| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
ад̇хигаран̣агат̇ааван̣н̣анаа
Adhikaraṇakathāvaṇṇanā
216. виваад̣̇аад̇хигаран̣асса гим̣ мууланд̇иаад̣̇ийсу виваад̣̇амуулаанийд̇и виваад̣̇асса муулаани. год̇ханод̇и гуж̇жханалагкан̣зна год̇хзна саманнааг̇ад̇о. убанаахийд̇и взрааббадиниссаг̇г̇алагкан̣зна убанаахзна саманнааг̇ад̇о. аг̇ааравод̇и (д̣̇ий. ни. адта. 3.323; ма. ни. адта. 3.44) г̇аарававирахид̇о. аббад̇иссод̇и аббад̇иссаяо анийжавуд̇д̇и. зд̇т̇а бана яо бхигку сад̇т̇ари д̇харамаанз д̇ийсу гаалзсу убадтаанам̣ на яаад̇и, сад̇т̇ари анубааханз жан̇гаманд̇з саубаахано жан̇гамад̇и, нийжз жан̇гамз жан̇гаманд̇з ужжз жан̇гамад̇и, хздтаа васанд̇з убари васад̇и, сад̇т̇у д̣̇ассанадтаанз убхо ам̣сз баарубад̇и, чад̇д̇ам̣ д̇хаарзд̇и, убааханам̣ д̇хаарзд̇и, нахааяад̇и, ужжаарам̣ ваа бассаавам̣ ваа гарод̇и, бариниб̣б̣уд̇з ваа бана жзд̇ияам̣ ванд̣̇ид̇ум̣ на г̇ажчад̇и, жзд̇ияасса бан̃н̃ааяанадтаанз сад̇т̇уд̣̇ассанадтаанз вуд̇д̇ам̣ саб̣б̣ам̣ гарод̇и, ан̃н̃зхи жа бхигкуухи ‘‘гасмаа звам̣ гароси, на ид̣̇ам̣ ваддад̇и, саммаасамб̣уд̣̇д̇хасса наама лаж̇ж̇ид̇ум̣ ваддад̇ий’’д̇и вуд̇д̇з ‘‘д̇ун̣хий хохи, б̣уд̣̇д̇хо б̣уд̣̇д̇ход̇и вад̣̇аси, гим̣ б̣уд̣̇д̇хо наамаа’’д̇и бхан̣ад̇и, аяам̣ сад̇т̇ари аг̇аараво наама.
216.Vivādādhikaraṇassa kiṃ mūlantiādīsu vivādamūlānīti vivādassa mūlāni. Kodhanoti kujjhanalakkhaṇena kodhena samannāgato. Upanāhīti veraappaṭinissaggalakkhaṇena upanāhena samannāgato. Agāravoti (dī. ni. aṭṭha. 3.323; ma. ni. aṭṭha. 3.44) gāravavirahito. Appatissoti appatissayo anīcavutti. Ettha pana yo bhikkhu satthari dharamāne tīsu kālesu upaṭṭhānaṃ na yāti, satthari anupāhane caṅkamante saupāhano caṅkamati, nīce caṅkame caṅkamante ucce caṅkamati, heṭṭhā vasante upari vasati, satthu dassanaṭṭhāne ubho aṃse pārupati, chattaṃ dhāreti, upāhanaṃ dhāreti, nahāyati, uccāraṃ vā passāvaṃ vā karoti, parinibbute vā pana cetiyaṃ vandituṃ na gacchati, cetiyassa paññāyanaṭṭhāne satthudassanaṭṭhāne vuttaṃ sabbaṃ karoti, aññehi ca bhikkhūhi ‘‘kasmā evaṃ karosi, na idaṃ vaṭṭati, sammāsambuddhassa nāma lajjituṃ vaṭṭatī’’ti vutte ‘‘tuṇhī hohi, buddho buddhoti vadasi, kiṃ buddho nāmā’’ti bhaṇati, ayaṃ satthari agāravo nāma.
яо бана д̇хаммасаванз сан̇гхудтз саггажжам̣ на г̇ажчад̇и, саггажжам̣ д̇хаммам̣ на сун̣аад̇и, нид̣̇д̣̇ааяад̇и ваа саллабанд̇о ваа нисийд̣̇ад̇и, саггажжам̣ на г̇ан̣хаад̇и на ваажзд̇и, ‘‘гим̣ д̇хаммз аг̇ааравам̣ гаросий’’д̇и вуд̇д̇з ‘‘д̇ун̣хий хохи, д̇хаммо д̇хаммод̇и вад̣̇аси, гим̣ д̇хаммо наамаа’’д̇и вад̣̇ад̇и, аяам̣ д̇хаммз аг̇аараво наама. яо бана т̇зрзна бхигкунаа анаж̇жхидто д̇хаммам̣ д̣̇зсзд̇и уд̣̇д̣̇исад̇и бан̃хам̣ гат̇зд̇и, вуд̣дхз бхигкуу гхаддзнд̇о г̇ажчад̇и д̇идтад̇и нисийд̣̇ад̇и, д̣̇уссабаллад̇т̇игам̣ ваа хад̇т̇абаллад̇т̇игам̣ ваа гарод̇и, сан̇гхамаж̇жхз убхо ам̣сз баарубад̇и, чад̇д̇убааханам̣ д̇хаарзд̇и, ‘‘бхигкусан̇гхасса лаж̇ж̇ид̇ум̣ ваддад̇ий’’д̇и вуд̇д̇зби ‘‘д̇ун̣хий хохи, сан̇гхо сан̇гход̇и вад̣̇аси, гим̣ сан̇гхо, миг̇асан̇гхо аж̇асан̇гхо’’д̇иаад̣̇ийни вад̣̇ад̇и, аяам̣ сан̇гхз аг̇аараво наама. згабхигкусмимби хи аг̇ааравз гад̇з сан̇гхз гад̇оязва ход̇и. д̇иссо сигкаа бана абуураяамаано сигкааяа на барибуурагаарий наама.
Yo pana dhammasavane saṅghuṭṭhe sakkaccaṃ na gacchati, sakkaccaṃ dhammaṃ na suṇāti, niddāyati vā sallapanto vā nisīdati, sakkaccaṃ na gaṇhāti na vāceti, ‘‘kiṃ dhamme agāravaṃ karosī’’ti vutte ‘‘tuṇhī hohi, dhammo dhammoti vadasi, kiṃ dhammo nāmā’’ti vadati, ayaṃ dhamme agāravo nāma. Yo pana therena bhikkhunā anajjhiṭṭho dhammaṃ deseti uddisati pañhaṃ katheti, vuḍḍhe bhikkhū ghaṭṭento gacchati tiṭṭhati nisīdati, dussapallatthikaṃ vā hatthapallatthikaṃ vā karoti, saṅghamajjhe ubho aṃse pārupati, chattupāhanaṃ dhāreti, ‘‘bhikkhusaṅghassa lajjituṃ vaṭṭatī’’ti vuttepi ‘‘tuṇhī hohi, saṅgho saṅghoti vadasi, kiṃ saṅgho, migasaṅgho ajasaṅgho’’tiādīni vadati, ayaṃ saṅghe agāravo nāma. Ekabhikkhusmimpi hi agārave kate saṅghe katoyeva hoti. Tisso sikkhā pana apūrayamāno sikkhāya na paripūrakārī nāma.
ахид̇ааяа д̣̇угкааяа д̣̇звамануссаананд̇и (д̣̇ий. ни. адта. 3.325; ма. ни. адта. 3.42; а. ни. адта. 3.6.36) згасмим̣ вихаарз д̣̇виннам̣ бхигкуунам̣ уббаннавиваад̣̇о гат̇ам̣ д̣̇звамануссаанам̣ ахид̇ааяа д̣̇угкааяа сам̣вад̇д̇ад̇и? госамб̣агагканд̇хагз вияа хи д̣̇вийсу бхигкуусу виваад̣̇ам̣ аабаннзсу д̇асмим̣ вихаарз д̇зсам̣ анд̇зваасигаа вивад̣̇анд̇и, д̇зсам̣ оваад̣̇ам̣ г̇ан̣ханд̇о бхигкунисан̇гхо вивад̣̇ад̇и, д̇ад̇о д̇зсам̣ убадтаагаа вивад̣̇анд̇и, ат̇а мануссаанам̣ аарагкад̣̇звад̇аа д̣̇вз годтаасаа хонд̇и. д̇ад̇т̇а д̇хаммаваад̣̇ийнам̣ аарагкад̣̇звад̇аа д̇хаммаваад̣̇инияо хонд̇и, ад̇хаммаваад̣̇ийнам̣ ад̇хаммаваад̣̇инияо. д̇ад̇о аарагкад̣̇звад̇аанам̣ мид̇д̇аа бхуммад̣̇звад̇аа бхиж̇ж̇анд̇и. звам̣ барамбарааяа яаава б̣рахмалогаа табзд̇ваа арияасаавагз саб̣б̣з д̣̇звамануссаа д̣̇вз годтаасаа хонд̇и. д̇хаммаваад̣̇ийхи бана ад̇хаммаваад̣̇инова б̣ахуд̇араа хонд̇и. д̇ад̇о ‘‘яам̣ б̣ахугзхи г̇ахид̇ам̣, д̇ам̣ д̇ажча’’нд̇и д̇хаммам̣ виссаж̇ж̇зд̇ваа б̣ахуд̇араа ад̇хаммам̣ г̇ан̣ханд̇и. д̇з ад̇хаммам̣ бурагкад̇ваа вихаранд̇аа абааязсу ниб̣б̣ад̇д̇анд̇и. звам̣ згасмим̣ вихаарз д̣̇виннам̣ бхигкуунам̣ уббанно виваад̣̇о б̣ахуунам̣ ахид̇ааяа д̣̇угкааяа ход̇и. аж̇жхад̇д̇ам̣ ваад̇и ад̇д̇ани ваа ад̇д̇ано барисааяа ваа. б̣ахид̣̇д̇хаа ваад̇и барасмим̣ ваа барасса барисааяа ваа. ааяад̇им̣ анавассавааяаад̇и ааяад̇им̣ ануббаад̣̇ааяа.
Ahitāya dukkhāya devamanussānanti (dī. ni. aṭṭha. 3.325; ma. ni. aṭṭha. 3.42; a. ni. aṭṭha. 3.6.36) ekasmiṃ vihāre dvinnaṃ bhikkhūnaṃ uppannavivādo kathaṃ devamanussānaṃ ahitāya dukkhāya saṃvattati? Kosambakakkhandhake viya hi dvīsu bhikkhūsu vivādaṃ āpannesu tasmiṃ vihāre tesaṃ antevāsikā vivadanti, tesaṃ ovādaṃ gaṇhanto bhikkhunisaṅgho vivadati, tato tesaṃ upaṭṭhākā vivadanti, atha manussānaṃ ārakkhadevatā dve koṭṭhāsā honti. Tattha dhammavādīnaṃ ārakkhadevatā dhammavādiniyo honti, adhammavādīnaṃ adhammavādiniyo. Tato ārakkhadevatānaṃ mittā bhummadevatā bhijjanti. Evaṃ paramparāya yāva brahmalokā ṭhapetvā ariyasāvake sabbe devamanussā dve koṭṭhāsā honti. Dhammavādīhi pana adhammavādinova bahutarā honti. Tato ‘‘yaṃ bahukehi gahitaṃ, taṃ taccha’’nti dhammaṃ vissajjetvā bahutarā adhammaṃ gaṇhanti. Te adhammaṃ purakkhatvā viharantā apāyesu nibbattanti. Evaṃ ekasmiṃ vihāre dvinnaṃ bhikkhūnaṃ uppanno vivādo bahūnaṃ ahitāya dukkhāya hoti. Ajjhattaṃ vāti attani vā attano parisāya vā. Bahiddhā vāti parasmiṃ vā parassa parisāya vā. Āyatiṃ anavassavāyāti āyatiṃ anuppādāya.
магкийд̇и барзсам̣ г̇ун̣амагканалагкан̣зна магкзна саманнааг̇ад̇о. бал̣аасийд̇и яуг̇аг̇г̇аахалагкан̣зна бал̣аасзна саманнааг̇ад̇о. иссугийд̇и барасаггаараад̣̇ийнам̣ иссааяаналагкан̣ааяа иссааяа саманнааг̇ад̇о. мажчарийд̇и ааваасамажчарияаад̣̇ийхи саманнааг̇ад̇о. сатод̇и гзраадиго. мааяаавийд̇и гад̇абаабабадижчаад̣̇аго. баабижчод̇и асанд̇асамбхааванижчаго д̣̇уссийло. мижчаад̣̇идтийд̇и над̇т̇игаваад̣̇ий ахзд̇угаваад̣̇ий агирияаваад̣̇ий. санд̣̇идтибараамаасийд̇и саяам̣ д̣̇идтамзва бараамасад̇и г̇ан̣хаад̇и. аад̇хаанаг̇г̇аахийд̇и д̣̇ал̣хаг̇г̇аахий. д̣̇уббадиниссаг̇г̇ийд̇и на саггаа ход̇и г̇ахид̇ам̣ ниссаж̇ж̇аабзд̇ум̣. зд̇т̇а жа год̇хано ход̇и убанаахийд̇иаад̣̇инаа буг̇г̇алаад̇хидтаананаязна год̇хуубанаахаад̣̇аяо агусалад̇хаммаа виваад̣̇амуулаанийд̇и д̣̇ассид̇аани, д̇ат̇аа д̣̇удтажид̇д̇аа вивад̣̇анд̇ийд̇иаад̣̇инаа лобхад̣̇осамохаа. ад̣̇удтажид̇д̇аа вивад̣̇анд̇ийд̇иаад̣̇инаа жа алобхаад̣̇аяо виваад̣̇амуулаанийд̇и д̣̇ассид̇аани.
Makkhīti paresaṃ guṇamakkhanalakkhaṇena makkhena samannāgato. Paḷāsīti yugaggāhalakkhaṇena paḷāsena samannāgato. Issukīti parasakkārādīnaṃ issāyanalakkhaṇāya issāya samannāgato. Maccharīti āvāsamacchariyādīhi samannāgato. Saṭhoti kerāṭiko. Māyāvīti katapāpapaṭicchādako. Pāpicchoti asantasambhāvanicchako dussīlo. Micchādiṭṭhīti natthikavādī ahetukavādī akiriyavādī. Sandiṭṭhiparāmāsīti sayaṃ diṭṭhameva parāmasati gaṇhāti. Ādhānaggāhīti daḷhaggāhī. Duppaṭinissaggīti na sakkā hoti gahitaṃ nissajjāpetuṃ. Ettha ca kodhano hoti upanāhītiādinā puggalādhiṭṭhānanayena kodhūpanāhādayo akusaladhammā vivādamūlānīti dassitāni, tathā duṭṭhacittā vivadantītiādinā lobhadosamohā. Aduṭṭhacittā vivadantītiādinā ca alobhādayo vivādamūlānīti dassitāni.
217. д̣̇уб̣б̣ан̣н̣од̇и бам̣субисаажаго вияа жхаамакаан̣уван̣н̣о. д̣̇уд̣̇д̣̇ассигод̇и виж̇аад̇амаад̇уяааби аманаабад̣̇ассано. огодимагод̇и лагун̣д̣аго. гаан̣од̇и згагкигаан̣о ваа убхаяагкигаан̣о ваа. гун̣ийд̇и згахад̇т̇агун̣ий ваа убхаяахад̇т̇агун̣ий ваа. кан̃ж̇од̇и згабаад̣̇акан̃ж̇о ваа убхаяабаад̣̇акан̃ж̇о ваа. багкахад̇од̇и хад̇абагко бийтасаббий.
217.Dubbaṇṇoti paṃsupisācako viya jhāmakhāṇuvaṇṇo. Duddassikoti vijātamātuyāpi amanāpadassano. Okoṭimakoti lakuṇḍako. Kāṇoti ekakkhikāṇo vā ubhayakkhikāṇo vā. Kuṇīti ekahatthakuṇī vā ubhayahatthakuṇī vā. Khañjoti ekapādakhañjo vā ubhayapādakhañjo vā. Pakkhahatoti hatapakkho pīṭhasappī.
220. виваад̣̇аад̇хигаран̣ам̣ гусалам̣ агусалам̣ аб̣яаагад̇анд̇и виваад̣̇аад̇хигаран̣ам̣ гим̣ гусалам̣ агусалам̣ уд̣̇ааху аб̣яаагад̇анд̇и бужчад̇и. виваад̣̇аад̇хигаран̣ам̣ сияаа гусаланд̇иаад̣̇и виссаж̇ж̇анам̣. зса наяо сзсзсуби. вивад̣̇анд̇и зд̇знаад̇и виваад̣̇од̇и ааха ‘‘язна вивад̣̇анд̇и, со жид̇д̇уббаад̣̇о виваад̣̇о’’д̇и. гат̇ам̣ бана со жид̇д̇уббаад̣̇о ад̇хигаран̣ам̣ наамаад̇и ааха ‘‘самат̇зхи жа ад̇хигаран̣ийяад̇ааяа ад̇хигаран̣а’’нд̇и, самат̇зхи самзд̇аб̣б̣ад̇ааяа ад̇хигаран̣анд̇и ад̇т̇о. виваад̣̇ахзд̇убхууд̇асса хи жид̇д̇уббаад̣̇асса вуубасамзна д̇аббабхавасса сад̣̇д̣̇ассаби вуубасамо ход̇ийд̇и жид̇д̇уббаад̣̇асса самат̇зхи ад̇хигаран̣ийяад̇аа барияааяо самбхавад̇и.
220.Vivādādhikaraṇaṃ kusalaṃ akusalaṃ abyākatanti vivādādhikaraṇaṃ kiṃ kusalaṃ akusalaṃ udāhu abyākatanti pucchati. Vivādādhikaraṇaṃ siyā kusalantiādi vissajjanaṃ. Esa nayo sesesupi. Vivadanti etenāti vivādoti āha ‘‘yena vivadanti, so cittuppādo vivādo’’ti. Kathaṃ pana so cittuppādo adhikaraṇaṃ nāmāti āha ‘‘samathehi ca adhikaraṇīyatāya adhikaraṇa’’nti, samathehi sametabbatāya adhikaraṇanti attho. Vivādahetubhūtassa hi cittuppādassa vūpasamena tappabhavassa saddassapi vūpasamo hotīti cittuppādassa samathehi adhikaraṇīyatā pariyāyo sambhavati.
222. аабад̇д̇аад̇хигаран̣ам̣ сияаа агусалам̣ сияаа аб̣яаагад̇анд̇и аяам̣ вигаббо бан̃н̃ад̇д̇иваж̇ж̇ам̣язва санд̇хааяа вуд̇д̇о, на логаваж̇ж̇анд̇и д̣̇ассзд̇ум̣ ‘‘санд̇хааяабхаасид̇авасзнаа’’д̇иаад̣̇имааха. гасмаа банзд̇т̇а санд̇хааяабхаасид̇авасзна ад̇т̇о взд̣̇ид̇аб̣б̣од̇и ааха ‘‘яасмим̣ хий’’д̇иаад̣̇и. бат̇авийкан̣анаад̣̇игзд̇и зд̇т̇а аад̣̇и-сад̣̇д̣̇зна бхууд̇аг̇аамабаад̇аб̣яад̇аад̣̇ибан̃н̃ад̇д̇иваж̇ж̇ам̣ сигкаабад̣̇ам̣ сан̇г̇ан̣хаад̇и. яо винаяз абагад̇ан̃н̃уд̇ааяа вад̇д̇асийсзна саммун̃ж̇аниаад̣̇инаа бат̇авийкан̣анаад̣̇ийни гарод̇и, д̇ад̣̇аа д̇ассуббаннажид̇д̇ам̣ санд̇хааяа вуд̇д̇ам̣ ‘‘гусалажид̇д̇ам̣ ан̇г̇ам̣ ход̇ий’’д̇и. ан̇г̇ам̣ ход̇ийд̇и жа вад̇д̇асийсзна гаронд̇ассаби ‘‘имам̣ бат̇авим̣ кан̣аамий’’д̇иаад̣̇инаа вийд̇иггамаж̇аананавасзна бавад̇д̇ад̇д̇аа д̇ам̣ гусалажид̇д̇ам̣ аабад̇д̇аад̇хигаран̣ам̣, гусалажид̇д̇ам̣ аабад̇д̇ияаа гааран̣ам̣ ход̇ийд̇и ад̇т̇о. на хи вийд̇иггамам̣ аж̇аананд̇асса бат̇авийкан̣анаад̣̇ийсу аабад̇д̇и самбхавад̇и. д̇асмим̣ сад̇ийд̇и д̇асмим̣ гусалажид̇д̇з аабад̇д̇ибхаавзна г̇ахид̇з сад̇ийд̇и ад̇хиббааяо. д̇асмаад̇и яасмаа гусалажид̇д̇з аабад̇д̇ибхаавзна г̇ахид̇з сад̇и ‘‘над̇т̇и аабад̇д̇аад̇хигаран̣ам̣ гусала’’нд̇и на саггаа вад̇д̇ум̣, д̇асмаа. наяид̣̇ам̣ ан̇г̇аббахонагажид̇д̇ам̣ санд̇хааяа вуд̇д̇анд̇и ‘‘аабад̇д̇аад̇хигаран̣ам̣ сияаа агусалам̣ сияаа аб̣яаагад̇ам̣, над̇т̇и аабад̇д̇аад̇хигаран̣ам̣ гусала’’нд̇и ид̣̇ам̣ аабад̇д̇исамудтаабагабхаавзна ан̇г̇аббахонагам̣ аабад̇д̇ияаа гааран̣абхууд̇ам̣ жид̇д̇ам̣ санд̇хааяа на вуд̇д̇ам̣. гим̣ бана санд̇хааяа вуд̇д̇анд̇и ааха ‘‘ид̣̇ам̣ банаа’’д̇иаад̣̇и. бхигкумхи гаммадтаанаг̇ад̇ажид̇д̇зна нибаннз нид̣̇д̣̇ааяанд̇з ваа маад̇уг̇аамо жз сзяяам̣ габбзд̇и, д̇асмим̣ кан̣з сзяяаагаарзна вад̇д̇амаанаруубамзва аабад̇д̇и, на гусалаад̣̇ивасаббавад̇д̇ам̣ жид̇д̇анд̇и ааха ‘‘асан̃жижжа…бз… сахасзяяаад̣̇ивасзна аабаж̇ж̇ад̇о (бари. 323 ад̇т̇ад̇о самаанам̣) аб̣яаагад̇ам̣ ход̇ий’’д̇и. д̇асмин̃хи кан̣з удтаад̇аб̣б̣з ж̇аад̇з анудтаанад̇о д̇ад̣̇аагаарабавад̇д̇о руубагканд̇хова аабад̇д̇и.
222.Āpattādhikaraṇaṃ siyā akusalaṃ siyā abyākatanti ayaṃ vikappo paññattivajjaṃyeva sandhāya vutto, na lokavajjanti dassetuṃ ‘‘sandhāyabhāsitavasenā’’tiādimāha. Kasmā panettha sandhāyabhāsitavasena attho veditabboti āha ‘‘yasmiṃ hī’’tiādi. Pathavīkhaṇanādiketi ettha ādi-saddena bhūtagāmapātabyatādipaññattivajjaṃ sikkhāpadaṃ saṅgaṇhāti. Yo vinaye apakataññutāya vattasīsena sammuñjaniādinā pathavīkhaṇanādīni karoti, tadā tassuppannacittaṃ sandhāya vuttaṃ ‘‘kusalacittaṃ aṅgaṃ hotī’’ti. Aṅgaṃ hotīti ca vattasīsena karontassapi ‘‘imaṃ pathaviṃ khaṇāmī’’tiādinā vītikkamajānanavasena pavattattā taṃ kusalacittaṃ āpattādhikaraṇaṃ, kusalacittaṃ āpattiyā kāraṇaṃ hotīti attho. Na hi vītikkamaṃ ajānantassa pathavīkhaṇanādīsu āpatti sambhavati. Tasmiṃ satīti tasmiṃ kusalacitte āpattibhāvena gahite satīti adhippāyo. Tasmāti yasmā kusalacitte āpattibhāvena gahite sati ‘‘natthi āpattādhikaraṇaṃ kusala’’nti na sakkā vattuṃ, tasmā. Nayidaṃ aṅgappahonakacittaṃ sandhāya vuttanti ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti idaṃ āpattisamuṭṭhāpakabhāvena aṅgappahonakaṃ āpattiyā kāraṇabhūtaṃ cittaṃ sandhāya na vuttaṃ. Kiṃ pana sandhāya vuttanti āha ‘‘idaṃ panā’’tiādi. Bhikkhumhi kammaṭṭhānagatacittena nipanne niddāyante vā mātugāmo ce seyyaṃ kappeti, tasmiṃ khaṇe seyyākārena vattamānarūpameva āpatti, na kusalādivasappavattaṃ cittanti āha ‘‘asañcicca…pe… sahaseyyādivasena āpajjato (pari. 323 atthato samānaṃ) abyākataṃ hotī’’ti. Tasmiñhi khaṇe uṭṭhātabbe jāte anuṭṭhānato tadākārapavatto rūpakkhandhova āpatti.
‘‘аабад̇д̇им̣ аабаж̇ж̇анд̇о гусалажид̇д̇о ваа аабаж̇ж̇ад̇и агусалааб̣яаагад̇ажид̇д̇о ваа’’д̇и важанад̇о гусаламби аабад̇д̇аад̇хигаран̣ам̣ сияаад̇и жз? на. яо хи аабад̇д̇им̣ аабаж̇ж̇ад̇ийд̇и вужжад̇и, со д̇ийсу жид̇д̇зсу ан̃н̃ад̇аражид̇д̇асаман̇г̇ий худ̇ваа аабаж̇ж̇ад̇и, на ан̃н̃ат̇аад̇и д̣̇ассанад̇т̇ам̣ ‘‘гусалажид̇д̇о ваа’’д̇иаад̣̇и вуд̇д̇ам̣. аяан̃хзд̇т̇а ад̇т̇о – бат̇авийкан̣анаад̣̇ийсу гусалажид̇д̇агкан̣з вийд̇иггамаад̣̇ивасзна бавад̇д̇аруубасамбхавад̇о гусалажид̇д̇о ваа д̇ат̇аабавад̇д̇аруубасан̇каад̇ам̣ аб̣яаагад̇аабад̇д̇им̣ аабаж̇ж̇ад̇и, д̇ат̇аа аб̣яаагад̇ажид̇д̇о ваа аб̣яаагад̇аруубасан̇каад̇ам̣ аб̣яаагад̇аабад̇д̇им̣ аабаж̇ж̇ад̇и. баан̣аад̇ибаад̇аад̣̇им̣ агусалажид̇д̇о ваа агусалаабад̇д̇им̣ аабаж̇ж̇ад̇и, руубам̣ банзд̇т̇а аб̣б̣охааригам̣. субинанд̇з жа баан̣аад̇ибаад̇аад̣̇им̣ гаронд̇о сахасзяяаад̣̇ивасзна аабаж̇ж̇ид̇аб̣б̣аабад̇д̇им̣ аабаж̇ж̇анд̇о агусалажид̇д̇о аб̣яаагад̇аабад̇д̇им̣ аабаж̇ж̇ад̇ийд̇и.
‘‘Āpattiṃ āpajjanto kusalacitto vā āpajjati akusalābyākatacitto vā’’ti vacanato kusalampi āpattādhikaraṇaṃ siyāti ce? Na. Yo hi āpattiṃ āpajjatīti vuccati, so tīsu cittesu aññataracittasamaṅgī hutvā āpajjati, na aññathāti dassanatthaṃ ‘‘kusalacitto vā’’tiādi vuttaṃ. Ayañhettha attho – pathavīkhaṇanādīsu kusalacittakkhaṇe vītikkamādivasena pavattarūpasambhavato kusalacitto vā tathāpavattarūpasaṅkhātaṃ abyākatāpattiṃ āpajjati, tathā abyākatacitto vā abyākatarūpasaṅkhātaṃ abyākatāpattiṃ āpajjati. Pāṇātipātādiṃ akusalacitto vā akusalāpattiṃ āpajjati, rūpaṃ panettha abbohārikaṃ. Supinante ca pāṇātipātādiṃ karonto sahaseyyādivasena āpajjitabbāpattiṃ āpajjanto akusalacitto abyākatāpattiṃ āpajjatīti.
гусалажид̇д̇ам̣ аабаж̇ж̇зяяаад̇и зл̣агаломам̣ г̇ахзд̇ваа гаммадтаанаманасигаарзна д̇ияож̇анам̣ ад̇иггаманд̇асса бан̃н̃ад̇д̇им̣ аж̇аанид̇ваа бад̣̇асо д̇хаммам̣ ваажзнд̇асса жа аабаж̇ж̇ид̇аб̣б̣аабад̇д̇ияаа гусалажид̇д̇ам̣ аабаж̇ж̇зяяа. на жа д̇ад̇т̇а виж̇ж̇амаанамби гусалажид̇д̇ам̣ аабад̇д̇ияаа ан̇г̇анд̇и д̇асмим̣ виж̇ж̇амаанамби гусалажид̇д̇ам̣ аабад̇д̇ияаа ан̇г̇ам̣ на ход̇и, саяам̣ аабад̇д̇и на ход̇ийд̇и ад̇т̇о. жалид̇аббавад̇д̇аананд̇и жалид̇аанам̣ бавад̇д̇аанан̃жа. жалид̇о гааяо, бавад̇д̇аа ваажаа. ан̃н̃ад̇арамзва ан̇г̇анд̇и гааяаваажаанам̣ ан̃н̃ад̇арамзва аабад̇д̇ийд̇и ад̇т̇о. д̇ан̃жа руубагканд̇хабарияаабаннад̇д̇аа аб̣яаагад̇анд̇и иминаа аб̣яаагад̇амаабад̇д̇аад̇хигаран̣ам̣, наан̃н̃анд̇и д̣̇ассзд̇и.
Kusalacittaṃāpajjeyyāti eḷakalomaṃ gahetvā kammaṭṭhānamanasikārena tiyojanaṃ atikkamantassa paññattiṃ ajānitvā padaso dhammaṃ vācentassa ca āpajjitabbāpattiyā kusalacittaṃ āpajjeyya. Na ca tattha vijjamānampi kusalacittaṃ āpattiyā aṅganti tasmiṃ vijjamānampi kusalacittaṃ āpattiyā aṅgaṃ na hoti, sayaṃ āpatti na hotīti attho. Calitappavattānanti calitānaṃ pavattānañca. Calito kāyo, pavattā vācā. Aññatarameva aṅganti kāyavācānaṃ aññatarameva āpattīti attho. Tañca rūpakkhandhapariyāpannattā abyākatanti iminā abyākatamāpattādhikaraṇaṃ, nāññanti dasseti.
яад̣̇и звам̣ ‘‘саабад̇д̇игасса, бхигкавз, нираяам̣ ваа вад̣̇аами д̇иражчаанаяоним̣ ваа’’д̇и важанад̇о аб̣яаагад̇ассаби вибаагад̇хаммад̇аа аабаж̇ж̇зяяаад̇и? наабаж̇ж̇зяяа. асан̃жижжа аабаннаа хи аабад̇д̇ияо яаава со на ж̇аанаад̇и, д̇аава ананд̇арааяагараа, ж̇аанид̇ваа чаад̣̇знд̇о бана чаад̣̇анаббажжаяаа ан̃н̃ам̣ д̣̇уггадасан̇каад̇ам̣ агусаламаабад̇д̇аад̇хигаран̣амаабаж̇ж̇ад̇и, д̇ан̃жа агусаласабхаавад̇д̇аа саг̇г̇амогкаанам̣ анд̇арааяагаран̣анд̇и саабад̇д̇игасса абааяаг̇аамид̇аа вуд̇д̇аа. аб̣яаагад̇ам̣ бана аабад̇д̇аад̇хигаран̣ам̣ авибаагад̇хаммамзваад̇и нидтамзд̇т̇а г̇анд̇аб̣б̣ам̣. д̇знзва бораан̣аг̇ан̣тибад̣̇зсуби ‘‘бут̇уж̇ж̇ано галяаан̣абут̇уж̇ж̇ано сзгко арахаад̇и жад̇д̇ааро буг̇г̇алз д̣̇ассзд̇ваа д̇зсу арахад̇о аабад̇д̇аад̇хигаран̣ам̣ аб̣яаагад̇амзва, д̇ат̇аа сзгкаанам̣, д̇ат̇аа галяаан̣абут̇уж̇ж̇анасса асан̃жижжа вийд̇иггамагаалз аб̣яаагад̇амзва. ид̇арасса агусаламби ход̇и аб̣яаагад̇амби. яасмаа жасса сан̃жижжа вийд̇иггамагаалз агусаламзва ход̇и, д̇асмаа вуд̇д̇ам̣ ‘над̇т̇и аабад̇д̇аад̇хигаран̣ам̣ гусала’нд̇и. саб̣б̣ад̇т̇а звам̣ аб̣яаагад̇анд̇и вибаагаабхаавамад̇д̇ам̣ санд̇хааяа вуд̇д̇а’’нд̇и ликид̇ам̣. яан̃жа аабад̇д̇аад̇хигаран̣ам̣ агусалам̣, д̇амби д̣̇зсид̇ам̣ вудтид̇ам̣ ваа ананд̇арааяагарам̣. яат̇аа хи арияуубаваад̣̇агаммам̣ агусаламби самаанам̣ ажжаяам̣ д̣̇зсзд̇ваа камаабанзна баяог̇асамбад̇д̇ибадиб̣аахид̇ад̇д̇аа авибаагад̇хаммад̇ам̣ аабаннам̣ ахосигаммам̣ ход̇и, звамид̣̇амби д̣̇зсид̇ам̣ вудтид̇ам̣ ваа баяог̇асамбад̇д̇ибадиб̣аахид̇ад̇д̇аа авибаагад̇хаммад̇ааяа ахосигаммабхаавзна ананд̇арааяагарам̣ ж̇аад̇ам̣. д̇знзва ‘‘саабад̇д̇игасса, бхигкавз, нираяам̣ ваа вад̣̇аами д̇иражчаанаяоним̣ ваа’’д̇и саабад̇д̇игассзва абааяаг̇аамид̇аа вуд̇д̇аа.
Yadi evaṃ ‘‘sāpattikassa, bhikkhave, nirayaṃ vā vadāmi tiracchānayoniṃ vā’’ti vacanato abyākatassapi vipākadhammatā āpajjeyyāti? Nāpajjeyya. Asañcicca āpannā hi āpattiyo yāva so na jānāti, tāva anantarāyakarā, jānitvā chādento pana chādanappaccayā aññaṃ dukkaṭasaṅkhātaṃ akusalamāpattādhikaraṇamāpajjati, tañca akusalasabhāvattā saggamokkhānaṃ antarāyakaraṇanti sāpattikassa apāyagāmitā vuttā. Abyākataṃ pana āpattādhikaraṇaṃ avipākadhammamevāti niṭṭhamettha gantabbaṃ. Teneva porāṇagaṇṭhipadesupi ‘‘puthujjano kalyāṇaputhujjano sekkho arahāti cattāro puggale dassetvā tesu arahato āpattādhikaraṇaṃ abyākatameva, tathā sekkhānaṃ, tathā kalyāṇaputhujjanassa asañcicca vītikkamakāle abyākatameva. Itarassa akusalampi hoti abyākatampi. Yasmā cassa sañcicca vītikkamakāle akusalameva hoti, tasmā vuttaṃ ‘natthi āpattādhikaraṇaṃ kusala’nti. Sabbattha evaṃ abyākatanti vipākābhāvamattaṃ sandhāya vutta’’nti likhitaṃ. Yañca āpattādhikaraṇaṃ akusalaṃ, tampi desitaṃ vuṭṭhitaṃ vā anantarāyakaraṃ. Yathā hi ariyūpavādakammaṃ akusalampi samānaṃ accayaṃ desetvā khamāpanena payogasampattipaṭibāhitattā avipākadhammataṃ āpannaṃ ahosikammaṃ hoti, evamidampi desitaṃ vuṭṭhitaṃ vā payogasampattipaṭibāhitattā avipākadhammatāya ahosikammabhāvena anantarāyakaraṃ jātaṃ. Teneva ‘‘sāpattikassa, bhikkhave, nirayaṃ vā vadāmi tiracchānayoniṃ vā’’ti sāpattikasseva apāyagāmitā vuttā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / 8. ад̇хигаран̣ам̣ • 8. Adhikaraṇaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / ад̇хигаран̣агат̇аа • Adhikaraṇakathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / ад̇хигаран̣агат̇ааван̣н̣анаа • Adhikaraṇakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / ад̇хигаран̣агат̇ааван̣н̣анаа • Adhikaraṇakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 8. ад̇хигаран̣агат̇аа • 8. Adhikaraṇakathā
