| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā |
ಅಧಮ್ಮಕಮ್ಮದ್ವಾದಸಕಕಥಾ
Adhammakammadvādasakakathā
೪. ಅಸಮ್ಮುಖಾ ಕತನ್ತಿಆದೀಸು ಸಙ್ಘಧಮ್ಮವಿನಯಪುಗ್ಗಲಸಮ್ಮುಖಾನಂ ವಿನಾ ಕತಂ, ಚುದಿತಕಂ ಅಪ್ಪಟಿಪುಚ್ಛಿತ್ವಾ ಕತಂ, ತಸ್ಸೇವ ಅಪ್ಪಟಿಞ್ಞಾಯ ಕತಂ। ಅದೇಸನಾಗಾಮಿನಿಯಾತಿ ಪಾರಾಜಿಕಾಪತ್ತಿಯಾ ವಾ ಸಙ್ಘಾದಿಸೇಸಾಪತ್ತಿಯಾ ವಾ। ಏತ್ಥ ಪುರಿಮಕೇಸು ತೀಸು ತಿಕೇಸು ನವ ಪದಾ ಅಧಮ್ಮೇನಕತಂ ವಗ್ಗೇನಕತನ್ತಿ ಇಮೇಹಿ ಸದ್ಧಿಂ ಏಕೇಕಂ ಗಹೇತ್ವಾ ನವ ತಿಕಾ ವುತ್ತಾ। ಏವಂ ಸಬ್ಬೇಪಿ ದ್ವಾದಸ ತಿಕಾ ಹೋನ್ತಿ। ಪಟಿಪಕ್ಖವಸೇನ ಸುಕ್ಕಪಕ್ಖೇಸುಪಿ ಏತೇಯೇವ ದ್ವಾದಸ ತಿಕಾ ವುತ್ತಾ।
4.Asammukhākatantiādīsu saṅghadhammavinayapuggalasammukhānaṃ vinā kataṃ, cuditakaṃ appaṭipucchitvā kataṃ, tasseva appaṭiññāya kataṃ. Adesanāgāminiyāti pārājikāpattiyā vā saṅghādisesāpattiyā vā. Ettha purimakesu tīsu tikesu nava padā adhammenakataṃ vaggenakatanti imehi saddhiṃ ekekaṃ gahetvā nava tikā vuttā. Evaṃ sabbepi dvādasa tikā honti. Paṭipakkhavasena sukkapakkhesupi eteyeva dvādasa tikā vuttā.
೬. ಅನನುಲೋಮಿಕೇಹಿ ಗಿಹಿಸಂಸಗ್ಗೇಹೀತಿ ಪಬ್ಬಜಿತಾನಂ ಅನನುಚ್ಛವಿಕೇಹಿ ಸಹಸೋಕಿತಾದೀಹಿ ಗಿಹಿಸಂಸಗ್ಗೇಹಿ।
6.Ananulomikehigihisaṃsaggehīti pabbajitānaṃ ananucchavikehi sahasokitādīhi gihisaṃsaggehi.
ತಿಣ್ಣಂ , ಭಿಕ್ಖವೇ, ಭಿಕ್ಖೂನನ್ತಿಆದಿ ಏಕೇಕೇನಾಪಿ ಅಙ್ಗೇನ ತಜ್ಜನೀಯಕಮ್ಮಂ ಕಾತುಂ ವಟ್ಟತೀತಿ ದಸ್ಸನತ್ಥಂ ವುತ್ತಂ। ತಜ್ಜನೀಯಸ್ಸ ಹಿ ವಿಸೇಸೇನ ಭಣ್ಡನಕಾರಕತ್ತಂ ಅಙ್ಗಂ, ನಿಯಸ್ಸಸ್ಸ ಅಭಿಣ್ಹಾಪತ್ತಿಕತ್ತಂ, ಪಬ್ಬಾಜನೀಯಸ್ಸ ಕುಲದೂಸಕತ್ತಂ ವುತ್ತಂ। ಇಮೇಸು ಪನ ತೀಸು ಅಙ್ಗೇಸು ಯೇನ ಕೇನಚಿ ಸಬ್ಬಾನಿಪಿ ಕಾತುಂ ವಟ್ಟತಿ। ಯದಿ ಏವಂ ಯಂ ಚಮ್ಪೇಯ್ಯಕ್ಖನ್ಧಕೇ ವುತ್ತಂ – ‘‘ತಜ್ಜನೀಯಕಮ್ಮಾರಹಸ್ಸ ನಿಯಸ್ಸಕಮ್ಮಂ ಕರೋತಿ…ಪೇ॰… ಉಪಸಮ್ಪದಾರಹಂ ಅಬ್ಭೇತಿ; ಏವಂ ಖೋ ಉಪಾಲಿ ಅಧಮ್ಮಕಮ್ಮಂ ಹೋತಿ ಅವಿನಯಕಮ್ಮಂ, ಏವಞ್ಚ ಪನ ಸಙ್ಘೋ ಸಾತಿಸಾರೋ ಹೋತೀ’’ತಿ ಇದಂ ವಿರುಜ್ಝತೀತಿ। ಇದಞ್ಚ ನ ವಿರುಜ್ಝತಿ। ಕಸ್ಮಾ? ವಚನತ್ಥನಾನತ್ತತೋ, ‘‘ತಜ್ಜನೀಯಕಮ್ಮಾರಹಸ್ಸಾ’’ತಿ ಇಮಸ್ಸ ಹಿ ವಚನಸ್ಸ ಕಮ್ಮಸನ್ನಿಟ್ಠಾನಂ ಅತ್ಥೋ। ‘‘ತಿಣ್ಣಂ, ಭಿಕ್ಖವೇ’’ತಿಆದಿವಚನಸ್ಸ ಅಙ್ಗಸಮ್ಭವೋ, ತಸ್ಮಾ ಯದಾ ಸಙ್ಘೇನ ಸನ್ನಿಪತಿತ್ವಾ ‘‘ಇದಂ ನಾಮ ಇಮಸ್ಸ ಭಿಕ್ಖುನೋ ಕಮ್ಮಂ ಕರೋಮಾ’’ತಿ ಸನ್ನಿಟ್ಠಾನಂ ಕತಂ ಹೋತಿ, ತದಾ ಕಮ್ಮಾರಹೋ ನಾಮ ಹೋತಿ। ತಸ್ಸ ಇಮಿನಾ ಲಕ್ಖಣೇನ ತಜ್ಜನೀಯಾದಿಕಮ್ಮಾರಹಸ್ಸ ನಿಯಸ್ಸಕಮ್ಮಾದಿಕರಣಂ ಅಧಮ್ಮಕಮ್ಮಞ್ಚೇವ ಅವಿನಯಕಮ್ಮಞ್ಚಾತಿ ವೇದಿತಬ್ಬಂ। ಯಸ್ಸ ಪನ ಭಣ್ಡನಕಾರಕಾದೀಸು ಅಙ್ಗೇಸು ಅಞ್ಞತರಂ ಅಙ್ಗಂ ಅತ್ಥಿ, ತಸ್ಸ ಆಕಙ್ಖಮಾನೋ ಸಙ್ಘೋ ಯಥಾನುಞ್ಞಾತೇಸು ಅಙ್ಗೇಸು ಚ ಕಮ್ಮೇಸು ಚ ಯೇನ ಕೇನಚಿ ಅಙ್ಗೇನ ಯಂಕಿಞ್ಚಿ ಕಮ್ಮಂ ವವತ್ಥಪೇತ್ವಾ ತಂ ಭಿಕ್ಖುಂ ಕಮ್ಮಾರಹಂ ಕತ್ವಾ ಕಮ್ಮಂ ಕರೇಯ್ಯ। ಅಯಮೇತ್ಥ ವಿನಿಚ್ಛಯೋ। ಏವಂ ಪುಬ್ಬೇನಾಪರಂ ಸಮೇತಿ।
Tiṇṇaṃ, bhikkhave, bhikkhūnantiādi ekekenāpi aṅgena tajjanīyakammaṃ kātuṃ vaṭṭatīti dassanatthaṃ vuttaṃ. Tajjanīyassa hi visesena bhaṇḍanakārakattaṃ aṅgaṃ, niyassassa abhiṇhāpattikattaṃ, pabbājanīyassa kuladūsakattaṃ vuttaṃ. Imesu pana tīsu aṅgesu yena kenaci sabbānipi kātuṃ vaṭṭati. Yadi evaṃ yaṃ campeyyakkhandhake vuttaṃ – ‘‘tajjanīyakammārahassa niyassakammaṃ karoti…pe… upasampadārahaṃ abbheti; evaṃ kho upāli adhammakammaṃ hoti avinayakammaṃ, evañca pana saṅgho sātisāro hotī’’ti idaṃ virujjhatīti. Idañca na virujjhati. Kasmā? Vacanatthanānattato, ‘‘tajjanīyakammārahassā’’ti imassa hi vacanassa kammasanniṭṭhānaṃ attho. ‘‘Tiṇṇaṃ, bhikkhave’’tiādivacanassa aṅgasambhavo, tasmā yadā saṅghena sannipatitvā ‘‘idaṃ nāma imassa bhikkhuno kammaṃ karomā’’ti sanniṭṭhānaṃ kataṃ hoti, tadā kammāraho nāma hoti. Tassa iminā lakkhaṇena tajjanīyādikammārahassa niyassakammādikaraṇaṃ adhammakammañceva avinayakammañcāti veditabbaṃ. Yassa pana bhaṇḍanakārakādīsu aṅgesu aññataraṃ aṅgaṃ atthi, tassa ākaṅkhamāno saṅgho yathānuññātesu aṅgesu ca kammesu ca yena kenaci aṅgena yaṃkiñci kammaṃ vavatthapetvā taṃ bhikkhuṃ kammārahaṃ katvā kammaṃ kareyya. Ayamettha vinicchayo. Evaṃ pubbenāparaṃ sameti.
ತತ್ಥ ಕಿಞ್ಚಾಪಿ ತಜ್ಜನೀಯಕಮ್ಮೇ ಭಣ್ಡನಕಾರಕವಸೇನ ಕಮ್ಮವಾಚಾ ವುತ್ತಾ, ಅಥ ಖೋ ಬಾಲಸ್ಸ ಅಬ್ಯತ್ತಸ್ಸ ಆಪತ್ತಿಬಹುಲಸ್ಸ ತಜ್ಜನೀಯಕಮ್ಮಂ ಕರೋನ್ತೇನ ಬಾಲಅಬ್ಯತ್ತವಸೇನೇವ ಕಮ್ಮವಾಚಾ ಕಾತಬ್ಬಾ । ಏವಞ್ಹಿ ಭೂತೇನ ವತ್ಥುನಾ ಕತಂ ಕಮ್ಮಂ ಹೋತಿ, ನ ಚ ಅಞ್ಞಸ್ಸ ಕಮ್ಮಸ್ಸ ವತ್ಥುನಾ। ಕಸ್ಮಾ? ಯಸ್ಮಾ ಇದಮ್ಪಿ ಅನುಞ್ಞಾತನ್ತಿ। ಏಸ ನಯೋ ಸಬ್ಬತ್ಥ। ಅಟ್ಠಾರಸ ಸಮ್ಮಾವತ್ತನವತ್ಥೂನಿ ಪಾರಿವಾಸಿಕಕ್ಖನ್ಧಕೇ ವಣ್ಣಯಿಸ್ಸಾಮ।
Tattha kiñcāpi tajjanīyakamme bhaṇḍanakārakavasena kammavācā vuttā, atha kho bālassa abyattassa āpattibahulassa tajjanīyakammaṃ karontena bālaabyattavaseneva kammavācā kātabbā . Evañhi bhūtena vatthunā kataṃ kammaṃ hoti, na ca aññassa kammassa vatthunā. Kasmā? Yasmā idampi anuññātanti. Esa nayo sabbattha. Aṭṭhārasa sammāvattanavatthūni pārivāsikakkhandhake vaṇṇayissāma.
ಅಧಮ್ಮಕಮ್ಮದ್ವಾದಸಕಕಥಾ ನಿಟ್ಠಿತಾ।
Adhammakammadvādasakakathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi
ಅಧಮ್ಮಕಮ್ಮದ್ವಾದಸಕಂ • Adhammakammadvādasakaṃ
ಆಕಙ್ಖಮಾನಛಕ್ಕಂ • Ākaṅkhamānachakkaṃ
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಧಮ್ಮಕಮ್ಮದ್ವಾದಸಕಕಥಾವಣ್ಣನಾ • Adhammakammadvādasakakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅಧಮ್ಮಕಮ್ಮದ್ವಾದಸಕಕಥಾವಣ್ಣನಾ • Adhammakammadvādasakakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಧಮ್ಮಕಮ್ಮದ್ವಾದಸಕಕಥಾದಿವಣ್ಣನಾ • Adhammakammadvādasakakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಅಧಮ್ಮಕಮ್ಮದ್ವಾದಸಕಕಥಾ • Adhammakammadvādasakakathā
