| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. அத⁴ம்மிகஸுத்தவண்ணனா
10. Adhammikasuttavaṇṇanā
70. த³ஸமே அத⁴ம்மிகா ஹொந்தீதி போராணகராஜூஹி ட²பிதங் த³ஸபா⁴க³ப³லிஞ்சேவ அபராதா⁴னுரூபஞ்ச த³ண்ட³ங் அக்³க³ஹெத்வா அதிரேகப³லினோ சேவ அதிரேகத³ண்ட³ஸ்ஸ ச க³ஹணேன அத⁴ம்மிகா. ராஜாயுத்தாதி ரஞ்ஞோ ஜனபதே³ஸு கிச்சஸங்விதா⁴யகா ஆயுத்தகபுரிஸா. ப்³ராஹ்மணக³ஹபதிகாதி அந்தோனக³ரவாஸினோ ப்³ராஹ்மணக³ஹபதயோ. நேக³மஜானபதா³தி நிக³மவாஸினோ சேவ ஜனபத³வாஸினோ ச. விஸமந்தி விஸமா ஹுத்வா, அஸமயேன வாயந்தீதி அத்தோ². விஸமாதி ந ஸமா, அதித²த்³தா⁴ வா அதிமுது³கா வாதி அத்தோ². அபஞ்ஜஸாதி மக்³க³தோ அபக³தா, உம்மக்³க³கா³மினோ ஹுத்வா வாயந்தீதி அத்தோ². தே³வதா பரிகுபிதா ப⁴வந்தீதி வாதேஸு ஹி விஸமேஸு அபஞ்ஜஸேஸு வாயந்தேஸு ருக்கா² பி⁴ஜ்ஜந்தி, விமானானி பி⁴ஜ்ஜந்தி. தஸ்மா தே³வதா பரிகுபிதா ப⁴வந்தி, தா தே³வஸ்ஸ ஸம்மா வஸ்ஸிதுங் ந தெ³ந்தி. தேன வுத்தங் தே³வோ ந ஸம்மா தா⁴ரங் அனுப்பவெச்ச²தீதி. விஸமபாகானி ஸஸ்ஸானி ப⁴வந்தீதி ஏகஸ்மிங் டா²னே க³ப்³பீ⁴னி ஹொந்தி, ஏகஸ்மிங் ஸஞ்ஜாதகீ²ரானி, ஏகங் டா²னங் பச்சதீதி ஏவங் விஸமங் பாகானி ஸஸ்ஸானி ப⁴வந்தி.
70. Dasame adhammikā hontīti porāṇakarājūhi ṭhapitaṃ dasabhāgabaliñceva aparādhānurūpañca daṇḍaṃ aggahetvā atirekabalino ceva atirekadaṇḍassa ca gahaṇena adhammikā. Rājāyuttāti rañño janapadesu kiccasaṃvidhāyakā āyuttakapurisā. Brāhmaṇagahapatikāti antonagaravāsino brāhmaṇagahapatayo. Negamajānapadāti nigamavāsino ceva janapadavāsino ca. Visamanti visamā hutvā, asamayena vāyantīti attho. Visamāti na samā, atithaddhā vā atimudukā vāti attho. Apañjasāti maggato apagatā, ummaggagāmino hutvā vāyantīti attho. Devatā parikupitā bhavantīti vātesu hi visamesu apañjasesu vāyantesu rukkhā bhijjanti, vimānāni bhijjanti. Tasmā devatā parikupitā bhavanti, tā devassa sammā vassituṃ na denti. Tena vuttaṃ devo na sammā dhāraṃ anuppavecchatīti. Visamapākāni sassāni bhavantīti ekasmiṃ ṭhāne gabbhīni honti, ekasmiṃ sañjātakhīrāni, ekaṃ ṭhānaṃ paccatīti evaṃ visamaṃ pākāni sassāni bhavanti.
ஸமங் நக்க²த்தானி தாரகரூபானி பரிவத்தந்தீதி யதா² கத்திகபுண்ணமா கத்திகனக்க²த்தமேவ லப⁴தி, மிக³ஸிரபுண்ணமா மிக³ஸிரனக்க²த்தமேவாதி ஏவங் தஸ்மிங் தஸ்மிங் மாஸே ஸா ஸா புண்ணமா தங் தங் நக்க²த்தமேவ லப⁴தி, ததா² ஸம்மா பரிவத்தந்தி. ஸமங் வாதா வாயந்தீதி அவிஸமா ஹுத்வா ஸமயஸ்மிங்யேவ வாயந்தி, ச² மாஸே உத்தரா வாதா, ச² மாஸேத³க்கி²ணாதி ஏவங் தேஸங் தேஸங் ஜனபதா³னங் அனுரூபே ஸமயே வாயந்தி. ஸமாதி ஸமப்பவத்தினோ நாதித²த்³தா⁴ நாதிமுதூ³. பஞ்ஜஸாதி மக்³க³ப்படிபன்னா, மக்³கே³னேவ வாயந்தி, நோ அமக்³கே³னாதி அத்தோ².
Samaṃnakkhattāni tārakarūpāni parivattantīti yathā kattikapuṇṇamā kattikanakkhattameva labhati, migasirapuṇṇamā migasiranakkhattamevāti evaṃ tasmiṃ tasmiṃ māse sā sā puṇṇamā taṃ taṃ nakkhattameva labhati, tathā sammā parivattanti. Samaṃ vātā vāyantīti avisamā hutvā samayasmiṃyeva vāyanti, cha māse uttarā vātā, cha māsedakkhiṇāti evaṃ tesaṃ tesaṃ janapadānaṃ anurūpe samaye vāyanti. Samāti samappavattino nātithaddhā nātimudū. Pañjasāti maggappaṭipannā, maggeneva vāyanti, no amaggenāti attho.
ஜிம்ஹங் க³ச்ச²தீதி குடிலங் க³ச்ச²தி, அதித்த²ங் க³ண்ஹாதி. நெத்தே ஜிம்ஹங் க³தே ஸதீதி நயதீதி நெத்தா. தஸ்மிங் நெத்தே ஜிம்ஹங் க³தே குடிலங் க³ந்த்வா அதித்த²ங் க³ண்ஹந்தே இதராபி அதித்த²மேவ க³ண்ஹந்தீதி அத்தோ². நேதேதிபி பாடோ². து³க்க²ங் ஸேதீதி து³க்க²ங் ஸயதி, து³க்கி²தங் ஹோதீதி அத்தோ².
Jimhaṃgacchatīti kuṭilaṃ gacchati, atitthaṃ gaṇhāti. Nette jimhaṃ gate satīti nayatīti nettā. Tasmiṃ nette jimhaṃ gate kuṭilaṃ gantvā atitthaṃ gaṇhante itarāpi atitthameva gaṇhantīti attho. Netetipi pāṭho. Dukkhaṃ setīti dukkhaṃ sayati, dukkhitaṃ hotīti attho.
பத்தகம்மவக்³கோ³ து³தியோ.
Pattakammavaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. அத⁴ம்மிகஸுத்தங் • 10. Adhammikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. அத⁴ம்மிகஸுத்தவண்ணனா • 10. Adhammikasuttavaṇṇanā
