| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
82. அத⁴ம்மகம்மபடிக்கோஸனாதி³
82. Adhammakammapaṭikkosanādi
154. தேன கோ² பன ஸமயேன ச²ப்³ப³க்³கி³யா பி⁴க்கூ² ஸங்க⁴மஜ்ஜே² அத⁴ம்மகம்மங் கரொந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அத⁴ம்மகம்மங் காதப்³ப³ங். யோ கரெய்ய, ஆபத்தி து³க்கடஸ்ஸாதி. கரொந்தியேவ அத⁴ம்மகம்மங். ப⁴க³வதோ ஏதமத்த²ங் ஆரோசேஸுங் . அனுஜானாமி, பி⁴க்க²வே, அத⁴ம்மகம்மே கயிரமானே படிக்கோஸிதுந்தி.
154. Tena kho pana samayena chabbaggiyā bhikkhū saṅghamajjhe adhammakammaṃ karonti. Bhagavato etamatthaṃ ārocesuṃ. Na, bhikkhave, adhammakammaṃ kātabbaṃ. Yo kareyya, āpatti dukkaṭassāti. Karontiyeva adhammakammaṃ. Bhagavato etamatthaṃ ārocesuṃ . Anujānāmi, bhikkhave, adhammakamme kayiramāne paṭikkositunti.
தேன கோ² பன ஸமயேன பேஸலா பி⁴க்கூ² ச²ப்³ப³க்³கி³யேஹி பி⁴க்கூ²ஹி அத⁴ம்மகம்மே கயிரமானே படிக்கோஸந்தி. ச²ப்³ப³க்³கி³யா பி⁴க்கூ² லப⁴ந்தி ஆகா⁴தங், லப⁴ந்தி அப்பச்சயங், வதே⁴ன தஜ்ஜெந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, தி³ட்டி²ம்பி ஆவிகாதுந்தி. தேஸங்யேவ ஸந்திகே தி³ட்டி²ங் ஆவிகரொந்தி. ச²ப்³ப³க்³கி³யா பி⁴க்கூ² லப⁴ந்தி ஆகா⁴தங், லப⁴ந்தி அப்பச்சயங், வதே⁴ன தஜ்ஜெந்தி. ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, சதூஹி பஞ்சஹி படிக்கோஸிதுங், த்³வீஹி தீஹி தி³ட்டி²ங் ஆவிகாதுங், ஏகேன அதி⁴ட்டா²துங் – ‘ந மேதங் க²மதீ’தி.
Tena kho pana samayena pesalā bhikkhū chabbaggiyehi bhikkhūhi adhammakamme kayiramāne paṭikkosanti. Chabbaggiyā bhikkhū labhanti āghātaṃ, labhanti appaccayaṃ, vadhena tajjenti. Bhagavato etamatthaṃ ārocesuṃ. Anujānāmi, bhikkhave, diṭṭhimpi āvikātunti. Tesaṃyeva santike diṭṭhiṃ āvikaronti. Chabbaggiyā bhikkhū labhanti āghātaṃ, labhanti appaccayaṃ, vadhena tajjenti. Bhagavato etamatthaṃ ārocesuṃ. Anujānāmi, bhikkhave, catūhi pañcahi paṭikkosituṃ, dvīhi tīhi diṭṭhiṃ āvikātuṃ, ekena adhiṭṭhātuṃ – ‘na metaṃ khamatī’ti.
தேன கோ² பன ஸமயேன ச²ப்³ப³க்³கி³யா பி⁴க்கூ² ஸங்க⁴மஜ்ஜே² பாதிமொக்க²ங் உத்³தி³ஸமானா ஸஞ்சிச்ச ந ஸாவெந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, பாதிமொக்கு²த்³தே³ஸகேன ஸஞ்சிச்ச ந ஸாவேதப்³ப³ங். யோ ந ஸாவெய்ய, ஆபத்தி து³க்கடஸ்ஸாதி.
Tena kho pana samayena chabbaggiyā bhikkhū saṅghamajjhe pātimokkhaṃ uddisamānā sañcicca na sāventi. Bhagavato etamatthaṃ ārocesuṃ. Na, bhikkhave, pātimokkhuddesakena sañcicca na sāvetabbaṃ. Yo na sāveyya, āpatti dukkaṭassāti.
தேன கோ² பன ஸமயேன ஆயஸ்மா உதா³யீ ஸங்க⁴ஸ்ஸ பாதிமொக்கு²த்³தே³ஸகோ ஹோதி காகஸ்ஸரகோ. அத² கோ² ஆயஸ்மதோ உதா³யிஸ்ஸ ஏதத³ஹோஸி – ‘‘ப⁴க³வதா பஞ்ஞத்தங் ‘பாதிமொக்கு²த்³தே³ஸகேன ஸாவேதப்³ப³’ந்தி, அஹஞ்சம்ஹி காகஸ்ஸரகோ, கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, பாதிமொக்கு²த்³தே³ஸகேன வாயமிதுங் – ‘கத²ங் ஸாவெய்ய’ந்தி. வாயமந்தஸ்ஸ அனாபத்தீதி.
Tena kho pana samayena āyasmā udāyī saṅghassa pātimokkhuddesako hoti kākassarako. Atha kho āyasmato udāyissa etadahosi – ‘‘bhagavatā paññattaṃ ‘pātimokkhuddesakena sāvetabba’nti, ahañcamhi kākassarako, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, pātimokkhuddesakena vāyamituṃ – ‘kathaṃ sāveyya’nti. Vāyamantassa anāpattīti.
தேன கோ² பன ஸமயேன தே³வத³த்தோ ஸக³ஹட்டா²ய பரிஸாய பாதிமொக்க²ங் உத்³தி³ஸதி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஸக³ஹட்டா²ய பரிஸாய பாதிமொக்க²ங் உத்³தி³ஸிதப்³ப³ங். யோ உத்³தி³ஸெய்ய, ஆபத்தி து³க்கடஸ்ஸாதி.
Tena kho pana samayena devadatto sagahaṭṭhāya parisāya pātimokkhaṃ uddisati. Bhagavato etamatthaṃ ārocesuṃ. Na, bhikkhave, sagahaṭṭhāya parisāya pātimokkhaṃ uddisitabbaṃ. Yo uddiseyya, āpatti dukkaṭassāti.
தேன கோ² பன ஸமயேன ச²ப்³ப³க்³கி³யா பி⁴க்கூ² ஸங்க⁴மஜ்ஜே² அனஜ்ஜி²ட்டா² பாதிமொக்க²ங் உத்³தி³ஸந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஸங்க⁴மஜ்ஜே² அனஜ்ஜி²ட்டே²ன பாதிமொக்க²ங் உத்³தி³ஸிதப்³ப³ங். யோ உத்³தி³ஸெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தே²ராதி⁴கங் 1 பாதிமொக்க²ந்தி.
Tena kho pana samayena chabbaggiyā bhikkhū saṅghamajjhe anajjhiṭṭhā pātimokkhaṃ uddisanti. Bhagavato etamatthaṃ ārocesuṃ. Na, bhikkhave, saṅghamajjhe anajjhiṭṭhena pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, therādhikaṃ 2 pātimokkhanti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அத⁴ம்மகம்மபடிக்கோஸனாதி³கதா² • Adhammakammapaṭikkosanādikathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அத⁴ம்மகம்மபடிக்கோஸனாதி³கதா²வண்ணனா • Adhammakammapaṭikkosanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 82. அத⁴ம்மகம்மபடிக்கோஸனாதி³கதா² • 82. Adhammakammapaṭikkosanādikathā
