| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
அதி⁴கரணனிதா³னாதி³வண்ணனா
Adhikaraṇanidānādivaṇṇanā
342. விவாதா³தி⁴கரணங் கிங்னிதா³னந்திஆதீ³ஸு கிங் நிதா³னமஸ்ஸாதி கிங்னிதா³னங். கோ ஸமுத³யோ அஸ்ஸாதி கிங்ஸமுத³யங். கா ஜாதி அஸ்ஸாதி கிங்ஜாதிகங். கோ பப⁴வோ அஸ்ஸாதி கிங்பப⁴வங். கோ ஸம்பா⁴ரோ அஸ்ஸாதி கிங்ஸம்பா⁴ரங். கிங் ஸமுட்டா²னங் அஸ்ஸாதி கிங்ஸமுட்டா²னங். ஸப்³பா³னேதானி காரணவேவசனானியேவ.
342.Vivādādhikaraṇaṃ kiṃnidānantiādīsu kiṃ nidānamassāti kiṃnidānaṃ. Ko samudayo assāti kiṃsamudayaṃ. Kā jāti assāti kiṃjātikaṃ. Ko pabhavo assāti kiṃpabhavaṃ. Ko sambhāro assāti kiṃsambhāraṃ. Kiṃ samuṭṭhānaṃ assāti kiṃsamuṭṭhānaṃ. Sabbānetāni kāraṇavevacanāniyeva.
விவாத³னிதா³னந்திஆதீ³ஸுபி அட்டா²ரஸபே⁴த³கரவத்து²ஸங்கா²தோ விவாதோ³ நிதா³னமேதஸ்ஸாதி விவாத³னிதா³னங். விவாத³ங் நிஸ்ஸாய உப்பஜ்ஜனகவிவாத³வஸேனேதங் வுத்தங். அனுவாதோ³ நிதா³னங் அஸ்ஸாதி அனுவாத³னிதா³னங் . இத³ம்பி அனுவாத³ங் நிஸ்ஸாய உப்பஜ்ஜனகஅனுவாத³வஸேன வுத்தங். ஆபத்தி நிதா³னங் அஸ்ஸாதி ஆபத்தினிதா³னங். ஆபத்தாதி⁴கரணபச்சயா சதஸ்ஸோ ஆபத்தியோ ஆபஜ்ஜதீதி ஏவங் ஆபத்திங் நிஸ்ஸாய உப்பஜ்ஜனகஆபத்திவஸேனேதங் வுத்தங். கிச்சயங் நிதா³னமஸ்ஸாதி கிச்சயனிதா³னங்; சதுப்³பி³த⁴ங் ஸங்க⁴கம்மங் காரணமஸ்ஸாதி அத்தோ². உக்கி²த்தானுவத்திகாய பி⁴க்கு²னியா யாவததியங் ஸமனுபா⁴ஸனாதீ³னங் கிச்சங் நிஸ்ஸாய உப்பஜ்ஜனககிச்சானங் வஸேனேதங் வுத்தங். அயங் சதுன்னம்பி அதி⁴கரணானங் விஸ்ஸஜ்ஜனபக்கே² ஏகபத³யோஜனா. ஏதேனானுஸாரேன ஸப்³ப³பதா³னி யோஜேதப்³பா³னி.
Vivādanidānantiādīsupi aṭṭhārasabhedakaravatthusaṅkhāto vivādo nidānametassāti vivādanidānaṃ. Vivādaṃ nissāya uppajjanakavivādavasenetaṃ vuttaṃ. Anuvādo nidānaṃ assāti anuvādanidānaṃ. Idampi anuvādaṃ nissāya uppajjanakaanuvādavasena vuttaṃ. Āpatti nidānaṃ assāti āpattinidānaṃ. Āpattādhikaraṇapaccayā catasso āpattiyo āpajjatīti evaṃ āpattiṃ nissāya uppajjanakaāpattivasenetaṃ vuttaṃ. Kiccayaṃ nidānamassāti kiccayanidānaṃ; catubbidhaṃ saṅghakammaṃ kāraṇamassāti attho. Ukkhittānuvattikāya bhikkhuniyā yāvatatiyaṃ samanubhāsanādīnaṃ kiccaṃ nissāya uppajjanakakiccānaṃ vasenetaṃ vuttaṃ. Ayaṃ catunnampi adhikaraṇānaṃ vissajjanapakkhe ekapadayojanā. Etenānusārena sabbapadāni yojetabbāni.
து³தியபுச்சா²ய ஹேதுனிதா³னந்திஆதி³ம்ஹி விஸ்ஸஜ்ஜனே நவன்னங் குஸலாகுஸலாப்³யாகதஹேதூனங் வஸேன ஹேதுனிதா³னாதி³தா வேதி³தப்³பா³. ததியபுச்சா²ய விஸ்ஸஜ்ஜனே ப்³யஞ்ஜனமத்தங் நானங். ஹேதுயேவ ஹி எத்த² பச்சயோதி வுத்தோ.
Dutiyapucchāya hetunidānantiādimhi vissajjane navannaṃ kusalākusalābyākatahetūnaṃ vasena hetunidānāditā veditabbā. Tatiyapucchāya vissajjane byañjanamattaṃ nānaṃ. Hetuyeva hi ettha paccayoti vutto.
343. மூலபுச்சா²ய விஸ்ஸஜ்ஜனே த்³வாத³ஸ மூலானீதி கோத⁴உபனாஹயுக³ளகாதீ³னி ச² விவாதா³மூலானி, லோப⁴தோ³ஸமோஹா தயோ, அலோபா⁴தோ³ஸாமோஹா தயோதி இமானி அஜ்ஜ²த்தஸந்தானப்பவத்தானி த்³வாத³ஸ மூலானி. சுத்³த³ஸ மூலானீதி தானேவ த்³வாத³ஸ காயவாசாஹி ஸத்³தி⁴ங் சுத்³த³ஸ ஹொந்தி. ச² மூலானீதி காயாதீ³னி ச² ஸமுட்டா²னானி.
343. Mūlapucchāya vissajjane dvādasa mūlānīti kodhaupanāhayugaḷakādīni cha vivādāmūlāni, lobhadosamohā tayo, alobhādosāmohā tayoti imāni ajjhattasantānappavattāni dvādasa mūlāni. Cuddasa mūlānīti tāneva dvādasa kāyavācāhi saddhiṃ cuddasa honti. Cha mūlānīti kāyādīni cha samuṭṭhānāni.
ஸமுட்டா²னபுச்சா²ய விஸ்ஸஜ்ஜனே அட்டா²ரஸ பே⁴த³கரவத்தூ²னி ஸமுட்டா²னானி, தஞ்ஹி ஏதேஸு அட்டா²ரஸஸு பே⁴த³கரவத்தூ²ஸு ஸமுட்டா²தி, ஏதேஹி வா காரணபூ⁴தேஹி ஸமுட்டா²தி. தேனஸ்ஸேதானி ஸமுட்டா²னானி வுச்சந்தி. ஏஸ நயோ ஸப்³ப³த்த².
Samuṭṭhānapucchāya vissajjane aṭṭhārasa bhedakaravatthūni samuṭṭhānāni, tañhi etesu aṭṭhārasasu bhedakaravatthūsu samuṭṭhāti, etehi vā kāraṇabhūtehi samuṭṭhāti. Tenassetāni samuṭṭhānāni vuccanti. Esa nayo sabbattha.
344. விவாதா³தி⁴கரணங் ஆபத்தீதிஆதி³பே⁴தே³ ஏகேன அதி⁴கரணேன கிச்சாதி⁴கரணேனாதி இத³ங் யேன அதி⁴கரணேன ஸம்மந்தி, தங் த³ஸ்ஸேதுங் வுத்தங், ந பனேதானி ஏகங்ஸதோ கிச்சாதி⁴கரணேனேவ ஸம்மந்தி. ந ஹி புக்³க³லஸ்ஸ ஸந்திகே தே³ஸெந்தஸ்ஸ கிச்சாதி⁴கரணங் நாம அத்தி².
344.Vivādādhikaraṇaṃ āpattītiādibhede ekena adhikaraṇena kiccādhikaraṇenāti idaṃ yena adhikaraṇena sammanti, taṃ dassetuṃ vuttaṃ, na panetāni ekaṃsato kiccādhikaraṇeneva sammanti. Na hi puggalassa santike desentassa kiccādhikaraṇaṃ nāma atthi.
ந கதமேன ஸமதே²னாதி ஸாவஸேஸாபத்தி விய ந ஸம்மதி. ந ஹி ஸக்கா ஸா தே³ஸேதுங், ந ததோ வுட்டா²ய ஸுத்³த⁴ந்தே பதிட்டா²துங்.
Na katamena samathenāti sāvasesāpatti viya na sammati. Na hi sakkā sā desetuṃ, na tato vuṭṭhāya suddhante patiṭṭhātuṃ.
348. விவாதா³தி⁴கரணங் ஹோதி அனுவாதா³தி⁴கரணந்திஆதி³ நயோ உத்தானோயேவ.
348.Vivādādhikaraṇaṃ hoti anuvādādhikaraṇantiādi nayo uttānoyeva.
349. ததோ பரங் யத்த² ஸதிவினயோதிஆதி³கா ஸம்முகா²வினயங் அமுஞ்சித்வா ச² யமகபுச்சா² வுத்தா, தாஸங் விஸ்ஸஜ்ஜனேனேவ அத்தோ² பகாஸிதோ.
349. Tato paraṃ yattha sativinayotiādikā sammukhāvinayaṃ amuñcitvā cha yamakapucchā vuttā, tāsaṃ vissajjaneneva attho pakāsito.
351. ஸங்ஸட்டா²தி³புச்சா²னங் விஸ்ஸஜ்ஜனே ஸங்ஸட்டா²தி ஸதிவினயகம்மவாசாக்க²ணஸ்மிங்யேவ த்³வின்னம்பி ஸமதா²னங் ஸித்³த⁴த்தா ஸம்முகா²வினயோதி வா ஸதிவினயோதி வா இமே த⁴ம்மா ஸங்ஸட்டா², நோ விஸங்ஸட்டா². யஸ்மா பன கத³லிக்க²ந்தே⁴ பத்தவட்டீனங் விய ந ஸக்கா தேஸங் வினிப்³பு⁴ஜித்வா நானாகரணங் த³ஸ்ஸேதுங், தேன வுத்தங் ‘‘ந ச லப்³பா⁴ இமேஸங் த⁴ம்மானங் வினிப்³பு⁴ஜித்வா வினிப்³பு⁴ஜித்வா நானாகரணங் பஞ்ஞாபேது’’ந்தி. ஏஸ நயோ ஸப்³ப³த்த².
351. Saṃsaṭṭhādipucchānaṃ vissajjane saṃsaṭṭhāti sativinayakammavācākkhaṇasmiṃyeva dvinnampi samathānaṃ siddhattā sammukhāvinayoti vā sativinayoti vā ime dhammā saṃsaṭṭhā, no visaṃsaṭṭhā. Yasmā pana kadalikkhandhe pattavaṭṭīnaṃ viya na sakkā tesaṃ vinibbhujitvā nānākaraṇaṃ dassetuṃ, tena vuttaṃ ‘‘na ca labbhā imesaṃ dhammānaṃ vinibbhujitvā vinibbhujitvā nānākaraṇaṃ paññāpetu’’nti. Esa nayo sabbattha.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
2. அதி⁴கரணனிதா³னாதி³ • 2. Adhikaraṇanidānādi
3. அதி⁴கரணமூலாதி³ • 3. Adhikaraṇamūlādi
4. அதி⁴கரணபச்சயாபத்தி • 4. Adhikaraṇapaccayāpatti
5. அதி⁴கரணாதி⁴ப்பாயோ • 5. Adhikaraṇādhippāyo
6. புச்சா²வாரோ • 6. Pucchāvāro
8. ஸங்ஸட்ட²வாரோ • 8. Saṃsaṭṭhavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணபே⁴த³வண்ணனா • Adhikaraṇabhedavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / அதி⁴கரணனிதா³னாதி³வண்ணனா • Adhikaraṇanidānādivaṇṇanā
