| Library / Tipiṭaka / तिपिटक • Tipiṭaka / महावग्ग-अट्ठकथा • Mahāvagga-aṭṭhakathā |
अधम्मकम्मपटिक्कोसनादिकथा
Adhammakammapaṭikkosanādikathā
१५४. अधम्मकम्मं वुत्तनयमेव। पटिक्कोसितुन्ति वारेतुं। दिट्ठिम्पि आविकातुन्ति ‘‘अधम्मकम्मं इदं न मे खमती’’ति एवं अञ्ञस्स सन्तिके अत्तनो दिट्ठिं पकासेतुं। चतूहि पञ्चहीतिआदि तेसं अनुपद्दवत्थाय वुत्तं। सञ्चिच्च न सावेन्तीति यथा न सुणन्ति एवं भणिस्सामाति सञ्चिच्च सणिकं उद्दिसन्ति।
154.Adhammakammaṃ vuttanayameva. Paṭikkositunti vāretuṃ. Diṭṭhimpi āvikātunti ‘‘adhammakammaṃ idaṃ na me khamatī’’ti evaṃ aññassa santike attano diṭṭhiṃ pakāsetuṃ. Catūhi pañcahītiādi tesaṃ anupaddavatthāya vuttaṃ. Sañcicca na sāventīti yathā na suṇanti evaṃ bhaṇissāmāti sañcicca saṇikaṃ uddisanti.
१५५. थेराधिकन्ति थेराधीनं; थेरायत्तं भवितुन्ति अत्थो। ‘‘थेराधेय्य’’न्तिपि पाठो, तस्मा थेरेन सयं वा उद्दिसितब्बं, अञ्ञो वा अज्झेसितब्बो। अज्झेसनविधानञ्चेत्थ धम्मज्झेसने वुत्तनयमेव। सो न जानाति उपोसथं वातिआदीसु चातुद्दसिकपन्नरसिकभेदेन दुविधं, सङ्घउपोसथादिभेदेन नवविधञ्च उपोसथं न जानाति, चतुब्बिधं उपोसथकम्मं न जानाति, दुविधं पातिमोक्खं न जानाति, नवविधं पातिमोक्खुद्देसं न जानाति। यो तत्थ भिक्खु ब्यत्तो पटिबलोति एत्थ किञ्चापि दहरस्सापि ब्यत्तस्स पातिमोक्खो अनुञ्ञातो। अथ खो एत्थ अयमधिप्पायो। सचे थेरस्स पञ्च वा चत्तारो वा तयो वा पातिमोक्खुद्देसा नागच्छन्ति; द्वे पन अखण्डा सुविसदा वाचुग्गता होन्ति, थेरायत्तोव पातिमोक्खा। सचे पन एत्तकम्पि विसदं कातुं न सक्कोति, ब्यत्तस्स भिक्खुनो आयत्तो होति।
155.Therādhikanti therādhīnaṃ; therāyattaṃ bhavitunti attho. ‘‘Therādheyya’’ntipi pāṭho, tasmā therena sayaṃ vā uddisitabbaṃ, añño vā ajjhesitabbo. Ajjhesanavidhānañcettha dhammajjhesane vuttanayameva. So najānāti uposathaṃ vātiādīsu cātuddasikapannarasikabhedena duvidhaṃ, saṅghauposathādibhedena navavidhañca uposathaṃ na jānāti, catubbidhaṃ uposathakammaṃ na jānāti, duvidhaṃ pātimokkhaṃ na jānāti, navavidhaṃ pātimokkhuddesaṃ na jānāti. Yo tattha bhikkhu byatto paṭibaloti ettha kiñcāpi daharassāpi byattassa pātimokkho anuññāto. Atha kho ettha ayamadhippāyo. Sace therassa pañca vā cattāro vā tayo vā pātimokkhuddesā nāgacchanti; dve pana akhaṇḍā suvisadā vācuggatā honti, therāyattova pātimokkhā. Sace pana ettakampi visadaṃ kātuṃ na sakkoti, byattassa bhikkhuno āyatto hoti.
सामन्ता आवासाति सामन्तं आवासं। सज्जुकन्ति तदहेव आगमनत्थाय। नवं भिक्खुं आणापेतुन्ति एत्थ यो सक्कोति उग्गहेतुं, एवरूपो आणापेतब्बो, न बालो।
Sāmantā āvāsāti sāmantaṃ āvāsaṃ. Sajjukanti tadaheva āgamanatthāya. Navaṃ bhikkhuṃ āṇāpetunti ettha yo sakkoti uggahetuṃ, evarūpo āṇāpetabbo, na bālo.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi
८२. अधम्मकम्मपटिक्कोसनादि • 82. Adhammakammapaṭikkosanādi
८३. पातिमोक्खुद्देसकअज्झेसनादि • 83. Pātimokkhuddesakaajjhesanādi
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पातिमोक्खुद्देसकअज्झेसनादिकथावण्णना • Pātimokkhuddesakaajjhesanādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā
अधम्मकम्मपटिक्कोसनादिकथावण्णना • Adhammakammapaṭikkosanādikathāvaṇṇanā
पातिमोक्खुद्देसकअज्झेसनादिकथावण्णना • Pātimokkhuddesakaajjhesanādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / अधम्मकम्मपटिक्कोसनादिकथावण्णना • Adhammakammapaṭikkosanādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi
८२. अधम्मकम्मपटिक्कोसनादिकथा • 82. Adhammakammapaṭikkosanādikathā
८३. पातिमोक्खुद्देसकअज्झेसनादिकथा • 83. Pātimokkhuddesakaajjhesanādikathā
