| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၁၇. အဓမ္မိကကတိကာ
117. Adhammikakatikā
၂၀၅. တေန ခော ပန သမယေန သာဝတ္ထိယာ သင္ဃေန ဧဝရူပာ ကတိကာ ကတာ ဟောတိ – အန္တရာဝသ္သံ န ပဗ္ဗာဇေတဗ္ဗန္တိ။ ဝိသာခာယ မိဂာရမာတုယာ နတ္တာ ဘိက္ခူ ဥပသင္ကမိတ္ဝာ ပဗ္ဗဇ္ဇံ ယာစိ။ ဘိက္ခူ ဧဝမာဟံသု – ‘‘သင္ဃေန ခော, အာဝုသော, ဧဝရူပာ ကတိကာ ကတာ ‘အန္တရာဝသ္သံ န ပဗ္ဗာဇေတဗ္ဗ’န္တိ။ အာဂမေဟိ, အာဝုသော, ယာဝ ဘိက္ခူ ဝသ္သံ ဝသန္တိ။ ဝသ္သံဝုဋ္ဌာ ပဗ္ဗာဇေသ္သန္တီ’’တိ။ အထ ခော တေ ဘိက္ခူ ဝသ္သံဝုဋ္ဌာ ဝိသာခာယ မိဂာရမာတုယာ နတ္တာရံ ဧတဒဝောစုံ – ‘‘ဧဟိ, ဒာနိ, အာဝုသော, ပဗ္ဗဇာဟီ’’တိ။ သော ဧဝမာဟ – ‘‘သစာဟံ, ဘန္တေ, ပဗ္ဗဇိတော အသ္သံ, အဘိရမေယ္ယာမဟံ 1။ န ဒာနာဟံ, ဘန္တေ, ပဗ္ဗဇိသ္သာမီ’’တိ။ ဝိသာခာ မိဂာရမာတာ ဥဇ္ဈာယတိ ခိယ္ယတိ ဝိပာစေတိ – ‘‘ကထဉ္ဟိ နာမ အယ္ယာ ဧဝရူပံ ကတိကံ ကရိသ္သန္တိ ‘န အန္တရာဝသ္သံ ပဗ္ဗာဇေတဗ္ဗ’န္တိ။ ကံ ကာလံ ဓမ္မော န စရိတဗ္ဗော’’တိ? အသ္သောသုံ ခော ဘိက္ခူ ဝိသာခာယ မိဂာရမာတုယာ ဥဇ္ဈာယန္တိယာ ခိယ္ယန္တိယာ ဝိပာစေန္တိယာ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ န, ဘိက္ခဝေ, ဧဝရူပာ ကတိကာ ကာတဗ္ဗာ – ‘န အန္တရာဝသ္သံ ပဗ္ဗာဇေတဗ္ဗ’န္တိ။ ယော ကရေယ္ယ, အာပတ္တိ ဒုက္ကဋသ္သာတိ။
205. Tena kho pana samayena sāvatthiyā saṅghena evarūpā katikā katā hoti – antarāvassaṃ na pabbājetabbanti. Visākhāya migāramātuyā nattā bhikkhū upasaṅkamitvā pabbajjaṃ yāci. Bhikkhū evamāhaṃsu – ‘‘saṅghena kho, āvuso, evarūpā katikā katā ‘antarāvassaṃ na pabbājetabba’nti. Āgamehi, āvuso, yāva bhikkhū vassaṃ vasanti. Vassaṃvuṭṭhā pabbājessantī’’ti. Atha kho te bhikkhū vassaṃvuṭṭhā visākhāya migāramātuyā nattāraṃ etadavocuṃ – ‘‘ehi, dāni, āvuso, pabbajāhī’’ti. So evamāha – ‘‘sacāhaṃ, bhante, pabbajito assaṃ, abhirameyyāmahaṃ 2. Na dānāhaṃ, bhante, pabbajissāmī’’ti. Visākhā migāramātā ujjhāyati khiyyati vipāceti – ‘‘kathañhi nāma ayyā evarūpaṃ katikaṃ karissanti ‘na antarāvassaṃ pabbājetabba’nti. Kaṃ kālaṃ dhammo na caritabbo’’ti? Assosuṃ kho bhikkhū visākhāya migāramātuyā ujjhāyantiyā khiyyantiyā vipācentiyā. Atha kho te bhikkhū bhagavato etamatthaṃ ārocesuṃ. Na, bhikkhave, evarūpā katikā kātabbā – ‘na antarāvassaṃ pabbājetabba’nti. Yo kareyya, āpatti dukkaṭassāti.
အဓမ္မိကကတိကာ နိဋ္ဌိတာ။
Adhammikakatikā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / အဓမ္မိကကတိကာဒိကထာ • Adhammikakatikādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အဓမ္မိကကတိကကထာဝဏ္ဏနာ • Adhammikakatikakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အဓမ္မိကကတိကာဒိကထာဝဏ္ဏနာ • Adhammikakatikādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အဓမ္မိကကတိကာဒိကထာဝဏ္ဏနာ • Adhammikakatikādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၁၇. အဓမ္မိကကတိကာကထာ • 117. Adhammikakatikākathā
