| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
10. අධම්‌මිකසුත්‌තවණ්‌ණනා
10. Adhammikasuttavaṇṇanā
70. දසමෙ විසමන්‌ති භාවනපුංසකමෙතං. තෙනාහ ‘‘විසමා හුත්‌වා’’ති. අසමයෙනාති අකාලෙ. භුම්‌මත්‌ථෙ හෙතං කරණවචනං. පකට්‌ඨං පධානං අඤ්‌ජසං එතෙසන්‌ති පඤ්‌ජසා, අඤ්‌ජසං පගතා පටිපන්‌නාති වා පඤ්‌ජසා, පකතිමග්‌ගගාමිනො. න පඤ්‌ජසා අපඤ්‌ජසා, අමග්‌ගප්‌පටිපන්‌නා. තෙ පන යස්‌මා මග්‌ගතො අපගතා නාම හොන්‌ති, තස්‌මා වුත්‌තං ‘‘මග්‌ගතො අපගතා’’තිආදි.
70. Dasame visamanti bhāvanapuṃsakametaṃ. Tenāha ‘‘visamā hutvā’’ti. Asamayenāti akāle. Bhummatthe hetaṃ karaṇavacanaṃ. Pakaṭṭhaṃ padhānaṃ añjasaṃ etesanti pañjasā, añjasaṃ pagatā paṭipannāti vā pañjasā, pakatimaggagāmino. Na pañjasā apañjasā, amaggappaṭipannā. Te pana yasmā maggato apagatā nāma honti, tasmā vuttaṃ ‘‘maggato apagatā’’tiādi.
ගාථාසු පන එවමෙත්‌ථ සම්‌බන්‌ධො වෙදිතබ්‌බො. ගුන්‌නං චෙ තරමානානන්‌ති ගාවීසු මහොඝං තරන්‌තීසු. ජිම්‌හං ගච්‌ඡති පුඞ්‌ගවොති යදි යූථපති උසභො කුටිලං ගච්‌ඡති. සබ්‌බා තා ජිම්‌හං ගච්‌ඡන්‌තීති සබ්‌බා තා ගාවියො කුටිලමෙව ගච්‌ඡන්‌ති. කස්‌මා? නෙත්‌තෙ ජිම්‌හං ගතෙ සති තස්‌ස කුටිලගතත්‌තා. සො හි තාසං පච්‌චයිකො උපද්‌දවහරො ච. එවමෙවන්‌ති යථා චෙතං, එවමෙව යො මනුස්‌සෙසු පධානසම්‌මතො, යදි සො අධම්‌මචාරී සියා, යෙ තස්‌ස අනුජීවිනො, සබ්‌බෙපි අධම්‌මිකා හොන්‌ති. සාමිසම්‌පදා හි පකතිසම්‌පදං සම්‌පාදෙති. යස්‌මා එතදෙවං, තස්‌මා සබ්‌බං රට්‌ඨං දුක්‌ඛං සෙති, රාජා චෙ හොති අධම්‌මිකො.
Gāthāsu pana evamettha sambandho veditabbo. Gunnaṃ ce taramānānanti gāvīsu mahoghaṃ tarantīsu. Jimhaṃ gacchati puṅgavoti yadi yūthapati usabho kuṭilaṃ gacchati. Sabbā tā jimhaṃ gacchantīti sabbā tā gāviyo kuṭilameva gacchanti. Kasmā? Nette jimhaṃ gate sati tassa kuṭilagatattā. So hi tāsaṃ paccayiko upaddavaharo ca. Evamevanti yathā cetaṃ, evameva yo manussesu padhānasammato, yadi so adhammacārī siyā, ye tassa anujīvino, sabbepi adhammikā honti. Sāmisampadā hi pakatisampadaṃ sampādeti. Yasmā etadevaṃ, tasmā sabbaṃ raṭṭhaṃ dukkhaṃ seti, rājā ce hoti adhammiko.
අධම්‌මිකසුත්‌තවණ්‌ණනා නිට්‌ඨිතා.
Adhammikasuttavaṇṇanā niṭṭhitā.
පත්‌තකම්‌මවග්‌ගවණ්‌ණනා නිට්‌ඨිතා.
Pattakammavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. අධම්‌මිකසුත්‌තං • 10. Adhammikasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. අධම්‌මිකසුත්‌තවණ්‌ණනා • 10. Adhammikasuttavaṇṇanā
