| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
அத⁴ம்மிககதிகாதி³கதா²வண்ணனா
Adhammikakatikādikathāvaṇṇanā
205. மஹாவிப⁴ங்கே³ வுத்தந்தி எத்த² அயங் அந்த⁴கட்ட²கதா²வசனங் ஊனபன்னரஸவஸ்ஸேன ஸாமணேரேன இத⁴ விஹாரே ந வத்த²ப்³பா³, ந பங்ஸுகூலங் ஆஹிண்டி³தப்³ப³ங், ந சோளபி⁴க்கா² க³ஹேதப்³பா³, ந அஞ்ஞவிஹாரே பு⁴ஞ்ஜிதப்³ப³ங், ந அஞ்ஞஸ்ஸ பி⁴க்கு²ஸ்ஸ வா பி⁴க்கு²னியா வா ஸந்தகங் பு⁴ஞ்ஜிதப்³ப³ங், அஞ்ஞமஞ்ஞங் நேவ ஆலபெய்யாம ந ஸல்லபெய்யாம, ந ஸஜ்ஜா²யிதப்³ப³ங், மத்திகாபத்தேன வட்டதி, ந அபரிபுண்ணபரிக்கா²ரஸ்ஸ வாஸோதி.
205.Mahāvibhaṅge vuttanti ettha ayaṃ andhakaṭṭhakathāvacanaṃ ūnapannarasavassena sāmaṇerena idha vihāre na vatthabbā, na paṃsukūlaṃ āhiṇḍitabbaṃ, na coḷabhikkhā gahetabbā, na aññavihāre bhuñjitabbaṃ, na aññassa bhikkhussa vā bhikkhuniyā vā santakaṃ bhuñjitabbaṃ, aññamaññaṃ neva ālapeyyāma na sallapeyyāma, na sajjhāyitabbaṃ, mattikāpattena vaṭṭati, na aparipuṇṇaparikkhārassa vāsoti.
206. முஸாவாதோ³தி விஸங்வாதோ³ அதி⁴ப்பேதோ. கேசி ‘‘விஸங்வாத³னவஸேன படிஸ்ஸுணித்வாதி வுத்த’’ந்தி ச, ‘‘ரஞ்ஞோ வுத்தவசனானுரூபதோ முஸாவாதோ³தி க³ஹட்டா² க³ண்ஹந்தீதி வுத்த’’ந்தி ச வத³ந்தி.
206.Musāvādoti visaṃvādo adhippeto. Keci ‘‘visaṃvādanavasena paṭissuṇitvāti vutta’’nti ca, ‘‘rañño vuttavacanānurūpato musāvādoti gahaṭṭhā gaṇhantīti vutta’’nti ca vadanti.
207. ‘‘புரிமிகா ச ந பஞ்ஞாயதி. கஸ்மா? ‘து³தியே வஸாமீ’தி சித்தே உப்பன்னே பட²மஸேனாஸனக்³கா³ஹோ படிப்பஸ்ஸம்ப⁴தி. புன ‘பட²மே ஏவ வஸாமீ’தி சித்தே உப்பன்னே து³தியோ படிப்பஸ்ஸம்ப⁴தி. உப⁴யாவாஸே விதா⁴னங் நத்தீ²’’தி லிகி²தங். போராணக³ண்டி²பதே³ பன ‘‘பட²மங் க³ஹிதட்டா²னே அவஸித்வா அஞ்ஞஸ்மிங் விஹாரே ஸேனாஸனங் க³ஹெத்வா த்³வீஹதீஹங் வஸதி, ததோ பட²மக்³கா³ஹோ படிப்பஸ்ஸம்ப⁴தீதி புரிமிகா ச ந பஞ்ஞாயதி. பச்சி²மக்³கா³ஹோ ந படிப்பஸ்ஸம்ப⁴தி. இத³ஞ்ஹி தி³வஸவஸேன படிப்பஸ்ஸம்ப⁴னங் நாம ஹோதி. அத² பச்சி²மங் தேமாஸங் அஞ்ஞஸ்மிங் வஸதி, புரிமிகா ச ந பஞ்ஞாயதி, இத³ங் ஸேனாஸனக்³கா³ஹானங் வஸேன படிப்பஸ்ஸம்ப⁴னங் நாமா’’தி வுத்தங். உபோ⁴பேதே அத்த²விகப்பா இத⁴ நாதி⁴ப்பேதா. யத்தா²யங் படிஸ்ஸுதோ, தத்த² புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ. கத்த² பன புரிமிகா பஞ்ஞாயதீதி? அந்தராமக்³கே³ த்³வீஸு ஆவாஸேஸு யத்த² தத³ஹேவ பச்சி²மக்³கா³ஹோ, தத்த² பட²மங் க³ஹிதட்டா²னே ஸத்தாஹகரணீயேன க³ச்ச²தோ ந வஸ்ஸச்சே²தோ³, ஸோ தத³ஹேவ அகரணீயோ பக்கமதீதிஆதி³ம்ஹி ‘‘கரணீயங் நாம ஸத்தாஹகரணீய’’ந்தி லிகி²தங்.
207.‘‘Purimikāca na paññāyati. Kasmā? ‘Dutiye vasāmī’ti citte uppanne paṭhamasenāsanaggāho paṭippassambhati. Puna ‘paṭhame eva vasāmī’ti citte uppanne dutiyo paṭippassambhati. Ubhayāvāse vidhānaṃ natthī’’ti likhitaṃ. Porāṇagaṇṭhipade pana ‘‘paṭhamaṃ gahitaṭṭhāne avasitvā aññasmiṃ vihāre senāsanaṃ gahetvā dvīhatīhaṃ vasati, tato paṭhamaggāho paṭippassambhatīti purimikā ca na paññāyati. Pacchimaggāho na paṭippassambhati. Idañhi divasavasena paṭippassambhanaṃ nāma hoti. Atha pacchimaṃ temāsaṃ aññasmiṃ vasati, purimikā ca na paññāyati, idaṃ senāsanaggāhānaṃ vasena paṭippassambhanaṃ nāmā’’ti vuttaṃ. Ubhopete atthavikappā idha nādhippetā. Yatthāyaṃ paṭissuto, tattha purimikā ca na paññāyati, paṭissave ca āpatti dukkaṭassa. Kattha pana purimikā paññāyatīti? Antarāmagge dvīsu āvāsesu yattha tadaheva pacchimaggāho, tattha paṭhamaṃ gahitaṭṭhāne sattāhakaraṇīyena gacchato na vassacchedo, so tadaheva akaraṇīyo pakkamatītiādimhi ‘‘karaṇīyaṃ nāma sattāhakaraṇīya’’nti likhitaṃ.
பாளிமுத்தகரத்திச்சே²த³வினிச்ச²யே ‘‘த⁴ம்மஸ்ஸவனாதீ³’’தி வுத்தங். ஆதி³ம்ஹி சதூஸு வாரேஸு நிரபெக்க²பக்கமனஸ்ஸாதி⁴ப்பேதத்தா ‘‘ஸத்தாஹகரணீயேனா’’தி ந வுத்தங் தஸ்மிங் ஸதி நிரபெக்க²க³மனாபா⁴வதோ. தத்த² புரிமா த்³வே வாரா வஸ்ஸங் அனுபக³தஸ்ஸ வஸேன வுத்தா, தஸ்மா உபக³தஸ்ஸ தத³ஹேவ ஸத்தாஹகரணீயேன க³ந்த்வா அந்தோஸத்தாஹங் ஆக³ச்ச²தோ ந வஸ்ஸச்சே²தோ³தி ஸித்³த⁴ங். பச்சி²மா த்³வே வாரா உபக³தஸ்ஸ நிரபெக்க²க³மனவஸேன வுத்தா, ‘‘ஸத்தாஹங் அனாக³தாய பவாரணாய ஸகரணீயோ பக்கமதீ’’தி ததோ ப³ஹித்³தா⁴ ஸத்தாஹங் வீதினாமெந்தஸ்ஸ வஸ்ஸச்சே²தோ³தி த³ஸ்ஸனத்த²ங் வுத்தங். தத்த² ‘‘அகரணீயோ பக்கமதீ’’தி வசனாபா⁴வா வினா ரத்திச்சே²த³காரணேன க³ந்துங் ந வட்டதீதி ஸித்³த⁴ங். பவாரெத்வா பன க³ந்துங் வட்டதி பவாரணாய தங்தி³வஸஸன்னிஸ்ஸிதத்தா. தத்த² ந வா ஆக³ச்செ²ய்யாதி அந்தராயேன. ஆசரியோ பன ‘‘ந புன இதா⁴க³ச்சா²மீ’தி நிரபெக்கோ²பி ஸகரணீயோவ க³ந்துங் லப⁴தீதி த³ஸ்ஸனத்த²ங் அகரணீயோ’தி ந வுத்த’’ந்தி வத³தி. ‘‘ஸீஹளதீ³பே கிர சூளபவாரணா நாம அத்தி², தங் பவாரணங் கத்வா யதா²ஸுக²ங் ஸகரணீயா க³ச்ச²ந்தி, பயோக³ஞ்ச த³ஸ்ஸெந்தீ’’தி வுத்தங். ‘‘தத்த² ச² அருணா அந்தோவஸ்ஸே ஹொந்தி , ஏகோ ப³ஹி, தஸ்மா ஸோ தேமாஸங் வுத்தோ² ஹோதீதி அபரே’’தி ச, ‘‘ஆசரியோ ஏவங் ந வத³தீ’’தி ச வுத்தங். ஸப்³ப³த்த² விஹாரங் உபேதீதி அத்தனோ வஸ்ஸக்³கே³ன பத்தக³ப்³ப⁴ங் உபேதீதி போராணா. அஸதியா பன வஸ்ஸங் ந உபேதீதி எத்த² ‘‘இமஸ்மிங் விஹாரே இமங் தேமாஸ’’ந்தி அவசனேன. ‘‘அட்ட²கதா²யங் வுத்தரத்திச்சே²த³காரணங் வினா திரோவிஹாரே வஸித்வா ஆக³ச்சி²ஸ்ஸாமீதி க³ச்ச²தோபி வஸ்ஸச்சே²த³’’ந்தி லிகி²தங்.
Pāḷimuttakaratticchedavinicchaye ‘‘dhammassavanādī’’ti vuttaṃ. Ādimhi catūsu vāresu nirapekkhapakkamanassādhippetattā ‘‘sattāhakaraṇīyenā’’ti na vuttaṃ tasmiṃ sati nirapekkhagamanābhāvato. Tattha purimā dve vārā vassaṃ anupagatassa vasena vuttā, tasmā upagatassa tadaheva sattāhakaraṇīyena gantvā antosattāhaṃ āgacchato na vassacchedoti siddhaṃ. Pacchimā dve vārā upagatassa nirapekkhagamanavasena vuttā, ‘‘sattāhaṃ anāgatāya pavāraṇāya sakaraṇīyo pakkamatī’’ti tato bahiddhā sattāhaṃ vītināmentassa vassacchedoti dassanatthaṃ vuttaṃ. Tattha ‘‘akaraṇīyo pakkamatī’’ti vacanābhāvā vinā ratticchedakāraṇena gantuṃ na vaṭṭatīti siddhaṃ. Pavāretvā pana gantuṃ vaṭṭati pavāraṇāya taṃdivasasannissitattā. Tattha na vā āgaccheyyāti antarāyena. Ācariyo pana ‘‘na puna idhāgacchāmī’ti nirapekkhopi sakaraṇīyova gantuṃ labhatīti dassanatthaṃ akaraṇīyo’ti na vutta’’nti vadati. ‘‘Sīhaḷadīpe kira cūḷapavāraṇā nāma atthi, taṃ pavāraṇaṃ katvā yathāsukhaṃ sakaraṇīyā gacchanti, payogañca dassentī’’ti vuttaṃ. ‘‘Tattha cha aruṇā antovasse honti , eko bahi, tasmā so temāsaṃ vuttho hotīti apare’’ti ca, ‘‘ācariyo evaṃ na vadatī’’ti ca vuttaṃ. Sabbattha vihāraṃ upetīti attano vassaggena pattagabbhaṃ upetīti porāṇā. Asatiyā pana vassaṃ na upetīti ettha ‘‘imasmiṃ vihāre imaṃ temāsa’’nti avacanena. ‘‘Aṭṭhakathāyaṃ vuttaratticchedakāraṇaṃ vinā tirovihāre vasitvā āgacchissāmīti gacchatopi vassaccheda’’nti likhitaṃ.
208. படிஸ்ஸுதோ ஹோதி பச்சி²மிகாயாதி அந்தரா பப்³ப³ஜிதபி⁴க்கு²னா, சி²ன்னவஸ்ஸேன வா படிஸ்ஸுதோ, அஞ்ஞேன பன புரிமங் அனுபக³ந்த்வா பச்சி²மிகாயங் படிஸ்ஸவோ ந காதப்³போ³. ரத்திச்சே²தே³ ஸப்³ப³த்த² வஸ்ஸச்சே²தோ³தி ஸன்னிட்டா²னங் கத்வா வத³ந்தி. கேசி பன ந இச்ச²ந்தி. தங் ஸாதே⁴துங் அனேகதா⁴ பபஞ்செந்தி. கிங் தேன.
208.Paṭissuto hoti pacchimikāyāti antarā pabbajitabhikkhunā, chinnavassena vā paṭissuto, aññena pana purimaṃ anupagantvā pacchimikāyaṃ paṭissavo na kātabbo. Ratticchede sabbattha vassacchedoti sanniṭṭhānaṃ katvā vadanti. Keci pana na icchanti. Taṃ sādhetuṃ anekadhā papañcenti. Kiṃ tena.
வஸ்ஸூபனாயிகக்க²ந்த⁴கவண்ணனா நிட்டி²தா.
Vassūpanāyikakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
117. அத⁴ம்மிககதிகா • 117. Adhammikakatikā
118. படிஸ்ஸவது³க்கடாபத்தி • 118. Paṭissavadukkaṭāpatti
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அத⁴ம்மிககதிகாதி³கதா² • Adhammikakatikādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā
அத⁴ம்மிககதிககதா²வண்ணனா • Adhammikakatikakathāvaṇṇanā
படிஸ்ஸவது³க்கடாபத்திகதா²வண்ணனா • Paṭissavadukkaṭāpattikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அத⁴ம்மிககதிகாதி³கதா²வண்ணனா • Adhammikakatikādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
117. அத⁴ம்மிககதிகாகதா² • 117. Adhammikakatikākathā
118. படிஸ்ஸவது³க்கடாபத்திகதா² • 118. Paṭissavadukkaṭāpattikathā
