| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. அத⁴ம்மிகஸுத்தவண்ணனா
10. Adhammikasuttavaṇṇanā
70. த³ஸமே விஸமந்தி பா⁴வனபுங்ஸகமேதங். தேனாஹ ‘‘விஸமா ஹுத்வா’’தி. அஸமயேனாதி அகாலே. பு⁴ம்மத்தே² ஹேதங் கரணவசனங். பகட்ட²ங் பதா⁴னங் அஞ்ஜஸங் ஏதேஸந்தி பஞ்ஜஸா, அஞ்ஜஸங் பக³தா படிபன்னாதி வா பஞ்ஜஸா, பகதிமக்³க³கா³மினோ. ந பஞ்ஜஸா அபஞ்ஜஸா, அமக்³க³ப்படிபன்னா. தே பன யஸ்மா மக்³க³தோ அபக³தா நாம ஹொந்தி, தஸ்மா வுத்தங் ‘‘மக்³க³தோ அபக³தா’’திஆதி³.
70. Dasame visamanti bhāvanapuṃsakametaṃ. Tenāha ‘‘visamā hutvā’’ti. Asamayenāti akāle. Bhummatthe hetaṃ karaṇavacanaṃ. Pakaṭṭhaṃ padhānaṃ añjasaṃ etesanti pañjasā, añjasaṃ pagatā paṭipannāti vā pañjasā, pakatimaggagāmino. Na pañjasā apañjasā, amaggappaṭipannā. Te pana yasmā maggato apagatā nāma honti, tasmā vuttaṃ ‘‘maggato apagatā’’tiādi.
கா³தா²ஸு பன ஏவமெத்த² ஸம்ப³ந்தோ⁴ வேதி³தப்³போ³. கு³ன்னங் சே தரமானானந்தி கா³வீஸு மஹோக⁴ங் தரந்தீஸு. ஜிம்ஹங் க³ச்ச²தி புங்க³வோதி யதி³ யூத²பதி உஸபோ⁴ குடிலங் க³ச்ச²தி. ஸப்³பா³ தா ஜிம்ஹங் க³ச்ச²ந்தீதி ஸப்³பா³ தா கா³வியோ குடிலமேவ க³ச்ச²ந்தி. கஸ்மா? நெத்தே ஜிம்ஹங் க³தே ஸதி தஸ்ஸ குடிலக³தத்தா. ஸோ ஹி தாஸங் பச்சயிகோ உபத்³த³வஹரோ ச. ஏவமேவந்தி யதா² சேதங், ஏவமேவ யோ மனுஸ்ஸேஸு பதா⁴னஸம்மதோ, யதி³ ஸோ அத⁴ம்மசாரீ ஸியா, யே தஸ்ஸ அனுஜீவினோ, ஸப்³பே³பி அத⁴ம்மிகா ஹொந்தி. ஸாமிஸம்பதா³ ஹி பகதிஸம்பத³ங் ஸம்பாதே³தி. யஸ்மா ஏததே³வங், தஸ்மா ஸப்³ப³ங் ரட்ட²ங் து³க்க²ங் ஸேதி, ராஜா சே ஹோதி அத⁴ம்மிகோ.
Gāthāsu pana evamettha sambandho veditabbo. Gunnaṃ ce taramānānanti gāvīsu mahoghaṃ tarantīsu. Jimhaṃ gacchati puṅgavoti yadi yūthapati usabho kuṭilaṃ gacchati. Sabbā tā jimhaṃ gacchantīti sabbā tā gāviyo kuṭilameva gacchanti. Kasmā? Nette jimhaṃ gate sati tassa kuṭilagatattā. So hi tāsaṃ paccayiko upaddavaharo ca. Evamevanti yathā cetaṃ, evameva yo manussesu padhānasammato, yadi so adhammacārī siyā, ye tassa anujīvino, sabbepi adhammikā honti. Sāmisampadā hi pakatisampadaṃ sampādeti. Yasmā etadevaṃ, tasmā sabbaṃ raṭṭhaṃ dukkhaṃ seti, rājā ce hoti adhammiko.
அத⁴ம்மிகஸுத்தவண்ணனா நிட்டி²தா.
Adhammikasuttavaṇṇanā niṭṭhitā.
பத்தகம்மவக்³க³வண்ணனா நிட்டி²தா.
Pattakammavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. அத⁴ம்மிகஸுத்தங் • 10. Adhammikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. அத⁴ம்மிகஸுத்தவண்ணனா • 10. Adhammikasuttavaṇṇanā
