| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
৮২. অধম্মকম্মপটিক্কোসনাদি
82. Adhammakammapaṭikkosanādi
১৫৪. তেন খো পন সমযেন ছব্বগ্গিযা ভিক্খূ সঙ্ঘমজ্ঝে অধম্মকম্মং করোন্তি। ভগৰতো এতমত্থং আরোচেসুং। ন, ভিক্খৰে, অধম্মকম্মং কাতব্বং। যো করেয্য, আপত্তি দুক্কটস্সাতি। করোন্তিযেৰ অধম্মকম্মং। ভগৰতো এতমত্থং আরোচেসুং । অনুজানামি, ভিক্খৰে, অধম্মকম্মে কযিরমানে পটিক্কোসিতুন্তি।
154. Tena kho pana samayena chabbaggiyā bhikkhū saṅghamajjhe adhammakammaṃ karonti. Bhagavato etamatthaṃ ārocesuṃ. Na, bhikkhave, adhammakammaṃ kātabbaṃ. Yo kareyya, āpatti dukkaṭassāti. Karontiyeva adhammakammaṃ. Bhagavato etamatthaṃ ārocesuṃ . Anujānāmi, bhikkhave, adhammakamme kayiramāne paṭikkositunti.
তেন খো পন সমযেন পেসলা ভিক্খূ ছব্বগ্গিযেহি ভিক্খূহি অধম্মকম্মে কযিরমানে পটিক্কোসন্তি। ছব্বগ্গিযা ভিক্খূ লভন্তি আঘাতং, লভন্তি অপ্পচ্চযং, ৰধেন তজ্জেন্তি। ভগৰতো এতমত্থং আরোচেসুং। অনুজানামি, ভিক্খৰে, দিট্ঠিম্পি আৰিকাতুন্তি। তেসংযেৰ সন্তিকে দিট্ঠিং আৰিকরোন্তি। ছব্বগ্গিযা ভিক্খূ লভন্তি আঘাতং, লভন্তি অপ্পচ্চযং, ৰধেন তজ্জেন্তি। ভগৰতো এতমত্থং আরোচেসুং। অনুজানামি, ভিক্খৰে, চতূহি পঞ্চহি পটিক্কোসিতুং, দ্ৰীহি তীহি দিট্ঠিং আৰিকাতুং, একেন অধিট্ঠাতুং – ‘ন মেতং খমতী’তি।
Tena kho pana samayena pesalā bhikkhū chabbaggiyehi bhikkhūhi adhammakamme kayiramāne paṭikkosanti. Chabbaggiyā bhikkhū labhanti āghātaṃ, labhanti appaccayaṃ, vadhena tajjenti. Bhagavato etamatthaṃ ārocesuṃ. Anujānāmi, bhikkhave, diṭṭhimpi āvikātunti. Tesaṃyeva santike diṭṭhiṃ āvikaronti. Chabbaggiyā bhikkhū labhanti āghātaṃ, labhanti appaccayaṃ, vadhena tajjenti. Bhagavato etamatthaṃ ārocesuṃ. Anujānāmi, bhikkhave, catūhi pañcahi paṭikkosituṃ, dvīhi tīhi diṭṭhiṃ āvikātuṃ, ekena adhiṭṭhātuṃ – ‘na metaṃ khamatī’ti.
তেন খো পন সমযেন ছব্বগ্গিযা ভিক্খূ সঙ্ঘমজ্ঝে পাতিমোক্খং উদ্দিসমানা সঞ্চিচ্চ ন সাৰেন্তি। ভগৰতো এতমত্থং আরোচেসুং। ন, ভিক্খৰে, পাতিমোক্খুদ্দেসকেন সঞ্চিচ্চ ন সাৰেতব্বং। যো ন সাৰেয্য, আপত্তি দুক্কটস্সাতি।
Tena kho pana samayena chabbaggiyā bhikkhū saṅghamajjhe pātimokkhaṃ uddisamānā sañcicca na sāventi. Bhagavato etamatthaṃ ārocesuṃ. Na, bhikkhave, pātimokkhuddesakena sañcicca na sāvetabbaṃ. Yo na sāveyya, āpatti dukkaṭassāti.
তেন খো পন সমযেন আযস্মা উদাযী সঙ্ঘস্স পাতিমোক্খুদ্দেসকো হোতি কাকস্সরকো। অথ খো আযস্মতো উদাযিস্স এতদহোসি – ‘‘ভগৰতা পঞ্ঞত্তং ‘পাতিমোক্খুদ্দেসকেন সাৰেতব্ব’ন্তি, অহঞ্চম্হি কাকস্সরকো, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, পাতিমোক্খুদ্দেসকেন ৰাযমিতুং – ‘কথং সাৰেয্য’ন্তি। ৰাযমন্তস্স অনাপত্তীতি।
Tena kho pana samayena āyasmā udāyī saṅghassa pātimokkhuddesako hoti kākassarako. Atha kho āyasmato udāyissa etadahosi – ‘‘bhagavatā paññattaṃ ‘pātimokkhuddesakena sāvetabba’nti, ahañcamhi kākassarako, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, pātimokkhuddesakena vāyamituṃ – ‘kathaṃ sāveyya’nti. Vāyamantassa anāpattīti.
তেন খো পন সমযেন দেৰদত্তো সগহট্ঠায পরিসায পাতিমোক্খং উদ্দিসতি। ভগৰতো এতমত্থং আরোচেসুং। ন, ভিক্খৰে, সগহট্ঠায পরিসায পাতিমোক্খং উদ্দিসিতব্বং। যো উদ্দিসেয্য, আপত্তি দুক্কটস্সাতি।
Tena kho pana samayena devadatto sagahaṭṭhāya parisāya pātimokkhaṃ uddisati. Bhagavato etamatthaṃ ārocesuṃ. Na, bhikkhave, sagahaṭṭhāya parisāya pātimokkhaṃ uddisitabbaṃ. Yo uddiseyya, āpatti dukkaṭassāti.
তেন খো পন সমযেন ছব্বগ্গিযা ভিক্খূ সঙ্ঘমজ্ঝে অনজ্ঝিট্ঠা পাতিমোক্খং উদ্দিসন্তি। ভগৰতো এতমত্থং আরোচেসুং। ন, ভিক্খৰে, সঙ্ঘমজ্ঝে অনজ্ঝিট্ঠেন পাতিমোক্খং উদ্দিসিতব্বং। যো উদ্দিসেয্য, আপত্তি দুক্কটস্স। অনুজানামি, ভিক্খৰে, থেরাধিকং 1 পাতিমোক্খন্তি।
Tena kho pana samayena chabbaggiyā bhikkhū saṅghamajjhe anajjhiṭṭhā pātimokkhaṃ uddisanti. Bhagavato etamatthaṃ ārocesuṃ. Na, bhikkhave, saṅghamajjhe anajjhiṭṭhena pātimokkhaṃ uddisitabbaṃ. Yo uddiseyya, āpatti dukkaṭassa. Anujānāmi, bhikkhave, therādhikaṃ 2 pātimokkhanti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / অধম্মকম্মপটিক্কোসনাদিকথা • Adhammakammapaṭikkosanādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধম্মকম্মপটিক্কোসনাদিকথাৰণ্ণনা • Adhammakammapaṭikkosanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮২. অধম্মকম্মপটিক্কোসনাদিকথা • 82. Adhammakammapaṭikkosanādikathā
