| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
অধিকরণকথাৰণ্ণনা
Adhikaraṇakathāvaṇṇanā
২১৬. ৰিৰাদাধিকরণস্স কিং মূলন্তিআদীসু ৰিৰাদমূলানীতি ৰিৰাদস্স মূলানি। কোধনোতি কুজ্ঝনলক্খণেন কোধেন সমন্নাগতো। উপনাহীতি ৰেরঅপ্পটিনিস্সগ্গলক্খণেন উপনাহেন সমন্নাগতো। অগারৰোতি (দী॰ নি॰ অট্ঠ॰ ৩.৩২৩; ম॰ নি॰ অট্ঠ॰ ৩.৪৪) গারৰৰিরহিতো। অপ্পতিস্সোতি অপ্পতিস্সযো অনীচৰুত্তি। এত্থ পন যো ভিক্খু সত্থরি ধরমানে তীসু কালেসু উপট্ঠানং ন যাতি, সত্থরি অনুপাহনে চঙ্কমন্তে সউপাহনো চঙ্কমতি, নীচে চঙ্কমে চঙ্কমন্তে উচ্চে চঙ্কমতি, হেট্ঠা ৰসন্তে উপরি ৰসতি, সত্থু দস্সনট্ঠানে উভো অংসে পারুপতি, ছত্তং ধারেতি, উপাহনং ধারেতি, নহাযতি, উচ্চারং ৰা পস্সাৰং ৰা করোতি, পরিনিব্বুতে ৰা পন চেতিযং ৰন্দিতুং ন গচ্ছতি, চেতিযস্স পঞ্ঞাযনট্ঠানে সত্থুদস্সনট্ঠানে ৰুত্তং সব্বং করোতি, অঞ্ঞেহি চ ভিক্খূহি ‘‘কস্মা এৰং করোসি, ন ইদং ৰট্টতি, সম্মাসম্বুদ্ধস্স নাম লজ্জিতুং ৰট্টতী’’তি ৰুত্তে ‘‘তুণ্হী হোহি, বুদ্ধো বুদ্ধোতি ৰদসি, কিং বুদ্ধো নামা’’তি ভণতি, অযং সত্থরি অগারৰো নাম।
216.Vivādādhikaraṇassa kiṃ mūlantiādīsu vivādamūlānīti vivādassa mūlāni. Kodhanoti kujjhanalakkhaṇena kodhena samannāgato. Upanāhīti veraappaṭinissaggalakkhaṇena upanāhena samannāgato. Agāravoti (dī. ni. aṭṭha. 3.323; ma. ni. aṭṭha. 3.44) gāravavirahito. Appatissoti appatissayo anīcavutti. Ettha pana yo bhikkhu satthari dharamāne tīsu kālesu upaṭṭhānaṃ na yāti, satthari anupāhane caṅkamante saupāhano caṅkamati, nīce caṅkame caṅkamante ucce caṅkamati, heṭṭhā vasante upari vasati, satthu dassanaṭṭhāne ubho aṃse pārupati, chattaṃ dhāreti, upāhanaṃ dhāreti, nahāyati, uccāraṃ vā passāvaṃ vā karoti, parinibbute vā pana cetiyaṃ vandituṃ na gacchati, cetiyassa paññāyanaṭṭhāne satthudassanaṭṭhāne vuttaṃ sabbaṃ karoti, aññehi ca bhikkhūhi ‘‘kasmā evaṃ karosi, na idaṃ vaṭṭati, sammāsambuddhassa nāma lajjituṃ vaṭṭatī’’ti vutte ‘‘tuṇhī hohi, buddho buddhoti vadasi, kiṃ buddho nāmā’’ti bhaṇati, ayaṃ satthari agāravo nāma.
যো পন ধম্মসৰনে সঙ্ঘুট্ঠে সক্কচ্চং ন গচ্ছতি, সক্কচ্চং ধম্মং ন সুণাতি, নিদ্দাযতি ৰা সল্লপন্তো ৰা নিসীদতি, সক্কচ্চং ন গণ্হাতি ন ৰাচেতি, ‘‘কিং ধম্মে অগারৰং করোসী’’তি ৰুত্তে ‘‘তুণ্হী হোহি, ধম্মো ধম্মোতি ৰদসি, কিং ধম্মো নামা’’তি ৰদতি, অযং ধম্মে অগারৰো নাম। যো পন থেরেন ভিক্খুনা অনজ্ঝিট্ঠো ধম্মং দেসেতি উদ্দিসতি পঞ্হং কথেতি, ৰুড্ঢে ভিক্খূ ঘট্টেন্তো গচ্ছতি তিট্ঠতি নিসীদতি, দুস্সপল্লত্থিকং ৰা হত্থপল্লত্থিকং ৰা করোতি, সঙ্ঘমজ্ঝে উভো অংসে পারুপতি, ছত্তুপাহনং ধারেতি, ‘‘ভিক্খুসঙ্ঘস্স লজ্জিতুং ৰট্টতী’’তি ৰুত্তেপি ‘‘তুণ্হী হোহি, সঙ্ঘো সঙ্ঘোতি ৰদসি, কিং সঙ্ঘো, মিগসঙ্ঘো অজসঙ্ঘো’’তিআদীনি ৰদতি, অযং সঙ্ঘে অগারৰো নাম। একভিক্খুস্মিম্পি হি অগারৰে কতে সঙ্ঘে কতোযেৰ হোতি। তিস্সো সিক্খা পন অপূরযমানো সিক্খায ন পরিপূরকারী নাম।
Yo pana dhammasavane saṅghuṭṭhe sakkaccaṃ na gacchati, sakkaccaṃ dhammaṃ na suṇāti, niddāyati vā sallapanto vā nisīdati, sakkaccaṃ na gaṇhāti na vāceti, ‘‘kiṃ dhamme agāravaṃ karosī’’ti vutte ‘‘tuṇhī hohi, dhammo dhammoti vadasi, kiṃ dhammo nāmā’’ti vadati, ayaṃ dhamme agāravo nāma. Yo pana therena bhikkhunā anajjhiṭṭho dhammaṃ deseti uddisati pañhaṃ katheti, vuḍḍhe bhikkhū ghaṭṭento gacchati tiṭṭhati nisīdati, dussapallatthikaṃ vā hatthapallatthikaṃ vā karoti, saṅghamajjhe ubho aṃse pārupati, chattupāhanaṃ dhāreti, ‘‘bhikkhusaṅghassa lajjituṃ vaṭṭatī’’ti vuttepi ‘‘tuṇhī hohi, saṅgho saṅghoti vadasi, kiṃ saṅgho, migasaṅgho ajasaṅgho’’tiādīni vadati, ayaṃ saṅghe agāravo nāma. Ekabhikkhusmimpi hi agārave kate saṅghe katoyeva hoti. Tisso sikkhā pana apūrayamāno sikkhāya na paripūrakārī nāma.
অহিতায দুক্খায দেৰমনুস্সানন্তি (দী॰ নি॰ অট্ঠ॰ ৩.৩২৫; ম॰ নি॰ অট্ঠ॰ ৩.৪২; অ॰ নি॰ অট্ঠ॰ ৩.৬.৩৬) একস্মিং ৰিহারে দ্ৰিন্নং ভিক্খূনং উপ্পন্নৰিৰাদো কথং দেৰমনুস্সানং অহিতায দুক্খায সংৰত্ততি? কোসম্বকক্খন্ধকে ৰিয হি দ্ৰীসু ভিক্খূসু ৰিৰাদং আপন্নেসু তস্মিং ৰিহারে তেসং অন্তেৰাসিকা ৰিৰদন্তি, তেসং ওৰাদং গণ্হন্তো ভিক্খুনিসঙ্ঘো ৰিৰদতি, ততো তেসং উপট্ঠাকা ৰিৰদন্তি, অথ মনুস্সানং আরক্খদেৰতা দ্ৰে কোট্ঠাসা হোন্তি। তত্থ ধম্মৰাদীনং আরক্খদেৰতা ধম্মৰাদিনিযো হোন্তি, অধম্মৰাদীনং অধম্মৰাদিনিযো। ততো আরক্খদেৰতানং মিত্তা ভুম্মদেৰতা ভিজ্জন্তি। এৰং পরম্পরায যাৰ ব্রহ্মলোকা ঠপেত্ৰা অরিযসাৰকে সব্বে দেৰমনুস্সা দ্ৰে কোট্ঠাসা হোন্তি। ধম্মৰাদীহি পন অধম্মৰাদিনোৰ বহুতরা হোন্তি। ততো ‘‘যং বহুকেহি গহিতং, তং তচ্ছ’’ন্তি ধম্মং ৰিস্সজ্জেত্ৰা বহুতরা অধম্মং গণ্হন্তি। তে অধম্মং পুরক্খত্ৰা ৰিহরন্তা অপাযেসু নিব্বত্তন্তি। এৰং একস্মিং ৰিহারে দ্ৰিন্নং ভিক্খূনং উপ্পন্নো ৰিৰাদো বহূনং অহিতায দুক্খায হোতি। অজ্ঝত্তং ৰাতি অত্তনি ৰা অত্তনো পরিসায ৰা। বহিদ্ধা ৰাতি পরস্মিং ৰা পরস্স পরিসায ৰা। আযতিং অনৰস্সৰাযাতি আযতিং অনুপ্পাদায।
Ahitāya dukkhāya devamanussānanti (dī. ni. aṭṭha. 3.325; ma. ni. aṭṭha. 3.42; a. ni. aṭṭha. 3.6.36) ekasmiṃ vihāre dvinnaṃ bhikkhūnaṃ uppannavivādo kathaṃ devamanussānaṃ ahitāya dukkhāya saṃvattati? Kosambakakkhandhake viya hi dvīsu bhikkhūsu vivādaṃ āpannesu tasmiṃ vihāre tesaṃ antevāsikā vivadanti, tesaṃ ovādaṃ gaṇhanto bhikkhunisaṅgho vivadati, tato tesaṃ upaṭṭhākā vivadanti, atha manussānaṃ ārakkhadevatā dve koṭṭhāsā honti. Tattha dhammavādīnaṃ ārakkhadevatā dhammavādiniyo honti, adhammavādīnaṃ adhammavādiniyo. Tato ārakkhadevatānaṃ mittā bhummadevatā bhijjanti. Evaṃ paramparāya yāva brahmalokā ṭhapetvā ariyasāvake sabbe devamanussā dve koṭṭhāsā honti. Dhammavādīhi pana adhammavādinova bahutarā honti. Tato ‘‘yaṃ bahukehi gahitaṃ, taṃ taccha’’nti dhammaṃ vissajjetvā bahutarā adhammaṃ gaṇhanti. Te adhammaṃ purakkhatvā viharantā apāyesu nibbattanti. Evaṃ ekasmiṃ vihāre dvinnaṃ bhikkhūnaṃ uppanno vivādo bahūnaṃ ahitāya dukkhāya hoti. Ajjhattaṃ vāti attani vā attano parisāya vā. Bahiddhā vāti parasmiṃ vā parassa parisāya vā. Āyatiṃ anavassavāyāti āyatiṃ anuppādāya.
মক্খীতি পরেসং গুণমক্খনলক্খণেন মক্খেন সমন্নাগতো। পল়াসীতি যুগগ্গাহলক্খণেন পল়াসেন সমন্নাগতো। ইস্সুকীতি পরসক্কারাদীনং ইস্সাযনলক্খণায ইস্সায সমন্নাগতো। মচ্ছরীতি আৰাসমচ্ছরিযাদীহি সমন্নাগতো। সঠোতি কেরাটিকো। মাযাৰীতি কতপাপপটিচ্ছাদকো। পাপিচ্ছোতি অসন্তসম্ভাৰনিচ্ছকো দুস্সীলো। মিচ্ছাদিট্ঠীতি নত্থিকৰাদী অহেতুকৰাদী অকিরিযৰাদী। সন্দিট্ঠিপরামাসীতি সযং দিট্ঠমেৰ পরামসতি গণ্হাতি। আধানগ্গাহীতি দল়্হগ্গাহী। দুপ্পটিনিস্সগ্গীতি ন সক্কা হোতি গহিতং নিস্সজ্জাপেতুং। এত্থ চ কোধনো হোতি উপনাহীতিআদিনা পুগ্গলাধিট্ঠাননযেন কোধূপনাহাদযো অকুসলধম্মা ৰিৰাদমূলানীতি দস্সিতানি, তথা দুট্ঠচিত্তা ৰিৰদন্তীতিআদিনা লোভদোসমোহা। অদুট্ঠচিত্তা ৰিৰদন্তীতিআদিনা চ অলোভাদযো ৰিৰাদমূলানীতি দস্সিতানি।
Makkhīti paresaṃ guṇamakkhanalakkhaṇena makkhena samannāgato. Paḷāsīti yugaggāhalakkhaṇena paḷāsena samannāgato. Issukīti parasakkārādīnaṃ issāyanalakkhaṇāya issāya samannāgato. Maccharīti āvāsamacchariyādīhi samannāgato. Saṭhoti kerāṭiko. Māyāvīti katapāpapaṭicchādako. Pāpicchoti asantasambhāvanicchako dussīlo. Micchādiṭṭhīti natthikavādī ahetukavādī akiriyavādī. Sandiṭṭhiparāmāsīti sayaṃ diṭṭhameva parāmasati gaṇhāti. Ādhānaggāhīti daḷhaggāhī. Duppaṭinissaggīti na sakkā hoti gahitaṃ nissajjāpetuṃ. Ettha ca kodhano hoti upanāhītiādinā puggalādhiṭṭhānanayena kodhūpanāhādayo akusaladhammā vivādamūlānīti dassitāni, tathā duṭṭhacittā vivadantītiādinā lobhadosamohā. Aduṭṭhacittā vivadantītiādinā ca alobhādayo vivādamūlānīti dassitāni.
২১৭. দুব্বণ্ণোতি পংসুপিসাচকো ৰিয ঝামখাণুৰণ্ণো। দুদ্দস্সিকোতি ৰিজাতমাতুযাপি অমনাপদস্সনো। ওকোটিমকোতি লকুণ্ডকো। কাণোতি একক্খিকাণো ৰা উভযক্খিকাণো ৰা। কুণীতি একহত্থকুণী ৰা উভযহত্থকুণী ৰা। খঞ্জোতি একপাদখঞ্জো ৰা উভযপাদখঞ্জো ৰা। পক্খহতোতি হতপক্খো পীঠসপ্পী।
217.Dubbaṇṇoti paṃsupisācako viya jhāmakhāṇuvaṇṇo. Duddassikoti vijātamātuyāpi amanāpadassano. Okoṭimakoti lakuṇḍako. Kāṇoti ekakkhikāṇo vā ubhayakkhikāṇo vā. Kuṇīti ekahatthakuṇī vā ubhayahatthakuṇī vā. Khañjoti ekapādakhañjo vā ubhayapādakhañjo vā. Pakkhahatoti hatapakkho pīṭhasappī.
২২০. ৰিৰাদাধিকরণং কুসলং অকুসলং অব্যাকতন্তি ৰিৰাদাধিকরণং কিং কুসলং অকুসলং উদাহু অব্যাকতন্তি পুচ্ছতি। ৰিৰাদাধিকরণং সিযা কুসলন্তিআদি ৰিস্সজ্জনং। এস নযো সেসেসুপি। ৰিৰদন্তি এতেনাতি ৰিৰাদোতি আহ ‘‘যেন ৰিৰদন্তি, সো চিত্তুপ্পাদো ৰিৰাদো’’তি। কথং পন সো চিত্তুপ্পাদো অধিকরণং নামাতি আহ ‘‘সমথেহি চ অধিকরণীযতায অধিকরণ’’ন্তি, সমথেহি সমেতব্বতায অধিকরণন্তি অত্থো। ৰিৰাদহেতুভূতস্স হি চিত্তুপ্পাদস্স ৰূপসমেন তপ্পভৰস্স সদ্দস্সপি ৰূপসমো হোতীতি চিত্তুপ্পাদস্স সমথেহি অধিকরণীযতা পরিযাযো সম্ভৰতি।
220.Vivādādhikaraṇaṃ kusalaṃ akusalaṃ abyākatanti vivādādhikaraṇaṃ kiṃ kusalaṃ akusalaṃ udāhu abyākatanti pucchati. Vivādādhikaraṇaṃ siyā kusalantiādi vissajjanaṃ. Esa nayo sesesupi. Vivadanti etenāti vivādoti āha ‘‘yena vivadanti, so cittuppādo vivādo’’ti. Kathaṃ pana so cittuppādo adhikaraṇaṃ nāmāti āha ‘‘samathehi ca adhikaraṇīyatāya adhikaraṇa’’nti, samathehi sametabbatāya adhikaraṇanti attho. Vivādahetubhūtassa hi cittuppādassa vūpasamena tappabhavassa saddassapi vūpasamo hotīti cittuppādassa samathehi adhikaraṇīyatā pariyāyo sambhavati.
২২২. আপত্তাধিকরণং সিযা অকুসলং সিযা অব্যাকতন্তি অযং ৰিকপ্পো পঞ্ঞত্তিৰজ্জংযেৰ সন্ধায ৰুত্তো, ন লোকৰজ্জন্তি দস্সেতুং ‘‘সন্ধাযভাসিতৰসেনা’’তিআদিমাহ। কস্মা পনেত্থ সন্ধাযভাসিতৰসেন অত্থো ৰেদিতব্বোতি আহ ‘‘যস্মিং হী’’তিআদি। পথৰীখণনাদিকেতি এত্থ আদি-সদ্দেন ভূতগামপাতব্যতাদিপঞ্ঞত্তিৰজ্জং সিক্খাপদং সঙ্গণ্হাতি। যো ৰিনযে অপকতঞ্ঞুতায ৰত্তসীসেন সম্মুঞ্জনিআদিনা পথৰীখণনাদীনি করোতি, তদা তস্সুপ্পন্নচিত্তং সন্ধায ৰুত্তং ‘‘কুসলচিত্তং অঙ্গং হোতী’’তি। অঙ্গং হোতীতি চ ৰত্তসীসেন করোন্তস্সপি ‘‘ইমং পথৰিং খণামী’’তিআদিনা ৰীতিক্কমজাননৰসেন পৰত্তত্তা তং কুসলচিত্তং আপত্তাধিকরণং, কুসলচিত্তং আপত্তিযা কারণং হোতীতি অত্থো। ন হি ৰীতিক্কমং অজানন্তস্স পথৰীখণনাদীসু আপত্তি সম্ভৰতি। তস্মিং সতীতি তস্মিং কুসলচিত্তে আপত্তিভাৰেন গহিতে সতীতি অধিপ্পাযো। তস্মাতি যস্মা কুসলচিত্তে আপত্তিভাৰেন গহিতে সতি ‘‘নত্থি আপত্তাধিকরণং কুসল’’ন্তি ন সক্কা ৰত্তুং, তস্মা। নযিদং অঙ্গপ্পহোনকচিত্তং সন্ধায ৰুত্তন্তি ‘‘আপত্তাধিকরণং সিযা অকুসলং সিযা অব্যাকতং, নত্থি আপত্তাধিকরণং কুসল’’ন্তি ইদং আপত্তিসমুট্ঠাপকভাৰেন অঙ্গপ্পহোনকং আপত্তিযা কারণভূতং চিত্তং সন্ধায ন ৰুত্তং। কিং পন সন্ধায ৰুত্তন্তি আহ ‘‘ইদং পনা’’তিআদি। ভিক্খুম্হি কম্মট্ঠানগতচিত্তেন নিপন্নে নিদ্দাযন্তে ৰা মাতুগামো চে সেয্যং কপ্পেতি, তস্মিং খণে সেয্যাকারেন ৰত্তমানরূপমেৰ আপত্তি, ন কুসলাদিৰসপ্পৰত্তং চিত্তন্তি আহ ‘‘অসঞ্চিচ্চ…পে॰… সহসেয্যাদিৰসেন আপজ্জতো (পরি॰ ৩২৩ অত্থতো সমানং) অব্যাকতং হোতী’’তি। তস্মিঞ্হি খণে উট্ঠাতব্বে জাতে অনুট্ঠানতো তদাকারপৰত্তো রূপক্খন্ধোৰ আপত্তি।
222.Āpattādhikaraṇaṃ siyā akusalaṃ siyā abyākatanti ayaṃ vikappo paññattivajjaṃyeva sandhāya vutto, na lokavajjanti dassetuṃ ‘‘sandhāyabhāsitavasenā’’tiādimāha. Kasmā panettha sandhāyabhāsitavasena attho veditabboti āha ‘‘yasmiṃ hī’’tiādi. Pathavīkhaṇanādiketi ettha ādi-saddena bhūtagāmapātabyatādipaññattivajjaṃ sikkhāpadaṃ saṅgaṇhāti. Yo vinaye apakataññutāya vattasīsena sammuñjaniādinā pathavīkhaṇanādīni karoti, tadā tassuppannacittaṃ sandhāya vuttaṃ ‘‘kusalacittaṃ aṅgaṃ hotī’’ti. Aṅgaṃ hotīti ca vattasīsena karontassapi ‘‘imaṃ pathaviṃ khaṇāmī’’tiādinā vītikkamajānanavasena pavattattā taṃ kusalacittaṃ āpattādhikaraṇaṃ, kusalacittaṃ āpattiyā kāraṇaṃ hotīti attho. Na hi vītikkamaṃ ajānantassa pathavīkhaṇanādīsu āpatti sambhavati. Tasmiṃ satīti tasmiṃ kusalacitte āpattibhāvena gahite satīti adhippāyo. Tasmāti yasmā kusalacitte āpattibhāvena gahite sati ‘‘natthi āpattādhikaraṇaṃ kusala’’nti na sakkā vattuṃ, tasmā. Nayidaṃ aṅgappahonakacittaṃ sandhāya vuttanti ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti idaṃ āpattisamuṭṭhāpakabhāvena aṅgappahonakaṃ āpattiyā kāraṇabhūtaṃ cittaṃ sandhāya na vuttaṃ. Kiṃ pana sandhāya vuttanti āha ‘‘idaṃ panā’’tiādi. Bhikkhumhi kammaṭṭhānagatacittena nipanne niddāyante vā mātugāmo ce seyyaṃ kappeti, tasmiṃ khaṇe seyyākārena vattamānarūpameva āpatti, na kusalādivasappavattaṃ cittanti āha ‘‘asañcicca…pe… sahaseyyādivasena āpajjato (pari. 323 atthato samānaṃ) abyākataṃ hotī’’ti. Tasmiñhi khaṇe uṭṭhātabbe jāte anuṭṭhānato tadākārapavatto rūpakkhandhova āpatti.
‘‘আপত্তিং আপজ্জন্তো কুসলচিত্তো ৰা আপজ্জতি অকুসলাব্যাকতচিত্তো ৰা’’তি ৰচনতো কুসলম্পি আপত্তাধিকরণং সিযাতি চে? ন। যো হি আপত্তিং আপজ্জতীতি ৰুচ্চতি, সো তীসু চিত্তেসু অঞ্ঞতরচিত্তসমঙ্গী হুত্ৰা আপজ্জতি, ন অঞ্ঞথাতি দস্সনত্থং ‘‘কুসলচিত্তো ৰা’’তিআদি ৰুত্তং। অযঞ্হেত্থ অত্থো – পথৰীখণনাদীসু কুসলচিত্তক্খণে ৰীতিক্কমাদিৰসেন পৰত্তরূপসম্ভৰতো কুসলচিত্তো ৰা তথাপৰত্তরূপসঙ্খাতং অব্যাকতাপত্তিং আপজ্জতি, তথা অব্যাকতচিত্তো ৰা অব্যাকতরূপসঙ্খাতং অব্যাকতাপত্তিং আপজ্জতি। পাণাতিপাতাদিং অকুসলচিত্তো ৰা অকুসলাপত্তিং আপজ্জতি, রূপং পনেত্থ অব্বোহারিকং। সুপিনন্তে চ পাণাতিপাতাদিং করোন্তো সহসেয্যাদিৰসেন আপজ্জিতব্বাপত্তিং আপজ্জন্তো অকুসলচিত্তো অব্যাকতাপত্তিং আপজ্জতীতি।
‘‘Āpattiṃ āpajjanto kusalacitto vā āpajjati akusalābyākatacitto vā’’ti vacanato kusalampi āpattādhikaraṇaṃ siyāti ce? Na. Yo hi āpattiṃ āpajjatīti vuccati, so tīsu cittesu aññataracittasamaṅgī hutvā āpajjati, na aññathāti dassanatthaṃ ‘‘kusalacitto vā’’tiādi vuttaṃ. Ayañhettha attho – pathavīkhaṇanādīsu kusalacittakkhaṇe vītikkamādivasena pavattarūpasambhavato kusalacitto vā tathāpavattarūpasaṅkhātaṃ abyākatāpattiṃ āpajjati, tathā abyākatacitto vā abyākatarūpasaṅkhātaṃ abyākatāpattiṃ āpajjati. Pāṇātipātādiṃ akusalacitto vā akusalāpattiṃ āpajjati, rūpaṃ panettha abbohārikaṃ. Supinante ca pāṇātipātādiṃ karonto sahaseyyādivasena āpajjitabbāpattiṃ āpajjanto akusalacitto abyākatāpattiṃ āpajjatīti.
কুসলচিত্তং আপজ্জেয্যাতি এল়কলোমং গহেত্ৰা কম্মট্ঠানমনসিকারেন তিযোজনং অতিক্কমন্তস্স পঞ্ঞত্তিং অজানিত্ৰা পদসো ধম্মং ৰাচেন্তস্স চ আপজ্জিতব্বাপত্তিযা কুসলচিত্তং আপজ্জেয্য। ন চ তত্থ ৰিজ্জমানম্পি কুসলচিত্তং আপত্তিযা অঙ্গন্তি তস্মিং ৰিজ্জমানম্পি কুসলচিত্তং আপত্তিযা অঙ্গং ন হোতি, সযং আপত্তি ন হোতীতি অত্থো। চলিতপ্পৰত্তানন্তি চলিতানং পৰত্তানঞ্চ। চলিতো কাযো, পৰত্তা ৰাচা। অঞ্ঞতরমেৰ অঙ্গন্তি কাযৰাচানং অঞ্ঞতরমেৰ আপত্তীতি অত্থো। তঞ্চ রূপক্খন্ধপরিযাপন্নত্তা অব্যাকতন্তি ইমিনা অব্যাকতমাপত্তাধিকরণং, নাঞ্ঞন্তি দস্সেতি।
Kusalacittaṃāpajjeyyāti eḷakalomaṃ gahetvā kammaṭṭhānamanasikārena tiyojanaṃ atikkamantassa paññattiṃ ajānitvā padaso dhammaṃ vācentassa ca āpajjitabbāpattiyā kusalacittaṃ āpajjeyya. Na ca tattha vijjamānampi kusalacittaṃ āpattiyā aṅganti tasmiṃ vijjamānampi kusalacittaṃ āpattiyā aṅgaṃ na hoti, sayaṃ āpatti na hotīti attho. Calitappavattānanti calitānaṃ pavattānañca. Calito kāyo, pavattā vācā. Aññatarameva aṅganti kāyavācānaṃ aññatarameva āpattīti attho. Tañca rūpakkhandhapariyāpannattā abyākatanti iminā abyākatamāpattādhikaraṇaṃ, nāññanti dasseti.
যদি এৰং ‘‘সাপত্তিকস্স, ভিক্খৰে, নিরযং ৰা ৰদামি তিরচ্ছানযোনিং ৰা’’তি ৰচনতো অব্যাকতস্সপি ৰিপাকধম্মতা আপজ্জেয্যাতি? নাপজ্জেয্য। অসঞ্চিচ্চ আপন্না হি আপত্তিযো যাৰ সো ন জানাতি, তাৰ অনন্তরাযকরা, জানিত্ৰা ছাদেন্তো পন ছাদনপ্পচ্চযা অঞ্ঞং দুক্কটসঙ্খাতং অকুসলমাপত্তাধিকরণমাপজ্জতি, তঞ্চ অকুসলসভাৰত্তা সগ্গমোক্খানং অন্তরাযকরণন্তি সাপত্তিকস্স অপাযগামিতা ৰুত্তা। অব্যাকতং পন আপত্তাধিকরণং অৰিপাকধম্মমেৰাতি নিট্ঠমেত্থ গন্তব্বং। তেনেৰ পোরাণগণ্ঠিপদেসুপি ‘‘পুথুজ্জনো কল্যাণপুথুজ্জনো সেক্খো অরহাতি চত্তারো পুগ্গলে দস্সেত্ৰা তেসু অরহতো আপত্তাধিকরণং অব্যাকতমেৰ, তথা সেক্খানং, তথা কল্যাণপুথুজ্জনস্স অসঞ্চিচ্চ ৰীতিক্কমকালে অব্যাকতমেৰ। ইতরস্স অকুসলম্পি হোতি অব্যাকতম্পি। যস্মা চস্স সঞ্চিচ্চ ৰীতিক্কমকালে অকুসলমেৰ হোতি, তস্মা ৰুত্তং ‘নত্থি আপত্তাধিকরণং কুসল’ন্তি। সব্বত্থ এৰং অব্যাকতন্তি ৰিপাকাভাৰমত্তং সন্ধায ৰুত্ত’’ন্তি লিখিতং। যঞ্চ আপত্তাধিকরণং অকুসলং, তম্পি দেসিতং ৰুট্ঠিতং ৰা অনন্তরাযকরং। যথা হি অরিযূপৰাদকম্মং অকুসলম্পি সমানং অচ্চযং দেসেত্ৰা খমাপনেন পযোগসম্পত্তিপটিবাহিতত্তা অৰিপাকধম্মতং আপন্নং অহোসিকম্মং হোতি, এৰমিদম্পি দেসিতং ৰুট্ঠিতং ৰা পযোগসম্পত্তিপটিবাহিতত্তা অৰিপাকধম্মতায অহোসিকম্মভাৰেন অনন্তরাযকরং জাতং। তেনেৰ ‘‘সাপত্তিকস্স, ভিক্খৰে, নিরযং ৰা ৰদামি তিরচ্ছানযোনিং ৰা’’তি সাপত্তিকস্সেৰ অপাযগামিতা ৰুত্তা।
Yadi evaṃ ‘‘sāpattikassa, bhikkhave, nirayaṃ vā vadāmi tiracchānayoniṃ vā’’ti vacanato abyākatassapi vipākadhammatā āpajjeyyāti? Nāpajjeyya. Asañcicca āpannā hi āpattiyo yāva so na jānāti, tāva anantarāyakarā, jānitvā chādento pana chādanappaccayā aññaṃ dukkaṭasaṅkhātaṃ akusalamāpattādhikaraṇamāpajjati, tañca akusalasabhāvattā saggamokkhānaṃ antarāyakaraṇanti sāpattikassa apāyagāmitā vuttā. Abyākataṃ pana āpattādhikaraṇaṃ avipākadhammamevāti niṭṭhamettha gantabbaṃ. Teneva porāṇagaṇṭhipadesupi ‘‘puthujjano kalyāṇaputhujjano sekkho arahāti cattāro puggale dassetvā tesu arahato āpattādhikaraṇaṃ abyākatameva, tathā sekkhānaṃ, tathā kalyāṇaputhujjanassa asañcicca vītikkamakāle abyākatameva. Itarassa akusalampi hoti abyākatampi. Yasmā cassa sañcicca vītikkamakāle akusalameva hoti, tasmā vuttaṃ ‘natthi āpattādhikaraṇaṃ kusala’nti. Sabbattha evaṃ abyākatanti vipākābhāvamattaṃ sandhāya vutta’’nti likhitaṃ. Yañca āpattādhikaraṇaṃ akusalaṃ, tampi desitaṃ vuṭṭhitaṃ vā anantarāyakaraṃ. Yathā hi ariyūpavādakammaṃ akusalampi samānaṃ accayaṃ desetvā khamāpanena payogasampattipaṭibāhitattā avipākadhammataṃ āpannaṃ ahosikammaṃ hoti, evamidampi desitaṃ vuṭṭhitaṃ vā payogasampattipaṭibāhitattā avipākadhammatāya ahosikammabhāvena anantarāyakaraṃ jātaṃ. Teneva ‘‘sāpattikassa, bhikkhave, nirayaṃ vā vadāmi tiracchānayoniṃ vā’’ti sāpattikasseva apāyagāmitā vuttā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৮. অধিকরণং • 8. Adhikaraṇaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / অধিকরণকথা • Adhikaraṇakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণকথাৰণ্ণনা • Adhikaraṇakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণকথাৰণ্ণনা • Adhikaraṇakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮. অধিকরণকথা • 8. Adhikaraṇakathā
