| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
অধম্মকম্মদ্ৰাদসককথাদিৰণ্ণনা
Adhammakammadvādasakakathādivaṇṇanā
৪. অপ্পটিঞ্ঞায কতন্তি ৰত্থুং ৰা আপত্তিং ৰা অসম্পটিচ্ছাপেত্ৰা কতং। যো পন সব্বেসং পস্সন্তানং এৰ ৰত্থুৰীতিক্কমং কত্ৰা পচ্ছা কম্মকরণভযেন ‘‘ন করোমী’’তি মুসা ৰদতি, তস্স ভিক্খূনং সম্মুখে ৰীতিক্কমকরণমেৰ পটিঞ্ঞা। তথতো জাননত্থমেৰ পটিঞ্ঞায করণং অনুঞ্ঞাতং। যত্থ পন সন্দেহো হোতি, তত্থ সম্পটিচ্ছাপেত্ৰাৰ কত্তব্বন্তি গহেতব্বং।
4.Appaṭiññāya katanti vatthuṃ vā āpattiṃ vā asampaṭicchāpetvā kataṃ. Yo pana sabbesaṃ passantānaṃ eva vatthuvītikkamaṃ katvā pacchā kammakaraṇabhayena ‘‘na karomī’’ti musā vadati, tassa bhikkhūnaṃ sammukhe vītikkamakaraṇameva paṭiññā. Tathato jānanatthameva paṭiññāya karaṇaṃ anuññātaṃ. Yattha pana sandeho hoti, tattha sampaṭicchāpetvāva kattabbanti gahetabbaṃ.
‘‘পারাজিকাপত্তিযা ৰা’’তি ইদং লিঙ্গনাসননিমিত্ততায পারাজিকস্স কম্মেন অতিকিচ্ছনীযতো ৰুত্তং। ‘‘সঙ্ঘাদিসেসাপত্তিযা ৰা’’তি ইদং পন পরিৰাসাদিনিস্সারণকম্মস্স আৰেণিকস্স ৰিজ্জমানত্তা ৰুত্তং। যং পন পরতো ‘‘অধিসীলে সীলৰিপন্নো হোতি…পে॰… তজ্জনীযকম্মং করেয্যা’’তি (চূল়ৰ॰ ৬) ৰুত্তং, তং ‘‘আযতিং সংৰরে ঠত্ৰা ৰুট্ঠানং করোহী’’তি ওৰদিযমানস্স অনাদরিযাদিপচ্চযলহুকাপত্তিং সন্ধায ৰুত্তং। সীলৰিপত্তিমূলকঞ্হি লহুকাপত্তিং আপন্নো ইধ অভেদূপচারেন ‘‘অধিসীলে সীলৰিপন্নো’’তি ৰুত্তো ‘‘অতিদিট্ঠিযা দিট্ঠিৰিপন্নো’’তি এত্থ ৰিয।
‘‘Pārājikāpattiyā vā’’ti idaṃ liṅganāsananimittatāya pārājikassa kammena atikicchanīyato vuttaṃ. ‘‘Saṅghādisesāpattiyā vā’’ti idaṃ pana parivāsādinissāraṇakammassa āveṇikassa vijjamānattā vuttaṃ. Yaṃ pana parato ‘‘adhisīle sīlavipanno hoti…pe… tajjanīyakammaṃ kareyyā’’ti (cūḷava. 6) vuttaṃ, taṃ ‘‘āyatiṃ saṃvare ṭhatvā vuṭṭhānaṃ karohī’’ti ovadiyamānassa anādariyādipaccayalahukāpattiṃ sandhāya vuttaṃ. Sīlavipattimūlakañhi lahukāpattiṃ āpanno idha abhedūpacārena ‘‘adhisīle sīlavipanno’’ti vutto ‘‘atidiṭṭhiyā diṭṭhivipanno’’ti ettha viya.
যথা চ দিট্ঠিং গহেত্ৰা ৰোহরন্তস্স ‘‘ইতো দিট্ঠিতো ওরমাহী’’তি অৰত্ৰা কতকম্মং কেৰলায দিট্ঠিৰিপত্তিযা কতত্তা অনাপত্তিযা কতং নাম অধম্মকম্মং হোতি, এৰং সীলৰিপত্তিং আপজ্জিত্ৰা লজ্জিধম্মে ওক্কন্তে যথাধম্মং ৰুট্ঠায সংৰরে ঠাতুকামস্স কতং তজ্জনীযাদিকম্মং কেৰলায সীলৰিপত্তিযা কতত্তা অদেসনাগামিনিযা কতং নাম অধম্মকম্মং হোতি। তেনেৰ নিযস্সকম্মেপি ‘‘অপিস্সু ভিক্খূ পকতা পরিৰাসং দেন্তা’’তিআদিনা সংৰরে অট্ঠানমেৰ কম্মনিমিত্তভাৰেন ৰুত্তং। অদন্তং দমনত্থমেৰ হি তজ্জনীযাদিকম্মানি অনুঞ্ঞাতানীতি। কেচি পন ‘‘অদেসনাগামিনিযাতি ইদং পারাজিকাপত্তিংযেৰ সন্ধায ৰুত্তং, ন সঙ্ঘাদিসেস’’ন্তি (সারত্থ॰ টী॰ চূল়ৰগ্গ ৩.৪) ৰদন্তি, তং সুক্কপক্খে ‘‘দেসনাগামিনিযা আপত্তিযা কতং হোতী’’তি ইমিনা ৰচনেন ৰিরুজ্ঝতি। সঙ্ঘাদিসেসস্সাপি চ পরিযাযতো দেসনাগামিনিৰোহারে গয্হমানে ‘‘আপত্তিযা কতং হোতী’’তি ৰুত্তৰারতো ইমস্স ৰারস্স ৰিসেসো ন সিযা, অট্ঠকথাযম্পেত্থ ৰিসেসভাৰো ন দস্সিতো। তস্মা ৰুত্তনযেনেৰেত্থ অধিপ্পাযো গহেতব্বো।
Yathā ca diṭṭhiṃ gahetvā voharantassa ‘‘ito diṭṭhito oramāhī’’ti avatvā katakammaṃ kevalāya diṭṭhivipattiyā katattā anāpattiyā kataṃ nāma adhammakammaṃ hoti, evaṃ sīlavipattiṃ āpajjitvā lajjidhamme okkante yathādhammaṃ vuṭṭhāya saṃvare ṭhātukāmassa kataṃ tajjanīyādikammaṃ kevalāya sīlavipattiyā katattā adesanāgāminiyā kataṃ nāma adhammakammaṃ hoti. Teneva niyassakammepi ‘‘apissu bhikkhū pakatā parivāsaṃ dentā’’tiādinā saṃvare aṭṭhānameva kammanimittabhāvena vuttaṃ. Adantaṃ damanatthameva hi tajjanīyādikammāni anuññātānīti. Keci pana ‘‘adesanāgāminiyāti idaṃ pārājikāpattiṃyeva sandhāya vuttaṃ, na saṅghādisesa’’nti (sārattha. ṭī. cūḷavagga 3.4) vadanti, taṃ sukkapakkhe ‘‘desanāgāminiyā āpattiyā kataṃ hotī’’ti iminā vacanena virujjhati. Saṅghādisesassāpi ca pariyāyato desanāgāminivohāre gayhamāne ‘‘āpattiyā kataṃ hotī’’ti vuttavārato imassa vārassa viseso na siyā, aṭṭhakathāyampettha visesabhāvo na dassito. Tasmā vuttanayenevettha adhippāyo gahetabbo.
৬. সব্বানিপীতি তজ্জনীযনিযস্সপব্বাজনীযকম্মানি তীণিপি। অঞ্ঞকম্মস্স ৰত্থুনাতি তজ্জনীযতো অঞ্ঞস্স কম্মস্স ৰত্থুনা অঞ্ঞকম্মকরণং নাম কোচি দোসোপি ন হোতীতি অধিপ্পাযো। কারণমাহ ‘‘কস্মা’’তিআদিনা।
6.Sabbānipīti tajjanīyaniyassapabbājanīyakammāni tīṇipi. Aññakammassa vatthunāti tajjanīyato aññassa kammassa vatthunā aññakammakaraṇaṃ nāma koci dosopi na hotīti adhippāyo. Kāraṇamāha ‘‘kasmā’’tiādinā.
৮. পন্নলোমাতি পতিতমানলোমা।
8.Pannalomāti patitamānalomā.
অধম্মকম্মদ্ৰাদসককথাদিৰণ্ণনা নিট্ঠিতা।
Adhammakammadvādasakakathādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
অধম্মকম্মদ্ৰাদসকং • Adhammakammadvādasakaṃ
আকঙ্খমানছক্কং • Ākaṅkhamānachakkaṃ
নপ্পটিপ্পস্সম্ভেতব্বঅট্ঠারসকং • Nappaṭippassambhetabbaaṭṭhārasakaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā
অধম্মকম্মদ্ৰাদসককথা • Adhammakammadvādasakakathā
নপ্পটিপ্পস্সম্ভেতব্বঅট্ঠারসকাদিকথা • Nappaṭippassambhetabbaaṭṭhārasakādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
অধম্মকম্মদ্ৰাদসককথাৰণ্ণনা • Adhammakammadvādasakakathāvaṇṇanā
নপ্পটিপ্পস্সম্ভেতব্বঅট্ঠারসককথাৰণ্ণনা • Nappaṭippassambhetabbaaṭṭhārasakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধম্মকম্মদ্ৰাদসককথাৰণ্ণনা • Adhammakammadvādasakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
অধম্মকম্মদ্ৰাদসককথা • Adhammakammadvādasakakathā
নপ্পটিপ্পস্সম্ভেতব্বঅট্ঠারসকাদিকথা • Nappaṭippassambhetabbaaṭṭhārasakādikathā
