| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
அதி⁴கரணகதா²வண்ணனா
Adhikaraṇakathāvaṇṇanā
215. விரூபதோ விபரிணாமட்டே²ன சித்தங் து³க்க²ங் விபச்சதீதி ஆஹ ‘‘சித்தது³க்க²த்த²ங் வோஹாரோ’’திஆதி³. உபவத³னாதி சோத³னா. தத்தே²வாதி அனுவத³னே.
215. Virūpato vipariṇāmaṭṭhena cittaṃ dukkhaṃ vipaccatīti āha ‘‘cittadukkhatthaṃ vohāro’’tiādi. Upavadanāti codanā. Tatthevāti anuvadane.
ஆதி³தோ பட்டா²ய ச தஸ்ஸ தஸ்ஸ கம்மஸ்ஸ விஞ்ஞாதத்தாதி வித்தா²ரதோ ஆக³தகம்மவக்³க³ஸ்ஸ ஆதி³தோ பட்டா²ய வண்ணனாமுகே²ன விஞ்ஞாதத்தா வினிச்ச²யோ ப⁴விஸ்ஸதீதி யோஜனா.
Ādito paṭṭhāya ca tassa tassa kammassa viññātattāti vitthārato āgatakammavaggassa ādito paṭṭhāya vaṇṇanāmukhena viññātattā vinicchayo bhavissatīti yojanā.
216. பாளியங் அஜ்ஜ²த்தங் வாதி அத்தனி வா அத்தனோ பரிஸாய வா. ப³ஹித்³தா⁴ வாதி பரஸ்மிங் வா பரஸ்ஸ பரிஸாய வா. அனவஸ்ஸவாயாதி அனுப்பாதா³ய.
216. Pāḷiyaṃ ajjhattaṃ vāti attani vā attano parisāya vā. Bahiddhā vāti parasmiṃ vā parassa parisāya vā. Anavassavāyāti anuppādāya.
220. ‘‘விவாதா³தி⁴கரணங் குஸலங் அகுஸலங் அப்³யாகத’’ந்தி இத³ங் புச்சா²வசனங். விவாதா³தி⁴கரணங் ஸியா குஸலந்திஆதி³ விஸஜ்ஜனங். ஏஸ நயோ ஸேஸேஸுபி.
220.‘‘Vivādādhikaraṇaṃ kusalaṃ akusalaṃ abyākata’’nti idaṃ pucchāvacanaṃ. Vivādādhikaraṇaṃ siyā kusalantiādi visajjanaṃ. Esa nayo sesesupi.
222. ஸம்முதிஸபா⁴வாயபி ஆபத்தியா காரணூபசாரேன அகுஸலாப்³யாகதபா⁴வேன வுச்சமானே குஸலஸ்ஸாபி ஆபத்திகாரணத்தா தது³பசாரேன ‘‘ஆபத்தாதி⁴கரணங் ஸியா குஸல’’ந்தி வத்தப்³ப³ங் ப⁴வெய்ய , ததா² அவத்வா ‘‘நத்தி² ஆபத்தாதி⁴கரணங் குஸல’’ந்தி ஏவங்வசனஸ்ஸ காரணங் த³ஸ்ஸேதுங் ‘‘எத்த² ஸந்தா⁴யபா⁴ஸிதவஸேன அத்தோ² வேதி³தப்³போ³’’தி வுத்தங். எத்த² சாயமதி⁴ப்பாயோ – யதி³ ஹி ஆபத்தி நாம பரமத்த²த⁴ம்மஸபா⁴வா ப⁴வெய்ய, ததா³ ‘‘ஆபத்தாதி⁴கரணங் ஸியா அகுஸல’’ந்திஆதி³வசனங் யுஜ்ஜெய்ய. யஸ்மா து³ட்ட²தோ³ஸஸிக்கா²பத³ட்ட²கதா²தீ³ஸு த³ஸ்ஸிததோ³ஸப்பஸங்க³தோ பரமத்த²ஸப⁴ஆவதா ந யுத்தா, ஏகந்தஸம்முதிஸபா⁴வா ஏவ ஸா ஹோதி, தஸ்மா ‘‘ஸியா அகுஸலங் ஸியா அப்³யாகத’’ந்திபி நிப்பரியாயதோ ந வத்தப்³பா³. யதி³ பன அகுஸலஅப்³யாகதத⁴ம்மஸமுட்டி²தத்தமேவ உபாதா³ய பரியாயதோ ‘‘ஸியா அகுஸலங் ஸியா அப்³யாகத’’ந்தி வுத்தங். ததா³ குஸலத⁴ம்மஸமஉட்டி²தத்தம்பி உபாதா³ய பரியாயதோ ‘‘ஆபத்தாதி⁴கரணங் ஸியா குஸல’’ந்திபி வத்தப்³ப³ங் ப⁴வெய்ய. யதோ சேதங் வசனங் ஆபத்தியா அகுஸலாப்³யாகதூபசாராரஹத்தஸ்ஸ குஸலூபசாரானாரஹத்தஸ்ஸ விஸுங் காரணஸப்³பா⁴வங் ஸந்தா⁴ய பா⁴ஸிதங், தஸ்மா யங் தங் காரணவிஸேஸங் ஸந்தா⁴ய இத³ங் பா⁴ஸிதங், தஸ்ஸ வஸேனேவெத்த² அத்தோ² வேதி³தப்³போ³.
222. Sammutisabhāvāyapi āpattiyā kāraṇūpacārena akusalābyākatabhāvena vuccamāne kusalassāpi āpattikāraṇattā tadupacārena ‘‘āpattādhikaraṇaṃ siyā kusala’’nti vattabbaṃ bhaveyya , tathā avatvā ‘‘natthi āpattādhikaraṇaṃ kusala’’nti evaṃvacanassa kāraṇaṃ dassetuṃ ‘‘ettha sandhāyabhāsitavasena attho veditabbo’’ti vuttaṃ. Ettha cāyamadhippāyo – yadi hi āpatti nāma paramatthadhammasabhāvā bhaveyya, tadā ‘‘āpattādhikaraṇaṃ siyā akusala’’ntiādivacanaṃ yujjeyya. Yasmā duṭṭhadosasikkhāpadaṭṭhakathādīsu dassitadosappasaṅgato paramatthasabhaāvatā na yuttā, ekantasammutisabhāvā eva sā hoti, tasmā ‘‘siyā akusalaṃ siyā abyākata’’ntipi nippariyāyato na vattabbā. Yadi pana akusalaabyākatadhammasamuṭṭhitattameva upādāya pariyāyato ‘‘siyā akusalaṃ siyā abyākata’’nti vuttaṃ. Tadā kusaladhammasamauṭṭhitattampi upādāya pariyāyato ‘‘āpattādhikaraṇaṃ siyā kusala’’ntipi vattabbaṃ bhaveyya. Yato cetaṃ vacanaṃ āpattiyā akusalābyākatūpacārārahattassa kusalūpacārānārahattassa visuṃ kāraṇasabbhāvaṃ sandhāya bhāsitaṃ, tasmā yaṃ taṃ kāraṇavisesaṃ sandhāya idaṃ bhāsitaṃ, tassa vasenevettha attho veditabbo.
இதா³னி பன யோ அங்க³ப்பஹோனகசித்தமேவ ஸந்தா⁴ய ஆபத்தியா அகுஸலாதி³பா⁴வோ வுத்தோ, நாஞ்ஞங் விஸேஸகாரணங் ஸந்தா⁴யாதி க³ண்ஹெய்ய, தஸ்ஸ கா³ஹே தோ³ஸங் த³ஸ்ஸெந்தோ ‘‘யஸ்மிங் ஹீ’’திஆதி³மாஹ. தத்த² பத²வீக²ணனாதி³கேதி பத²வீக²ணனாதி³னிமித்தே பண்ணத்திவஜ்ஜே. ஆபத்தாதி⁴கரணே குஸலசித்தங் அங்க³ந்தி பண்ணத்திங் அஜானித்வா குஸலசித்தேன சேதியங்க³ணாதீ³ஸு பூ⁴மிஸோத⁴னாதி³வஸேன பத²வீபூ⁴தகா³மவிகோபனாதி³காலே குஸலசித்தங் காரணங் ஹோதி. தஸ்மிங் ஸதீதி தஸ்மிங் ஆபத்தாதி⁴கரணே விஜ்ஜமானே குஸலசித்தஸமுட்டி²தத்தேன குஸலவோஹாராரஹாய ஆபத்தியா விஜ்ஜமானாயாதி அதி⁴ப்பாயோ. ஸாரத்த²தீ³பனியங் (ஸாரத்த²॰ டீ॰ சூளவக்³க³ 3.222) பன ‘‘தஸ்மிங் ஸதீ’’தி இமஸ்ஸ ‘‘தஸ்மிங் குஸலசித்தே ஆபத்திபா⁴வேன க³ஹிதே’’தி அத்தோ² வுத்தோ, தங் ந யுஜ்ஜதி ‘‘யஸ்மி’’ந்தி ய-ஸத்³தே³ன பராமட்ட²ஸ்ஸேவ ஆபத்தாதி⁴கரணஸ்ஸ ‘‘தஸ்மி’’ந்தி பராமஸிதப்³ப³தோ.
Idāni pana yo aṅgappahonakacittameva sandhāya āpattiyā akusalādibhāvo vutto, nāññaṃ visesakāraṇaṃ sandhāyāti gaṇheyya, tassa gāhe dosaṃ dassento ‘‘yasmiṃ hī’’tiādimāha. Tattha pathavīkhaṇanādiketi pathavīkhaṇanādinimitte paṇṇattivajje. Āpattādhikaraṇe kusalacittaṃ aṅganti paṇṇattiṃ ajānitvā kusalacittena cetiyaṅgaṇādīsu bhūmisodhanādivasena pathavībhūtagāmavikopanādikāle kusalacittaṃ kāraṇaṃ hoti. Tasmiṃ satīti tasmiṃ āpattādhikaraṇe vijjamāne kusalacittasamuṭṭhitattena kusalavohārārahāya āpattiyā vijjamānāyāti adhippāyo. Sāratthadīpaniyaṃ (sārattha. ṭī. cūḷavagga 3.222) pana ‘‘tasmiṃ satī’’ti imassa ‘‘tasmiṃ kusalacitte āpattibhāvena gahite’’ti attho vutto, taṃ na yujjati ‘‘yasmi’’nti ya-saddena parāmaṭṭhasseva āpattādhikaraṇassa ‘‘tasmi’’nti parāmasitabbato.
ந ஸக்கா வத்துந்தி யதி³ ஸம்முதிஸபா⁴வாயபி ஆபத்தியா அகுஸலாதி³ஸமுட்டி²தத்தேன அகுஸலாதி³வோஹாரோ கரீயதி, ததா³ குஸலவோஹாரோபி கத்தப்³போ³தி ‘‘நத்தி² ஆபத்தாதி⁴கரணங் குஸல’’ந்தி ந ஸக்கா வத்துங், அஞ்ஞதா² அகுஸலாதி³பா⁴வோபிஸ்ஸ படிக்கி²பிதப்³போ³தி அதி⁴ப்பாயோ. தஸ்மாதி யஸ்மா குஸலாதீ³னங் திண்ணங் ஸமானேபி ஆபத்தியா அங்க³ப்பஹோனகத்தே குஸலவோஹாரோவ ஆபத்தியா படிக்கி²த்தோ, ந அகுஸலாதி³வோஹாரோ, தஸ்மா நயித³ங் அங்க³ப்பஹோனகங் சித்தங் ஸந்தா⁴ய வுத்தந்தி ‘‘ஆபத்தாதி⁴கரணங் ஸியா அகுஸலங் ஸியா அப்³யாகதங், நத்தி² ஆபத்தாதி⁴கரணங் குஸல’’ந்தி இத³ங் ஆபத்தியா ஸமுட்டா²பகத்தேன அங்க³ப்பஹோனகங் காரணபூ⁴தங் சித்தமத்தங் ஸந்தா⁴ய ந வுத்தங் , அஞ்ஞதா² ‘‘ஆபத்தாதி⁴கரணங் ஸியா குஸல’’ந்திபி வத்தப்³ப³தோதி அதி⁴ப்பாயோ. ஏதேன ஆபத்தியா அகுஸலாதி³பா⁴வோபி கேனசி நிமித்தேன பரியாயதோவ வுத்தோ, ந பரமத்த²தோதி த³ஸ்ஸேதி. யதா²ஹ ‘‘யங் குஸலசித்தேன ஆபஜ்ஜதி, தங் குஸலங், இதரேஹி இதர’’ந்தி.
Na sakkā vattunti yadi sammutisabhāvāyapi āpattiyā akusalādisamuṭṭhitattena akusalādivohāro karīyati, tadā kusalavohāropi kattabboti ‘‘natthi āpattādhikaraṇaṃ kusala’’nti na sakkā vattuṃ, aññathā akusalādibhāvopissa paṭikkhipitabboti adhippāyo. Tasmāti yasmā kusalādīnaṃ tiṇṇaṃ samānepi āpattiyā aṅgappahonakatte kusalavohārova āpattiyā paṭikkhitto, na akusalādivohāro, tasmā nayidaṃ aṅgappahonakaṃ cittaṃ sandhāya vuttanti ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti idaṃ āpattiyā samuṭṭhāpakattena aṅgappahonakaṃ kāraṇabhūtaṃ cittamattaṃ sandhāya na vuttaṃ , aññathā ‘‘āpattādhikaraṇaṃ siyā kusala’’ntipi vattabbatoti adhippāyo. Etena āpattiyā akusalādibhāvopi kenaci nimittena pariyāyatova vutto, na paramatthatoti dasseti. Yathāha ‘‘yaṃ kusalacittena āpajjati, taṃ kusalaṃ, itarehi itara’’nti.
இத³ங் பனாதிஆதீ³ஸு அயங் அதி⁴ப்பாயோ – ‘‘ஆபத்தாதி⁴கரணங் ஸியா அகுஸலங் ஸியா அப்³யாகத’’ந்தி இத³ஞ்ஹி யங் கிஞ்சி கதா³சி கத்த²சி காரணங் ப⁴வந்தங் அனியதகாரணங் ஸந்தா⁴ய வுத்தங் ந ஹோதி. யங் பன ஸப்³ப³ஸிக்கா²பதே³ஸு ஆபத்தியா காரணங் ப⁴விதுமரஹதி, இத³மேவ காரணங் ஸந்தா⁴ய வுத்தங். அகுஸலஞ்ஹி பண்ணத்திங் ஞத்வா வீதிக்கமந்தஸ்ஸ ஸப்³பா³பத்தியா காரணங் ஹோதி, லோகவஜ்ஜாபத்தியா பன பண்ணத்திங் அஜானந்தஸ்ஸபி காரணங் ஹோதி. கேவலங் பண்ணத்திவஜ்ஜாபத்தீஸு குஸலாப்³யாகதசித்தபவத்திக்க²ணே ஏவ அகுஸலங் ந வத்ததி, தத³ஞ்ஞத்த² ஸயமேவ பவத்ததி. அப்³யாகதங் பன காயவசீபூ⁴தங் குஸலாகுஸலாதீ³னங் பவத்திக்க²ணே நிரோத⁴ஸமாபன்னஸ்ஸ ஸஹஸெய்யாபத்தியந்தி ஸப்³பா³பத்தியா அங்க³மேவ ஹோதி ச²ன்னங் ஆபத்திஸமுட்டா²னானங் காயவாசங்க³விரஹிதத்தாபா⁴வா. தஸ்மா இமேஸங் அகுஸலாப்³யாகதானங் ஸப்³பா³பத்திமூலகத்தமேவ ஸந்தா⁴ய இத³ங் ஆபத்தியா அகுஸலத்தங், அப்³யாகதத்தஞ்ச வுத்தங். யத்த² பன பத²வீக²ணனாதீ³ஸு குஸலம்பி ஆபத்தியா காரணங் ஹோதி, தத்தா²பி ஆபத்தியா தது³பசாரேன குஸலத்தவோஹாரோ அயுத்தோ ஸாவஜ்ஜானவஜ்ஜானங் ஏகத்தவோஹாரஸ்ஸ விருத்³த⁴த்தா. யத³க்³கே³ன அஞ்ஞமஞ்ஞங் விருத்³தா⁴, தத³க்³கே³ன காரணகாரியவோஹாரோபி நேஸங் அயுத்தோ. தஸ்மா தத்த² விஜ்ஜமானம்பி குஸலங் அப்³போ³ஹாரிகங், காயவசீத்³வாரமேவ ஆவேணிகங் காரணந்தி.
Idaṃ panātiādīsu ayaṃ adhippāyo – ‘‘āpattādhikaraṇaṃ siyā akusalaṃ siyā abyākata’’nti idañhi yaṃ kiñci kadāci katthaci kāraṇaṃ bhavantaṃ aniyatakāraṇaṃ sandhāya vuttaṃ na hoti. Yaṃ pana sabbasikkhāpadesu āpattiyā kāraṇaṃ bhavitumarahati, idameva kāraṇaṃ sandhāya vuttaṃ. Akusalañhi paṇṇattiṃ ñatvā vītikkamantassa sabbāpattiyā kāraṇaṃ hoti, lokavajjāpattiyā pana paṇṇattiṃ ajānantassapi kāraṇaṃ hoti. Kevalaṃ paṇṇattivajjāpattīsu kusalābyākatacittapavattikkhaṇe eva akusalaṃ na vattati, tadaññattha sayameva pavattati. Abyākataṃ pana kāyavacībhūtaṃ kusalākusalādīnaṃ pavattikkhaṇe nirodhasamāpannassa sahaseyyāpattiyanti sabbāpattiyā aṅgameva hoti channaṃ āpattisamuṭṭhānānaṃ kāyavācaṅgavirahitattābhāvā. Tasmā imesaṃ akusalābyākatānaṃ sabbāpattimūlakattameva sandhāya idaṃ āpattiyā akusalattaṃ, abyākatattañca vuttaṃ. Yattha pana pathavīkhaṇanādīsu kusalampi āpattiyā kāraṇaṃ hoti, tatthāpi āpattiyā tadupacārena kusalattavohāro ayutto sāvajjānavajjānaṃ ekattavohārassa viruddhattā. Yadaggena aññamaññaṃ viruddhā, tadaggena kāraṇakāriyavohāropi nesaṃ ayutto. Tasmā tattha vijjamānampi kusalaṃ abbohārikaṃ, kāyavacīdvārameva āveṇikaṃ kāraṇanti.
தத்த² ஏகந்ததோ அகுஸலமேவாதி அகுஸலசித்தேன ஸமுட்ட²ஹனதோ காரணூபசாரதோ ஏவங் வுத்தங். தத்தா²தி லோகவஜ்ஜே. விகப்போ நத்தீ²தி ஸியா-ஸத்³த³ஸ்ஸ விகப்பனத்த²தங் த³ஸ்ஸேதி. அகுஸலங் ஹோதீதி அகுஸலஸமுட்டி²தாய காரணூபசாரேன அகுஸலங் ஹோதி. ஸஹஸெய்யாதி³வஸேன ஆபஜ்ஜனதோ அப்³யாகதங் ஹோதீதி இத்தி²யாதீ³ஹி ஸஹ பிட்டி²பஸாரணவஸப்பவத்தகாயத்³வாரஸங்கா²தரூபாப்³யாகதவஸேனேவ ஆபஜ்ஜிதப்³ப³தோ காரணூபசாரேனேவ ஆபத்தி அப்³யாகதங் ஹோதி. தத்தா²தி தஸ்மிங் பண்ணத்திவஜ்ஜாபத்தாதி⁴கரணே. ஸஞ்சிச்சாஸஞ்சிச்சவஸேனாதி பண்ணத்திங் ஞத்வா, அஞ்ஞத்வா ச ஆபஜ்ஜனவஸேன இமங் விகப்பபா⁴வங் ஸந்தா⁴ய அகுஸலத்தஅப்³யாகதத்தஸங்கா²தங் யதா²வுத்தங் இமங் விகப்பஸபா⁴வங் ஸந்தா⁴ய இத³ங் வசனங் வுத்தங்.
Tattha ekantato akusalamevāti akusalacittena samuṭṭhahanato kāraṇūpacārato evaṃ vuttaṃ. Tatthāti lokavajje. Vikappo natthīti siyā-saddassa vikappanatthataṃ dasseti. Akusalaṃ hotīti akusalasamuṭṭhitāya kāraṇūpacārena akusalaṃ hoti. Sahaseyyādivasena āpajjanatoabyākataṃ hotīti itthiyādīhi saha piṭṭhipasāraṇavasappavattakāyadvārasaṅkhātarūpābyākatavaseneva āpajjitabbato kāraṇūpacāreneva āpatti abyākataṃ hoti. Tatthāti tasmiṃ paṇṇattivajjāpattādhikaraṇe. Sañciccāsañciccavasenāti paṇṇattiṃ ñatvā, aññatvā ca āpajjanavasena imaṃ vikappabhāvaṃ sandhāya akusalattaabyākatattasaṅkhātaṃ yathāvuttaṃ imaṃ vikappasabhāvaṃ sandhāya idaṃ vacanaṃ vuttaṃ.
யதி³ ஏவங் அஸஞ்சிச்சாபஜ்ஜனபக்கே² குஸலேனாபி ஆபஜ்ஜனதோ தம்பி விகப்பங் ஸந்தா⁴ய ‘‘ஆபத்தாதி⁴கரணங் ஸியா குஸல’’ந்திபி கஸ்மா ந வுத்தந்தி ஆஹ ‘‘ஸசே பனா’’திஆதி³. ‘‘அசித்தகான’’ந்தி வுத்தமேவத்த²ங் ஸமுட்டா²னவஸேன விபா⁴வேதுங் ‘‘ஏளகலோமபத³ஸோத⁴ம்மாதி³ஸமுட்டா²னானம்பீ’’தி வுத்தங். அசித்தகஸமுட்டா²னானங் ‘‘குஸலசித்தங் ஆபஜ்ஜெய்யா’’தி ஏதேன ஸாவஜ்ஜபூ⁴தாய ஆபத்தியா காரணூபசாரேனாபி அனவஜ்ஜபூ⁴தகுஸலவோஹாரோ அயுத்தோதி த³ஸ்ஸேதி. ‘‘ந ச தத்தா²’’திஆதி³னா குஸலஸ்ஸ ஆபத்தியா காரணத்தங் விஜ்ஜமானம்பி ததா² வோஹரிதுங் அயுத்தந்தி படிக்கி²பித்வா காயவாசாஸங்கா²தங் அப்³யாகதஸ்ஸேவ காரணத்தங் த³ஸ்ஸேதி. தத்த² சலிதப்பவத்தானந்தி சலிதானங், பவத்தானஞ்ச. சலிதோ ஹி காயோ, பவத்தா வாசா. எத்த² ச காயவாசானமஞ்ஞதரமேவ அங்க³ங். தஞ்ச…பே॰… அப்³யாகதந்தி ஏவங் அப்³யாகதஸ்ஸ ஆபத்திகாரணபா⁴வேனேவ வுத்தத்தா. ‘‘ஆபத்தாதி⁴கரணங் ஸியா அகுஸலங் ஸியா அப்³யாகத’’ந்தி இத³ங் காரணூபசாரேன பரியாயதோ வுத்தங், ந நிப்பரியாயதோதி ஸிஜ்ஜ²தி.
Yadi evaṃ asañciccāpajjanapakkhe kusalenāpi āpajjanato tampi vikappaṃ sandhāya ‘‘āpattādhikaraṇaṃ siyā kusala’’ntipi kasmā na vuttanti āha ‘‘sace panā’’tiādi. ‘‘Acittakāna’’nti vuttamevatthaṃ samuṭṭhānavasena vibhāvetuṃ ‘‘eḷakalomapadasodhammādisamuṭṭhānānampī’’ti vuttaṃ. Acittakasamuṭṭhānānaṃ ‘‘kusalacittaṃ āpajjeyyā’’ti etena sāvajjabhūtāya āpattiyā kāraṇūpacārenāpi anavajjabhūtakusalavohāro ayuttoti dasseti. ‘‘Na ca tatthā’’tiādinā kusalassa āpattiyā kāraṇattaṃ vijjamānampi tathā voharituṃ ayuttanti paṭikkhipitvā kāyavācāsaṅkhātaṃ abyākatasseva kāraṇattaṃ dasseti. Tattha calitappavattānanti calitānaṃ, pavattānañca. Calito hi kāyo, pavattā vācā. Ettha ca kāyavācānamaññatarameva aṅgaṃ. Tañca…pe… abyākatanti evaṃ abyākatassa āpattikāraṇabhāveneva vuttattā. ‘‘Āpattādhikaraṇaṃ siyā akusalaṃ siyā abyākata’’nti idaṃ kāraṇūpacārena pariyāyato vuttaṃ, na nippariyāyatoti sijjhati.
யங் பன ஸாரத்த²தீ³பனியங் (ஸாரத்த²॰ டீ॰ சூளவ॰ 3.222) ஆபத்தியா நிப்பரியாயதோவ அகுஸலாதி³ஸபா⁴வதங் ஸமத்தே²துங் ப³ஹுங் பபஞ்சிதங், தங் ந ஸாரதோ பச்சேதப்³ப³ங் து³ட்ட²தோ³ஸஸிக்கா²பத³ட்ட²கதா²யமேவ படிக்கி²த்தத்தா. தேனேவெத்தா²பி ‘‘யங் சித்தங் ஆபத்தியா அங்க³ங் ஹோதீ’’திஆதி³னா அகுஸலசித்தஸ்ஸாபி ஆபத்தியா காரணத்தேன பி⁴ன்னதாவ த³ஸ்ஸிதா. யங் பனெத்த² வத்தப்³ப³ங், தங் ஹெட்டா² த³ஸ்ஸிதமேவாதி இத⁴ ந வித்தா²ரயிம்ஹ. ஏவங் வீதிக்கமதோ யோ வீதிக்கமோதி எத்த² அகுஸலசித்தேன ஞத்வா வீதிக்கமந்தஸ்ஸ காயவசீவீதிக்கமஸமுட்டி²தா ஆபத்திவீதிக்கமோதி வுத்தோ. ஏஸ நயோ அப்³யாகதவாரேபி.
Yaṃ pana sāratthadīpaniyaṃ (sārattha. ṭī. cūḷava. 3.222) āpattiyā nippariyāyatova akusalādisabhāvataṃ samatthetuṃ bahuṃ papañcitaṃ, taṃ na sārato paccetabbaṃ duṭṭhadosasikkhāpadaṭṭhakathāyameva paṭikkhittattā. Tenevetthāpi ‘‘yaṃ cittaṃ āpattiyā aṅgaṃ hotī’’tiādinā akusalacittassāpi āpattiyā kāraṇattena bhinnatāva dassitā. Yaṃ panettha vattabbaṃ, taṃ heṭṭhā dassitamevāti idha na vitthārayimha. Evaṃ vītikkamato yo vītikkamoti ettha akusalacittena ñatvā vītikkamantassa kāyavacīvītikkamasamuṭṭhitā āpattivītikkamoti vutto. Esa nayo abyākatavārepi.
அதி⁴கரணகதா²வண்ணனா நிட்டி²தா.
Adhikaraṇakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 8. அதி⁴கரணங் • 8. Adhikaraṇaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அதி⁴கரணகதா² • Adhikaraṇakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணகதா²வண்ணனா • Adhikaraṇakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அதி⁴கரணகதா²வண்ணனா • Adhikaraṇakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. அதி⁴கரணகதா² • 8. Adhikaraṇakathā
