| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
অধম্মিককতিকাদিকথা
Adhammikakatikādikathā
২০৫. এৰরূপা কতিকাতি এত্থ অঞ্ঞাপি যা ঈদিসী অধম্মিকা কতিকা হোতি, সা ন কাতব্বাতি অত্থো। তস্সা লক্খণং মহাৰিভঙ্গে ৰুত্তং।
205.Evarūpā katikāti ettha aññāpi yā īdisī adhammikā katikā hoti, sā na kātabbāti attho. Tassā lakkhaṇaṃ mahāvibhaṅge vuttaṃ.
২০৭-৮. পটিস্সৰে চ আপত্তি দুক্কটস্সাতি এত্থ ন কেৰলং ‘‘ইমং তেমাসং ইধ ৰস্সং ৰসথা’’তি এতস্সেৰ পটিস্সৰে আপত্তি, ‘‘ইমং তেমাসং ভিক্খং গণ্হথ, উভোপি মযং ইধ ৰস্সং ৰসিস্সাম, একতো উদ্দিসাপেস্সামা’’তি এৰমাদিনাপি তস্স তস্স পটিস্সৰে দুক্কটং। তঞ্চ খো পঠমং সুদ্ধচিত্তস্স পচ্ছা ৰিসংৰাদনপচ্চযা, পঠমম্পি অসুদ্ধচিত্তস্স পন পটিস্সৰে পাচিত্তিযং, ৰিসংৰাদনে দুক্কটন্তি পাচিত্তিযেন সদ্ধিং দুক্কটং যুজ্জতি।
207-8.Paṭissave ca āpatti dukkaṭassāti ettha na kevalaṃ ‘‘imaṃ temāsaṃ idha vassaṃ vasathā’’ti etasseva paṭissave āpatti, ‘‘imaṃ temāsaṃ bhikkhaṃ gaṇhatha, ubhopi mayaṃ idha vassaṃ vasissāma, ekato uddisāpessāmā’’ti evamādināpi tassa tassa paṭissave dukkaṭaṃ. Tañca kho paṭhamaṃ suddhacittassa pacchā visaṃvādanapaccayā, paṭhamampi asuddhacittassa pana paṭissave pācittiyaṃ, visaṃvādane dukkaṭanti pācittiyena saddhiṃ dukkaṭaṃ yujjati.
সো তদহেৰ অকরণীযোতিআদীসু সচে ৰস্সং অনুপগন্ত্ৰা ৰা পক্কমতি, উপগন্ত্ৰা ৰা সত্তাহং বহিদ্ধা ৰীতিনামেতি, পুরিমিকা চ ন পঞ্ঞাযতি, পটিস্সৰে চ আপত্তি। ৰস্সং উপগন্ত্ৰা পন অরুণং অনুট্ঠাপেত্ৰা তদহেৰ সত্তাহকরণীযেন পক্কমন্তস্সাপি অন্তোসত্তাহে নিৰত্তন্তস্স অনাপত্তি, কো পন ৰাদো দ্ৰীহতীহং ৰসিত্ৰা অন্তোসত্তাহে নিৰত্তন্তস্স। দ্ৰীহতীহং ৰসিত্ৰাতি এত্থাপি নিরপেক্খেনেৰ উপচারাতিক্কমে ৰস্সচ্ছেদো ৰেদিতব্বো। সচে ইধ ৰসিস্সামীতি আলযো অত্থি, অসতিযা পন ৰস্সং ন উপেতি, গহিতসেনাসনং সুগ্গহিতং, ছিন্নৰস্সো ন হোতি, পৰারেতুং লভতিযেৰ।
Sotadaheva akaraṇīyotiādīsu sace vassaṃ anupagantvā vā pakkamati, upagantvā vā sattāhaṃ bahiddhā vītināmeti, purimikā ca na paññāyati, paṭissave ca āpatti. Vassaṃ upagantvā pana aruṇaṃ anuṭṭhāpetvā tadaheva sattāhakaraṇīyena pakkamantassāpi antosattāhe nivattantassa anāpatti, ko pana vādo dvīhatīhaṃ vasitvā antosattāhe nivattantassa. Dvīhatīhaṃ vasitvāti etthāpi nirapekkheneva upacārātikkame vassacchedo veditabbo. Sace idha vasissāmīti ālayo atthi, asatiyā pana vassaṃ na upeti, gahitasenāsanaṃ suggahitaṃ, chinnavasso na hoti, pavāretuṃ labhatiyeva.
সত্তাহং অনাগতায পৰারণাযাতি এত্থ নৰমিতো পট্ঠায গন্তুং ৰট্টতি, আগচ্ছতু ৰা মা ৰা, অনাপত্তি। সেসং উত্তানমেৰাতি।
Sattāhaṃ anāgatāya pavāraṇāyāti ettha navamito paṭṭhāya gantuṃ vaṭṭati, āgacchatu vā mā vā, anāpatti. Sesaṃ uttānamevāti.
ৰস্সূপনাযিকক্খন্ধকৰণ্ণনা নিট্ঠিতা।
Vassūpanāyikakkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১১৭. অধম্মিককতিকা • 117. Adhammikakatikā
১১৮. পটিস্সৰদুক্কটাপত্তি • 118. Paṭissavadukkaṭāpatti
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
অধম্মিককতিককথাৰণ্ণনা • Adhammikakatikakathāvaṇṇanā
পটিস্সৰদুক্কটাপত্তিকথাৰণ্ণনা • Paṭissavadukkaṭāpattikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধম্মিককতিকাদিকথাৰণ্ণনা • Adhammikakatikādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধম্মিককতিকাদিকথাৰণ্ণনা • Adhammikakatikādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
১১৭. অধম্মিককতিকাকথা • 117. Adhammikakatikākathā
১১৮. পটিস্সৰদুক্কটাপত্তিকথা • 118. Paṭissavadukkaṭāpattikathā
