| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
5. அதி⁴கரணாதி⁴ப்பாயோ
5. Adhikaraṇādhippāyo
348. விவாதா³தி⁴கரணங் ஹோதி அனுவாதா³தி⁴கரணங், ஹோதி ஆபத்தாதி⁴கரணங், ஹோதி கிச்சாதி⁴கரணங். விவாதா³தி⁴கரணங் ந ஹோதி அனுவாதா³தி⁴கரணங், ந ஹோதி ஆபத்தாதி⁴கரணங், ந ஹோதி கிச்சாதி⁴கரணங்; அபி ச, விவாதா³தி⁴கரணபச்சயா ஹோதி அனுவாதா³தி⁴கரணங், ஹோதி ஆபத்தாதி⁴கரணங், ஹோதி கிச்சாதி⁴கரணங். யதா² கத²ங் விய? 1 இத⁴ பி⁴க்கூ² விவத³ந்தி – த⁴ம்மோதி வா அத⁴ம்மோதி வா து³ட்டு²ல்லாபத்தீதி வா அது³ட்டு²ல்லாபத்தீதி வா. யங் தத்த² ப⁴ண்ட³னங் கலஹோ விக்³க³ஹோ விவாதோ³ நானாவாதோ³ அஞ்ஞதா²வாதோ³ விபச்சதாய வோஹாரோ மேத⁴கங், இத³ங் வுச்சதி விவாதா³தி⁴கரணங். விவாதா³தி⁴கரணே ஸங்கோ⁴ விவத³தி விவாதா³தி⁴கரணங். விவத³மானோ அனுவத³தி அனுவாதா³தி⁴கரணங். அனுவத³மானோ ஆபத்திங் ஆபஜ்ஜதி ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி கிச்சாதி⁴கரணங். ஏவங் விவாதா³தி⁴கரணபச்சயா ஹோதி அனுவாதா³தி⁴கரணங், ஹோதி ஆபத்தாதி⁴கரணங், ஹோதி கிச்சாதி⁴கரணங்.
348. Vivādādhikaraṇaṃ hoti anuvādādhikaraṇaṃ, hoti āpattādhikaraṇaṃ, hoti kiccādhikaraṇaṃ. Vivādādhikaraṇaṃ na hoti anuvādādhikaraṇaṃ, na hoti āpattādhikaraṇaṃ, na hoti kiccādhikaraṇaṃ; api ca, vivādādhikaraṇapaccayā hoti anuvādādhikaraṇaṃ, hoti āpattādhikaraṇaṃ, hoti kiccādhikaraṇaṃ. Yathā kathaṃ viya? 2 Idha bhikkhū vivadanti – dhammoti vā adhammoti vā duṭṭhullāpattīti vā aduṭṭhullāpattīti vā. Yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhakaṃ, idaṃ vuccati vivādādhikaraṇaṃ. Vivādādhikaraṇe saṅgho vivadati vivādādhikaraṇaṃ. Vivadamāno anuvadati anuvādādhikaraṇaṃ. Anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ vivādādhikaraṇapaccayā hoti anuvādādhikaraṇaṃ, hoti āpattādhikaraṇaṃ, hoti kiccādhikaraṇaṃ.
அனுவாதா³தி⁴கரணங் ஹோதி ஆபத்தாதி⁴கரணங், ஹோதி கிச்சாதி⁴கரணங், ஹோதி விவாதா³தி⁴கரணங். அனுவாதா³தி⁴கரணங் ந ஹோதி ஆபத்தாதி⁴கரணங், ந ஹோதி கிச்சாதி⁴கரணங், ந ஹோதி விவாதா³தி⁴கரணங்; அபி ச, அனுவாதா³தி⁴கரணபச்சயா ஹோதி ஆபத்தாதி⁴கரணங், ஹோதி கிச்சாதி⁴கரணங், ஹோதி விவாதா³தி⁴கரணங். யதா² கத²ங் விய? இத⁴ பி⁴க்கூ² பி⁴க்கு²ங் அனுவத³ந்தி ஸீலவிபத்தியா வா ஆசாரவிபத்தியா வா தி³ட்டி²விபத்தியா வா ஆஜீவவிபத்தியா வா. யோ தத்த² அனுவாதோ³ அனுவத³னா அனுல்லபனா அனுப⁴ணனா அனுஸம்பவங்கதா அப்³பு⁴ஸ்ஸஹனதா அனுப³லப்பதா³னங், இத³ங் வுச்சதி அனுவாதா³தி⁴கரணங். அனுவாதா³தி⁴கரணே ஸங்கோ⁴ விவத³தி, விவாதா³தி⁴கரணங். விவத³மானோ அனுவத³தி, அனுவாதா³தி⁴கரணங். அனுவத³மானோ ஆபத்திங் ஆபஜ்ஜதி, ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி, கிச்சாதி⁴கரணங். ஏவங் அனுவாதா³தி⁴கரணபச்சயா ஹோதி ஆபத்தாதி⁴கரணங், ஹோதி கிச்சாதி⁴கரணங், ஹோதி விவாதா³தி⁴கரணங்.
Anuvādādhikaraṇaṃ hoti āpattādhikaraṇaṃ, hoti kiccādhikaraṇaṃ, hoti vivādādhikaraṇaṃ. Anuvādādhikaraṇaṃ na hoti āpattādhikaraṇaṃ, na hoti kiccādhikaraṇaṃ, na hoti vivādādhikaraṇaṃ; api ca, anuvādādhikaraṇapaccayā hoti āpattādhikaraṇaṃ, hoti kiccādhikaraṇaṃ, hoti vivādādhikaraṇaṃ. Yathā kathaṃ viya? Idha bhikkhū bhikkhuṃ anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā. Yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ, idaṃ vuccati anuvādādhikaraṇaṃ. Anuvādādhikaraṇe saṅgho vivadati, vivādādhikaraṇaṃ. Vivadamāno anuvadati, anuvādādhikaraṇaṃ. Anuvadamāno āpattiṃ āpajjati, āpattādhikaraṇaṃ. Tāya āpattiyā saṅgho kammaṃ karoti, kiccādhikaraṇaṃ. Evaṃ anuvādādhikaraṇapaccayā hoti āpattādhikaraṇaṃ, hoti kiccādhikaraṇaṃ, hoti vivādādhikaraṇaṃ.
ஆபத்தாதி⁴கரணங் ஹோதி கிச்சாதி⁴கரணங், ஹோதி விவாதா³தி⁴கரணங், ஹோதி அனுவாதா³தி⁴கரணங். ஆபத்தாதி⁴கரணங் ந ஹோதி கிச்சாதி⁴கரணங், ந ஹோதி விவாதா³தி⁴கரணங், ந ஹோதி அனுவாதா³தி⁴கரணங்; அபி ச, ஆபத்தாதி⁴கரணபச்சயா ஹோதி கிச்சாதி⁴கரணங், ஹோதி விவாதா³தி⁴கரணங், ஹோதி அனுவாதா³தி⁴கரணங். யதா² கத²ங் விய? 3 பஞ்சபி ஆபத்திக்க²ந்தா⁴ ஆபத்தாதி⁴கரணங், ஸத்தபி ஆபத்திக்க²ந்தா⁴ ஆபத்தாதி⁴கரணங், இத³ங் வுச்சதி ஆபத்தாதி⁴கரணங். ஆபத்தாதி⁴கரணே ஸங்கோ⁴ விவத³தி விவாதா³தி⁴கரணங். விவத³மானோ அனுவத³தி அனுவாதா³தி⁴கரணங். அனுவத³மானோ ஆபத்திங் ஆபஜ்ஜதி ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி கிச்சாதி⁴கரணங். ஏவங் ஆபத்தாதி⁴கரணபச்சயா ஹோதி கிச்சாதி⁴கரணங், ஹோதி விவாதா³தி⁴கரணங், ஹோதி அனுவாதா³தி⁴கரணங்.
Āpattādhikaraṇaṃ hoti kiccādhikaraṇaṃ, hoti vivādādhikaraṇaṃ, hoti anuvādādhikaraṇaṃ. Āpattādhikaraṇaṃ na hoti kiccādhikaraṇaṃ, na hoti vivādādhikaraṇaṃ, na hoti anuvādādhikaraṇaṃ; api ca, āpattādhikaraṇapaccayā hoti kiccādhikaraṇaṃ, hoti vivādādhikaraṇaṃ, hoti anuvādādhikaraṇaṃ. Yathā kathaṃ viya? 4 Pañcapi āpattikkhandhā āpattādhikaraṇaṃ, sattapi āpattikkhandhā āpattādhikaraṇaṃ, idaṃ vuccati āpattādhikaraṇaṃ. Āpattādhikaraṇe saṅgho vivadati vivādādhikaraṇaṃ. Vivadamāno anuvadati anuvādādhikaraṇaṃ. Anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ āpattādhikaraṇapaccayā hoti kiccādhikaraṇaṃ, hoti vivādādhikaraṇaṃ, hoti anuvādādhikaraṇaṃ.
கிச்சாதி⁴கரணங் ஹோதி விவாதா³தி⁴கரணங், ஹோதி அனுவாதா³தி⁴கரணங், ஹோதி ஆபத்தாதி⁴கரணங். கிச்சாதி⁴கரணங் ந ஹோதி விவாதா³தி⁴கரணங், ந ஹோதி அனுவாதா³தி⁴கரணங், ந ஹோதி ஆபத்தாதி⁴கரணங்; அபி ச, கிச்சாதி⁴கரணபச்சயா ஹோதி விவாதா³தி⁴கரணங், ஹோதி அனுவாதா³தி⁴கரணங், ஹோதி ஆபத்தாதி⁴கரணங். யதா² கத²ங் விய? யா ஸங்க⁴ஸ்ஸ கிச்சயதா கரணீயதா அபலோகனகம்மங் ஞத்திகம்மங் ஞத்திது³தியகம்மங் ஞத்திசதுத்த²கம்மங், இத³ங் வுச்சதி கிச்சாதி⁴கரணங். கிச்சாதி⁴கரணே ஸங்கோ⁴ விவத³தி விவாதா³தி⁴கரணங். விவத³மானோ அனுவத³தி அனுவாதா³தி⁴கரணங். அனுவத³மானோ ஆபத்திங் ஆபஜ்ஜதி ஆபத்தாதி⁴கரணங். தாய ஆபத்தியா ஸங்கோ⁴ கம்மங் கரோதி கிச்சாதி⁴கரணங். ஏவங் கிச்சாதி⁴கரணபச்சயா ஹோதி விவாதா³தி⁴கரணங், ஹோதி அனுவாதா³தி⁴கரணங், ஹோதி ஆபத்தாதி⁴கரணங்.
Kiccādhikaraṇaṃ hoti vivādādhikaraṇaṃ, hoti anuvādādhikaraṇaṃ, hoti āpattādhikaraṇaṃ. Kiccādhikaraṇaṃ na hoti vivādādhikaraṇaṃ, na hoti anuvādādhikaraṇaṃ, na hoti āpattādhikaraṇaṃ; api ca, kiccādhikaraṇapaccayā hoti vivādādhikaraṇaṃ, hoti anuvādādhikaraṇaṃ, hoti āpattādhikaraṇaṃ. Yathā kathaṃ viya? Yā saṅghassa kiccayatā karaṇīyatā apalokanakammaṃ ñattikammaṃ ñattidutiyakammaṃ ñatticatutthakammaṃ, idaṃ vuccati kiccādhikaraṇaṃ. Kiccādhikaraṇe saṅgho vivadati vivādādhikaraṇaṃ. Vivadamāno anuvadati anuvādādhikaraṇaṃ. Anuvadamāno āpattiṃ āpajjati āpattādhikaraṇaṃ. Tāya āpattiyā saṅgho kammaṃ karoti kiccādhikaraṇaṃ. Evaṃ kiccādhikaraṇapaccayā hoti vivādādhikaraṇaṃ, hoti anuvādādhikaraṇaṃ, hoti āpattādhikaraṇaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
