| Library / Tipiṭaka / তিপিটক • Tipiṭaka / চূল়ৰগ্গ-অট্ঠকথা • Cūḷavagga-aṭṭhakathā |
অধিকরণকথা
Adhikaraṇakathā
২১৫. ভিক্খুনীনং অনুপখজ্জাতি ভিক্খুনীনং অন্তো পৰিসিত্ৰা। ৰিৰাদাধিকরণাদীনং ৰচনত্থো দুট্ঠদোসৰণ্ণনাযং ৰুত্তোযেৰ। ৰিপচ্চতায ৰোহারোতি চিত্তদুক্খত্থং ৰোহারো; ফরুসৰচনন্তি অত্থো। যো তত্থ অনুৰাদোতি যো তেসু অনুৰদন্তেসু উপৰাদো। অনুৰদনাতি আকারনিদস্সনমেতং; উপৰদনাতি অত্থো। অনুল্লপনা অনুভণনাতি উভযং অনুৰদনৰেৰচনমত্তমেৰ। অনুসম্পৰঙ্কতাতি পুনপ্পুনং কাযচিত্তৰাচাহি তত্থেৰ সম্পৰঙ্কতা; অনুৰদনভাৰোতি অত্থো। অব্ভুস্সহনতাতি ‘‘কস্মা এৰং ন উপৰদিস্সামি, উপৰদিস্সামিযেৰা’’তি উস্সাহং কত্ৰা অনুৰদনা। অনুবলপ্পদানন্তি পুরিমৰচনস্স কারণং দস্সেত্ৰা পচ্ছিমৰচনেন বলপ্পদানং।
215.Bhikkhunīnaṃ anupakhajjāti bhikkhunīnaṃ anto pavisitvā. Vivādādhikaraṇādīnaṃ vacanattho duṭṭhadosavaṇṇanāyaṃ vuttoyeva. Vipaccatāya vohāroti cittadukkhatthaṃ vohāro; pharusavacananti attho. Yo tattha anuvādoti yo tesu anuvadantesu upavādo. Anuvadanāti ākāranidassanametaṃ; upavadanāti attho. Anullapanā anubhaṇanāti ubhayaṃ anuvadanavevacanamattameva. Anusampavaṅkatāti punappunaṃ kāyacittavācāhi tattheva sampavaṅkatā; anuvadanabhāvoti attho. Abbhussahanatāti ‘‘kasmā evaṃ na upavadissāmi, upavadissāmiyevā’’ti ussāhaṃ katvā anuvadanā. Anubalappadānanti purimavacanassa kāraṇaṃ dassetvā pacchimavacanena balappadānaṃ.
কিচ্চযতা করণীযতাতি এত্থ কিচ্চমেৰ কিচ্চযং, কিচ্চযস্স ভাৰো কিচ্চযতা, করণীযস্স ভাৰো করণীযতা; উভযম্পেতং সঙ্ঘকম্মস্সেৰ অধিৰচনং। অপলোকনকম্মন্তিআদি পন তস্সেৰ পভেদৰচনং। তত্থ অপলোকনকম্মং নাম সীমট্ঠকসঙ্ঘং সোধেত্ৰা ছন্দারহানং ছন্দং আহরিত্ৰা সমগ্গস্স সঙ্ঘস্স অনুমতিযা তিক্খত্তুং সাৰেত্ৰা কত্তব্বকম্মং। ঞত্তিকম্মং নাম ৰুত্তনযেনেৰ সমগ্গস্স সঙ্ঘস্স অনুমতিযা একায ঞত্তিযা কত্তব্বকম্মং। ঞত্তিদুতিযকম্মং নাম ৰুত্তনযেনেৰ সমগ্গস্স সঙ্ঘস্স অনুমতিযা একায ঞত্তিযা একায চ অনুস্সাৰনাযাতি এৰং ঞত্তিদুতিযায অনুস্সাৰনায কত্তব্বকম্মং। ঞত্তিচতুত্থকম্মং নাম ৰুত্তনযেনেৰ সমগ্গস্স সঙ্ঘস্স অনুমতিযা একায ঞত্তিযা তীহি চ অনুস্সাৰনাহীতি এৰং ঞত্তিচতুত্থাহি তীহি অনুস্সাৰনাহি কত্তব্বকম্মং।
Kiccayatākaraṇīyatāti ettha kiccameva kiccayaṃ, kiccayassa bhāvo kiccayatā, karaṇīyassa bhāvo karaṇīyatā; ubhayampetaṃ saṅghakammasseva adhivacanaṃ. Apalokanakammantiādi pana tasseva pabhedavacanaṃ. Tattha apalokanakammaṃ nāma sīmaṭṭhakasaṅghaṃ sodhetvā chandārahānaṃ chandaṃ āharitvā samaggassa saṅghassa anumatiyā tikkhattuṃ sāvetvā kattabbakammaṃ. Ñattikammaṃ nāma vuttanayeneva samaggassa saṅghassa anumatiyā ekāya ñattiyā kattabbakammaṃ. Ñattidutiyakammaṃ nāma vuttanayeneva samaggassa saṅghassa anumatiyā ekāya ñattiyā ekāya ca anussāvanāyāti evaṃ ñattidutiyāya anussāvanāya kattabbakammaṃ. Ñatticatutthakammaṃ nāma vuttanayeneva samaggassa saṅghassa anumatiyā ekāya ñattiyā tīhi ca anussāvanāhīti evaṃ ñatticatutthāhi tīhi anussāvanāhi kattabbakammaṃ.
তত্থ অপলোকনকম্মং অপলোকেত্ৰাৰ কাতব্বং, ঞত্তিকম্মাদিৰসেন ন কাতব্বং। ঞত্তিকম্মম্পি একং ঞত্তিং ঠপেত্ৰাৰ কাতব্বং, অপলোকনকম্মাদিৰসেন ন কাতব্বং। ঞত্তিদুতিযকম্মং পন অপলোকেত্ৰা কত্তব্বম্পি অত্থি, অকত্তব্বম্পি অত্থি। তত্থ সীমাসম্মুতি সীমাসমূহননং কথিনদানং কথিনুব্ভারো কুটিৰত্থুদেসনা ৰিহারৰত্থুদেসনাতি ইমানি ছ কম্মানি গরুকানি, অপলোকেত্ৰা কাতুং ন ৰট্টন্তি। ঞত্তিদুতিযকম্মৰাচং সাৰেত্ৰাৰ কাতব্বানি। অৰসেসা তেরস সম্মুতিযো সেনাসনগ্গাহকমতকচীৰরদানাদিসম্মুতিযো চাতি এৰরূপানি লহুককম্মানি অপলোকেত্ৰাপি কাতুং ৰট্টন্তি। ঞত্তিকম্মঞত্তিচতুত্থকম্মৰসেন পন ন কাতব্বমেৰ। ঞত্তিচতুত্থকম্মং ঞত্তিঞ্চ তিস্সো চ কম্মৰাচাযো সাৰেত্ৰাৰ কাতব্বং, অপলোকনকম্মাদিৰসেন ন কাতব্বন্তি অযমেত্থ সঙ্খেপো।
Tattha apalokanakammaṃ apaloketvāva kātabbaṃ, ñattikammādivasena na kātabbaṃ. Ñattikammampi ekaṃ ñattiṃ ṭhapetvāva kātabbaṃ, apalokanakammādivasena na kātabbaṃ. Ñattidutiyakammaṃ pana apaloketvā kattabbampi atthi, akattabbampi atthi. Tattha sīmāsammuti sīmāsamūhananaṃ kathinadānaṃ kathinubbhāro kuṭivatthudesanā vihāravatthudesanāti imāni cha kammāni garukāni, apaloketvā kātuṃ na vaṭṭanti. Ñattidutiyakammavācaṃ sāvetvāva kātabbāni. Avasesā terasa sammutiyo senāsanaggāhakamatakacīvaradānādisammutiyo cāti evarūpāni lahukakammāni apaloketvāpi kātuṃ vaṭṭanti. Ñattikammañatticatutthakammavasena pana na kātabbameva. Ñatticatutthakammaṃ ñattiñca tisso ca kammavācāyo sāvetvāva kātabbaṃ, apalokanakammādivasena na kātabbanti ayamettha saṅkhepo.
ৰিত্থারতো পন ইমানি চত্তারি কম্মানি ‘‘কতিহাকারেহি ৰিপজ্জন্তী’’তিআদিনা নযেন পরিৰারাৰসানে কম্মৰগ্গে এতেসং ৰিনিচ্ছযো আগতোযেৰ। যং পন তত্থ অনুত্তানং, তং কম্মৰগ্গেযেৰ ৰণ্ণযিস্সাম। এৰঞ্হি সতি ন অট্ঠানে ৰণ্ণনা ভৰিস্সতি, আদিতো পট্ঠায চ তস্স তস্স কম্মস্স ৰিঞ্ঞাতত্তা সুৰিঞ্ঞেয্যো ভৰিস্সতি।
Vitthārato pana imāni cattāri kammāni ‘‘katihākārehi vipajjantī’’tiādinā nayena parivārāvasāne kammavagge etesaṃ vinicchayo āgatoyeva. Yaṃ pana tattha anuttānaṃ, taṃ kammavaggeyeva vaṇṇayissāma. Evañhi sati na aṭṭhāne vaṇṇanā bhavissati, ādito paṭṭhāya ca tassa tassa kammassa viññātattā suviññeyyo bhavissati.
২১৬. ৰিৰাদাধিকরণস্স কিং মূলন্তিআদীনি পাল়িৰসেনেৰ ৰেদিতব্বানি।
216.Vivādādhikaraṇassa kiṃ mūlantiādīni pāḷivaseneva veditabbāni.
২২০. ‘‘ৰিৰাদাধিকরণং সিযা কুসল’’ন্তিআদীসু যেন ৰিৰদন্তি, সো চিত্তুপ্পাদো ৰিৰাদো, সমথেহি চ অধিকরণীযতায অধিকরণন্তি এৰমাদিনা নযেন অত্থো দট্ঠব্বো।
220.‘‘Vivādādhikaraṇaṃsiyā kusala’’ntiādīsu yena vivadanti, so cittuppādo vivādo, samathehi ca adhikaraṇīyatāya adhikaraṇanti evamādinā nayena attho daṭṭhabbo.
২২২. আপত্তাধিকরণং সিযা অকুসলং সিযা অব্যাকতং, নত্থি আপত্তাধিকরণং কুসলন্তি এত্থ সন্ধায ভাসিতৰসেন অত্থো ৰেদিতব্বো। যস্মিঞ্হি পথৰিখণনাদিকে আপত্তাধিকরণে কুসলচিত্তং অঙ্গং হোতি, তস্মিং সতি ন সক্কা ৰত্তুং ‘‘নত্থি আপত্তাধিকরণং কুসল’’ন্তি, তস্মা নযিদং অঙ্গপ্পহোনকচিত্তং সন্ধায ৰুত্তং। ইদং পন সন্ধায ৰুত্তং। যং তাৰ আপত্তাধিকরণং লোকৰজ্জং, তং একন্ততো অকুসলমেৰ, তত্থ ‘‘সিযা অকুসল’’ন্তি ৰিকপ্পো নত্থি। যং পন পণ্ণত্তিৰজ্জং, তং যস্মা সঞ্চিচ্চ ‘‘ইমং আপত্তিং ৰীতিক্কমামী’’তি ৰীতিক্কমন্তস্সেৰ অকুসলং হোতি, অসঞ্চিচ্চ পন কিঞ্চি অজানন্তস্স সহসেয্যাদিৰসেন আপজ্জতো অব্যাকতং হোতি, তস্মা তত্থ সঞ্চিচ্চাসঞ্চিচ্চৰসেন ইমং ৰিকপ্পভাৰং সন্ধায ইদং ৰুত্তং – ‘‘আপত্তাধিকরণং সিযা অকুসলং, সিযা অব্যাকতং, নত্থি আপত্তাধিকরণং কুসল’’ন্তি।
222.Āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusalanti ettha sandhāya bhāsitavasena attho veditabbo. Yasmiñhi pathavikhaṇanādike āpattādhikaraṇe kusalacittaṃ aṅgaṃ hoti, tasmiṃ sati na sakkā vattuṃ ‘‘natthi āpattādhikaraṇaṃ kusala’’nti, tasmā nayidaṃ aṅgappahonakacittaṃ sandhāya vuttaṃ. Idaṃ pana sandhāya vuttaṃ. Yaṃ tāva āpattādhikaraṇaṃ lokavajjaṃ, taṃ ekantato akusalameva, tattha ‘‘siyā akusala’’nti vikappo natthi. Yaṃ pana paṇṇattivajjaṃ, taṃ yasmā sañcicca ‘‘imaṃ āpattiṃ vītikkamāmī’’ti vītikkamantasseva akusalaṃ hoti, asañcicca pana kiñci ajānantassa sahaseyyādivasena āpajjato abyākataṃ hoti, tasmā tattha sañciccāsañciccavasena imaṃ vikappabhāvaṃ sandhāya idaṃ vuttaṃ – ‘‘āpattādhikaraṇaṃ siyā akusalaṃ, siyā abyākataṃ, natthi āpattādhikaraṇaṃ kusala’’nti.
সচে পন ‘‘যং কুসলচিত্তো আপজ্জতি, ইদং ৰুচ্চতি আপত্তাধিকরণং কুসল’’ন্তি ৰদেয্য, অচিত্তকানং পন এল়কলোমপদসোধম্মাদিসমুট্ঠানানম্পি কুসলচিত্তং আপজ্জেয্য, ন চ তত্থ ৰিজ্জমানম্পি কুসলচিত্তং আপত্তিযা অঙ্গং। কাযৰচীৰিঞ্ঞত্তিৰসেন পন চলিতপ্পৰত্তানং কাযৰাচানং অঞ্ঞতরমেৰ অঙ্গং, তঞ্চ রূপক্খন্ধপরিযাপন্নত্তা অব্যাকতন্তি।
Sace pana ‘‘yaṃ kusalacitto āpajjati, idaṃ vuccati āpattādhikaraṇaṃ kusala’’nti vadeyya, acittakānaṃ pana eḷakalomapadasodhammādisamuṭṭhānānampi kusalacittaṃ āpajjeyya, na ca tattha vijjamānampi kusalacittaṃ āpattiyā aṅgaṃ. Kāyavacīviññattivasena pana calitappavattānaṃ kāyavācānaṃ aññatarameva aṅgaṃ, tañca rūpakkhandhapariyāpannattā abyākatanti.
যং জানন্তোতিআদিম্হি পন অযমত্থো – যং চিত্তং আপত্তিযা অঙ্গং হোতি, তেন ৰত্থুং জানন্তো ‘‘ইদং ৰীতিক্কমামী’’তি চ ৰীতিক্কমাকারেন সদ্ধিং জানন্তো সঞ্জানন্তো ৰীতিক্কমচেতনাৰসেন চেতেত্ৰা পকপ্পেত্ৰা উপক্কমৰসেন মদ্দন্তো অভিৰিতরিত্ৰা নিরাসঙ্কচিত্তং পেসেত্ৰা যং আপত্তাধিকরণং ৰীতিক্কমং আপজ্জতি, তস্স এৰং ৰীতিক্কমতো যো ৰীতিক্কমো, ইদং ৰুচ্চতি ‘‘আপত্তাধিকরণং অকুসল’’ন্তি।
Yaṃ jānantotiādimhi pana ayamattho – yaṃ cittaṃ āpattiyā aṅgaṃ hoti, tena vatthuṃ jānanto ‘‘idaṃ vītikkamāmī’’ti ca vītikkamākārena saddhiṃ jānanto sañjānanto vītikkamacetanāvasena cetetvā pakappetvā upakkamavasena maddanto abhivitaritvā nirāsaṅkacittaṃ pesetvā yaṃ āpattādhikaraṇaṃ vītikkamaṃ āpajjati, tassa evaṃ vītikkamato yo vītikkamo, idaṃ vuccati ‘‘āpattādhikaraṇaṃ akusala’’nti.
অব্যাকতৰারেপি যং চিত্তং আপত্তিযা অঙ্গং হোতি, তস্স অভাৰেন অজানন্তো ৰীতিক্কমাকারেন চ সদ্ধিং অজানন্তো অসঞ্জানন্তো আপত্তিঅঙ্গভূতায ৰীতিক্কমচেতনায অভাৰেন অচেতেত্ৰা সঞ্চিচ্চ মদ্দনস্স অভাৰেন অনভিৰিতরিত্ৰা নিরাসঙ্কচিত্তং অপেসেত্ৰা যং আপত্তাধিকরণং ৰীতিক্কমং আপজ্জতি, তস্স এৰং ৰীতিক্কমতো যো ৰীতিক্কমো, ইদং ৰুচ্চতি ‘‘আপত্তাধিকরণং অব্যাকত’’ন্তি।
Abyākatavārepi yaṃ cittaṃ āpattiyā aṅgaṃ hoti, tassa abhāvena ajānanto vītikkamākārena ca saddhiṃ ajānanto asañjānanto āpattiaṅgabhūtāya vītikkamacetanāya abhāvena acetetvā sañcicca maddanassa abhāvena anabhivitaritvā nirāsaṅkacittaṃ apesetvā yaṃ āpattādhikaraṇaṃ vītikkamaṃ āpajjati, tassa evaṃ vītikkamato yo vītikkamo, idaṃ vuccati ‘‘āpattādhikaraṇaṃ abyākata’’nti.
২২৪. অযং ৰিৰাদো নো অধিকরণন্তিআদীসু সমথেহি অধিকরণীযতায অভাৰতো নোঅধিকরণন্তি এৰমত্থো ৰেদিতব্বো।
224.Ayaṃ vivādo no adhikaraṇantiādīsu samathehi adhikaraṇīyatāya abhāvato noadhikaraṇanti evamattho veditabbo.
অধিকরণকথা নিট্ঠিতা।
Adhikaraṇakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৮. অধিকরণং • 8. Adhikaraṇaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণকথাৰণ্ণনা • Adhikaraṇakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণকথাৰণ্ণনা • Adhikaraṇakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণকথাৰণ্ণনা • Adhikaraṇakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮. অধিকরণকথা • 8. Adhikaraṇakathā
