ගෙ වා උක්‌ඛිපති – අධම්‌මකම්‌මං.
Idha pana, bhikkhave, bhikkhussa na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho appaṭikamme vā appaṭinissagge vā ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස න හොති ආපත්‌ති දට්‌ඨබ්‌බා, න හොති ආපත්‌ති පටිකාතබ්‌බා, න හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පස්‌සසෙතං ආපත්‌තිං? පටිකරොහි තං ආපත්‌තිං; පාපිකා තෙ දිට්‌ඨි, පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පස්‌සෙය්‍යං. නත්‌ථි මෙ, ආවුසො, ආපත්‌ති, යමහං පටිකරෙය්‍යං. නත්‌ථි මෙ, ආවුසො, පාපිකා දිට්‌ඨි, යමහං පටිනිස්‌සජ්‌ජෙය්‍ය’’න්‌ති. තං සඞ්‌ඝො අදස්‌සනෙ වා අප්‌පටිකම්‌මෙ වා අප්‌පටිනිස්‌සග්‌ගෙ වා උක්‌ඛිපති – අධම්‌මකම්‌මං.
Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭikamme vā appaṭinissagge vā ukkhipati – adhammakammaṃ.
398. ඉධ පන, භික්‌ඛවෙ, භික්‌ඛුස්‌ස හොති ආපත්‌ති දට්‌ඨබ්‌බා. තමෙනං චොදෙති. සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං , ආවුසො, ආපන්‌නො, පස්‌සසෙතං ආපත්‌ති’’න්‌ති? සො එවං වදෙති – ‘‘ආමාවුසො, පස්‌සාමී’’ති. තං සඞ්‌ඝො ආපත්‌තියා අදස්‌සනෙ උක්‌ඛිපති – අධම්‌මකම්‌මං.
398. Idha pana, bhikkhave, bhikkhussa hoti āpatti daṭṭhabbā. Tamenaṃ codeti. Saṅgho vā sambahulā vā ekapuggalo vā – ‘‘āpattiṃ tvaṃ , āvuso, āpanno, passasetaṃ āpatti’’nti? So evaṃ vadeti – ‘‘āmāvuso, passāmī’’ti. Taṃ saṅgho āpattiyā adassane ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස හොති ආපත්‌ති පටිකාතබ්‌බා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පටිකරොහි තං ආපත්‌ති’’න්‌ති. සො එවං වදෙති – ‘‘ආමාවුසො, පටිකරිස්‌සාමී’’ති. තං සඞ්‌ඝො ආපත්‌තියා අප්‌පටිකම්‌මෙ උක්‌ඛිපති – අධම්‌මකම්‌මං.
Idha pana, bhikkhave, bhikkhussa hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘āmāvuso, paṭikarissāmī’’ti. Taṃ saṅgho āpattiyā appaṭikamme ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘පාපිකා තෙ, ආවුසො, දිට්‌ඨි; පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘ආමාවුසො , පටිනිස්‌සජ්‌ජිස්‌සාමී’’ති. තං සඞ්‌ඝො පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිපති – අධම්‌මකම්‌මං.
Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi; paṭinissajjetaṃ pāpikaṃ diṭṭhi’’nti. So evaṃ vadeti – ‘‘āmāvuso , paṭinissajjissāmī’’ti. Taṃ saṅgho pāpikāya diṭṭhiyā appaṭinissagge ukkhipati – adhammakammaṃ.
ඉධ පන, භික්‌ඛවෙ, භික්‌ඛුස්‌ස හොති ආපත්‌ති දට්‌ඨබ්‌බා, හොති ආපත්‌ති පටිකාතබ්‌බා…පෙ.… හොති ආපත්‌ති දට්‌ඨබ්‌බා, හොති පාපිකා දිට්‌ඨි පටිනිස්‌සජ්‌ජෙතා…පෙ.… හොති ආපත්‌ති පටිකාතබ්‌බා, හොති පාපිකා දිට්‌ඨි පටිනිස්‌සජ්‌ජෙතා…පෙ.… හොති ආපත්‌ති දට්‌ඨබ්‌බා, හොති ආපත්‌ති පටිකාතබ්‌බා, හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පස්‌සසෙතං ආපත්‌තිං? පටිකරොහි තං ආපත්‌තිං; පාපිකා තෙ දිට්‌ඨි, පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘ආමාවුසො, පස්‌සාමි, ආම පටිකරිස්‌සාමි, ආම පටිනිස්‌සජ්‌ජිස්‌සාමී’’ති . තං සඞ්‌ඝො අදස්‌සනෙ වා අප්‌පටිකම්‌මෙ වා අප්‌පටිනිස්‌සග්‌ගෙ වා උක්‌ඛිපති – අධම්‌මකම්‌මං.
Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe… hoti āpatti daṭṭhabbā, hoti pāpikā diṭṭhi paṭinissajjetā…pe… hoti āpatti paṭikātabbā, hoti pāpikā diṭṭhi paṭinissajjetā…pe… hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘āmāvuso, passāmi, āma paṭikarissāmi, āma paṭinissajjissāmī’’ti . Taṃ saṅgho adassane vā appaṭikamme vā appaṭinissagge vā ukkhipati – adhammakammaṃ.
399. ඉධ පන, භික්‌ඛවෙ, භික්‌ඛුස්‌ස හොති ආපත්‌ති දට්‌ඨබ්‌බා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පස්‌සසෙතං ආපත්‌ති’’න්‌ති? සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පස්‌සෙය්‍ය’’න්‌ති. තං සඞ්‌ඝො ආපත්‌තියා අදස්‌සනෙ උක්‌ඛිපති – ධම්‌මකම්‌මං.
399. Idha pana, bhikkhave, bhikkhussa hoti āpatti daṭṭhabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpatti’’nti? So evaṃ vadeti – ‘‘natthi me, āvuso, āpatti, yamahaṃ passeyya’’nti. Taṃ saṅgho āpattiyā adassane ukkhipati – dhammakammaṃ.
ඉධ පන, භික්‌ඛවෙ, භික්‌ඛුස්‌ස හොති ආපත්‌ති පටිකාතබ්‌බා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පටිකරොහි තං ආපත්‌ති’’න්‌ති. සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පටිකරෙය්‍ය’’න්‌ති. තං සඞ්‌ඝො ආපත්‌තියා අප්‌පටිකම්‌මෙ උක්‌ඛිපති – ධම්‌මකම්‌මං.
Idha pana, bhikkhave, bhikkhussa hoti āpatti paṭikātabbā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, paṭikarohi taṃ āpatti’’nti. So evaṃ vadeti – ‘‘natthi me, āvuso, āpatti, yamahaṃ paṭikareyya’’nti. Taṃ saṅgho āpattiyā appaṭikamme ukkhipati – dhammakammaṃ.
ඉධ පන, භික්‌ඛවෙ, භික්‌ඛුස්‌ස හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘පාපිකා තෙ, ආවුසො, දිට්‌ඨි, පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘නත්‌ථි මෙ, ආවුසො, පාපිකා දිට්‌ඨි, යමහං පටිනිස්‌සජ්‌ජෙය්‍ය’’න්‌ති. තං සඞ්‌ඝො පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිපති – ධම්‌මකම්‌මං.
Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘pāpikā te, āvuso, diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho pāpikāya diṭṭhiyā appaṭinissagge ukkhipati – dhammakammaṃ.
ඉධ පන, භික්‌ඛවෙ, භික්‌ඛුස්‌ස හොති ආපත්‌ති දට්‌ඨබ්‌බා, හොති ආපත්‌ති පටිකාතබ්‌බා…පෙ.…
Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe…
හොති ආපත්‌ති දට්‌ඨබ්‌බා, හොති පාපිකා දිට්‌ඨි පටිනිස්‌සජ්‌ජෙතා…පෙ.… හොති ආපත්‌ති පටිකාතබ්‌බා, හොති පාපිකා දිට්‌ඨි පටිනිස්‌සජ්‌ජෙතා …පෙ.… හොති ආපත්‌ති දට්‌ඨබ්‌බා, හොති ආපත්‌ති පටිකාතබ්‌බා, හොති පාපිකා දිට්‌ඨි පටිනිස්‌සජ්‌ජෙතා. තමෙනං චොදෙති සඞ්‌ඝො වා සම්‌බහුලා වා එකපුග්‌ගලො වා – ‘‘ආපත්‌තිං ත්‌වං, ආවුසො, ආපන්‌නො, පස්‌සසෙතං ආපත්‌තිං? පටිකරොහි තං ආපත්‌තිං. පාපිකා තෙ දිට්‌ඨි, පටිනිස්‌සජ්‌ජෙතං පාපිකං දිට්‌ඨි’’න්‌ති. සො එවං වදෙති – ‘‘නත්‌ථි මෙ, ආවුසො, ආපත්‌ති, යමහං පස්‌සෙය්‍යං. නත්‌ථි මෙ, ආවුසො, ආපත්‌ති යමහං පටිකරෙය්‍යං. නත්‌ථි මෙ, ආවුසො, පාපිකා දිට්‌ඨි, යමහං පටිනිස්‌සජ්‌ජෙය්‍ය’’න්‌ති. තං සඞ්‌ඝො අදස්‌සනෙ වා අප්‌පටිකම්‌මෙ වා අප්‌පටිනිස්‌සග්‌ගෙ වා උක්‌ඛිපති – ධම්‌මකම්‌මන්‌ති.
Hoti āpatti daṭṭhabbā, hoti pāpikā diṭṭhi paṭinissajjetā…pe… hoti āpatti paṭikātabbā, hoti pāpikā diṭṭhi paṭinissajjetā …pe… hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṅgho vā sambahulā vā ekapuggalo vā – ‘‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ. Pāpikā te diṭṭhi, paṭinissajjetaṃ pāpikaṃ diṭṭhi’’nti. So evaṃ vadeti – ‘‘natthi me, āvuso, āpatti, yamahaṃ passeyyaṃ. Natthi me, āvuso, āpatti yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyya’’nti. Taṃ saṅgho adassane vā appaṭikamme vā appaṭinissagge vā ukkhipati – dhammakammanti.
අධම්‌මකම්‌මාදිකථා නිට්‌ඨිතා.
Adhammakammādikathā niṭṭhitā.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / ද්‌වෙනිස්‌සාරණාදිකථා • Dvenissāraṇādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 239. ද්‌වෙනිස්‌සාරණාදිකථා • 239. Dvenissāraṇādikathā
