| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
အဓမ္မကမ္မဒ္ဝာဒသကံ
Adhammakammadvādasakaṃ
၄၈. ‘‘တီဟိ, ဘိက္ခဝေ, အင္ဂေဟိ သမန္နာဂတံ, အာပတ္တိယာ အဒသ္သနေ, ဥက္ခေပနီယကမ္မံ အဓမ္မကမ္မဉ္စ ဟောတိ, အဝိနယကမ္မဉ္စ, ဒုဝူပသန္တဉ္စ။ အသမ္မုခာ ကတံ ဟောတိ, အပ္ပဋိပုစ္ဆာ ကတံ ဟောတိ, အပ္ပဋိညာယ ကတံ ဟောတိ – ဣမေဟိ ခော, ဘိက္ခဝေ, တီဟင္ဂေဟိ သမန္နာဂတံ, အာပတ္တိယာ အဒသ္သနေ, ဥက္ခေပနီယကမ္မံ အဓမ္မကမ္မဉ္စ ဟောတိ, အဝိနယကမ္မဉ္စ, ဒုဝူပသန္တဉ္စ။
48. ‘‘Tīhi, bhikkhave, aṅgehi samannāgataṃ, āpattiyā adassane, ukkhepanīyakammaṃ adhammakammañca hoti, avinayakammañca, duvūpasantañca. Asammukhā kataṃ hoti, appaṭipucchā kataṃ hoti, appaṭiññāya kataṃ hoti – imehi kho, bhikkhave, tīhaṅgehi samannāgataṃ, āpattiyā adassane, ukkhepanīyakammaṃ adhammakammañca hoti, avinayakammañca, duvūpasantañca.
‘‘အပရေဟိပိ, ဘိက္ခဝေ, တီဟင္ဂေဟိ သမန္နာဂတံ, အာပတ္တိယာ အဒသ္သနေ, ဥက္ခေပနီယကမ္မံ အဓမ္မကမ္မဉ္စ ဟောတိ, အဝိနယကမ္မဉ္စ, ဒုဝူပသန္တဉ္စ။ အနာပတ္တိယာ ကတံ ဟောတိ, အဒေသနာဂာမိနိယာ အာပတ္တိယာ ကတံ ဟောတိ, ဒေသိတာယ အာပတ္တိယာ ကတံ ဟောတိ။ပေ.။ အစောဒေတ္ဝာ ကတံ ဟောတိ, အသာရေတ္ဝာ ကတံ ဟောတိ, အာပတ္တိံ အနာရောပေတ္ဝာ ကတံ ဟောတိ။ပေ.။ အသမ္မုခာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ အပ္ပဋိပုစ္ဆာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ အပ္ပဋိညာယ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ အနာပတ္တိယာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ အဒေသနာဂာမိနိယာ အာပတ္တိယာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ ဒေသိတာယ အာပတ္တိယာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ အစောဒေတ္ဝာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ အသာရေတ္ဝာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ။ပေ.။ အာပတ္တိံ အနာရောပေတ္ဝာ ကတံ ဟောတိ, အဓမ္မေန ကတံ ဟောတိ, ဝဂ္ဂေန ကတံ ဟောတိ – ဣမေဟိ ခော, ဘိက္ခဝေ, တီဟင္ဂေဟိ သမန္နာဂတံ, အာပတ္တိယာ အဒသ္သနေ, ဥက္ခေပနီယကမ္မံ အဓမ္မကမ္မဉ္စ ဟောတိ, အဝိနယကမ္မဉ္စ, ဒုဝူပသန္တဉ္စ။
‘‘Aparehipi, bhikkhave, tīhaṅgehi samannāgataṃ, āpattiyā adassane, ukkhepanīyakammaṃ adhammakammañca hoti, avinayakammañca, duvūpasantañca. Anāpattiyā kataṃ hoti, adesanāgāminiyā āpattiyā kataṃ hoti, desitāya āpattiyā kataṃ hoti…pe… acodetvā kataṃ hoti, asāretvā kataṃ hoti, āpattiṃ anāropetvā kataṃ hoti…pe… asammukhā kataṃ hoti, adhammena kataṃ hoti, vaggena kataṃ hoti…pe… appaṭipucchā kataṃ hoti, adhammena kataṃ hoti, vaggena kataṃ hoti…pe… appaṭiññāya kataṃ hoti, adhammena kataṃ hoti, vaggena kataṃ hoti…pe… anāpattiyā kataṃ hoti, adhammena kataṃ hoti, vaggena kataṃ hoti…pe… adesanāgāminiyā āpattiyā kataṃ hoti, adhammena kataṃ hoti, vaggena kataṃ hoti…pe… desitāya āpattiyā kataṃ hoti, adhammena kataṃ hoti, vaggena kataṃ hoti…pe… acodetvā kataṃ hoti, adhammena kataṃ hoti, vaggena kataṃ hoti…pe… asāretvā kataṃ hoti, adhammena kataṃ hoti, vaggena kataṃ hoti…pe… āpattiṃ anāropetvā kataṃ hoti, adhammena kataṃ hoti, vaggena kataṃ hoti – imehi kho, bhikkhave, tīhaṅgehi samannāgataṃ, āpattiyā adassane, ukkhepanīyakammaṃ adhammakammañca hoti, avinayakammañca, duvūpasantañca.
အာပတ္တိယာ အဒသ္သနေ ဥက္ခေပနီယကမ္မေ အဓမ္မကမ္မဒ္ဝာဒသကံ နိဋ္ဌိတံ။
Āpattiyā adassane ukkhepanīyakamme adhammakammadvādasakaṃ niṭṭhitaṃ.
