| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
அத⁴ம்மகம்மத்³வாத³ஸககதா²
Adhammakammadvādasakakathā
4. அஸம்முகா² கதந்திஆதீ³ஸு ஏவங் வினிச்ச²யோ வேதி³தப்³போ³தி யோஜனா. ஸம்முகே²ஹி விரஹிதா அஸம்முகா²தி த³ஸ்ஸெந்தோ ஆஹ ‘‘ஸங்க⁴த⁴ம்மவினயபுக்³க³லஸம்முகா²னங் வினா கத’’ந்தி. ‘‘அப்படிபுச்சி²த்வா’’தி இமினா அப்படிபுச்சா²தி எத்த² த்வாபச்சயஸ்ஸாகாரபா⁴வங் த³ஸ்ஸேதி. தஸ்ஸேவாதி சுதி³தகஸ்ஸேவ. அதே³ஸனாகா³மினியாதி எத்த² அகாரஸ்ஸ அஞ்ஞத்த²ங் த³ஸ்ஸெந்தோ ஆஹ ‘‘பாராஜிகா…பே॰… வா’’தி. எத்தா²தி தஜ்ஜனீயகம்மே. நவ பதா³தி நவஸு பதே³ஸு, நித்³தா⁴ரணே சேதங் பச்சத்தவசனங். புரிமகேஸு தீஸு திகேஸு வுத்தேஸு நவஸு பதே³ஸூதி யோஜனா. ‘‘ஏகேக’’ந்தி பதே³ன ஸம்ப³ந்தி⁴தப்³ப³ங். இமேஹீதி இமேஹி த்³வீஹி பதே³ஹி. த்³வாத³ஸ திகாதி புரிமேஹி தீஹி திகேஹி நவ திகே மிஸ்ஸெத்வா த்³வாத³ஸ. ஸுக்கபக்கே²ஸுபீதி படிஸேத⁴விரஹவஸேன ஸுக்கேஸு பக்கே²ஸுபி.
4. Asammukhā katantiādīsu evaṃ vinicchayo veditabboti yojanā. Sammukhehi virahitā asammukhāti dassento āha ‘‘saṅghadhammavinayapuggalasammukhānaṃ vinā kata’’nti. ‘‘Appaṭipucchitvā’’ti iminā appaṭipucchāti ettha tvāpaccayassākārabhāvaṃ dasseti. Tassevāti cuditakasseva. Adesanāgāminiyāti ettha akārassa aññatthaṃ dassento āha ‘‘pārājikā…pe… vā’’ti. Etthāti tajjanīyakamme. Nava padāti navasu padesu, niddhāraṇe cetaṃ paccattavacanaṃ. Purimakesu tīsu tikesu vuttesu navasu padesūti yojanā. ‘‘Ekeka’’nti padena sambandhitabbaṃ. Imehīti imehi dvīhi padehi. Dvādasa tikāti purimehi tīhi tikehi nava tike missetvā dvādasa. Sukkapakkhesupīti paṭisedhavirahavasena sukkesu pakkhesupi.
6. ‘‘பப்³ப³ஜிதான’’ந்தி இமினா கி³ஹீனங் அனநுலோமிகதங் நிவத்தேதி. ஸஹஸோகிதாதீ³ஹீதி ஆதி³ஸத்³தே³ன ஸஹனந்தி³ங் ஸங்க³ண்ஹாதி. இமஸ்மிங் டா²னே ஸப்³ப³அட்ட²கதா²பொத்த²கேஸு ‘‘ந உபஸம்பாதே³தப்³ப³ந்தி உபஜ்ஜா²யேன ஹுத்வா ந உபஸம்பாதே³தப்³ப³’’ந்தி பாட²தோ பட்டா²ய யாவ ‘‘ந ஸம்பயோஜேதப்³ப³ந்தி அஞ்ஞமஞ்ஞங் யோஜெத்வா கலஹோ ந காரேதப்³போ³’’தி பாடோ² அத்தி², தாவ அட்டா²ரஸஸம்மாவத்தனவத்தானங் ஸங்வண்ணனாபாடோ² லிகி²தோ, ஸோ பாடோ² இமஸ்மிங் டா²னே ந லிகி²தப்³போ³. கஸ்மா? பாளிக்கமானுப்பத்தாபா⁴வதோ, அட்ட²கதா²யமேவ ‘‘அட்டா²ரஸ ஸம்மாவத்தனவத்தானி பாரிவாஸிகக்க²ந்த⁴கே வண்ணயிஸ்ஸாமா’’தி வக்க²மானத்தா, யதா²வசனஞ்ச பாரிவாஸிகக்க²ந்த⁴கே (சூளவ॰ அட்ட²॰ 76) ஸங்வண்ணிதத்தா² ச. தஸ்மா ஸோ பாடோ² ந போராணபாடோ² ஹோதி, பச்சா² பக்கி²த்தபாடோ²தி த³ட்ட²ப்³போ³.
6. ‘‘Pabbajitāna’’nti iminā gihīnaṃ ananulomikataṃ nivatteti. Sahasokitādīhīti ādisaddena sahanandiṃ saṅgaṇhāti. Imasmiṃ ṭhāne sabbaaṭṭhakathāpotthakesu ‘‘na upasampādetabbanti upajjhāyena hutvā na upasampādetabba’’nti pāṭhato paṭṭhāya yāva ‘‘na sampayojetabbanti aññamaññaṃ yojetvā kalaho na kāretabbo’’ti pāṭho atthi, tāva aṭṭhārasasammāvattanavattānaṃ saṃvaṇṇanāpāṭho likhito, so pāṭho imasmiṃ ṭhāne na likhitabbo. Kasmā? Pāḷikkamānuppattābhāvato, aṭṭhakathāyameva ‘‘aṭṭhārasa sammāvattanavattāni pārivāsikakkhandhake vaṇṇayissāmā’’ti vakkhamānattā, yathāvacanañca pārivāsikakkhandhake (cūḷava. aṭṭha. 76) saṃvaṇṇitatthā ca. Tasmā so pāṭho na porāṇapāṭho hoti, pacchā pakkhittapāṭhoti daṭṭhabbo.
திண்ணங் பி⁴க்க²வே பி⁴க்கூ²னந்திஆதி³ வுத்தந்தி ஸம்ப³ந்தோ⁴. ஏகேகேனாபீதி தீஸு அங்கே³ஸு ஏகேகேனாபி. இமினா அவயவவாக்யனிப்³ப³த்திவஸேன கம்மாரஹபா⁴வங் த³ஸ்ஸேதி. ஹீதி ஸச்சங். நியஸ்ஸஸ்ஸ விஸேஸேன அபி⁴ண்ஹாபத்திகத்தங் அங்க³ங் இதி வுத்தந்தி யோஜனா. எத்த² ஆகாரவாசகோ இதிஸத்³தோ³ லுத்தனித்³தி³ட்டோ²தி த³ட்ட²ப்³ப³ங். ஏஸேவ நயோ அனந்தரேபி. தஜ்ஜீயதி அனேன வினயகம்மேனாதி தஜ்ஜனீயங், தமேவ கம்மங் தஜ்ஜனீயகம்மங். ‘‘நிஸ்ஸாய தே வத்த²ப்³ப³’’ந்தி நியஸ்ஸீயதி பா³லோ ப⁴ஜாபீயதி அனேன வினயகம்மேனாதி நியஸ்ஸங், தி³வாதி³க³ணிகத்தா ஸகாரஸ்ஸ த்³வேபா⁴வோ ஹோதி ‘‘நஸ்ஸங் வஸ்ஸ’’ந்திஆதீ³ஸு விய, நியஸ்ஸமேவ கம்மங் நியஸ்ஸகம்மங். கா³மாதி³தோ பப்³பா³ஜியதி அனேன வினயகம்மேனாதி பப்³பா³ஜனீயங், தமேவ கம்மங் பப்³பா³ஜனீயகம்மங். தீஸூதி ப⁴ண்ட³னகாரகஅபி⁴ண்ஹாபத்திககுலதூ³ஸகவஸேன திவிதே⁴ஸு அங்கே³ஸு. யேன கேனசி அங்கே³னாதி ஸம்ப³ந்தோ⁴. யதி³ ஸப்³பா³னி கம்மானி காதுங் வட்டதீதி யோஜனா. ஏவங் ஸதி சம்பெய்யக்க²ந்த⁴கே (மஹாவ॰ 400 ஆத³யோ) வுத்தங் இத³ங் வசனங் விருஜ்ஜ²தீதி ஸம்ப³ந்தோ⁴. வசனத்த²னானத்ததோதி வசனஸ்ஸ ச அத்த²ஸ்ஸ ச நானாபா⁴வதோ. தமேவத்த²ங் வித்தா²ரெந்தோ ஆஹ ‘‘தஜ்ஜனீயகம்மாரஹஸ்ஸாதி இமஸ்ஸ ஹீ’’திஆதி³. தத்த² ‘‘திண்ணங் பி⁴க்க²வே’’திஆதி³வசனஸ்ஸ அங்க³ஸம்ப⁴வோ அத்தோ²தி யோஜனா. தஸ்மாதி யஸ்மா ந விருஜ்ஜ²தி, தஸ்மா. ஸங்கே⁴ன கதங் ஹோதீதி ஸம்ப³ந்தோ⁴. இமினா லக்க²ணேன தஜ்ஜனீயாதி³கம்மாரஹஸ்ஸ தஸ்ஸ பி⁴க்கு²ஸ்ஸாதி யோஜனா. ஏவங் கம்மஸன்னிட்டா²னத்த²ங் த³ஸ்ஸெத்வா அங்க³ஸம்ப⁴வத்த²ங் த³ஸ்ஸெந்தோ ஆஹ ‘‘யஸ்ஸ பனா’’திஆதி³. தத்த² யஸ்ஸாதி பி⁴க்கு²ஸ்ஸ, அத்தீ²தி ஸம்ப³ந்தோ⁴. ப⁴ண்ட³னகாரகாதீ³ஸூதிஆதி³ஸத்³தே³ன அபி⁴ண்ஹாபத்திககுலதூ³ஸகானி ஸங்க³ண்ஹாதி. ஆகங்க²மானோ ஸங்கோ⁴ கரெய்யாதி ஸம்ப³ந்தோ⁴. கம்மாரஹந்தி கம்மஸ்ஸ, கம்மே வா அரஹங். எத்தா²தி கம்மக்க²ந்த⁴கே. புப்³பே³னாதி புப்³பே³ வுத்தேன சம்பெய்யக்க²ந்த⁴கேன. அபரந்தி அபரே வுத்தங் கம்மக்க²ந்த⁴கங். ஸமேதீதி ஸமங் க³ச்ச²தி.
Tiṇṇaṃ bhikkhave bhikkhūnantiādi vuttanti sambandho. Ekekenāpīti tīsu aṅgesu ekekenāpi. Iminā avayavavākyanibbattivasena kammārahabhāvaṃ dasseti. Hīti saccaṃ. Niyassassa visesena abhiṇhāpattikattaṃ aṅgaṃ iti vuttanti yojanā. Ettha ākāravācako itisaddo luttaniddiṭṭhoti daṭṭhabbaṃ. Eseva nayo anantarepi. Tajjīyati anena vinayakammenāti tajjanīyaṃ, tameva kammaṃ tajjanīyakammaṃ. ‘‘Nissāya te vatthabba’’nti niyassīyati bālo bhajāpīyati anena vinayakammenāti niyassaṃ, divādigaṇikattā sakārassa dvebhāvo hoti ‘‘nassaṃ vassa’’ntiādīsu viya, niyassameva kammaṃ niyassakammaṃ. Gāmādito pabbājiyati anena vinayakammenāti pabbājanīyaṃ, tameva kammaṃ pabbājanīyakammaṃ. Tīsūti bhaṇḍanakārakaabhiṇhāpattikakuladūsakavasena tividhesu aṅgesu. Yena kenaci aṅgenāti sambandho. Yadi sabbāni kammāni kātuṃ vaṭṭatīti yojanā. Evaṃ sati campeyyakkhandhake (mahāva. 400 ādayo) vuttaṃ idaṃ vacanaṃ virujjhatīti sambandho. Vacanatthanānattatoti vacanassa ca atthassa ca nānābhāvato. Tamevatthaṃ vitthārento āha ‘‘tajjanīyakammārahassāti imassa hī’’tiādi. Tattha ‘‘tiṇṇaṃ bhikkhave’’tiādivacanassa aṅgasambhavo atthoti yojanā. Tasmāti yasmā na virujjhati, tasmā. Saṅghena kataṃ hotīti sambandho. Iminā lakkhaṇena tajjanīyādikammārahassa tassa bhikkhussāti yojanā. Evaṃ kammasanniṭṭhānatthaṃ dassetvā aṅgasambhavatthaṃ dassento āha ‘‘yassa panā’’tiādi. Tattha yassāti bhikkhussa, atthīti sambandho. Bhaṇḍanakārakādīsūtiādisaddena abhiṇhāpattikakuladūsakāni saṅgaṇhāti. Ākaṅkhamāno saṅgho kareyyāti sambandho. Kammārahanti kammassa, kamme vā arahaṃ. Etthāti kammakkhandhake. Pubbenāti pubbe vuttena campeyyakkhandhakena. Aparanti apare vuttaṃ kammakkhandhakaṃ. Sametīti samaṃ gacchati.
தத்தா²தி கம்மேஸு, தஜ்ஜனீயகம்மேதி ஸம்ப³ந்தோ⁴, அங்கே³ஸு வா, ப⁴ண்ட³னகாரகவஸேனாதி ஸம்ப³ந்தோ⁴. அத² கோ²தி ததா² வுத்தாபீதி அத்தோ². கரொந்தேன கம்மவாசாவாசகேனாதி ஸம்ப³ந்தோ⁴. ஹீதி ப²லஜோதகோ. பூ⁴தேன வத்து²னாதி தச்சே²ன வத்து²னா. அஞ்ஞஸ்ஸ கம்மஸ்ஸாதி தஜ்ஜனீயகம்மதோ அஞ்ஞஸ்ஸ கம்மஸ்ஸ. கஸ்மா பா³லஸ்ஸ அப்³யத்தஸ்ஸ ஆபத்திப³ஹுலஸ்ஸ தஜ்ஜனீயகம்மங் காதப்³ப³ந்தி யோஜனா. இத³ம்பீதி தஜ்ஜனீயகம்மம்பி. ஸப்³ப³த்தா²தி ஸப்³பே³ஸு கம்மேஸு.
Tatthāti kammesu, tajjanīyakammeti sambandho, aṅgesu vā, bhaṇḍanakārakavasenāti sambandho. Atha khoti tathā vuttāpīti attho. Karontena kammavācāvācakenāti sambandho. Hīti phalajotako. Bhūtena vatthunāti tacchena vatthunā. Aññassa kammassāti tajjanīyakammato aññassa kammassa. Kasmā bālassa abyattassa āpattibahulassa tajjanīyakammaṃ kātabbanti yojanā. Idampīti tajjanīyakammampi. Sabbatthāti sabbesu kammesu.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi
அத⁴ம்மகம்மத்³வாத³ஸகங் • Adhammakammadvādasakaṃ
ஆகங்க²மானச²க்கங் • Ākaṅkhamānachakkaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அத⁴ம்மகம்மத்³வாத³ஸககதா² • Adhammakammadvādasakakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அத⁴ம்மகம்மத்³வாத³ஸககதா²வண்ணனா • Adhammakammadvādasakakathāvaṇṇanā
