| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. அதி⁴க³ய்ஹமனஸிகாரகதா²வண்ணனா
4. Adhigayhamanasikārakathāvaṇṇanā
749-753. இதா³னி அதி⁴க³ய்ஹ மனஸிகாரகதா² நாம ஹோதி. தத்த² து³விதோ⁴ மனஸிகாரோ நயதோ ச ஆரம்மணதோ ச. தத்த² ஏகஸங்கா²ரஸ்ஸாபி அனிச்சதாய தி³ட்டா²ய ஸப்³பே³ ஸங்கா²ரா அனிச்சாதி அவஸேஸேஸு நயதோ மனஸிகாரோ ஹோதி. அதீதே பன ஸங்கா²ரே மனஸிகரொந்தோ ந அனாக³தே மனஸிகாதுங் ஸக்கோதி. அதீதாதீ³ஸு அஞ்ஞதரங் மனஸிகரோதோ ஆரம்மணதோ மனஸிகாரோ ஹோதி . தத்த² பச்சுப்பன்னே மனஸிகரொந்தோ யேன சித்தேன தே மனஸிகரோதி, தங் பச்சுப்பன்னக்க²ணே மனஸிகாதுங் ந ஸக்கோதி. தத்த² யேஸங் ‘‘ஸப்³பே³ ஸங்கா²ரா அனிச்சா’’திஆதி³வசனங் நிஸ்ஸாய ‘‘மனஸிகரொந்தோ நாம அதி⁴க³ய்ஹ அதி⁴க³ண்ஹித்வா ஸங்க³ண்ஹித்வா ஸப்³பே³ ஸங்கா²ரே ஏகதோ மனஸிகரோதீ’’தி லத்³தி⁴, ஸெய்யதா²பி புப்³ப³ஸேலியாபரஸேலியானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ.
749-753. Idāni adhigayha manasikārakathā nāma hoti. Tattha duvidho manasikāro nayato ca ārammaṇato ca. Tattha ekasaṅkhārassāpi aniccatāya diṭṭhāya sabbe saṅkhārā aniccāti avasesesu nayato manasikāro hoti. Atīte pana saṅkhāre manasikaronto na anāgate manasikātuṃ sakkoti. Atītādīsu aññataraṃ manasikaroto ārammaṇato manasikāro hoti . Tattha paccuppanne manasikaronto yena cittena te manasikaroti, taṃ paccuppannakkhaṇe manasikātuṃ na sakkoti. Tattha yesaṃ ‘‘sabbe saṅkhārā aniccā’’tiādivacanaṃ nissāya ‘‘manasikaronto nāma adhigayha adhigaṇhitvā saṅgaṇhitvā sabbe saṅkhāre ekato manasikarotī’’ti laddhi, seyyathāpi pubbaseliyāparaseliyānaṃ; te sandhāya pucchā sakavādissa, paṭiññā itarassa.
அத² நங் யஸ்மா ஸப்³பே³ ஏகதோ மனஸிகரொந்தேன யேன சித்தேன தே மனஸிகரோதி, தம்பி மனஸிகாதப்³ப³ங் ஹோதி. தஸ்மா தங்சித்ததாய சோதே³துங் தேன சித்தேனாதி ஆஹ. இதரோ ஆரம்மணங் கத்வா ந ஸக்கா ஜானிதுந்தி ஸந்தா⁴ய படிக்கி²பதி. ஏவங்லக்க²ணங் சித்தந்தி ஞாதத்தா பன தம்பி சித்தங் ஞாதமேவ ஹோதீதி ஸந்தா⁴ய படிஜானாதி. அத² வா தஞ்ஞேவ தஸ்ஸ ஆரம்மணங் ந ஹோதீதி படிக்கி²பதி. ‘‘ஸப்³பே³ ஸங்கா²ரா அனிச்சா, யதா³ பஞ்ஞாய பஸ்ஸதீ’’திஆதீ³னி நிஸ்ஸாய உப்பன்னலத்³தி⁴வஸேன படிஜானாதி. ஸேஸபஞ்ஹத்³வயேபி ஏஸேவ நயோ. தேன ப²ஸ்ஸேனாதிஆதீ³ஸு பன ததா²ரூபங் ஸுத்தங் அபஸ்ஸந்தோ படிக்கி²பதேவ. அதீதாதி³பஞ்ஹேஸு ஹெட்டா² வுத்தனயேனேவ படிக்கே²பபடிஞ்ஞா வேதி³தப்³பா³. ஸேஸங் யதா²பாளிமேவ நிய்யாதீதி. ஸப்³பே³ ஸங்கா²ராதிஆதி³வசனங் நயதோ த³ஸ்ஸனங் ஸந்தா⁴ய வுத்தங், ந ஏகக்க²ணே ஆரம்மணதோ, தஸ்மா அஸாத⁴கந்தி.
Atha naṃ yasmā sabbe ekato manasikarontena yena cittena te manasikaroti, tampi manasikātabbaṃ hoti. Tasmā taṃcittatāya codetuṃ tena cittenāti āha. Itaro ārammaṇaṃ katvā na sakkā jānitunti sandhāya paṭikkhipati. Evaṃlakkhaṇaṃ cittanti ñātattā pana tampi cittaṃ ñātameva hotīti sandhāya paṭijānāti. Atha vā taññeva tassa ārammaṇaṃ na hotīti paṭikkhipati. ‘‘Sabbe saṅkhārā aniccā, yadā paññāya passatī’’tiādīni nissāya uppannaladdhivasena paṭijānāti. Sesapañhadvayepi eseva nayo. Tena phassenātiādīsu pana tathārūpaṃ suttaṃ apassanto paṭikkhipateva. Atītādipañhesu heṭṭhā vuttanayeneva paṭikkhepapaṭiññā veditabbā. Sesaṃ yathāpāḷimeva niyyātīti. Sabbe saṅkhārātiādivacanaṃ nayato dassanaṃ sandhāya vuttaṃ, na ekakkhaṇe ārammaṇato, tasmā asādhakanti.
அதி⁴க³ய்ஹமனஸிகாரகதா²வண்ணனா.
Adhigayhamanasikārakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (159) 4. அதி⁴க³ய்ஹமனஸிகாரகதா² • (159) 4. Adhigayhamanasikārakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. அதி⁴க³ய்ஹமனஸிகாரகதா²வண்ணனா • 4. Adhigayhamanasikārakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. அதி⁴க³ய்ஹமனஸிகாரகதா²வண்ணனா • 4. Adhigayhamanasikārakathāvaṇṇanā
