Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya

    ༥. ཨདྷིགམསུཏྟཾ

    5. Adhigamasuttaṃ

    ༧༩. ‘‘ཚཧི, བྷིཀྑཝེ, དྷམྨེཧི སམནྣཱགཏོ བྷིཀྑུ ཨབྷབྦོ ཨནདྷིགཏཾ ཝཱ ཀུསལཾ དྷམྨཾ ཨདྷིགནྟུཾ, ཨདྷིགཏཾ ཝཱ ཀུསལཾ དྷམྨཾ ཕཱཏིཾ ཀཱཏུཾ 1། ཀཏམེཧི ཚཧི? ཨིདྷ, བྷིཀྑཝེ, བྷིཀྑུ ན ཨཱཡཀུསལོ ཙ ཧོཏི, ན ཨཔཱཡཀུསལོ ཙ ཧོཏི, ན ཨུཔཱཡཀུསལོ ཙ ཧོཏི, ཨནདྷིགཏཱནཾ ཀུསལཱནཾ དྷམྨཱནཾ ཨདྷིགམཱཡ ན ཚནྡཾ ཛནེཏི, ཨདྷིགཏེ ཀུསལེ དྷམྨེ ན ཨཱརཀྑཏི 2, སཱཏཙྩཀིརིཡཱཡ ན སམྤཱདེཏི། ཨིམེཧི ཁོ, བྷིཀྑཝེ, ཚཧི དྷམྨེཧི སམནྣཱགཏོ བྷིཀྑུ ཨབྷབྦོ ཨནདྷིགཏཾ ཝཱ ཀུསལཾ དྷམྨཾ ཨདྷིགནྟུཾ, ཨདྷིགཏཾ ཝཱ ཀུསལཾ དྷམྨཾ ཕཱཏིཾ ཀཱཏུཾ།

    79. ‘‘Chahi, bhikkhave, dhammehi samannāgato bhikkhu abhabbo anadhigataṃ vā kusalaṃ dhammaṃ adhigantuṃ, adhigataṃ vā kusalaṃ dhammaṃ phātiṃ kātuṃ 3. Katamehi chahi? Idha, bhikkhave, bhikkhu na āyakusalo ca hoti, na apāyakusalo ca hoti, na upāyakusalo ca hoti, anadhigatānaṃ kusalānaṃ dhammānaṃ adhigamāya na chandaṃ janeti, adhigate kusale dhamme na ārakkhati 4, sātaccakiriyāya na sampādeti. Imehi kho, bhikkhave, chahi dhammehi samannāgato bhikkhu abhabbo anadhigataṃ vā kusalaṃ dhammaṃ adhigantuṃ, adhigataṃ vā kusalaṃ dhammaṃ phātiṃ kātuṃ.

    ‘‘ཚཧི , བྷིཀྑཝེ, དྷམྨེཧི སམནྣཱགཏོ བྷིཀྑུ བྷབྦོ ཨནདྷིགཏཾ ཝཱ ཀུསལཾ དྷམྨཾ ཨདྷིགནྟུཾ, ཨདྷིགཏཾ ཝཱ ཀུསལཾ དྷམྨཾ ཕཱཏིཾ ཀཱཏུཾ། ཀཏམེཧི ཚཧི? ཨིདྷ, བྷིཀྑཝེ, བྷིཀྑུ ཨཱཡཀུསལོ ཙ ཧོཏི, ཨཔཱཡཀུསལོ ཙ ཧོཏི, ཨུཔཱཡཀུསལོ ཙ ཧོཏི, ཨནདྷིགཏཱནཾ ཀུསལཱནཾ དྷམྨཱནཾ ཨདྷིགམཱཡ ཚནྡཾ ཛནེཏི, ཨདྷིགཏེ ཀུསལེ དྷམྨེ ཨཱརཀྑཏི, སཱཏཙྩཀིརིཡཱཡ སམྤཱདེཏི། ཨིམེཧི ཁོ, བྷིཀྑཝེ, ཚཧི དྷམྨེཧི སམནྣཱགཏོ བྷིཀྑུ བྷབྦོ ཨནདྷིགཏཾ ཝཱ ཀུསལཾ དྷམྨཾ ཨདྷིགནྟུཾ, ཨདྷིགཏཾ ཝཱ ཀུསལཾ དྷམྨཾ ཕཱཏིཾ ཀཱཏུ’’ནྟི། པཉྩམཾ།

    ‘‘Chahi , bhikkhave, dhammehi samannāgato bhikkhu bhabbo anadhigataṃ vā kusalaṃ dhammaṃ adhigantuṃ, adhigataṃ vā kusalaṃ dhammaṃ phātiṃ kātuṃ. Katamehi chahi? Idha, bhikkhave, bhikkhu āyakusalo ca hoti, apāyakusalo ca hoti, upāyakusalo ca hoti, anadhigatānaṃ kusalānaṃ dhammānaṃ adhigamāya chandaṃ janeti, adhigate kusale dhamme ārakkhati, sātaccakiriyāya sampādeti. Imehi kho, bhikkhave, chahi dhammehi samannāgato bhikkhu bhabbo anadhigataṃ vā kusalaṃ dhammaṃ adhigantuṃ, adhigataṃ vā kusalaṃ dhammaṃ phātiṃ kātu’’nti. Pañcamaṃ.




    Next: ༦. མཧནྟཏྟསུཏྟཾ • 6. Mahantattasuttaṃ




    Footnotes:
    1. ཕཱཏིཀཏྟུཾ (སཱི॰), ཕཱཏིཀཱཏུཾ (སྱཱ॰ ཀཾ॰ པཱི॰)
    2. སཱརཀྑཏི (སཱི॰ སྱཱ॰ ཀཾ॰ པཱི)
    3. phātikattuṃ (sī.), phātikātuṃ (syā. kaṃ. pī.)
    4. sārakkhati (sī. syā. kaṃ. pī)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. ཨདྷིགམསུཏྟཝཎྞནཱ • 5. Adhigamasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥. ཨདྷིགམསུཏྟཝཎྞནཱ • 5. Adhigamasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact