| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༨. ཨདྷིཀརཎཀཐཱ
8. Adhikaraṇakathā
༢༡༥. ཝིཔཙྩཏཱཡཱཏི ཨེཏྠ ཝིཀཱརབྷཱཝེན པཏཏི པཝཏྟཏཱིཏི ཝིཔཙྩཾ, ཙིཏྟདུཀྑཾ, ཏདེཝ ཝིཔཙྩཏཱ, ཏདཏྠཱཡཱཏི དསྶེནྟོ ཨཱཧ ‘‘ཙིཏྟདུཀྑཏྠ’’ནྟི། ‘‘ཕརུསཝཙན’’ནྟི ཨིམིནཱ ཝོཧཱར སདྡོ ཝཙནཔརིཡཱཡོཏི དསྶེཏི། ཡོ ཏཏྠཱཏི ཨེཏྠ ཏསདྡསྶ ཝིསཡཾ དསྶེནྟོ ཨཱཧ ‘‘ཏེསུ ཨནུཝདནྟེསཱུ’’ཏི། ཡོ ཨུཔཝཱདོཏི ཡོཛནཱ། ‘‘ཨནུཝདནཱ’’ཏི ཨེཏཾ པདནྟི ཡོཛནཱ། ཨཱཀཱརདསྶནནྟི ཨནུཝདནསྶ ཨཱཀཱརདསྶནཾ, དསྶནཧེཏུ ཝཱ། ‘‘པུནཔྤུན’’ནྟི ཨིམིནཱ ཨནུསམྤཝངྐཏཱཏི ཨེཏྠ ཨནུསདྡསྶ ན ཨུཔཙྪིནྣཏྠཾ དསྶེཏི། ཏཏྠེཝཱཏི ཨནུཝདནེ ཨེཝ། སམྤཝངྐཏཱཏི སམྨཱ པཀཱརེན ནིནྣཔོནཔབྦྷཱརཏཱ། ཨབྦྷུསྶཧནཏཱཏི ཨེཏྠ ཨཏིརེཀཾ ཨུསྶཱཧནཏཱཏི དསྶེནྟོ ཨཱཧ ‘‘ཀསྨཱ’’ཏིཨཱདི། ཨནུབལཔྤདཱནནྟི ཨེཏྠ པུནཔྤུནཾ བལསྶ པདཱནནྟི དསྶེནྟོ ཨཱཧ ‘‘པུརིམཝཙནསྶཱ’’ཏིཨཱདི།
215.Vipaccatāyāti ettha vikārabhāvena patati pavattatīti vipaccaṃ, cittadukkhaṃ, tadeva vipaccatā, tadatthāyāti dassento āha ‘‘cittadukkhattha’’nti. ‘‘Pharusavacana’’nti iminā vohāra saddo vacanapariyāyoti dasseti. Yo tatthāti ettha tasaddassa visayaṃ dassento āha ‘‘tesu anuvadantesū’’ti. Yo upavādoti yojanā. ‘‘Anuvadanā’’ti etaṃ padanti yojanā. Ākāradassananti anuvadanassa ākāradassanaṃ, dassanahetu vā. ‘‘Punappuna’’nti iminā anusampavaṅkatāti ettha anusaddassa na upacchinnatthaṃ dasseti. Tatthevāti anuvadane eva. Sampavaṅkatāti sammā pakārena ninnaponapabbhāratā. Abbhussahanatāti ettha atirekaṃ ussāhanatāti dassento āha ‘‘kasmā’’tiādi. Anubalappadānanti ettha punappunaṃ balassa padānanti dassento āha ‘‘purimavacanassā’’tiādi.
ཀིཙྩཡཏཱཏི ཨེཏྠ ‘‘མཱ པཎྜིཙྩཡ’’ནྟིཨཱདཱིསུ (ཛཱ॰ ༢.༢༢.༡) ཝིཡ བྱཉྫནཝཌྜྷནཝསེན ཡཀཱརཱགམོཏི ཨཱཧ ‘‘ཀིཙྩམེཝ ཀིཙྩཡ’’ནྟི། ‘‘ཨུབྷཡཾཔེཏཾ སངྒྷསྶེཝ ཨདྷིཝཙན’’ནྟི ཨིམིནཱ ཀིཙྩཀརཎཱིཡསདྡོ ཀཏྟུཝཱཙཀོཏི དསྶེཏི, སངྒྷོ ཧི ཀརོཏཱིཏི ཝཙནཏྠེན ཀིཙྩོཏི ཙ ཀརཎཱིཡོཏི ཙ ཝུཙྩཏི། ཏསྶ བྷཱཝོ, ཀིཙྩཡཏཱ ཀརཎཱིཡཏཱཏི ཝུཏྟེ སངྒྷཀམྨཾཡེཝ ལབྦྷཏི། ཏེན ཝུཏྟཾ ‘‘ཨུབྷཡཾཔེཏཾ སངྒྷཀམྨསྶེཝ ཨདྷིཝཙན’’ནྟི། ཡདི ཀམྨཝཱཙཀོ བྷཝེཡྻ, ‘‘ཀཏྟབྦནྟི ཀིཙྩཾ, ཀརཎཱིཡ’’ནྟི ཝུཏྟེཡེཝ སངྒྷཀམྨསྶ ལབྷནཏོ ཏཱཔཙྩཡོ སྭཏྠོ བྷཝེཡྻ། ཨེཝཉྷི སཏི ཀིཙྩཡསྶ བྷཱཝོ ཀིཙྩཡཏཱ ཀརཎཱིཡསྶ བྷཱཝོ ཀརཎཱིཡཏཱཏི ཝཙནཏྠོ ན ཀཏྟབྦོ བྷཝེཡྻ, ཀཏོ ཙ, ཏསྨཱ ན ཀམྨཝཱཙཀོཏི དཊྛབྦཾ། ཏསྶེཝཱཏི སངྒྷཀམྨསྶེཝ། ཏཏྠཱཏི ཨཔལོཀནཱདཱིསུ ཙཏཱུསུ ཀམྨེསུ། སཱིམཊྛཀསངྒྷནྟི ‘‘ཨུཔཙཱརསཱིམཱདཱིསུ ཋིཏཾ སངྒྷཾ། སོདྷེཏྭཱཏི ཨེཏྠ སོདྷནཾ ནཱམ སཱིམཊྛཀསངྒྷསྶ ཧཏྠཔཱསནཡནཾ, ཚནྡཱརཧཱནཾ ཚནྡསྶ ཨཱཧརཎཾ, སཱིམཏོ བཧིཀརཎཾ། ཏམེཝཏྠཾ ཨེཀདེསཏོ དསྶེཏུཾ ཝུཏྟཾ ‘‘ཚནྡཱརཧཱནཾ ཚནྡཾ ཨཱཧརིཏྭཱ’’ཏི། ཨཔལོཀེཏི ཨཱཔུཙྪཏི ཨནེནཱཏི ཨཔལོཀནཾ, ཏཾཡེཝ ཀམྨཾ ཨཔལོཀནཀམྨཾ། ཝུཏྟནཡེནེཝཱཏི ‘‘སཱིམཊྛཀསངྒྷཾ སོདྷེཏྭཱ’’ཏིཨཱདིནཱ ཝུཏྟནཡེནེཝ། ‘‘སུཎཱཏུ མེ’’ཏིཨཱདིནཱ སངྒྷགཎཔུགྒལེ ཉཱཔེཏི ཨེཏཱཡཱཏི ཉཏྟི, སཱཡེཝ ཀམྨཾ ཉཏྟིཀམྨཾ, ཉཏྟིཡེཝ དུཏིཡཾ ཉཏྟིདུཏིཡཾ, ཏམེཝ ཀམྨཾ ཉཏྟིདུཏིཡཀམྨཾ། ཨེཏྠ ཀིཉྩཱཔི ཉཏྟི པཋམཾ ཋཔིཏཱ, ཀམྨཝཱཙཱཡེཝ དུཏིཡཱ ཧོཏི, ‘‘ཕསྶཔཉྩམཱ’’ཏིཨཱདཱིསུ (དྷཱཏུ॰ ༣༡༦) ཝིཡ པན པཊིལོམཝསེན ཝོཧཱརཾ ཀཏྭཱ ‘‘ཉཏྟིདུཏིཡཱ’’ཏི ཝུཏྟཾ། ཕསྶཔཉྩམཱཏི ཨེཏྠ ཀིཉྩཱཔི དྷམྨསངྒཎིཡཾ (དྷ॰ ས॰ ༡ ཨཱདཡོ) ‘‘ཕསྶོ ཧོཏི, ཝེདནཱ ཧོཏི, སཉྙཱ ཧོཏི, ཙེཏནཱ ཧོཏི , ཙིཏྟཾ ཧོཏཱི’’ཏི ཕསྶཾ པཋམཾ ཝུཏྟཾ, པཊིལོམཝསེན པན ཝོཧཱརཾ ཀཏྭཱ ‘‘ཕསྶཔཉྩམཱ’’ཏི དྷཱཏུཀཐཱཡཾ ཝུཏྟནྟི དཊྛབྦཾ། ཨེསེཝ ནཡོ ཉཏྟི ཙཏུཏྠཀམྨེཔི། ཨེཀཱཡ ཙ ཨནུསཱཝནཱཡཱཏི ཉཏྟིཏོ ཨནུཔཙྪཱ སཱཝེཏབྦཱཏི ཨནུསཱཝནཱ, ཏཱཡ, ཏཱིཧི ཙ ཨནུསཱཝནཱཧཱིཏི ཉཏྟིཏོཨནུ པཙྪཱ, པུནཔྤུནཾ ཝཱ ཏིཀྑཏྟུཾ སཱཝེཏབྦཱཏི ཨནུསཱཝནཱ, ཏཱཧི། ཏཏྠཱཏི ཙཏཱུསུ ཀམྨེསུ།
Kiccayatāti ettha ‘‘mā paṇḍiccaya’’ntiādīsu (jā. 2.22.1) viya byañjanavaḍḍhanavasena yakārāgamoti āha ‘‘kiccameva kiccaya’’nti. ‘‘Ubhayaṃpetaṃ saṅghasseva adhivacana’’nti iminā kiccakaraṇīyasaddo kattuvācakoti dasseti, saṅgho hi karotīti vacanatthena kiccoti ca karaṇīyoti ca vuccati. Tassa bhāvo, kiccayatā karaṇīyatāti vutte saṅghakammaṃyeva labbhati. Tena vuttaṃ ‘‘ubhayaṃpetaṃ saṅghakammasseva adhivacana’’nti. Yadi kammavācako bhaveyya, ‘‘kattabbanti kiccaṃ, karaṇīya’’nti vutteyeva saṅghakammassa labhanato tāpaccayo svattho bhaveyya. Evañhi sati kiccayassa bhāvo kiccayatā karaṇīyassa bhāvo karaṇīyatāti vacanattho na kattabbo bhaveyya, kato ca, tasmā na kammavācakoti daṭṭhabbaṃ. Tassevāti saṅghakammasseva. Tatthāti apalokanādīsu catūsu kammesu. Sīmaṭṭhakasaṅghanti ‘‘upacārasīmādīsu ṭhitaṃ saṅghaṃ. Sodhetvāti ettha sodhanaṃ nāma sīmaṭṭhakasaṅghassa hatthapāsanayanaṃ, chandārahānaṃ chandassa āharaṇaṃ, sīmato bahikaraṇaṃ. Tamevatthaṃ ekadesato dassetuṃ vuttaṃ ‘‘chandārahānaṃ chandaṃ āharitvā’’ti. Apaloketi āpucchati anenāti apalokanaṃ, taṃyeva kammaṃ apalokanakammaṃ. Vuttanayenevāti ‘‘sīmaṭṭhakasaṅghaṃ sodhetvā’’tiādinā vuttanayeneva. ‘‘Suṇātu me’’tiādinā saṅghagaṇapuggale ñāpeti etāyāti ñatti, sāyeva kammaṃ ñattikammaṃ, ñattiyeva dutiyaṃ ñattidutiyaṃ, tameva kammaṃ ñattidutiyakammaṃ. Ettha kiñcāpi ñatti paṭhamaṃ ṭhapitā, kammavācāyeva dutiyā hoti, ‘‘phassapañcamā’’tiādīsu (dhātu. 316) viya pana paṭilomavasena vohāraṃ katvā ‘‘ñattidutiyā’’ti vuttaṃ. Phassapañcamāti ettha kiñcāpi dhammasaṅgaṇiyaṃ (dha. sa. 1 ādayo) ‘‘phasso hoti, vedanā hoti, saññā hoti, cetanā hoti , cittaṃ hotī’’ti phassaṃ paṭhamaṃ vuttaṃ, paṭilomavasena pana vohāraṃ katvā ‘‘phassapañcamā’’ti dhātukathāyaṃ vuttanti daṭṭhabbaṃ. Eseva nayo ñatti catutthakammepi. Ekāya ca anusāvanāyāti ñattito anupacchā sāvetabbāti anusāvanā, tāya, tīhi ca anusāvanāhīti ñattitoanu pacchā, punappunaṃ vā tikkhattuṃ sāvetabbāti anusāvanā, tāhi. Tatthāti catūsu kammesu.
ཨཔལོཀེཏྭཱཝཱཏི ཨེཏྠ ཨེཝཕལཾ དསྶེནྟོ ཨཱཧ ‘‘ཉཏྟིཀམྨཱདིཝསེན ན ཀཱཏབྦ’’ནྟི། ཉཏྟིཀམྨམྤཱིཏི པིསདྡེན ན ཀེཝལཾ ཨཔལོཀནཀམྨམེཝ, ཨཐ ཁོ ཉཏྟིཀམྨམྤཱིཏི དསྶེཏི། ཉཏྟིདུཏིཡཀམྨཾ པནཱཏི ཨེཏྠ པནསདྡོ ཝིསེསཏྠཛོཏཀོ, པཀྑནྟརཛོཏཀོ ཝཱ། ཏཏྠཱཏི དྭཱིསུ ཀམྨེསུ། གརུཀཱནཱིཏི ཨལཧུཀཱནི། ཨཝསེསཱནཱིཏི ཚཧི ཀམྨེཧི ཨཝསེསཱནི, ཨེཝརཱུཔཱནི ལཧུཀཀམྨཱནཱིཏི སམྦནྡྷོ། ‘‘ཨཝསེསཱ’’ཏིཔི པཱཋོ, སམྨུཏིཡོཏི སམྦནྡྷོ། ཨཔལོཀེཏྭཱཔཱིཏི པིསདྡོ ཉཏྟིདུཏིཡཀམྨཝཱཙཾ སཱཝེཏྭཱཔཱིཏི སམྤིཎྜེཏི། ཨཉྙཏྠཱཔོཧནཾ དསྶེནྟོ ཨཱཧ ‘‘ཉཏྟིཀམྨཉཏྟིཙཏུཏྠཀམྨཝསེན པན ན ཀཱཏབྦམེཝཱ’’ཏི། ཉཏྟིཙཏུཏྠཀམྨཾ ཀཱཏབྦནྟི སམྦནྡྷོ། ཨེཏྠཱཏི སམཐཀྑནྡྷཀེ།
Apaloketvāvāti ettha evaphalaṃ dassento āha ‘‘ñattikammādivasena na kātabba’’nti. Ñattikammampīti pisaddena na kevalaṃ apalokanakammameva, atha kho ñattikammampīti dasseti. Ñattidutiyakammaṃ panāti ettha panasaddo visesatthajotako, pakkhantarajotako vā. Tatthāti dvīsu kammesu. Garukānīti alahukāni. Avasesānīti chahi kammehi avasesāni, evarūpāni lahukakammānīti sambandho. ‘‘Avasesā’’tipi pāṭho, sammutiyoti sambandho. Apaloketvāpīti pisaddo ñattidutiyakammavācaṃ sāvetvāpīti sampiṇḍeti. Aññatthāpohanaṃ dassento āha ‘‘ñattikammañatticatutthakammavasena pana na kātabbamevā’’ti. Ñatticatutthakammaṃ kātabbanti sambandho. Etthāti samathakkhandhake.
ཝིཏྠཱརཏོ པན ཨཱགཏོཡེཝཱཏི སམྦནྡྷོ། ཨེཏེསནྟི ཙཏུནྣཾ ཀམྨཱནཾ། ཡཾ པན ཨཏྠཛཱཏཾ ཨནུཏྟཱནནྟི སམྦནྡྷོ། ཏཏྠཱཏི ཙཏཱུསུ ཀམྨེསུ། ཏནྟི ཨཏྠཛཱཏཾ། ཨེཝནྟི ཨེཝཾ ཀམྨཝགྒེཡེཝ ཝཎྞཡམཱནེ། ཧཱིཏི ལདྡྷགུཎཛོཏཀོ། སུཝིཉྙེཡྻཱཏི སུཁེན ཝིཉྙཱཏབྦཱ།
Vitthārato pana āgatoyevāti sambandho. Etesanti catunnaṃ kammānaṃ. Yaṃ pana atthajātaṃ anuttānanti sambandho. Tatthāti catūsu kammesu. Tanti atthajātaṃ. Evanti evaṃ kammavaggeyeva vaṇṇayamāne. Hīti laddhaguṇajotako. Suviññeyyāti sukhena viññātabbā.
༢༡༦. པཱལི༹ཝསེནེཝཱཏི ན ཨཊྛཀཐཱཝསེནཱཏི ཨདྷིཔྤཱཡོ།
216.Pāḷivasenevāti na aṭṭhakathāvasenāti adhippāyo.
༢༢༠. ཡེནཱཏི ཙིཏྟུཔྤཱདེན། ཨིམིནཱ ཝིཝདནྟི ཨནེནཱཏི ཝིཝཱདོཏི ཝཙནཏྠཾ དསྶེཏི། སམཐེཧི ཙཱཏི ཙསདྡོ སམྤིཎྜནཏྠོ། ཏེན ན ཀེཝལཾ ཝིཝཱདོཡེཝ, ཨཐ ཁོ ཨདྷིཀརཎཉྩཱཏི སམྤིཎྜེཏི, ཨཐ ཝཱ སམཐེཧི ཙཱཏི སམཐེཧི ཨེཝ། ཨིམིནཱ སམཐེཧི ཨདྷིཀརཱིཡཏི ཝཱུཔསམཱིཡཏཱིཏི ཨདྷིཀརཎནྟི ཝཙནཏྠཾ དསྶེཏི། ཝིཝཱདོཡེཝ ཨདྷིཀརཎཾ ཝིཝཱདཱདྷིཀརཎཾ། ཨེཝམཱདིནཱ ནཡེནཱཏི ཨཱདིསདྡེན ཨནུདྡྷཾསནེན ཝདནྟི ཨནེན ཙིཏྟུཔྤཱདེནཱཏི ཨནུཝཱདོཏིཨཱདཡོ ཝཙནཏྠེ སངྒཎྷཱཏི།
220.Yenāti cittuppādena. Iminā vivadanti anenāti vivādoti vacanatthaṃ dasseti. Samathehi cāti casaddo sampiṇḍanattho. Tena na kevalaṃ vivādoyeva, atha kho adhikaraṇañcāti sampiṇḍeti, atha vā samathehi cāti samathehi eva. Iminā samathehi adhikarīyati vūpasamīyatīti adhikaraṇanti vacanatthaṃ dasseti. Vivādoyeva adhikaraṇaṃ vivādādhikaraṇaṃ. Evamādinā nayenāti ādisaddena anuddhaṃsanena vadanti anena cittuppādenāti anuvādotiādayo vacanatthe saṅgaṇhāti.
༢༢༢. སནྡྷཱཡབྷཱསིཏཝསེནཱཏི ལོཀཝཛྫཾ སནྡྷཱཡ བྷཱསིཏསྶ ཝཙནསྶ ཝསེན། སནྡྷཱཡབྷཱསིཏཏྠཾ ཝིཏྠཱརེནྟོ ཨཱཧ ‘‘ཡསྨིཾ ཧཱི’’ཏིཨཱདི། ཏཏྠ པཐཝིཁཎནཱདིཀེ ཡསྨིཾ ཨཱཔཏྟཱདྷིཀརཎེཏི ཡོཛནཱ། ཏསྨིནྟི ཀུསལཙིཏྟངྒེ ཨཱཔཏྟཱདྷིཀརཎེ། ཏསྨཱཏི ཡསྨཱ ན སཀྐཱ ཝཏྟུཾ, ཏསྨཱ། ཨིདནྟི ‘‘ནཏྠི ཨཱཔཏྟཱདྷིཀརཎཾ ཀུསལ’’ནྟི ཝཙནཾ, ཝུཏྟནྟི སམྦནྡྷོ། སནྡྷཱཡ ཨཝུཏྟཾ དསྶེཏྭཱ སནྡྷཱཡ ཝུཏྟཾ དསྶེནྟོ ཨཱཧ ‘‘ཨིདཾ པན སནྡྷཱཡ ཝུཏྟ’’ནྟི། ཏཏྠ ཨིདཾ པནཱཏི ཀཱརཎཾ པན སནྡྷཱཡཱཏི སམྦནྡྷོ། ཡཾ ཨཱཔཏྟཱདྷིཀརཎནྟི ཡོཛནཱ། ‘‘ལོཀཝཛྫ’’ནྟི པདེ ཏུལྱཱདྷིཀརཎཾ། ལོཀསྨིཾ, ལོཀེཧི ཝཱ ཝཛྫེཏབྦནྟི ལོཀཝཛྫཾ། ཏནྟི ཨཱཔཏྟཱདྷིཀརཎཾ། ཏཏྠཱཏི ཨཱཔཏྟཱདྷིཀརཎེ། ཝིཀཔྤོཏི ཝིཝིདྷཱ ཀཔྤནཾ, ཝིཝིདྷཏཀྐོ ཝཱ། ཡཾ པནཱཏི ཨཱཔཏྟཱདྷིཀརཎཾ པན། ‘‘པཎྞཏྟིཝཛྫ’’ནྟི པདེ ཏུལྱཱདྷིཀརཎཾ། བྷགཝཏོ པཉྙཏྟིཡཱ ཧེཏུབྷཱུཏཱཡ ཝཛྫེཏབྦནྟི པཎྞཏྟིཝཛྫཾ། ཏནྟི ཨཱཔཏྟཱདྷིཀརཎཾ, ཨཀུསལཾ ཧོཏཱིཏི སམྦནྡྷོ། ཀིཉྩཱིཏི ཨཔྤམཏྟཀཾ, ཨཱཔཏྟཱནཱཔཏྟིཾ ཨཛཱནནྟསྶ ཨཱཔཛྫནཏོཏི སམྦནྡྷོ། ཏསྨཱཏི ཡསྨཱ ཨབྱཱཀཏཾ ཧོཏི, ཏསྨཱ། ཏཏྠཱཏི པཎྞཏྟིཝཛྫབྷཱུཏེ ཨཱཔཏྟཱདྷིཀརཎེ། ‘‘ཨཱཔཏྟཱདྷིཀརཎཾ…པེ॰… ཀུསལ’’ནྟི ཨིདཾ ཝཙནཾ ཝུཏྟནྟི ཡོཛནཱ།
222.Sandhāyabhāsitavasenāti lokavajjaṃ sandhāya bhāsitassa vacanassa vasena. Sandhāyabhāsitatthaṃ vitthārento āha ‘‘yasmiṃ hī’’tiādi. Tattha pathavikhaṇanādike yasmiṃ āpattādhikaraṇeti yojanā. Tasminti kusalacittaṅge āpattādhikaraṇe. Tasmāti yasmā na sakkā vattuṃ, tasmā. Idanti ‘‘natthi āpattādhikaraṇaṃ kusala’’nti vacanaṃ, vuttanti sambandho. Sandhāya avuttaṃ dassetvā sandhāya vuttaṃ dassento āha ‘‘idaṃ pana sandhāya vutta’’nti. Tattha idaṃ panāti kāraṇaṃ pana sandhāyāti sambandho. Yaṃ āpattādhikaraṇanti yojanā. ‘‘Lokavajja’’nti pade tulyādhikaraṇaṃ. Lokasmiṃ, lokehi vā vajjetabbanti lokavajjaṃ. Tanti āpattādhikaraṇaṃ. Tatthāti āpattādhikaraṇe. Vikappoti vividhā kappanaṃ, vividhatakko vā. Yaṃ panāti āpattādhikaraṇaṃ pana. ‘‘Paṇṇattivajja’’nti pade tulyādhikaraṇaṃ. Bhagavato paññattiyā hetubhūtāya vajjetabbanti paṇṇattivajjaṃ. Tanti āpattādhikaraṇaṃ, akusalaṃ hotīti sambandho. Kiñcīti appamattakaṃ, āpattānāpattiṃ ajānantassa āpajjanatoti sambandho. Tasmāti yasmā abyākataṃ hoti, tasmā. Tatthāti paṇṇattivajjabhūte āpattādhikaraṇe. ‘‘Āpattādhikaraṇaṃ…pe… kusala’’nti idaṃ vacanaṃ vuttanti yojanā.
ཡདི ཀུསལཙིཏྟོ ཨཱཔཛྫཏི, ཨཐ ནནུ ཨཱཔཏྟཱདྷིཀརཎཾ ཀུལལནྟི ཝཏྟབྦོ བྷཝེཡྻཱཏི ཨཱཧ ‘‘སཙེ པནཱ’’ཏིཨཱདི། ཡནྟི ཨཱཔཏྟཱདྷིཀརཎཾ། ‘‘ཨིདཾ ཝུཙྩཏི…པེ॰… ཀུསལ’’ནྟི ཝདེཡྻ སཙེཏི ཡོཛནཱ། ཨེལ༹ཀལོམཉྩ པདསོདྷམྨཉྩ ཨེལ༹ཀལོམཔདསོདྷམྨཱནི, ཏཱནི ཨཱདཱིནི ཡེསཾ ཏཱནཱིཏི ཨེལ༹ཀལོམཔདསོདྷམྨཱདཱིནི, ཏཱནི སམུཊྛཱནཱནི ཡཱསནྟི ཨེལ༹ཀལོམཔདསོདྷམྨཱདིསམུཊྛཱནཱ, ཏཱསཾ ཨཱཔཏྟཱིནམྤཱིཏི སམྦནྡྷོ། ཏཏྠཱཏི ཨེལ༹ཀལོམཔདསོདྷམྨཱདིསམུཊྛཱནཱསུ ཨཱཔཏྟཱིསུ། ཨཱཔཏྟིཡཱ ཨངྒནྟི ཨཱཔཏྟིཡཱ ཀཱརཎཾ། ཨེཝཾ ཨཱཔཏྟིཡཱ ཨནངྒཾ དསྶེཏྭཱ ཏསྶཱཡེཝ ཨངྒཾ དསྶེནྟོ ཨཱཧ ‘‘ཀཱཡཝཙཱིཝིཉྙཏྟིཝསེན པནཱ’’ཏིཨཱདི། ཏཏྠ ཙལིཏཔྤཝཏྟཱནནྟི ཙལིཏེན ཧེཏུབྷཱུཏེན པཝཏྟཱནཾ། ཨཐ ཝཱ ཙལིཏོ ཙ ཀཱཡོ, པཝཏྟཱ ཙ ཝཱཙཱཏི ཙལིཏཔྤཝཏྟཱ, ཏཱསཾ ཙལིཏཔྤཝཏྟཱནཾ ཀཱཡཝཱཙཱནཾ། ཏཉྩཱཏི ཀཱཡཝཱཙཱནཾ ཨཉྙཏརཉྩ། ཨབྱཱཀཏནྟི ཨེཏྠ ཨིཏིསདྡོ པརིསམཱཔནཏྠོ།
Yadi kusalacitto āpajjati, atha nanu āpattādhikaraṇaṃ kulalanti vattabbo bhaveyyāti āha ‘‘sace panā’’tiādi. Yanti āpattādhikaraṇaṃ. ‘‘Idaṃ vuccati…pe… kusala’’nti vadeyya saceti yojanā. Eḷakalomañca padasodhammañca eḷakalomapadasodhammāni, tāni ādīni yesaṃ tānīti eḷakalomapadasodhammādīni, tāni samuṭṭhānāni yāsanti eḷakalomapadasodhammādisamuṭṭhānā, tāsaṃ āpattīnampīti sambandho. Tatthāti eḷakalomapadasodhammādisamuṭṭhānāsu āpattīsu. Āpattiyā aṅganti āpattiyā kāraṇaṃ. Evaṃ āpattiyā anaṅgaṃ dassetvā tassāyeva aṅgaṃ dassento āha ‘‘kāyavacīviññattivasena panā’’tiādi. Tattha calitappavattānanti calitena hetubhūtena pavattānaṃ. Atha vā calito ca kāyo, pavattā ca vācāti calitappavattā, tāsaṃ calitappavattānaṃ kāyavācānaṃ. Tañcāti kāyavācānaṃ aññatarañca. Abyākatanti ettha itisaddo parisamāpanattho.
ཨཡམཏྠོ ཨེཝཾ ཝེདིཏབྦོཏི ཡོཛནཱ། ཏེནཱཏི ཙིཏྟེན། ‘‘ཨིདཾ…པེ॰… སདྡྷི’’ནྟི ཨིམིནཱ སཉྫཱནནྟོཏི ཨེཏྠ སཾསདྡསྶ སུནྡརཏྠཾ སཧ ཨཱཀཱརེན དསྶེཏི། ‘‘ཝཱིཏིཀྐམ…པེ॰… ཀཔྤེཏྭཱ’’ཏི ཨིམིནཱ ཙེཙྩཱཏི པདསྶ ཨཏྠཾ སཧ ཝིསེསནེན དསྶེཏི། ‘‘ཨུཔཀྐམཝསེན…པེ॰… པེསེཏྭཱ’’ཏི ཨིམིནཱ ཨབྷིཝིཏརིཏྭཱཏི པདསྶ ཨཏྠཾ དསྶེཏི། པཱལི༹ཡཾ ཡཾསདྡོཝཱིཏིཀྐམཝིསཡོཏི ཨཱཧ ‘‘ཡཾ ཨཱཔཏྟཱདྷིཀརཎཾ ཝཱིཏིཀྐམ’’ནྟི། ‘‘ཨཱཔཛྫཏཱི’’ཏི ཨིམིནཱ པཱཋསེསཾ དསྶེཏི། ཨེཝཾ ཝཱིཏིཀྐམཏོ ཏསྶ བྷིཀྑུནོཏི ཡོཛནཱ།
Ayamattho evaṃ veditabboti yojanā. Tenāti cittena. ‘‘Idaṃ…pe… saddhi’’nti iminā sañjānantoti ettha saṃsaddassa sundaratthaṃ saha ākārena dasseti. ‘‘Vītikkama…pe… kappetvā’’ti iminā ceccāti padassa atthaṃ saha visesanena dasseti. ‘‘Upakkamavasena…pe… pesetvā’’ti iminā abhivitaritvāti padassa atthaṃ dasseti. Pāḷiyaṃ yaṃsaddovītikkamavisayoti āha ‘‘yaṃ āpattādhikaraṇaṃ vītikkama’’nti. ‘‘Āpajjatī’’ti iminā pāṭhasesaṃ dasseti. Evaṃ vītikkamato tassa bhikkhunoti yojanā.
ཨབྱཱཀཏཝཱརེཔཱིཏི པིསདྡོ ཨཀུསལཝཱརཾ ཨཔེཀྑཏི། ཏསྶཱཏི ཙིཏྟསྶ། ཨཛཱནནྟོཏིཨཱདཱིནཾ པདཱནམཏྠོ ཨཀུསལཝཱརེ ཝུཏྟཔཊིཔཀྑཝསེན ཝེདིཏབྦོ། ཡཾ ཨཱཔཏྟཱདྷིཀརཎནྟིཨཱདཱིནཾ པདཱནམཏྠོ ཨཀུསལཝཱརེན སདིསོཡེཝ།
Abyākatavārepīti pisaddo akusalavāraṃ apekkhati. Tassāti cittassa. Ajānantotiādīnaṃ padānamattho akusalavāre vuttapaṭipakkhavasena veditabbo. Yaṃ āpattādhikaraṇantiādīnaṃ padānamattho akusalavārena sadisoyeva.
༢༢༤. ཨཡཾ ཝིཝཱདོ ནོ ཨདྷིཀརཎནྟིཨཱདཱིསུ ཨེཝམཏྠོ ཝེདིཏབྦོཏི སམྦནྡྷོ།
224.Ayaṃ vivādo no adhikaraṇantiādīsu evamattho veditabboti sambandho.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ༨. ཨདྷིཀརཎཾ • 8. Adhikaraṇaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨདྷིཀརཎཀཐཱ • Adhikaraṇakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨདྷིཀརཎཀཐཱཝཎྞནཱ • Adhikaraṇakathāvaṇṇanā
