| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. අධම්‌මිකසුත්‌තවණ්‌ණනා
10. Adhammikasuttavaṇṇanā
70. දසමෙ අධම්‌මිකා හොන්‌තීති පොරාණකරාජූහි ඨපිතං දසභාගබලිඤ්‌චෙව අපරාධානුරූපඤ්‌ච දණ්‌ඩං අග්‌ගහෙත්‌වා අතිරෙකබලිනො චෙව අතිරෙකදණ්‌ඩස්‌ස ච ගහණෙන අධම්‌මිකා. රාජායුත්‌තාති රඤ්‌ඤො ජනපදෙසු කිච්‌චසංවිධායකා ආයුත්‌තකපුරිසා. බ්‍රාහ්‌මණගහපතිකාති අන්‌තොනගරවාසිනො බ්‍රාහ්‌මණගහපතයො. නෙගමජානපදාති නිගමවාසිනො චෙව ජනපදවාසිනො ච. විසමන්‌ති විසමා හුත්‌වා, අසමයෙන වායන්‌තීති අත්‌ථො. විසමාති න සමා, අතිථද්‌ධා වා අතිමුදුකා වාති අත්‌ථො. අපඤ්‌ජසාති මග්‌ගතො අපගතා, උම්‌මග්‌ගගාමිනො හුත්‌වා වායන්‌තීති අත්‌ථො. දෙවතා පරිකුපිතා භවන්‌තීති වාතෙසු හි විසමෙසු අපඤ්‌ජසෙසු වායන්‌තෙසු රුක්‌ඛා භිජ්‌ජන්‌ති, විමානානි භිජ්‌ජන්‌ති. තස්‌මා දෙවතා පරිකුපිතා භවන්‌ති, තා දෙවස්‌ස සම්‌මා වස්‌සිතුං න දෙන්‌ති. තෙන වුත්‌තං දෙවො න සම්‌මා ධාරං අනුප්‌පවෙච්‌ඡතීති. විසමපාකානි සස්‌සානි භවන්‌තීති එකස්‌මිං ඨානෙ ගබ්‌භීනි හොන්‌ති, එකස්‌මිං සඤ්‌ජාතඛීරානි, එකං ඨානං පච්‌චතීති එවං විසමං පාකානි සස්‌සානි භවන්‌ති.
70. Dasame adhammikā hontīti porāṇakarājūhi ṭhapitaṃ dasabhāgabaliñceva aparādhānurūpañca daṇḍaṃ aggahetvā atirekabalino ceva atirekadaṇḍassa ca gahaṇena adhammikā. Rājāyuttāti rañño janapadesu kiccasaṃvidhāyakā āyuttakapurisā. Brāhmaṇagahapatikāti antonagaravāsino brāhmaṇagahapatayo. Negamajānapadāti nigamavāsino ceva janapadavāsino ca. Visamanti visamā hutvā, asamayena vāyantīti attho. Visamāti na samā, atithaddhā vā atimudukā vāti attho. Apañjasāti maggato apagatā, ummaggagāmino hutvā vāyantīti attho. Devatā parikupitā bhavantīti vātesu hi visamesu apañjasesu vāyantesu rukkhā bhijjanti, vimānāni bhijjanti. Tasmā devatā parikupitā bhavanti, tā devassa sammā vassituṃ na denti. Tena vuttaṃ devo na sammā dhāraṃ anuppavecchatīti. Visamapākāni sassāni bhavantīti ekasmiṃ ṭhāne gabbhīni honti, ekasmiṃ sañjātakhīrāni, ekaṃ ṭhānaṃ paccatīti evaṃ visamaṃ pākāni sassāni bhavanti.
සමං නක්‌ඛත්‌තානි තාරකරූපානි පරිවත්‌තන්‌තීති යථා කත්‌තිකපුණ්‌ණමා කත්‌තිකනක්‌ඛත්‌තමෙව ලභති, මිගසිරපුණ්‌ණමා මිගසිරනක්‌ඛත්‌තමෙවාති එවං තස්‌මිං තස්‌මිං මාසෙ සා සා පුණ්‌ණමා තං තං නක්‌ඛත්‌තමෙව ලභති, තථා සම්‌මා පරිවත්‌තන්‌ති. සමං වාතා වායන්‌තීති අවිසමා හුත්‌වා සමයස්‌මිංයෙව වායන්‌ති, ඡ මාසෙ උත්‌තරා වාතා, ඡ මාසෙදක්‌ඛිණාති එවං තෙසං තෙසං ජනපදානං අනුරූපෙ සමයෙ වායන්‌ති. සමාති සමප්‌පවත්‌තිනො නාතිථද්‌ධා නාතිමුදූ. පඤ්‌ජසාති මග්‌ගප්‌පටිපන්‌නා, මග්‌ගෙනෙව වායන්‌ති, නො අමග්‌ගෙනාති අත්‌ථො.
Samaṃnakkhattāni tārakarūpāni parivattantīti yathā kattikapuṇṇamā kattikanakkhattameva labhati, migasirapuṇṇamā migasiranakkhattamevāti evaṃ tasmiṃ tasmiṃ māse sā sā puṇṇamā taṃ taṃ nakkhattameva labhati, tathā sammā parivattanti. Samaṃ vātā vāyantīti avisamā hutvā samayasmiṃyeva vāyanti, cha māse uttarā vātā, cha māsedakkhiṇāti evaṃ tesaṃ tesaṃ janapadānaṃ anurūpe samaye vāyanti. Samāti samappavattino nātithaddhā nātimudū. Pañjasāti maggappaṭipannā, maggeneva vāyanti, no amaggenāti attho.
ජිම්‌හං ගච්‌ඡතීති කුටිලං ගච්‌ඡති, අතිත්‌ථං ගණ්‌හාති. නෙත්‌තෙ ජිම්‌හං ගතෙ සතීති නයතීති නෙත්‌තා. තස්‌මිං නෙත්‌තෙ ජිම්‌හං ගතෙ කුටිලං ගන්‌ත්‌වා අතිත්‌ථං ගණ්‌හන්‌තෙ ඉතරාපි අතිත්‌ථමෙව ගණ්‌හන්‌තීති අත්‌ථො. නෙතෙතිපි පාඨො. දුක්‌ඛං සෙතීති දුක්‌ඛං සයති, දුක්‌ඛිතං හොතීති අත්‌ථො.
Jimhaṃgacchatīti kuṭilaṃ gacchati, atitthaṃ gaṇhāti. Nette jimhaṃ gate satīti nayatīti nettā. Tasmiṃ nette jimhaṃ gate kuṭilaṃ gantvā atitthaṃ gaṇhante itarāpi atitthameva gaṇhantīti attho. Netetipi pāṭho. Dukkhaṃ setīti dukkhaṃ sayati, dukkhitaṃ hotīti attho.
පත්‌තකම්‌මවග්‌ගො දුතියො.
Pattakammavaggo dutiyo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. අධම්‌මිකසුත්‌තං • 10. Adhammikasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. අධම්‌මිකසුත්‌තවණ්‌ණනා • 10. Adhammikasuttavaṇṇanā
