| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಅಧಮ್ಮಕಮ್ಮಪಟಿಕ್ಕೋಸನಾದಿಕಥಾ
Adhammakammapaṭikkosanādikathā
೧೫೪. ಅಧಮ್ಮಕಮ್ಮಂ ವುತ್ತನಯಮೇವ। ಪಟಿಕ್ಕೋಸಿತುನ್ತಿ ವಾರೇತುಂ। ದಿಟ್ಠಿಮ್ಪಿ ಆವಿಕಾತುನ್ತಿ ‘‘ಅಧಮ್ಮಕಮ್ಮಂ ಇದಂ ನ ಮೇ ಖಮತೀ’’ತಿ ಏವಂ ಅಞ್ಞಸ್ಸ ಸನ್ತಿಕೇ ಅತ್ತನೋ ದಿಟ್ಠಿಂ ಪಕಾಸೇತುಂ। ಚತೂಹಿ ಪಞ್ಚಹೀತಿಆದಿ ತೇಸಂ ಅನುಪದ್ದವತ್ಥಾಯ ವುತ್ತಂ। ಸಞ್ಚಿಚ್ಚ ನ ಸಾವೇನ್ತೀತಿ ಯಥಾ ನ ಸುಣನ್ತಿ ಏವಂ ಭಣಿಸ್ಸಾಮಾತಿ ಸಞ್ಚಿಚ್ಚ ಸಣಿಕಂ ಉದ್ದಿಸನ್ತಿ।
154.Adhammakammaṃ vuttanayameva. Paṭikkositunti vāretuṃ. Diṭṭhimpi āvikātunti ‘‘adhammakammaṃ idaṃ na me khamatī’’ti evaṃ aññassa santike attano diṭṭhiṃ pakāsetuṃ. Catūhi pañcahītiādi tesaṃ anupaddavatthāya vuttaṃ. Sañcicca na sāventīti yathā na suṇanti evaṃ bhaṇissāmāti sañcicca saṇikaṃ uddisanti.
೧೫೫. ಥೇರಾಧಿಕನ್ತಿ ಥೇರಾಧೀನಂ; ಥೇರಾಯತ್ತಂ ಭವಿತುನ್ತಿ ಅತ್ಥೋ। ‘‘ಥೇರಾಧೇಯ್ಯ’’ನ್ತಿಪಿ ಪಾಠೋ, ತಸ್ಮಾ ಥೇರೇನ ಸಯಂ ವಾ ಉದ್ದಿಸಿತಬ್ಬಂ, ಅಞ್ಞೋ ವಾ ಅಜ್ಝೇಸಿತಬ್ಬೋ। ಅಜ್ಝೇಸನವಿಧಾನಞ್ಚೇತ್ಥ ಧಮ್ಮಜ್ಝೇಸನೇ ವುತ್ತನಯಮೇವ। ಸೋ ನ ಜಾನಾತಿ ಉಪೋಸಥಂ ವಾತಿಆದೀಸು ಚಾತುದ್ದಸಿಕಪನ್ನರಸಿಕಭೇದೇನ ದುವಿಧಂ, ಸಙ್ಘಉಪೋಸಥಾದಿಭೇದೇನ ನವವಿಧಞ್ಚ ಉಪೋಸಥಂ ನ ಜಾನಾತಿ, ಚತುಬ್ಬಿಧಂ ಉಪೋಸಥಕಮ್ಮಂ ನ ಜಾನಾತಿ, ದುವಿಧಂ ಪಾತಿಮೋಕ್ಖಂ ನ ಜಾನಾತಿ, ನವವಿಧಂ ಪಾತಿಮೋಕ್ಖುದ್ದೇಸಂ ನ ಜಾನಾತಿ। ಯೋ ತತ್ಥ ಭಿಕ್ಖು ಬ್ಯತ್ತೋ ಪಟಿಬಲೋತಿ ಏತ್ಥ ಕಿಞ್ಚಾಪಿ ದಹರಸ್ಸಾಪಿ ಬ್ಯತ್ತಸ್ಸ ಪಾತಿಮೋಕ್ಖೋ ಅನುಞ್ಞಾತೋ। ಅಥ ಖೋ ಏತ್ಥ ಅಯಮಧಿಪ್ಪಾಯೋ। ಸಚೇ ಥೇರಸ್ಸ ಪಞ್ಚ ವಾ ಚತ್ತಾರೋ ವಾ ತಯೋ ವಾ ಪಾತಿಮೋಕ್ಖುದ್ದೇಸಾ ನಾಗಚ್ಛನ್ತಿ; ದ್ವೇ ಪನ ಅಖಣ್ಡಾ ಸುವಿಸದಾ ವಾಚುಗ್ಗತಾ ಹೋನ್ತಿ, ಥೇರಾಯತ್ತೋವ ಪಾತಿಮೋಕ್ಖಾ। ಸಚೇ ಪನ ಏತ್ತಕಮ್ಪಿ ವಿಸದಂ ಕಾತುಂ ನ ಸಕ್ಕೋತಿ, ಬ್ಯತ್ತಸ್ಸ ಭಿಕ್ಖುನೋ ಆಯತ್ತೋ ಹೋತಿ।
155.Therādhikanti therādhīnaṃ; therāyattaṃ bhavitunti attho. ‘‘Therādheyya’’ntipi pāṭho, tasmā therena sayaṃ vā uddisitabbaṃ, añño vā ajjhesitabbo. Ajjhesanavidhānañcettha dhammajjhesane vuttanayameva. So najānāti uposathaṃ vātiādīsu cātuddasikapannarasikabhedena duvidhaṃ, saṅghauposathādibhedena navavidhañca uposathaṃ na jānāti, catubbidhaṃ uposathakammaṃ na jānāti, duvidhaṃ pātimokkhaṃ na jānāti, navavidhaṃ pātimokkhuddesaṃ na jānāti. Yo tattha bhikkhu byatto paṭibaloti ettha kiñcāpi daharassāpi byattassa pātimokkho anuññāto. Atha kho ettha ayamadhippāyo. Sace therassa pañca vā cattāro vā tayo vā pātimokkhuddesā nāgacchanti; dve pana akhaṇḍā suvisadā vācuggatā honti, therāyattova pātimokkhā. Sace pana ettakampi visadaṃ kātuṃ na sakkoti, byattassa bhikkhuno āyatto hoti.
ಸಾಮನ್ತಾ ಆವಾಸಾತಿ ಸಾಮನ್ತಂ ಆವಾಸಂ। ಸಜ್ಜುಕನ್ತಿ ತದಹೇವ ಆಗಮನತ್ಥಾಯ। ನವಂ ಭಿಕ್ಖುಂ ಆಣಾಪೇತುನ್ತಿ ಏತ್ಥ ಯೋ ಸಕ್ಕೋತಿ ಉಗ್ಗಹೇತುಂ, ಏವರೂಪೋ ಆಣಾಪೇತಬ್ಬೋ, ನ ಬಾಲೋ।
Sāmantā āvāsāti sāmantaṃ āvāsaṃ. Sajjukanti tadaheva āgamanatthāya. Navaṃ bhikkhuṃ āṇāpetunti ettha yo sakkoti uggahetuṃ, evarūpo āṇāpetabbo, na bālo.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೮೨. ಅಧಮ್ಮಕಮ್ಮಪಟಿಕ್ಕೋಸನಾದಿ • 82. Adhammakammapaṭikkosanādi
೮೩. ಪಾತಿಮೋಕ್ಖುದ್ದೇಸಕಅಜ್ಝೇಸನಾದಿ • 83. Pātimokkhuddesakaajjhesanādi
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾತಿಮೋಕ್ಖುದ್ದೇಸಕಅಜ್ಝೇಸನಾದಿಕಥಾವಣ್ಣನಾ • Pātimokkhuddesakaajjhesanādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā
ಅಧಮ್ಮಕಮ್ಮಪಟಿಕ್ಕೋಸನಾದಿಕಥಾವಣ್ಣನಾ • Adhammakammapaṭikkosanādikathāvaṇṇanā
ಪಾತಿಮೋಕ್ಖುದ್ದೇಸಕಅಜ್ಝೇಸನಾದಿಕಥಾವಣ್ಣನಾ • Pātimokkhuddesakaajjhesanādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಧಮ್ಮಕಮ್ಮಪಟಿಕ್ಕೋಸನಾದಿಕಥಾವಣ್ಣನಾ • Adhammakammapaṭikkosanādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi
೮೨. ಅಧಮ್ಮಕಮ್ಮಪಟಿಕ್ಕೋಸನಾದಿಕಥಾ • 82. Adhammakammapaṭikkosanādikathā
೮೩. ಪಾತಿಮೋಕ್ಖುದ್ದೇಸಕಅಜ್ಝೇಸನಾದಿಕಥಾ • 83. Pātimokkhuddesakaajjhesanādikathā
