| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
намо д̇асса бхаг̇авад̇о арахад̇о саммаасамб̣уд̣̇д̇хасса
Namo tassa bhagavato arahato sammāsambuddhassa
жуул̣аваг̇г̇аван̣н̣анаа
Cūḷavaggavaṇṇanā
1. гаммагканд̇хагаван̣н̣анаа
1. Kammakkhandhakavaṇṇanā
ад̇хаммагаммад̣̇ваад̣̇асагагат̇ааван̣н̣анаа
Adhammakammadvādasakakathāvaṇṇanā
4. асаммукаа гад̇ам̣ ход̇ийд̇иаад̣̇аяо д̇игаа гзвалам̣ д̣̇зсанаамад̇д̇амзва. на хи д̇ийхи зва ан̇г̇зхи самод̇хаанзхи ад̇хаммагаммам̣ ход̇и, згзнаби ход̇и зва, аяамад̇т̇о ‘‘д̇ин̣н̣ам̣, бхигкавз’’д̇иаад̣̇ибаал̣ияаа (жуул̣ава. 6) саад̇хзд̇аб̣б̣о. ‘‘аббадин̃н̃ааяа гад̇ам̣ ход̇ий’’д̇и лаж̇ж̇им̣ санд̇хааяа вуд̇д̇ам̣. ган̣хабагкз ‘‘ад̣̇зсанааг̇ааминияаа аабад̇д̇ияаа гад̇ам̣ ход̇ий’’д̇и суггабагкз ‘‘д̣̇зсанааг̇ааминияаа аабад̇д̇ияаа гад̇ам̣ ход̇ий’’д̇и ид̣̇ам̣ д̣̇ваяам̣ барад̇о ‘‘д̇ийхи, бхигкавз, ан̇г̇зхи саманнааг̇ад̇асса бхигкуно ааган̇камаано сан̇гхо д̇аж̇ж̇анийяагаммам̣ гарзяяа. ад̇хисийлз сийлавибанно ход̇ий’’д̇и иминаа вируж̇жхад̇и, ад̣̇зсанааг̇ааминим̣ аабанно хи ‘‘ад̇хисийлз сийлавибанно’’д̇и вужжад̇ийд̇и. яуд̇д̇амзд̇ам̣, гад̇д̇у ад̇хиббааяо зд̇т̇а жинд̇зд̇аб̣б̣о. зд̇т̇ааха убад̇иссад̇т̇зро ‘‘д̇аж̇ж̇анийяагаммасса хи висзсзна бхан̣д̣анагаарагад̇д̇ам̣ ан̇г̇а’нд̇и адтагат̇ааяам̣ вуд̇д̇ам̣, д̇ам̣ баал̣ияаа ааг̇ад̇анид̣̇аанзна яуж̇ж̇ад̇и, д̇асмаа саб̣б̣ад̇д̇игзсуби бхан̣д̣анам̣ ааробзд̇ваа бхан̣д̣анабажжаяаа аабаннаабад̇д̇ивасзна ид̣̇ам̣ гаммам̣ гаад̇аб̣б̣ам̣, д̇асмаа ‘ад̇хисийлз сийлавибанно’д̇и зд̇т̇ааби буб̣б̣абхааг̇з ваа абарабхааг̇з ваа жод̣̇анаасааран̣аад̣̇игаалз бхан̣д̣анабажжаяаа аабаннаабад̇д̇ивасзнзва гаарзд̇аб̣б̣ам̣, на гзвалам̣ сан̇гхаад̣̇исзсабажжаяаа гаад̇аб̣б̣а’’нд̇и. ‘‘ад̣̇зсанааг̇ааминияаа аабад̇д̇ияаад̇и баарааж̇игаабад̇д̇ияаа’д̇и зд̇д̇агамад̇д̇ам̣ вад̇ваа барад̇о ‘ад̇хисийлз баарааж̇игасан̇гхаад̣̇исзсз аж̇жхаажаараа’д̇и бораан̣аг̇ан̣тибад̣̇з вуд̇д̇а’’нд̇и ликид̇ам̣. ‘‘ад̇хисийлз сийлавибанно’д̇и сан̇гхаад̣̇исзсам̣ санд̇хааяаа’’д̇и г̇ан̣тибад̣̇з ликид̇ам̣. ид̣̇ам̣ бораан̣аг̇ан̣тибад̣̇з буримаважанзна самзд̇и, д̇асмаа д̇ад̇т̇а бажчимам̣ баарааж̇игабад̣̇ам̣ ад̇т̇уд̣̇д̇хааравасзна вуд̇д̇ам̣ сияаа , адтагат̇ааяан̃жа ‘‘ад̣̇зсанааг̇ааминияаад̇и баарааж̇игаабад̇д̇ияаа ваа сан̇гхаад̣̇исзсаабад̇д̇ияаа ваа’’д̇и вуд̇д̇ам̣, д̇ад̇т̇а баарааж̇игаабад̇д̇и ад̇т̇уд̣̇д̇хааравасзна вуд̇д̇аа сияаа. яад̇о г̇ан̣тибад̣̇з ‘‘ад̇хисийлз сийлавибанно’д̇и сан̇гхаад̣̇исзсам̣ санд̇хааяаа’’д̇и зд̇д̇агамзва ликид̇ам̣, д̇асмаа саб̣б̣ад̇т̇а г̇ан̣тибад̣̇з сагалзна наязна баарааж̇игаабад̇д̇ибажжаяаа уббаннабхан̣д̣анахзд̇у на д̇аж̇ж̇анийяагаммам̣ гаад̇аб̣б̣ам̣ баяож̇анаабхааваа, сан̇гхаад̣̇исзсабажжаяаа гаад̇аб̣б̣анд̇и аяамад̇т̇о сид̣̇д̇хо ход̇и. на, суггабагкз ‘‘д̣̇зсанааг̇ааминияаа аабад̇д̇ияаа гад̇ам̣ ход̇ий’’д̇и (жуул̣ава. 5) важанад̇од̇и жз? на, згзна барияааязна сан̇гхаад̣̇исзсассаби д̣̇зсанааг̇ааминивохаарасамбхавад̇о,
4.Asammukhākataṃ hotītiādayo tikā kevalaṃ desanāmattameva. Na hi tīhi eva aṅgehi samodhānehi adhammakammaṃ hoti, ekenapi hoti eva, ayamattho ‘‘tiṇṇaṃ, bhikkhave’’tiādipāḷiyā (cūḷava. 6) sādhetabbo. ‘‘Appaṭiññāya kataṃ hotī’’ti lajjiṃ sandhāya vuttaṃ. Kaṇhapakkhe ‘‘adesanāgāminiyā āpattiyā kataṃ hotī’’ti sukkapakkhe ‘‘desanāgāminiyā āpattiyā kataṃ hotī’’ti idaṃ dvayaṃ parato ‘‘tīhi, bhikkhave, aṅgehi samannāgatassa bhikkhuno ākaṅkhamāno saṅgho tajjanīyakammaṃ kareyya. Adhisīle sīlavipanno hotī’’ti iminā virujjhati, adesanāgāminiṃ āpanno hi ‘‘adhisīle sīlavipanno’’ti vuccatīti. Yuttametaṃ, kattu adhippāyo ettha cintetabbo. Etthāha upatissatthero ‘‘tajjanīyakammassa hi visesena bhaṇḍanakārakattaṃ aṅga’nti aṭṭhakathāyaṃ vuttaṃ, taṃ pāḷiyā āgatanidānena yujjati, tasmā sabbattikesupi bhaṇḍanaṃ āropetvā bhaṇḍanapaccayā āpannāpattivasena idaṃ kammaṃ kātabbaṃ, tasmā ‘adhisīle sīlavipanno’ti etthāpi pubbabhāge vā aparabhāge vā codanāsāraṇādikāle bhaṇḍanapaccayā āpannāpattivaseneva kāretabbaṃ, na kevalaṃ saṅghādisesapaccayā kātabba’’nti. ‘‘Adesanāgāminiyā āpattiyāti pārājikāpattiyā’ti ettakamattaṃ vatvā parato ‘adhisīle pārājikasaṅghādisese ajjhācārā’ti porāṇagaṇṭhipade vutta’’nti likhitaṃ. ‘‘Adhisīle sīlavipanno’ti saṅghādisesaṃ sandhāyā’’ti gaṇṭhipade likhitaṃ. Idaṃ porāṇagaṇṭhipade purimavacanena sameti, tasmā tattha pacchimaṃ pārājikapadaṃ atthuddhāravasena vuttaṃ siyā , aṭṭhakathāyañca ‘‘adesanāgāminiyāti pārājikāpattiyā vā saṅghādisesāpattiyā vā’’ti vuttaṃ, tattha pārājikāpatti atthuddhāravasena vuttā siyā. Yato gaṇṭhipade ‘‘adhisīle sīlavipanno’ti saṅghādisesaṃ sandhāyā’’ti ettakameva likhitaṃ, tasmā sabbattha gaṇṭhipade sakalena nayena pārājikāpattipaccayā uppannabhaṇḍanahetu na tajjanīyakammaṃ kātabbaṃ payojanābhāvā, saṅghādisesapaccayā kātabbanti ayamattho siddho hoti. Na, sukkapakkhe ‘‘desanāgāminiyā āpattiyā kataṃ hotī’’ti (cūḷava. 5) vacanatoti ce? Na, ekena pariyāyena saṅghādisesassapi desanāgāminivohārasambhavato,
язна гаммзна санд̇аж̇ж̇анам̣ гарийяад̇и, д̇ам̣ д̇аж̇ж̇анийяагаммам̣ наама. язна гаммзна ниссааяа д̇з вад̇т̇аб̣б̣анд̇и ниссияад̇и бхаж̇аабияад̇и нияассо, д̇ам̣ нияасагаммам̣ наама. язна д̇ад̇о ааваасад̇о, г̇аамад̇о жа баб̣б̣ааж̇знд̇и гулад̣̇уусагам̣, д̇ам̣ баб̣б̣ааж̇анийяагаммам̣ наама. язна гаммзна аггудтаг̇ахадтасамаийбамзва бадисаарияад̇и со аггосаго бажчаа бзсияад̇и, д̇ам̣ бадисааран̣ийяагаммам̣ наама. язна самаанасам̣ваасагабхуумид̇о угкибияад̇и. чад̣д̣ийяад̇и саад̇исааро бхигкусан̇гхзна, д̇ам̣ гаммам̣ угкзбанийяагаммам̣ наамаад̇и взд̣̇ид̇аб̣б̣ам̣.
Yena kammena santajjanaṃ karīyati, taṃ tajjanīyakammaṃ nāma. Yena kammena nissāya te vatthabbanti nissiyati bhajāpiyati niyasso, taṃ niyasakammaṃ nāma. Yena tato āvāsato, gāmato ca pabbājenti kuladūsakaṃ, taṃ pabbājanīyakammaṃ nāma. Yena kammena akkuṭṭhagahaṭṭhasamaīpameva paṭisāriyati so akkosako pacchā pesiyati, taṃ paṭisāraṇīyakammaṃ nāma. Yena samānasaṃvāsakabhūmito ukkhipiyati. Chaḍḍīyati sātisāro bhikkhusaṅghena, taṃ kammaṃ ukkhepanīyakammaṃ nāmāti veditabbaṃ.
11. ‘‘ниссааяа д̇з вад̇т̇аб̣б̣а’’нд̇и г̇аруниссаяам̣ санд̇хааяа вуд̇д̇ам̣, на ид̇аранд̇и.
11.‘‘Nissāya te vatthabba’’nti garunissayaṃ sandhāya vuttaṃ, na itaranti.
21. ассаж̇ибунаб̣б̣асугавад̇т̇усмим̣ ‘‘д̇зсу виб̣бханд̇зсуби гаммам̣ бадиббассамбхзд̇ум̣ анун̃н̃аад̇амби саммаавад̇д̇анд̇аанам̣язваа’’д̇и ликид̇ам̣. саммукаа вуд̇д̇амзва г̇ихибадисам̣яуд̇д̇ам̣ наама. бараммукаа вуд̇д̇ам̣ д̣̇зсанам̣ г̇ажчад̇и.
21.Assajipunabbasukavatthusmiṃ ‘‘tesu vibbhantesupi kammaṃ paṭippassambhetuṃ anuññātampi sammāvattantānaṃyevā’’ti likhitaṃ. Sammukhā vuttameva gihipaṭisaṃyuttaṃ nāma. Parammukhā vuttaṃ desanaṃ gacchati.
41. камаабзнд̇зна ‘‘камаахий’’д̇и вад̇д̇аб̣б̣амад̇д̇амзва, на уггудигаад̣̇исаамийжинаа баяож̇ананд̇и. ануд̣̇ууд̇анд̇и сахааяанд̇и ад̇т̇о.
41. Khamāpentena ‘‘khamāhī’’ti vattabbamattameva, na ukkuṭikādisāmīcinā payojananti. Anudūtanti sahāyanti attho.
50. ад̣̇ассанзязва угкзбанийяам̣ гаад̇аб̣б̣ам̣, на ан̃н̃ат̇аа. ‘‘д̇аж̇ж̇анийяаад̣̇игаран̣агаалз аабад̇д̇им̣ робзд̇ваа д̇ассаа ад̣̇ассанз, аббадигаммз ваа бхан̣д̣анагаарагаад̣̇иан̇г̇зхи гаад̇аб̣б̣а’’нд̇и ликид̇ам̣.
50.Adassaneyeva ukkhepanīyaṃ kātabbaṃ, na aññathā. ‘‘Tajjanīyādikaraṇakāle āpattiṃ ropetvā tassā adassane, appaṭikamme vā bhaṇḍanakārakādiaṅgehi kātabba’’nti likhitaṃ.
д̇аж̇ж̇анийяагаммаад̣̇ийсу аяам̣ багин̣н̣агавинижчаяод̇и взд̣̇ид̇аб̣б̣о. гим̣ д̇аж̇ж̇анийяагаммам̣, д̇аж̇ж̇анийяагаммасса гим̣ муулам̣, гим̣ вад̇т̇у, гим̣ барияосаанам̣, гасмаа ‘‘д̇аж̇ж̇анийяагамма’’нд̇и вужжад̇ийд̇и? гим̣ д̇аж̇ж̇анийяагамманд̇и вад̇т̇усмим̣ сад̇и гаран̣асамбад̇д̇и. д̇аж̇ж̇анийяагаммасса гим̣ мууланд̇и сан̇гхо муулам̣. д̇аж̇ж̇анийяагаммасса гим̣ вад̇т̇ууд̇и галахаж̇аад̇аабад̇д̇ивад̇т̇у. гим̣ барияосаананд̇и бхааванаабарияосаанам̣. гасмаа д̇аж̇ж̇анийяагамманд̇и вужжад̇ийд̇и сан̇гхо галахагаарагабуг̇г̇алам̣ галахз жа бхзд̣̇з жа бхаяам̣ д̣̇ассзд̇ваа канд̇ияаа ж̇анзд̇и, убасамз ж̇анзд̇и, д̇асмаа ‘‘д̇аж̇ж̇анийяагамма’’нд̇и вужжад̇и. гат̇ам̣ д̇аж̇ж̇анийяагаммам̣ гад̇ам̣ ход̇и, гат̇ам̣ агад̇ам̣. гинд̇и жа д̇аж̇ж̇анийяагаммам̣ гад̇ам̣ ход̇и, гинд̇и жа агад̇ам̣. гзна жа д̇аж̇ж̇анийяагаммам̣ гад̇ам̣ ход̇и, гзна жа агад̇ам̣. гад̇т̇а жа д̇аж̇ж̇анийяагаммам̣ гад̇ам̣ ход̇и, гад̇т̇а жа агад̇ам̣. гааяа взлааяа д̇аж̇ж̇анийяагаммам̣ гад̇ам̣ ход̇и, гааяа взлааяа агад̇ам̣ ход̇и? гат̇ам̣ д̇аж̇ж̇анийяагаммам̣ гад̇ам̣ ход̇ийд̇и самаг̇г̇зна сан̇гхзна н̃ад̇д̇ижад̇уд̇т̇зна гаммзна. гат̇ам̣ агад̇ам̣ ход̇ийд̇и ваг̇г̇зна сан̇гхзна н̃ад̇д̇ижад̇уд̇т̇зна гаммзна. гинд̇и жа гад̇ам̣ ход̇ийд̇и гаран̣асамбад̇д̇ияаа. гинд̇и жа агад̇ам̣ ход̇ийд̇и гаран̣авибад̇д̇ияаа. гзна жа гад̇ам̣ ход̇ийд̇и сан̇гхзна. гзна жа агад̇ам̣ ход̇ийд̇и г̇ан̣зна буг̇г̇алзна. гад̇т̇а жа гад̇ам̣ ход̇ийд̇и яасса буг̇г̇аласса сан̇гхо д̇аж̇ж̇анийяагаммам̣ гарод̇и, д̇асса буг̇г̇аласса саммукийбхууд̇з. гад̇т̇а жа агад̇ам̣ ход̇ийд̇и яасса буг̇г̇аласса сан̇гхо д̇аж̇ж̇анийяагаммам̣ гарод̇и, д̇асса буг̇г̇аласса асаммукийбхууд̇з. гааяа взлааяа гад̇ам̣ ход̇ийд̇и яад̣̇аа галахаж̇аад̇аабад̇д̇и сам̣виж̇ж̇ад̇и. гааяа взлааяа агад̇ам̣ ход̇ийд̇и яад̣̇аа галахаж̇аад̇аабад̇д̇и на сам̣виж̇ж̇ад̇и. гад̇ихаагаарзхи д̇аж̇ж̇анийяагаммасса бад̇д̇агаллам̣ ход̇и, гад̇ихаагаарзхи абад̇д̇агаллам̣? сад̇д̇ахаагаарзхи д̇аж̇ж̇анийяагаммасса бад̇д̇агаллам̣ ход̇и, сад̇д̇ахаагаарзхи абад̇д̇агаллам̣. гад̇амзхи сад̇д̇ахаагаарзхи бад̇д̇агаллам̣, гад̇амзхи сад̇д̇ахаагаарзхи абад̇д̇агаллам̣ ход̇и? галахаж̇аад̇аабад̇д̇и на сам̣виж̇ж̇ад̇и, со ваа буг̇г̇ало асаммукийбхууд̇о ход̇и, сан̇гхо ваа ваг̇г̇о ход̇и, асам̣ваасиго ваа буг̇г̇ало д̇ассам̣ барисааяам̣ сам̣виж̇ж̇ад̇и, ажод̣̇ид̇о ваа ход̇и асаарид̇о ваа, аабад̇д̇им̣ ваа анааробид̇о. имзхи сад̇д̇ахаагаарзхи д̇аж̇ж̇анийяагаммасса абад̇д̇агаллам̣ ход̇и, ид̇арзхи сад̇д̇ахаагаарзхи бад̇д̇агаллам̣ ход̇и. звам̣ сзсагаммзсууд̇и.
Tajjanīyakammādīsu ayaṃ pakiṇṇakavinicchayoti veditabbo. Kiṃ tajjanīyakammaṃ, tajjanīyakammassa kiṃ mūlaṃ, kiṃ vatthu, kiṃ pariyosānaṃ, kasmā ‘‘tajjanīyakamma’’nti vuccatīti? Kiṃ tajjanīyakammanti vatthusmiṃ sati karaṇasampatti. Tajjanīyakammassa kiṃ mūlanti saṅgho mūlaṃ. Tajjanīyakammassa kiṃ vatthūti kalahajātāpattivatthu. Kiṃ pariyosānanti bhāvanāpariyosānaṃ. Kasmā tajjanīyakammanti vuccatīti saṅgho kalahakārakapuggalaṃ kalahe ca bhede ca bhayaṃ dassetvā khantiyā janeti, upasame janeti, tasmā ‘‘tajjanīyakamma’’nti vuccati. Kathaṃ tajjanīyakammaṃ kataṃ hoti, kathaṃ akataṃ. Kinti ca tajjanīyakammaṃ kataṃ hoti, kinti ca akataṃ. Kena ca tajjanīyakammaṃ kataṃ hoti, kena ca akataṃ. Kattha ca tajjanīyakammaṃ kataṃ hoti, kattha ca akataṃ. Kāya velāya tajjanīyakammaṃ kataṃ hoti, kāya velāya akataṃ hoti? Kathaṃ tajjanīyakammaṃ kataṃ hotīti samaggena saṅghena ñatticatutthena kammena. Kathaṃ akataṃ hotīti vaggena saṅghena ñatticatutthena kammena. Kinti ca kataṃ hotīti karaṇasampattiyā. Kinti ca akataṃ hotīti karaṇavipattiyā. Kena ca kataṃ hotīti saṅghena. Kena ca akataṃ hotīti gaṇena puggalena. Kattha ca kataṃ hotīti yassa puggalassa saṅgho tajjanīyakammaṃ karoti, tassa puggalassa sammukhībhūte. Kattha ca akataṃ hotīti yassa puggalassa saṅgho tajjanīyakammaṃ karoti, tassa puggalassa asammukhībhūte. Kāya velāya kataṃ hotīti yadā kalahajātāpatti saṃvijjati. Kāya velāya akataṃ hotīti yadā kalahajātāpatti na saṃvijjati. Katihākārehi tajjanīyakammassa pattakallaṃ hoti, katihākārehi apattakallaṃ? Sattahākārehi tajjanīyakammassa pattakallaṃ hoti, sattahākārehi apattakallaṃ. Katamehi sattahākārehi pattakallaṃ, katamehi sattahākārehi apattakallaṃ hoti? Kalahajātāpatti na saṃvijjati, so vā puggalo asammukhībhūto hoti, saṅgho vā vaggo hoti, asaṃvāsiko vā puggalo tassaṃ parisāyaṃ saṃvijjati, acodito vā hoti asārito vā, āpattiṃ vā anāropito. Imehi sattahākārehi tajjanīyakammassa apattakallaṃ hoti, itarehi sattahākārehi pattakallaṃ hoti. Evaṃ sesakammesūti.
гаммагканд̇хагаван̣н̣анаа нидтид̇аа.
Kammakkhandhakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi
ад̇хаммагаммад̣̇ваад̣̇асагам̣ • Adhammakammadvādasakaṃ
2. нияассагаммам̣ • 2. Niyassakammaṃ
3. баб̣б̣ааж̇анийяагаммам̣ • 3. Pabbājanīyakammaṃ
адтаарасавад̇д̇ам̣ • Aṭṭhārasavattaṃ
ааган̇камааначаггам̣ • Ākaṅkhamānachakkaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā
ад̇хаммагаммад̣̇ваад̣̇асагагат̇аа • Adhammakammadvādasakakathā
нияассагаммагат̇аа • Niyassakammakathā
баб̣б̣ааж̇анийяагаммагат̇аа • Pabbājanīyakammakathā
аабад̇д̇ияаа ад̣̇ассанз угкзбанийяагаммагат̇аа • Āpattiyā adassane ukkhepanīyakammakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā
ад̇хаммагаммад̣̇ваад̣̇асагагат̇ааван̣н̣анаа • Adhammakammadvādasakakathāvaṇṇanā
нияассагаммагат̇ааван̣н̣анаа • Niyassakammakathāvaṇṇanā
бадисааран̣ийяагаммагат̇ааван̣н̣анаа • Paṭisāraṇīyakammakathāvaṇṇanā
аабад̇д̇ияаа ад̣̇ассанз угкзбанийяагаммагат̇ааван̣н̣анаа • Āpattiyā adassane ukkhepanīyakammakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā
ад̇хаммагаммад̣̇ваад̣̇асагагат̇аад̣̇иван̣н̣анаа • Adhammakammadvādasakakathādivaṇṇanā
нияассагаммагат̇аад̣̇иван̣н̣анаа • Niyassakammakathādivaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi
ад̇хаммагаммад̣̇ваад̣̇асагагат̇аа • Adhammakammadvādasakakathā
2. нияассагаммагат̇аа • 2. Niyassakammakathā
5. аабад̇д̇ияаа ад̣̇ассанз угкзбанийяагаммагат̇аа • 5. Āpattiyā adassane ukkhepanīyakammakathā
