| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৪. অধিগয্হমনসিকারকথাৰণ্ণনা
4. Adhigayhamanasikārakathāvaṇṇanā
৭৪৯-৭৫৩. ইদানি অধিগয্হ মনসিকারকথা নাম হোতি। তত্থ দুৰিধো মনসিকারো নযতো চ আরম্মণতো চ। তত্থ একসঙ্খারস্সাপি অনিচ্চতায দিট্ঠায সব্বে সঙ্খারা অনিচ্চাতি অৰসেসেসু নযতো মনসিকারো হোতি। অতীতে পন সঙ্খারে মনসিকরোন্তো ন অনাগতে মনসিকাতুং সক্কোতি। অতীতাদীসু অঞ্ঞতরং মনসিকরোতো আরম্মণতো মনসিকারো হোতি । তত্থ পচ্চুপ্পন্নে মনসিকরোন্তো যেন চিত্তেন তে মনসিকরোতি, তং পচ্চুপ্পন্নক্খণে মনসিকাতুং ন সক্কোতি। তত্থ যেসং ‘‘সব্বে সঙ্খারা অনিচ্চা’’তিআদিৰচনং নিস্সায ‘‘মনসিকরোন্তো নাম অধিগয্হ অধিগণ্হিত্ৰা সঙ্গণ্হিত্ৰা সব্বে সঙ্খারে একতো মনসিকরোতী’’তি লদ্ধি, সেয্যথাপি পুব্বসেলিযাপরসেলিযানং; তে সন্ধায পুচ্ছা সকৰাদিস্স, পটিঞ্ঞা ইতরস্স।
749-753. Idāni adhigayha manasikārakathā nāma hoti. Tattha duvidho manasikāro nayato ca ārammaṇato ca. Tattha ekasaṅkhārassāpi aniccatāya diṭṭhāya sabbe saṅkhārā aniccāti avasesesu nayato manasikāro hoti. Atīte pana saṅkhāre manasikaronto na anāgate manasikātuṃ sakkoti. Atītādīsu aññataraṃ manasikaroto ārammaṇato manasikāro hoti . Tattha paccuppanne manasikaronto yena cittena te manasikaroti, taṃ paccuppannakkhaṇe manasikātuṃ na sakkoti. Tattha yesaṃ ‘‘sabbe saṅkhārā aniccā’’tiādivacanaṃ nissāya ‘‘manasikaronto nāma adhigayha adhigaṇhitvā saṅgaṇhitvā sabbe saṅkhāre ekato manasikarotī’’ti laddhi, seyyathāpi pubbaseliyāparaseliyānaṃ; te sandhāya pucchā sakavādissa, paṭiññā itarassa.
অথ নং যস্মা সব্বে একতো মনসিকরোন্তেন যেন চিত্তেন তে মনসিকরোতি, তম্পি মনসিকাতব্বং হোতি। তস্মা তংচিত্ততায চোদেতুং তেন চিত্তেনাতি আহ। ইতরো আরম্মণং কত্ৰা ন সক্কা জানিতুন্তি সন্ধায পটিক্খিপতি। এৰংলক্খণং চিত্তন্তি ঞাতত্তা পন তম্পি চিত্তং ঞাতমেৰ হোতীতি সন্ধায পটিজানাতি। অথ ৰা তঞ্ঞেৰ তস্স আরম্মণং ন হোতীতি পটিক্খিপতি। ‘‘সব্বে সঙ্খারা অনিচ্চা, যদা পঞ্ঞায পস্সতী’’তিআদীনি নিস্সায উপ্পন্নলদ্ধিৰসেন পটিজানাতি। সেসপঞ্হদ্ৰযেপি এসেৰ নযো। তেন ফস্সেনাতিআদীসু পন তথারূপং সুত্তং অপস্সন্তো পটিক্খিপতেৰ। অতীতাদিপঞ্হেসু হেট্ঠা ৰুত্তনযেনেৰ পটিক্খেপপটিঞ্ঞা ৰেদিতব্বা। সেসং যথাপাল়িমেৰ নিয্যাতীতি। সব্বে সঙ্খারাতিআদিৰচনং নযতো দস্সনং সন্ধায ৰুত্তং, ন একক্খণে আরম্মণতো, তস্মা অসাধকন্তি।
Atha naṃ yasmā sabbe ekato manasikarontena yena cittena te manasikaroti, tampi manasikātabbaṃ hoti. Tasmā taṃcittatāya codetuṃ tena cittenāti āha. Itaro ārammaṇaṃ katvā na sakkā jānitunti sandhāya paṭikkhipati. Evaṃlakkhaṇaṃ cittanti ñātattā pana tampi cittaṃ ñātameva hotīti sandhāya paṭijānāti. Atha vā taññeva tassa ārammaṇaṃ na hotīti paṭikkhipati. ‘‘Sabbe saṅkhārā aniccā, yadā paññāya passatī’’tiādīni nissāya uppannaladdhivasena paṭijānāti. Sesapañhadvayepi eseva nayo. Tena phassenātiādīsu pana tathārūpaṃ suttaṃ apassanto paṭikkhipateva. Atītādipañhesu heṭṭhā vuttanayeneva paṭikkhepapaṭiññā veditabbā. Sesaṃ yathāpāḷimeva niyyātīti. Sabbe saṅkhārātiādivacanaṃ nayato dassanaṃ sandhāya vuttaṃ, na ekakkhaṇe ārammaṇato, tasmā asādhakanti.
অধিগয্হমনসিকারকথাৰণ্ণনা।
Adhigayhamanasikārakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১৫৯) ৪. অধিগয্হমনসিকারকথা • (159) 4. Adhigayhamanasikārakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৪. অধিগয্হমনসিকারকথাৰণ্ণনা • 4. Adhigayhamanasikārakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৪. অধিগয্হমনসিকারকথাৰণ্ণনা • 4. Adhigayhamanasikārakathāvaṇṇanā
