| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
១០. អធម្មិកសុត្តវណ្ណនា
10. Adhammikasuttavaṇṇanā
៧០. ទសមេ អធម្មិកា ហោន្តីតិ បោរាណករាជូហិ ឋបិតំ ទសភាគពលិញ្ចេវ អបរាធានុរូបញ្ច ទណ្ឌំ អគ្គហេត្វា អតិរេកពលិនោ ចេវ អតិរេកទណ្ឌស្ស ច គហណេន អធម្មិកា។ រាជាយុត្តាតិ រញ្ញោ ជនបទេសុ កិច្ចសំវិធាយកា អាយុត្តកបុរិសា។ ព្រាហ្មណគហបតិកាតិ អន្តោនគរវាសិនោ ព្រាហ្មណគហបតយោ។ នេគមជានបទាតិ និគមវាសិនោ ចេវ ជនបទវាសិនោ ច។ វិសមន្តិ វិសមា ហុត្វា, អសមយេន វាយន្តីតិ អត្ថោ។ វិសមាតិ ន សមា, អតិថទ្ធា វា អតិមុទុកា វាតិ អត្ថោ។ អបញ្ជសាតិ មគ្គតោ អបគតា, ឧម្មគ្គគាមិនោ ហុត្វា វាយន្តីតិ អត្ថោ។ ទេវតា បរិកុបិតា ភវន្តីតិ វាតេសុ ហិ វិសមេសុ អបញ្ជសេសុ វាយន្តេសុ រុក្ខា ភិជ្ជន្តិ, វិមានានិ ភិជ្ជន្តិ។ តស្មា ទេវតា បរិកុបិតា ភវន្តិ, តា ទេវស្ស សម្មា វស្សិតុំ ន ទេន្តិ។ តេន វុត្តំ ទេវោ ន សម្មា ធារំ អនុប្បវេច្ឆតីតិ។ វិសមបាកានិ សស្សានិ ភវន្តីតិ ឯកស្មិំ ឋានេ គព្ភីនិ ហោន្តិ, ឯកស្មិំ សញ្ជាតខីរានិ, ឯកំ ឋានំ បច្ចតីតិ ឯវំ វិសមំ បាកានិ សស្សានិ ភវន្តិ។
70. Dasame adhammikā hontīti porāṇakarājūhi ṭhapitaṃ dasabhāgabaliñceva aparādhānurūpañca daṇḍaṃ aggahetvā atirekabalino ceva atirekadaṇḍassa ca gahaṇena adhammikā. Rājāyuttāti rañño janapadesu kiccasaṃvidhāyakā āyuttakapurisā. Brāhmaṇagahapatikāti antonagaravāsino brāhmaṇagahapatayo. Negamajānapadāti nigamavāsino ceva janapadavāsino ca. Visamanti visamā hutvā, asamayena vāyantīti attho. Visamāti na samā, atithaddhā vā atimudukā vāti attho. Apañjasāti maggato apagatā, ummaggagāmino hutvā vāyantīti attho. Devatā parikupitā bhavantīti vātesu hi visamesu apañjasesu vāyantesu rukkhā bhijjanti, vimānāni bhijjanti. Tasmā devatā parikupitā bhavanti, tā devassa sammā vassituṃ na denti. Tena vuttaṃ devo na sammā dhāraṃ anuppavecchatīti. Visamapākāni sassāni bhavantīti ekasmiṃ ṭhāne gabbhīni honti, ekasmiṃ sañjātakhīrāni, ekaṃ ṭhānaṃ paccatīti evaṃ visamaṃ pākāni sassāni bhavanti.
សមំ នក្ខត្តានិ តារករូបានិ បរិវត្តន្តីតិ យថា កត្តិកបុណ្ណមា កត្តិកនក្ខត្តមេវ លភតិ, មិគសិរបុណ្ណមា មិគសិរនក្ខត្តមេវាតិ ឯវំ តស្មិំ តស្មិំ មាសេ សា សា បុណ្ណមា តំ តំ នក្ខត្តមេវ លភតិ, តថា សម្មា បរិវត្តន្តិ។ សមំ វាតា វាយន្តីតិ អវិសមា ហុត្វា សមយស្មិំយេវ វាយន្តិ, ឆ មាសេ ឧត្តរា វាតា, ឆ មាសេទក្ខិណាតិ ឯវំ តេសំ តេសំ ជនបទានំ អនុរូបេ សមយេ វាយន្តិ។ សមាតិ សមប្បវត្តិនោ នាតិថទ្ធា នាតិមុទូ។ បញ្ជសាតិ មគ្គប្បដិបន្នា, មគ្គេនេវ វាយន្តិ, នោ អមគ្គេនាតិ អត្ថោ។
Samaṃnakkhattāni tārakarūpāni parivattantīti yathā kattikapuṇṇamā kattikanakkhattameva labhati, migasirapuṇṇamā migasiranakkhattamevāti evaṃ tasmiṃ tasmiṃ māse sā sā puṇṇamā taṃ taṃ nakkhattameva labhati, tathā sammā parivattanti. Samaṃ vātā vāyantīti avisamā hutvā samayasmiṃyeva vāyanti, cha māse uttarā vātā, cha māsedakkhiṇāti evaṃ tesaṃ tesaṃ janapadānaṃ anurūpe samaye vāyanti. Samāti samappavattino nātithaddhā nātimudū. Pañjasāti maggappaṭipannā, maggeneva vāyanti, no amaggenāti attho.
ជិម្ហំ គច្ឆតីតិ កុដិលំ គច្ឆតិ, អតិត្ថំ គណ្ហាតិ។ នេត្តេ ជិម្ហំ គតេ សតីតិ នយតីតិ នេត្តា។ តស្មិំ នេត្តេ ជិម្ហំ គតេ កុដិលំ គន្ត្វា អតិត្ថំ គណ្ហន្តេ ឥតរាបិ អតិត្ថមេវ គណ្ហន្តីតិ អត្ថោ។ នេតេតិបិ បាឋោ។ ទុក្ខំ សេតីតិ ទុក្ខំ សយតិ, ទុក្ខិតំ ហោតីតិ អត្ថោ។
Jimhaṃgacchatīti kuṭilaṃ gacchati, atitthaṃ gaṇhāti. Nette jimhaṃ gate satīti nayatīti nettā. Tasmiṃ nette jimhaṃ gate kuṭilaṃ gantvā atitthaṃ gaṇhante itarāpi atitthameva gaṇhantīti attho. Netetipi pāṭho. Dukkhaṃ setīti dukkhaṃ sayati, dukkhitaṃ hotīti attho.
បត្តកម្មវគ្គោ ទុតិយោ។
Pattakammavaggo dutiyo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. អធម្មិកសុត្តំ • 10. Adhammikasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. អធម្មិកសុត្តវណ្ណនា • 10. Adhammikasuttavaṇṇanā
