| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
8. அதி⁴கரணகதா²
8. Adhikaraṇakathā
215. விபச்சதாயாதி எத்த² விகாரபா⁴வேன பததி பவத்ததீதி விபச்சங், சித்தது³க்க²ங், ததே³வ விபச்சதா, தத³த்தா²யாதி த³ஸ்ஸெந்தோ ஆஹ ‘‘சித்தது³க்க²த்த²’’ந்தி. ‘‘ப²ருஸவசன’’ந்தி இமினா வோஹார ஸத்³தோ³ வசனபரியாயோதி த³ஸ்ஸேதி. யோ தத்தா²தி எத்த² தஸத்³த³ஸ்ஸ விஸயங் த³ஸ்ஸெந்தோ ஆஹ ‘‘தேஸு அனுவத³ந்தேஸூ’’தி. யோ உபவாதோ³தி யோஜனா. ‘‘அனுவத³னா’’தி ஏதங் பத³ந்தி யோஜனா. ஆகாரத³ஸ்ஸனந்தி அனுவத³னஸ்ஸ ஆகாரத³ஸ்ஸனங், த³ஸ்ஸனஹேது வா. ‘‘புனப்புன’’ந்தி இமினா அனுஸம்பவங்கதாதி எத்த² அனுஸத்³த³ஸ்ஸ ந உபச்சி²ன்னத்த²ங் த³ஸ்ஸேதி. தத்தே²வாதி அனுவத³னே ஏவ. ஸம்பவங்கதாதி ஸம்மா பகாரேன நின்னபோனபப்³பா⁴ரதா. அப்³பு⁴ஸ்ஸஹனதாதி எத்த² அதிரேகங் உஸ்ஸாஹனதாதி த³ஸ்ஸெந்தோ ஆஹ ‘‘கஸ்மா’’திஆதி³. அனுப³லப்பதா³னந்தி எத்த² புனப்புனங் ப³லஸ்ஸ பதா³னந்தி த³ஸ்ஸெந்தோ ஆஹ ‘‘புரிமவசனஸ்ஸா’’திஆதி³.
215.Vipaccatāyāti ettha vikārabhāvena patati pavattatīti vipaccaṃ, cittadukkhaṃ, tadeva vipaccatā, tadatthāyāti dassento āha ‘‘cittadukkhattha’’nti. ‘‘Pharusavacana’’nti iminā vohāra saddo vacanapariyāyoti dasseti. Yo tatthāti ettha tasaddassa visayaṃ dassento āha ‘‘tesu anuvadantesū’’ti. Yo upavādoti yojanā. ‘‘Anuvadanā’’ti etaṃ padanti yojanā. Ākāradassananti anuvadanassa ākāradassanaṃ, dassanahetu vā. ‘‘Punappuna’’nti iminā anusampavaṅkatāti ettha anusaddassa na upacchinnatthaṃ dasseti. Tatthevāti anuvadane eva. Sampavaṅkatāti sammā pakārena ninnaponapabbhāratā. Abbhussahanatāti ettha atirekaṃ ussāhanatāti dassento āha ‘‘kasmā’’tiādi. Anubalappadānanti ettha punappunaṃ balassa padānanti dassento āha ‘‘purimavacanassā’’tiādi.
கிச்சயதாதி எத்த² ‘‘மா பண்டி³ச்சய’’ந்திஆதீ³ஸு (ஜா॰ 2.22.1) விய ப்³யஞ்ஜனவட்³ட⁴னவஸேன யகாராக³மோதி ஆஹ ‘‘கிச்சமேவ கிச்சய’’ந்தி. ‘‘உப⁴யங்பேதங் ஸங்க⁴ஸ்ஸேவ அதி⁴வசன’’ந்தி இமினா கிச்சகரணீயஸத்³தோ³ கத்துவாசகோதி த³ஸ்ஸேதி, ஸங்கோ⁴ ஹி கரோதீதி வசனத்தே²ன கிச்சோதி ச கரணீயோதி ச வுச்சதி. தஸ்ஸ பா⁴வோ, கிச்சயதா கரணீயதாதி வுத்தே ஸங்க⁴கம்மங்யேவ லப்³ப⁴தி. தேன வுத்தங் ‘‘உப⁴யங்பேதங் ஸங்க⁴கம்மஸ்ஸேவ அதி⁴வசன’’ந்தி. யதி³ கம்மவாசகோ ப⁴வெய்ய, ‘‘கத்தப்³ப³ந்தி கிச்சங், கரணீய’’ந்தி வுத்தேயேவ ஸங்க⁴கம்மஸ்ஸ லப⁴னதோ தாபச்சயோ ஸ்வத்தோ² ப⁴வெய்ய. ஏவஞ்ஹி ஸதி கிச்சயஸ்ஸ பா⁴வோ கிச்சயதா கரணீயஸ்ஸ பா⁴வோ கரணீயதாதி வசனத்தோ² ந கத்தப்³போ³ ப⁴வெய்ய, கதோ ச, தஸ்மா ந கம்மவாசகோதி த³ட்ட²ப்³ப³ங். தஸ்ஸேவாதி ஸங்க⁴கம்மஸ்ஸேவ. தத்தா²தி அபலோகனாதீ³ஸு சதூஸு கம்மேஸு. ஸீமட்ட²கஸங்க⁴ந்தி ‘‘உபசாரஸீமாதீ³ஸு டி²தங் ஸங்க⁴ங். ஸோதெ⁴த்வாதி எத்த² ஸோத⁴னங் நாம ஸீமட்ட²கஸங்க⁴ஸ்ஸ ஹத்த²பாஸனயனங், ச²ந்தா³ரஹானங் ச²ந்த³ஸ்ஸ ஆஹரணங், ஸீமதோ ப³ஹிகரணங். தமேவத்த²ங் ஏகதே³ஸதோ த³ஸ்ஸேதுங் வுத்தங் ‘‘ச²ந்தா³ரஹானங் ச²ந்த³ங் ஆஹரித்வா’’தி. அபலோகேதி ஆபுச்ச²தி அனேனாதி அபலோகனங், தங்யேவ கம்மங் அபலோகனகம்மங். வுத்தனயேனேவாதி ‘‘ஸீமட்ட²கஸங்க⁴ங் ஸோதெ⁴த்வா’’திஆதி³னா வுத்தனயேனேவ. ‘‘ஸுணாது மே’’திஆதி³னா ஸங்க⁴க³ணபுக்³க³லே ஞாபேதி ஏதாயாதி ஞத்தி, ஸாயேவ கம்மங் ஞத்திகம்மங், ஞத்தியேவ து³தியங் ஞத்திது³தியங், தமேவ கம்மங் ஞத்திது³தியகம்மங். எத்த² கிஞ்சாபி ஞத்தி பட²மங் ட²பிதா, கம்மவாசாயேவ து³தியா ஹோதி, ‘‘ப²ஸ்ஸபஞ்சமா’’திஆதீ³ஸு (தா⁴து॰ 316) விய பன படிலோமவஸேன வோஹாரங் கத்வா ‘‘ஞத்திது³தியா’’தி வுத்தங். ப²ஸ்ஸபஞ்சமாதி எத்த² கிஞ்சாபி த⁴ம்மஸங்க³ணியங் (த⁴॰ ஸ॰ 1 ஆத³யோ) ‘‘ப²ஸ்ஸோ ஹோதி, வேத³னா ஹோதி, ஸஞ்ஞா ஹோதி, சேதனா ஹோதி , சித்தங் ஹோதீ’’தி ப²ஸ்ஸங் பட²மங் வுத்தங், படிலோமவஸேன பன வோஹாரங் கத்வா ‘‘ப²ஸ்ஸபஞ்சமா’’தி தா⁴துகதா²யங் வுத்தந்தி த³ட்ட²ப்³ப³ங். ஏஸேவ நயோ ஞத்தி சதுத்த²கம்மேபி. ஏகாய ச அனுஸாவனாயாதி ஞத்திதோ அனுபச்சா² ஸாவேதப்³பா³தி அனுஸாவனா, தாய, தீஹி ச அனுஸாவனாஹீதி ஞத்திதோஅனு பச்சா², புனப்புனங் வா திக்க²த்துங் ஸாவேதப்³பா³தி அனுஸாவனா, தாஹி. தத்தா²தி சதூஸு கம்மேஸு.
Kiccayatāti ettha ‘‘mā paṇḍiccaya’’ntiādīsu (jā. 2.22.1) viya byañjanavaḍḍhanavasena yakārāgamoti āha ‘‘kiccameva kiccaya’’nti. ‘‘Ubhayaṃpetaṃ saṅghasseva adhivacana’’nti iminā kiccakaraṇīyasaddo kattuvācakoti dasseti, saṅgho hi karotīti vacanatthena kiccoti ca karaṇīyoti ca vuccati. Tassa bhāvo, kiccayatā karaṇīyatāti vutte saṅghakammaṃyeva labbhati. Tena vuttaṃ ‘‘ubhayaṃpetaṃ saṅghakammasseva adhivacana’’nti. Yadi kammavācako bhaveyya, ‘‘kattabbanti kiccaṃ, karaṇīya’’nti vutteyeva saṅghakammassa labhanato tāpaccayo svattho bhaveyya. Evañhi sati kiccayassa bhāvo kiccayatā karaṇīyassa bhāvo karaṇīyatāti vacanattho na kattabbo bhaveyya, kato ca, tasmā na kammavācakoti daṭṭhabbaṃ. Tassevāti saṅghakammasseva. Tatthāti apalokanādīsu catūsu kammesu. Sīmaṭṭhakasaṅghanti ‘‘upacārasīmādīsu ṭhitaṃ saṅghaṃ. Sodhetvāti ettha sodhanaṃ nāma sīmaṭṭhakasaṅghassa hatthapāsanayanaṃ, chandārahānaṃ chandassa āharaṇaṃ, sīmato bahikaraṇaṃ. Tamevatthaṃ ekadesato dassetuṃ vuttaṃ ‘‘chandārahānaṃ chandaṃ āharitvā’’ti. Apaloketi āpucchati anenāti apalokanaṃ, taṃyeva kammaṃ apalokanakammaṃ. Vuttanayenevāti ‘‘sīmaṭṭhakasaṅghaṃ sodhetvā’’tiādinā vuttanayeneva. ‘‘Suṇātu me’’tiādinā saṅghagaṇapuggale ñāpeti etāyāti ñatti, sāyeva kammaṃ ñattikammaṃ, ñattiyeva dutiyaṃ ñattidutiyaṃ, tameva kammaṃ ñattidutiyakammaṃ. Ettha kiñcāpi ñatti paṭhamaṃ ṭhapitā, kammavācāyeva dutiyā hoti, ‘‘phassapañcamā’’tiādīsu (dhātu. 316) viya pana paṭilomavasena vohāraṃ katvā ‘‘ñattidutiyā’’ti vuttaṃ. Phassapañcamāti ettha kiñcāpi dhammasaṅgaṇiyaṃ (dha. sa. 1 ādayo) ‘‘phasso hoti, vedanā hoti, saññā hoti, cetanā hoti , cittaṃ hotī’’ti phassaṃ paṭhamaṃ vuttaṃ, paṭilomavasena pana vohāraṃ katvā ‘‘phassapañcamā’’ti dhātukathāyaṃ vuttanti daṭṭhabbaṃ. Eseva nayo ñatti catutthakammepi. Ekāya ca anusāvanāyāti ñattito anupacchā sāvetabbāti anusāvanā, tāya, tīhi ca anusāvanāhīti ñattitoanu pacchā, punappunaṃ vā tikkhattuṃ sāvetabbāti anusāvanā, tāhi. Tatthāti catūsu kammesu.
அபலோகெத்வாவாதி எத்த² ஏவப²லங் த³ஸ்ஸெந்தோ ஆஹ ‘‘ஞத்திகம்மாதி³வஸேன ந காதப்³ப³’’ந்தி. ஞத்திகம்மம்பீதி பிஸத்³தே³ன ந கேவலங் அபலோகனகம்மமேவ, அத² கோ² ஞத்திகம்மம்பீதி த³ஸ்ஸேதி. ஞத்திது³தியகம்மங் பனாதி எத்த² பனஸத்³தோ³ விஸேஸத்த²ஜோதகோ, பக்க²ந்தரஜோதகோ வா. தத்தா²தி த்³வீஸு கம்மேஸு. க³ருகானீதி அலஹுகானி. அவஸேஸானீதி ச²ஹி கம்மேஹி அவஸேஸானி, ஏவரூபானி லஹுககம்மானீதி ஸம்ப³ந்தோ⁴. ‘‘அவஸேஸா’’திபி பாடோ², ஸம்முதியோதி ஸம்ப³ந்தோ⁴. அபலோகெத்வாபீதி பிஸத்³தோ³ ஞத்திது³தியகம்மவாசங் ஸாவெத்வாபீதி ஸம்பிண்டே³தி. அஞ்ஞத்தா²போஹனங் த³ஸ்ஸெந்தோ ஆஹ ‘‘ஞத்திகம்மஞத்திசதுத்த²கம்மவஸேன பன ந காதப்³ப³மேவா’’தி. ஞத்திசதுத்த²கம்மங் காதப்³ப³ந்தி ஸம்ப³ந்தோ⁴. எத்தா²தி ஸமத²க்க²ந்த⁴கே.
Apaloketvāvāti ettha evaphalaṃ dassento āha ‘‘ñattikammādivasena na kātabba’’nti. Ñattikammampīti pisaddena na kevalaṃ apalokanakammameva, atha kho ñattikammampīti dasseti. Ñattidutiyakammaṃ panāti ettha panasaddo visesatthajotako, pakkhantarajotako vā. Tatthāti dvīsu kammesu. Garukānīti alahukāni. Avasesānīti chahi kammehi avasesāni, evarūpāni lahukakammānīti sambandho. ‘‘Avasesā’’tipi pāṭho, sammutiyoti sambandho. Apaloketvāpīti pisaddo ñattidutiyakammavācaṃ sāvetvāpīti sampiṇḍeti. Aññatthāpohanaṃ dassento āha ‘‘ñattikammañatticatutthakammavasena pana na kātabbamevā’’ti. Ñatticatutthakammaṃ kātabbanti sambandho. Etthāti samathakkhandhake.
வித்தா²ரதோ பன ஆக³தோயேவாதி ஸம்ப³ந்தோ⁴. ஏதேஸந்தி சதுன்னங் கம்மானங். யங் பன அத்த²ஜாதங் அனுத்தானந்தி ஸம்ப³ந்தோ⁴. தத்தா²தி சதூஸு கம்மேஸு. தந்தி அத்த²ஜாதங். ஏவந்தி ஏவங் கம்மவக்³கே³யேவ வண்ணயமானே. ஹீதி லத்³த⁴கு³ணஜோதகோ. ஸுவிஞ்ஞெய்யாதி ஸுகே²ன விஞ்ஞாதப்³பா³.
Vitthārato pana āgatoyevāti sambandho. Etesanti catunnaṃ kammānaṃ. Yaṃ pana atthajātaṃ anuttānanti sambandho. Tatthāti catūsu kammesu. Tanti atthajātaṃ. Evanti evaṃ kammavaggeyeva vaṇṇayamāne. Hīti laddhaguṇajotako. Suviññeyyāti sukhena viññātabbā.
216. பாளிவஸேனேவாதி ந அட்ட²கதா²வஸேனாதி அதி⁴ப்பாயோ.
216.Pāḷivasenevāti na aṭṭhakathāvasenāti adhippāyo.
220. யேனாதி சித்துப்பாதே³ன. இமினா விவத³ந்தி அனேனாதி விவாதோ³தி வசனத்த²ங் த³ஸ்ஸேதி. ஸமதே²ஹி சாதி சஸத்³தோ³ ஸம்பிண்ட³னத்தோ². தேன ந கேவலங் விவாதோ³யேவ, அத² கோ² அதி⁴கரணஞ்சாதி ஸம்பிண்டே³தி, அத² வா ஸமதே²ஹி சாதி ஸமதே²ஹி ஏவ. இமினா ஸமதே²ஹி அதி⁴கரீயதி வூபஸமீயதீதி அதி⁴கரணந்தி வசனத்த²ங் த³ஸ்ஸேதி. விவாதோ³யேவ அதி⁴கரணங் விவாதா³தி⁴கரணங். ஏவமாதி³னா நயேனாதி ஆதி³ஸத்³தே³ன அனுத்³த⁴ங்ஸனேன வத³ந்தி அனேன சித்துப்பாதே³னாதி அனுவாதோ³திஆத³யோ வசனத்தே² ஸங்க³ண்ஹாதி.
220.Yenāti cittuppādena. Iminā vivadanti anenāti vivādoti vacanatthaṃ dasseti. Samathehi cāti casaddo sampiṇḍanattho. Tena na kevalaṃ vivādoyeva, atha kho adhikaraṇañcāti sampiṇḍeti, atha vā samathehi cāti samathehi eva. Iminā samathehi adhikarīyati vūpasamīyatīti adhikaraṇanti vacanatthaṃ dasseti. Vivādoyeva adhikaraṇaṃ vivādādhikaraṇaṃ. Evamādinā nayenāti ādisaddena anuddhaṃsanena vadanti anena cittuppādenāti anuvādotiādayo vacanatthe saṅgaṇhāti.
222. ஸந்தா⁴யபா⁴ஸிதவஸேனாதி லோகவஜ்ஜங் ஸந்தா⁴ய பா⁴ஸிதஸ்ஸ வசனஸ்ஸ வஸேன. ஸந்தா⁴யபா⁴ஸிதத்த²ங் வித்தா²ரெந்தோ ஆஹ ‘‘யஸ்மிங் ஹீ’’திஆதி³. தத்த² பத²விக²ணனாதி³கே யஸ்மிங் ஆபத்தாதி⁴கரணேதி யோஜனா. தஸ்மிந்தி குஸலசித்தங்கே³ ஆபத்தாதி⁴கரணே. தஸ்மாதி யஸ்மா ந ஸக்கா வத்துங், தஸ்மா. இத³ந்தி ‘‘நத்தி² ஆபத்தாதி⁴கரணங் குஸல’’ந்தி வசனங், வுத்தந்தி ஸம்ப³ந்தோ⁴. ஸந்தா⁴ய அவுத்தங் த³ஸ்ஸெத்வா ஸந்தா⁴ய வுத்தங் த³ஸ்ஸெந்தோ ஆஹ ‘‘இத³ங் பன ஸந்தா⁴ய வுத்த’’ந்தி. தத்த² இத³ங் பனாதி காரணங் பன ஸந்தா⁴யாதி ஸம்ப³ந்தோ⁴. யங் ஆபத்தாதி⁴கரணந்தி யோஜனா. ‘‘லோகவஜ்ஜ’’ந்தி பதே³ துல்யாதி⁴கரணங். லோகஸ்மிங், லோகேஹி வா வஜ்ஜேதப்³ப³ந்தி லோகவஜ்ஜங். தந்தி ஆபத்தாதி⁴கரணங். தத்தா²தி ஆபத்தாதி⁴கரணே. விகப்போதி விவிதா⁴ கப்பனங், விவித⁴தக்கோ வா. யங் பனாதி ஆபத்தாதி⁴கரணங் பன. ‘‘பண்ணத்திவஜ்ஜ’’ந்தி பதே³ துல்யாதி⁴கரணங். ப⁴க³வதோ பஞ்ஞத்தியா ஹேதுபூ⁴தாய வஜ்ஜேதப்³ப³ந்தி பண்ணத்திவஜ்ஜங். தந்தி ஆபத்தாதி⁴கரணங், அகுஸலங் ஹோதீதி ஸம்ப³ந்தோ⁴. கிஞ்சீதி அப்பமத்தகங், ஆபத்தானாபத்திங் அஜானந்தஸ்ஸ ஆபஜ்ஜனதோதி ஸம்ப³ந்தோ⁴. தஸ்மாதி யஸ்மா அப்³யாகதங் ஹோதி, தஸ்மா. தத்தா²தி பண்ணத்திவஜ்ஜபூ⁴தே ஆபத்தாதி⁴கரணே. ‘‘ஆபத்தாதி⁴கரணங்…பே॰… குஸல’’ந்தி இத³ங் வசனங் வுத்தந்தி யோஜனா.
222.Sandhāyabhāsitavasenāti lokavajjaṃ sandhāya bhāsitassa vacanassa vasena. Sandhāyabhāsitatthaṃ vitthārento āha ‘‘yasmiṃ hī’’tiādi. Tattha pathavikhaṇanādike yasmiṃ āpattādhikaraṇeti yojanā. Tasminti kusalacittaṅge āpattādhikaraṇe. Tasmāti yasmā na sakkā vattuṃ, tasmā. Idanti ‘‘natthi āpattādhikaraṇaṃ kusala’’nti vacanaṃ, vuttanti sambandho. Sandhāya avuttaṃ dassetvā sandhāya vuttaṃ dassento āha ‘‘idaṃ pana sandhāya vutta’’nti. Tattha idaṃ panāti kāraṇaṃ pana sandhāyāti sambandho. Yaṃ āpattādhikaraṇanti yojanā. ‘‘Lokavajja’’nti pade tulyādhikaraṇaṃ. Lokasmiṃ, lokehi vā vajjetabbanti lokavajjaṃ. Tanti āpattādhikaraṇaṃ. Tatthāti āpattādhikaraṇe. Vikappoti vividhā kappanaṃ, vividhatakko vā. Yaṃ panāti āpattādhikaraṇaṃ pana. ‘‘Paṇṇattivajja’’nti pade tulyādhikaraṇaṃ. Bhagavato paññattiyā hetubhūtāya vajjetabbanti paṇṇattivajjaṃ. Tanti āpattādhikaraṇaṃ, akusalaṃ hotīti sambandho. Kiñcīti appamattakaṃ, āpattānāpattiṃ ajānantassa āpajjanatoti sambandho. Tasmāti yasmā abyākataṃ hoti, tasmā. Tatthāti paṇṇattivajjabhūte āpattādhikaraṇe. ‘‘Āpattādhikaraṇaṃ…pe… kusala’’nti idaṃ vacanaṃ vuttanti yojanā.
யதி³ குஸலசித்தோ ஆபஜ்ஜதி, அத² நனு ஆபத்தாதி⁴கரணங் குலலந்தி வத்தப்³போ³ ப⁴வெய்யாதி ஆஹ ‘‘ஸசே பனா’’திஆதி³. யந்தி ஆபத்தாதி⁴கரணங். ‘‘இத³ங் வுச்சதி…பே॰… குஸல’’ந்தி வதெ³ய்ய ஸசேதி யோஜனா. ஏளகலோமஞ்ச பத³ஸோத⁴ம்மஞ்ச ஏளகலோமபத³ஸோத⁴ம்மானி, தானி ஆதீ³னி யேஸங் தானீதி ஏளகலோமபத³ஸோத⁴ம்மாதீ³னி, தானி ஸமுட்டா²னானி யாஸந்தி ஏளகலோமபத³ஸோத⁴ம்மாதி³ஸமுட்டா²னா, தாஸங் ஆபத்தீனம்பீதி ஸம்ப³ந்தோ⁴. தத்தா²தி ஏளகலோமபத³ஸோத⁴ம்மாதி³ஸமுட்டா²னாஸு ஆபத்தீஸு. ஆபத்தியா அங்க³ந்தி ஆபத்தியா காரணங். ஏவங் ஆபத்தியா அனங்க³ங் த³ஸ்ஸெத்வா தஸ்ஸாயேவ அங்க³ங் த³ஸ்ஸெந்தோ ஆஹ ‘‘காயவசீவிஞ்ஞத்திவஸேன பனா’’திஆதி³. தத்த² சலிதப்பவத்தானந்தி சலிதேன ஹேதுபூ⁴தேன பவத்தானங். அத² வா சலிதோ ச காயோ, பவத்தா ச வாசாதி சலிதப்பவத்தா, தாஸங் சலிதப்பவத்தானங் காயவாசானங். தஞ்சாதி காயவாசானங் அஞ்ஞதரஞ்ச. அப்³யாகதந்தி எத்த² இதிஸத்³தோ³ பரிஸமாபனத்தோ².
Yadi kusalacitto āpajjati, atha nanu āpattādhikaraṇaṃ kulalanti vattabbo bhaveyyāti āha ‘‘sace panā’’tiādi. Yanti āpattādhikaraṇaṃ. ‘‘Idaṃ vuccati…pe… kusala’’nti vadeyya saceti yojanā. Eḷakalomañca padasodhammañca eḷakalomapadasodhammāni, tāni ādīni yesaṃ tānīti eḷakalomapadasodhammādīni, tāni samuṭṭhānāni yāsanti eḷakalomapadasodhammādisamuṭṭhānā, tāsaṃ āpattīnampīti sambandho. Tatthāti eḷakalomapadasodhammādisamuṭṭhānāsu āpattīsu. Āpattiyā aṅganti āpattiyā kāraṇaṃ. Evaṃ āpattiyā anaṅgaṃ dassetvā tassāyeva aṅgaṃ dassento āha ‘‘kāyavacīviññattivasena panā’’tiādi. Tattha calitappavattānanti calitena hetubhūtena pavattānaṃ. Atha vā calito ca kāyo, pavattā ca vācāti calitappavattā, tāsaṃ calitappavattānaṃ kāyavācānaṃ. Tañcāti kāyavācānaṃ aññatarañca. Abyākatanti ettha itisaddo parisamāpanattho.
அயமத்தோ² ஏவங் வேதி³தப்³போ³தி யோஜனா. தேனாதி சித்தேன. ‘‘இத³ங்…பே॰… ஸத்³தி⁴’’ந்தி இமினா ஸஞ்ஜானந்தோதி எத்த² ஸங்ஸத்³த³ஸ்ஸ ஸுந்த³ரத்த²ங் ஸஹ ஆகாரேன த³ஸ்ஸேதி. ‘‘வீதிக்கம…பே॰… கப்பெத்வா’’தி இமினா சேச்சாதி பத³ஸ்ஸ அத்த²ங் ஸஹ விஸேஸனேன த³ஸ்ஸேதி. ‘‘உபக்கமவஸேன…பே॰… பேஸெத்வா’’தி இமினா அபி⁴விதரித்வாதி பத³ஸ்ஸ அத்த²ங் த³ஸ்ஸேதி. பாளியங் யங்ஸத்³தோ³வீதிக்கமவிஸயோதி ஆஹ ‘‘யங் ஆபத்தாதி⁴கரணங் வீதிக்கம’’ந்தி. ‘‘ஆபஜ்ஜதீ’’தி இமினா பாட²ஸேஸங் த³ஸ்ஸேதி. ஏவங் வீதிக்கமதோ தஸ்ஸ பி⁴க்கு²னோதி யோஜனா.
Ayamattho evaṃ veditabboti yojanā. Tenāti cittena. ‘‘Idaṃ…pe… saddhi’’nti iminā sañjānantoti ettha saṃsaddassa sundaratthaṃ saha ākārena dasseti. ‘‘Vītikkama…pe… kappetvā’’ti iminā ceccāti padassa atthaṃ saha visesanena dasseti. ‘‘Upakkamavasena…pe… pesetvā’’ti iminā abhivitaritvāti padassa atthaṃ dasseti. Pāḷiyaṃ yaṃsaddovītikkamavisayoti āha ‘‘yaṃ āpattādhikaraṇaṃ vītikkama’’nti. ‘‘Āpajjatī’’ti iminā pāṭhasesaṃ dasseti. Evaṃ vītikkamato tassa bhikkhunoti yojanā.
அப்³யாகதவாரேபீதி பிஸத்³தோ³ அகுஸலவாரங் அபெக்க²தி. தஸ்ஸாதி சித்தஸ்ஸ. அஜானந்தோதிஆதீ³னங் பதா³னமத்தோ² அகுஸலவாரே வுத்தபடிபக்க²வஸேன வேதி³தப்³போ³. யங் ஆபத்தாதி⁴கரணந்திஆதீ³னங் பதா³னமத்தோ² அகுஸலவாரேன ஸதி³ஸோயேவ.
Abyākatavārepīti pisaddo akusalavāraṃ apekkhati. Tassāti cittassa. Ajānantotiādīnaṃ padānamattho akusalavāre vuttapaṭipakkhavasena veditabbo. Yaṃ āpattādhikaraṇantiādīnaṃ padānamattho akusalavārena sadisoyeva.
224. அயங் விவாதோ³ நோ அதி⁴கரணந்திஆதீ³ஸு ஏவமத்தோ² வேதி³தப்³போ³தி ஸம்ப³ந்தோ⁴.
224.Ayaṃ vivādo no adhikaraṇantiādīsu evamattho veditabboti sambandho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 8. அதி⁴கரணங் • 8. Adhikaraṇaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அதி⁴கரணகதா² • Adhikaraṇakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணகதா²வண்ணனா • Adhikaraṇakathāvaṇṇanā
