| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
அத⁴ம்மகம்மத்³வாத³ஸககதா²
Adhammakammadvādasakakathā
4. அஸம்முகா² கதந்திஆதீ³ஸு ஸங்க⁴த⁴ம்மவினயபுக்³க³லஸம்முகா²னங் வினா கதங், சுதி³தகங் அப்படிபுச்சி²த்வா கதங், தஸ்ஸேவ அப்படிஞ்ஞாய கதங். அதே³ஸனாகா³மினியாதி பாராஜிகாபத்தியா வா ஸங்கா⁴தி³ஸேஸாபத்தியா வா. எத்த² புரிமகேஸு தீஸு திகேஸு நவ பதா³ அத⁴ம்மேனகதங் வக்³கே³னகதந்தி இமேஹி ஸத்³தி⁴ங் ஏகேகங் க³ஹெத்வா நவ திகா வுத்தா. ஏவங் ஸப்³பே³பி த்³வாத³ஸ திகா ஹொந்தி. படிபக்க²வஸேன ஸுக்கபக்கே²ஸுபி ஏதேயேவ த்³வாத³ஸ திகா வுத்தா.
4.Asammukhākatantiādīsu saṅghadhammavinayapuggalasammukhānaṃ vinā kataṃ, cuditakaṃ appaṭipucchitvā kataṃ, tasseva appaṭiññāya kataṃ. Adesanāgāminiyāti pārājikāpattiyā vā saṅghādisesāpattiyā vā. Ettha purimakesu tīsu tikesu nava padā adhammenakataṃ vaggenakatanti imehi saddhiṃ ekekaṃ gahetvā nava tikā vuttā. Evaṃ sabbepi dvādasa tikā honti. Paṭipakkhavasena sukkapakkhesupi eteyeva dvādasa tikā vuttā.
6. அனநுலோமிகேஹி கி³ஹிஸங்ஸக்³கே³ஹீதி பப்³ப³ஜிதானங் அனநுச்ச²விகேஹி ஸஹஸோகிதாதீ³ஹி கி³ஹிஸங்ஸக்³கே³ஹி.
6.Ananulomikehigihisaṃsaggehīti pabbajitānaṃ ananucchavikehi sahasokitādīhi gihisaṃsaggehi.
திண்ணங் , பி⁴க்க²வே, பி⁴க்கூ²னந்திஆதி³ ஏகேகேனாபி அங்கே³ன தஜ்ஜனீயகம்மங் காதுங் வட்டதீதி த³ஸ்ஸனத்த²ங் வுத்தங். தஜ்ஜனீயஸ்ஸ ஹி விஸேஸேன ப⁴ண்ட³னகாரகத்தங் அங்க³ங், நியஸ்ஸஸ்ஸ அபி⁴ண்ஹாபத்திகத்தங், பப்³பா³ஜனீயஸ்ஸ குலதூ³ஸகத்தங் வுத்தங். இமேஸு பன தீஸு அங்கே³ஸு யேன கேனசி ஸப்³பா³னிபி காதுங் வட்டதி. யதி³ ஏவங் யங் சம்பெய்யக்க²ந்த⁴கே வுத்தங் – ‘‘தஜ்ஜனீயகம்மாரஹஸ்ஸ நியஸ்ஸகம்மங் கரோதி…பே॰… உபஸம்பதா³ரஹங் அப்³பே⁴தி; ஏவங் கோ² உபாலி அத⁴ம்மகம்மங் ஹோதி அவினயகம்மங், ஏவஞ்ச பன ஸங்கோ⁴ ஸாதிஸாரோ ஹோதீ’’தி இத³ங் விருஜ்ஜ²தீதி. இத³ஞ்ச ந விருஜ்ஜ²தி. கஸ்மா? வசனத்த²னானத்ததோ, ‘‘தஜ்ஜனீயகம்மாரஹஸ்ஸா’’தி இமஸ்ஸ ஹி வசனஸ்ஸ கம்மஸன்னிட்டா²னங் அத்தோ². ‘‘திண்ணங், பி⁴க்க²வே’’திஆதி³வசனஸ்ஸ அங்க³ஸம்ப⁴வோ, தஸ்மா யதா³ ஸங்கே⁴ன ஸன்னிபதித்வா ‘‘இத³ங் நாம இமஸ்ஸ பி⁴க்கு²னோ கம்மங் கரோமா’’தி ஸன்னிட்டா²னங் கதங் ஹோதி, ததா³ கம்மாரஹோ நாம ஹோதி. தஸ்ஸ இமினா லக்க²ணேன தஜ்ஜனீயாதி³கம்மாரஹஸ்ஸ நியஸ்ஸகம்மாதி³கரணங் அத⁴ம்மகம்மஞ்சேவ அவினயகம்மஞ்சாதி வேதி³தப்³ப³ங். யஸ்ஸ பன ப⁴ண்ட³னகாரகாதீ³ஸு அங்கே³ஸு அஞ்ஞதரங் அங்க³ங் அத்தி², தஸ்ஸ ஆகங்க²மானோ ஸங்கோ⁴ யதா²னுஞ்ஞாதேஸு அங்கே³ஸு ச கம்மேஸு ச யேன கேனசி அங்கே³ன யங்கிஞ்சி கம்மங் வவத்த²பெத்வா தங் பி⁴க்கு²ங் கம்மாரஹங் கத்வா கம்மங் கரெய்ய. அயமெத்த² வினிச்ச²யோ. ஏவங் புப்³பே³னாபரங் ஸமேதி.
Tiṇṇaṃ, bhikkhave, bhikkhūnantiādi ekekenāpi aṅgena tajjanīyakammaṃ kātuṃ vaṭṭatīti dassanatthaṃ vuttaṃ. Tajjanīyassa hi visesena bhaṇḍanakārakattaṃ aṅgaṃ, niyassassa abhiṇhāpattikattaṃ, pabbājanīyassa kuladūsakattaṃ vuttaṃ. Imesu pana tīsu aṅgesu yena kenaci sabbānipi kātuṃ vaṭṭati. Yadi evaṃ yaṃ campeyyakkhandhake vuttaṃ – ‘‘tajjanīyakammārahassa niyassakammaṃ karoti…pe… upasampadārahaṃ abbheti; evaṃ kho upāli adhammakammaṃ hoti avinayakammaṃ, evañca pana saṅgho sātisāro hotī’’ti idaṃ virujjhatīti. Idañca na virujjhati. Kasmā? Vacanatthanānattato, ‘‘tajjanīyakammārahassā’’ti imassa hi vacanassa kammasanniṭṭhānaṃ attho. ‘‘Tiṇṇaṃ, bhikkhave’’tiādivacanassa aṅgasambhavo, tasmā yadā saṅghena sannipatitvā ‘‘idaṃ nāma imassa bhikkhuno kammaṃ karomā’’ti sanniṭṭhānaṃ kataṃ hoti, tadā kammāraho nāma hoti. Tassa iminā lakkhaṇena tajjanīyādikammārahassa niyassakammādikaraṇaṃ adhammakammañceva avinayakammañcāti veditabbaṃ. Yassa pana bhaṇḍanakārakādīsu aṅgesu aññataraṃ aṅgaṃ atthi, tassa ākaṅkhamāno saṅgho yathānuññātesu aṅgesu ca kammesu ca yena kenaci aṅgena yaṃkiñci kammaṃ vavatthapetvā taṃ bhikkhuṃ kammārahaṃ katvā kammaṃ kareyya. Ayamettha vinicchayo. Evaṃ pubbenāparaṃ sameti.
தத்த² கிஞ்சாபி தஜ்ஜனீயகம்மே ப⁴ண்ட³னகாரகவஸேன கம்மவாசா வுத்தா, அத² கோ² பா³லஸ்ஸ அப்³யத்தஸ்ஸ ஆபத்திப³ஹுலஸ்ஸ தஜ்ஜனீயகம்மங் கரொந்தேன பா³லஅப்³யத்தவஸேனேவ கம்மவாசா காதப்³பா³ . ஏவஞ்ஹி பூ⁴தேன வத்து²னா கதங் கம்மங் ஹோதி, ந ச அஞ்ஞஸ்ஸ கம்மஸ்ஸ வத்து²னா. கஸ்மா? யஸ்மா இத³ம்பி அனுஞ்ஞாதந்தி. ஏஸ நயோ ஸப்³ப³த்த². அட்டா²ரஸ ஸம்மாவத்தனவத்தூ²னி பாரிவாஸிகக்க²ந்த⁴கே வண்ணயிஸ்ஸாம.
Tattha kiñcāpi tajjanīyakamme bhaṇḍanakārakavasena kammavācā vuttā, atha kho bālassa abyattassa āpattibahulassa tajjanīyakammaṃ karontena bālaabyattavaseneva kammavācā kātabbā . Evañhi bhūtena vatthunā kataṃ kammaṃ hoti, na ca aññassa kammassa vatthunā. Kasmā? Yasmā idampi anuññātanti. Esa nayo sabbattha. Aṭṭhārasa sammāvattanavatthūni pārivāsikakkhandhake vaṇṇayissāma.
அத⁴ம்மகம்மத்³வாத³ஸககதா² நிட்டி²தா.
Adhammakammadvādasakakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
அத⁴ம்மகம்மத்³வாத³ஸகங் • Adhammakammadvādasakaṃ
ஆகங்க²மானச²க்கங் • Ākaṅkhamānachakkaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அத⁴ம்மகம்மத்³வாத³ஸககதா²வண்ணனா • Adhammakammadvādasakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அத⁴ம்மகம்மத்³வாத³ஸககதா²வண்ணனா • Adhammakammadvādasakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அத⁴ம்மகம்மத்³வாத³ஸககதா²தி³வண்ணனா • Adhammakammadvādasakakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அத⁴ம்மகம்மத்³வாத³ஸககதா² • Adhammakammadvādasakakathā
