| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
அதி⁴கரணனிதா³னாதி³வண்ணனா
Adhikaraṇanidānādivaṇṇanā
342. கிங்னிதா³னந்திஆதீ³ஸு ச²ஸு பதே³ஸு ஸமாஸபா⁴வங் த³ஸ்ஸெந்தோ ஆஹ ‘‘கிங்னிதா³னமஸ்ஸா’’திஆதி³. அஸ்ஸாதி விவாதா³தி⁴கரணஸ்ஸ. ‘‘கிங்னிதா³ன’’ந்தி பதா³னங் ஸதிபி ஸமாஸபா⁴வே ப்³யஞ்ஜனந்தபகதிகத்தா ‘‘கி’’ந்தி நிக்³க³ஹிதந்தபா⁴வேன உச்சாரணங் காதப்³ப³ங். ஸப்³பா³னேதானீதி ஸப்³பா³னி நிதா³னந்திஆதீ³னி ஏதானி பதா³னி. வேவசனானீதி ஏகஸ்மிங்யேவ ‘‘காரண’’ந்தி அத்தே² விவிதா⁴னி வசனானி விவசனானி, தானியேவ வேவசனானி. அத² வா விவித⁴ங் வசனமேதஸ்ஸத்த²ஸ்ஸாதி விவசனங், காரணஸங்கா²தோ அத்தோ², அபி⁴தெ⁴ய்யஅபி⁴தா⁴னபா⁴வேன ஸம்ப³ந்த⁴த்தா விவசனஸ்ஸ ஏதானி வேவசனானி, பதா³னி.
342.Kiṃnidānantiādīsu chasu padesu samāsabhāvaṃ dassento āha ‘‘kiṃnidānamassā’’tiādi. Assāti vivādādhikaraṇassa. ‘‘Kiṃnidāna’’nti padānaṃ satipi samāsabhāve byañjanantapakatikattā ‘‘ki’’nti niggahitantabhāvena uccāraṇaṃ kātabbaṃ. Sabbānetānīti sabbāni nidānantiādīni etāni padāni. Vevacanānīti ekasmiṃyeva ‘‘kāraṇa’’nti atthe vividhāni vacanāni vivacanāni, tāniyeva vevacanāni. Atha vā vividhaṃ vacanametassatthassāti vivacanaṃ, kāraṇasaṅkhāto attho, abhidheyyaabhidhānabhāvena sambandhattā vivacanassa etāni vevacanāni, padāni.
‘‘அட்டா²ரஸபே⁴த³கரவத்து²ஸங்கா²தோ’’தி இமினா விவாத³ஸரூபங் த³ஸ்ஸேதி. விவாத³ந்தி அட்டா²ரஸபே⁴த³கரவத்து²ஸங்கா²தங் விவாத³ங். ஏதந்தி ‘‘விவாத³னிதா³ன’’ந்தி ஏதங் வசனங். அஸ்ஸாதி அனுவாதா³தி⁴கரணஸ்ஸ. இத³ம்பீதி ‘‘அனுவாத³னிதா³ன’’ந்தி வசனம்பி. அஸ்ஸாதி ஆபத்தாதி⁴கரணஸ்ஸ. ஏதந்தி ‘‘ஆபத்தினிதா³ன’’ந்தி வசனங். கிச்சமேவ ப்³யஞ்ஜனவட்³ட⁴னவஸேன கிச்சயந்தி வுத்தங். அஸ்ஸாதி கிச்சாதி⁴கரணஸ்ஸ. ஸமனுபா⁴ஸனாதீ³னங் உப்பஜ்ஜனககிச்சானந்தி ஸம்ப³ந்தோ⁴. ஏதந்தி ‘‘கிச்சயனிதா³ன’’ந்தி வசனங். ஏகபத³யோஜனாதி ஏகேன ‘‘நிதா³ன’’ந்தி பதே³ன யோஜனா. ஸப்³ப³பதா³னீதி ஸப்³பா³னி ஸமுத³யாதீ³னி பதா³னி.
‘‘Aṭṭhārasabhedakaravatthusaṅkhāto’’ti iminā vivādasarūpaṃ dasseti. Vivādanti aṭṭhārasabhedakaravatthusaṅkhātaṃ vivādaṃ. Etanti ‘‘vivādanidāna’’nti etaṃ vacanaṃ. Assāti anuvādādhikaraṇassa. Idampīti ‘‘anuvādanidāna’’nti vacanampi. Assāti āpattādhikaraṇassa. Etanti ‘‘āpattinidāna’’nti vacanaṃ. Kiccameva byañjanavaḍḍhanavasena kiccayanti vuttaṃ. Assāti kiccādhikaraṇassa. Samanubhāsanādīnaṃ uppajjanakakiccānanti sambandho. Etanti ‘‘kiccayanidāna’’nti vacanaṃ. Ekapadayojanāti ekena ‘‘nidāna’’nti padena yojanā. Sabbapadānīti sabbāni samudayādīni padāni.
நவன்னந்தி ஜாதிவஸேன ச²ன்னங் ஹேதூனங் நவஸு அந்தோக³த⁴த்தா திகவஸேனேதங் வுத்தங். ப்³யஞ்ஜனமத்தந்தி ஹேதுபச்சயவஸேன ப்³யஞ்ஜனமேவ. ஹீதி ஸச்சங், யஸ்மா வா. எத்தா²தி ததியபுச்சா²விஸ்ஸஜ்ஜனே.
Navannanti jātivasena channaṃ hetūnaṃ navasu antogadhattā tikavasenetaṃ vuttaṃ. Byañjanamattanti hetupaccayavasena byañjanameva. Hīti saccaṃ, yasmā vā. Etthāti tatiyapucchāvissajjane.
343. த்³வாத³ஸ மூலானீதி எத்த² த்³வாத³ஸன்னங் மூலானங் ஸரூபங் த³ஸ்ஸெந்தோ ஆஹ ‘‘கோத⁴உபனாஹயுக³ளகாதீ³னீ’’திஆதி³ . எத்த² (விப⁴॰ 833, 944) ஆதி³ஸத்³தே³ன மக்க²பளாஸயுக³ள இஸ்ஸாமச்ச²ரியயுக³ள மாயாஸாடெ²ய்யயுக³ள பாபிச்ச²மிச்சா²தி³ட்டி²யுக³ள ஸந்தி³ட்டி²பராமாஸிஆதா⁴னக்³கா³ஹிது³ப்படினிஸ்ஸக்³கி³யுக³ளவஸேன பஞ்ச யுக³ளானி ஸங்க³ண்ஹாதி. அஜ்ஜ²த்தஸந்தானப்பவத்தானீதி நியகஜ்ஜ²த்தஸந்தானே பவத்தானி.
343.Dvādasa mūlānīti ettha dvādasannaṃ mūlānaṃ sarūpaṃ dassento āha ‘‘kodhaupanāhayugaḷakādīnī’’tiādi . Ettha (vibha. 833, 944) ādisaddena makkhapaḷāsayugaḷa issāmacchariyayugaḷa māyāsāṭheyyayugaḷa pāpicchamicchādiṭṭhiyugaḷa sandiṭṭhiparāmāsiādhānaggāhiduppaṭinissaggiyugaḷavasena pañca yugaḷāni saṅgaṇhāti. Ajjhattasantānappavattānīti niyakajjhattasantāne pavattāni.
அட்டா²ரஸபே⁴த³கரவத்தூ²னங் ஸமுட்டா²னபா⁴வங் நிப்³ப³சனேன பகாஸெந்தோ ஆஹ ‘‘தங் ஹீ’’திஆதி³. தந்தி அனுவாதா³தி⁴கரணங், ஸமுட்டா²தீதி ஸம்ப³ந்தோ⁴. எத்த² ச ‘‘ஏதேஸூ’’தி இமினா அதி⁴கரணபா⁴வங் த³ஸ்ஸேதி. ‘‘ஏதேஹீ’’தி இமினா கரணபா⁴வங் த³ஸ்ஸேதி. தேனாதி காரணேன. அஸ்ஸாதி விவாதா³தி⁴கரணஸ்ஸ. ஏதானீதி அட்டா²ரஸபே⁴த³கரவத்தூ²னி. ஸப்³ப³த்தா²தி ஸப்³பே³ஸங் அதி⁴கரணானங் ஸப்³பே³ஸு ஸமுட்டா²னேஸு.
Aṭṭhārasabhedakaravatthūnaṃ samuṭṭhānabhāvaṃ nibbacanena pakāsento āha ‘‘taṃ hī’’tiādi. Tanti anuvādādhikaraṇaṃ, samuṭṭhātīti sambandho. Ettha ca ‘‘etesū’’ti iminā adhikaraṇabhāvaṃ dasseti. ‘‘Etehī’’ti iminā karaṇabhāvaṃ dasseti. Tenāti kāraṇena. Assāti vivādādhikaraṇassa. Etānīti aṭṭhārasabhedakaravatthūni. Sabbatthāti sabbesaṃ adhikaraṇānaṃ sabbesu samuṭṭhānesu.
344. ஏகேன அதி⁴கரணேன கிச்சாதி⁴கரணேனாதி இத³ங் வுத்தந்தி ஸம்ப³ந்தோ⁴. ஏதானீதி அதி⁴கரணானி. ஏகங்ஸதோதி ஏகங்ஸேன, ஏககொட்டா²ஸேனாதி அத்தோ². ஹீதி ஸச்சங், யஸ்மா வா.
344. Ekena adhikaraṇena kiccādhikaraṇenāti idaṃ vuttanti sambandho. Etānīti adhikaraṇāni. Ekaṃsatoti ekaṃsena, ekakoṭṭhāsenāti attho. Hīti saccaṃ, yasmā vā.
ஸாவஸேஸாபத்தி ஸம்மதி விய அனவஸேஸாபத்தி ந ஸம்மதீதி யோஜனா. கஸ்மா ந ஸம்மதீதி ஆஹ ‘‘ந ஹீ’’திஆதி³. ஹீதி யஸ்மா. ஸாதி அனவஸேஸா ஆபத்தி. ததோதி அனவஸேஸாபத்திதோ. எத்த² ச ‘‘ந ஸக்கா தே³ஸேது’’ந்தி இமினா தே³ஸனாகா³மினியா அபா⁴வங் தீ³பேதி. ‘‘ந ஸக்கா…பே॰… பதிட்டா²து’’ந்தி இமினா வுட்டா²னகா³மினியா அபா⁴வங் தீ³பேதி.
Sāvasesāpatti sammati viya anavasesāpatti na sammatīti yojanā. Kasmā na sammatīti āha ‘‘na hī’’tiādi. Hīti yasmā. Sāti anavasesā āpatti. Tatoti anavasesāpattito. Ettha ca ‘‘na sakkā desetu’’nti iminā desanāgāminiyā abhāvaṃ dīpeti. ‘‘Na sakkā…pe… patiṭṭhātu’’nti iminā vuṭṭhānagāminiyā abhāvaṃ dīpeti.
349. ததோதி நயதோ. யத்த² ஸதிவினயோதிஆதி³கா ச² யமகபுச்சா²தி ஸம்ப³ந்தோ⁴. தாஸந்தி புச்சா²னங். பகாஸிதோதி பாகடோ.
349.Tatoti nayato. Yattha sativinayotiādikā cha yamakapucchāti sambandho. Tāsanti pucchānaṃ. Pakāsitoti pākaṭo.
351. த்³வின்னம்பி ஸமதா²னந்தி ஸம்முகா²வினயஸதிவினயவஸேன த்³வின்னம்பி ஸமதா²னங். யஸ்மாதி யேன காரணேன ந ஸக்காதி ஸம்ப³ந்தோ⁴. பத்தவட்டீனங் நானாகரணந்தி ஸம்ப³ந்தோ⁴. தேஸந்தி ஸம்முகா²வினயஸதிவினயானங் நானாகரணந்தி ஸம்ப³ந்தோ⁴. அயங் பனெத்த² யோஜனா – யஸ்மா கத³லிக்க²ந்தே⁴ பத்தவட்டீனங் நானாகரணங் வினிப்³பு⁴ஜ்ஜித்வா த³ஸ்ஸேதுங் ந ஸக்கா விய தேஸங் நானாகரணங் வினிப்³பு⁴ஜ்ஜித்வா த³ஸ்ஸேதுங் ந ஸக்காதி. தேனாதி காரணேன. ஸப்³ப³த்தா²தி ஸப்³பே³ஸு விஸ்ஸஜ்ஜனேஸு.
351.Dvinnampi samathānanti sammukhāvinayasativinayavasena dvinnampi samathānaṃ. Yasmāti yena kāraṇena na sakkāti sambandho. Pattavaṭṭīnaṃ nānākaraṇanti sambandho. Tesanti sammukhāvinayasativinayānaṃ nānākaraṇanti sambandho. Ayaṃ panettha yojanā – yasmā kadalikkhandhe pattavaṭṭīnaṃ nānākaraṇaṃ vinibbhujjitvā dassetuṃ na sakkā viya tesaṃ nānākaraṇaṃ vinibbhujjitvā dassetuṃ na sakkāti. Tenāti kāraṇena. Sabbatthāti sabbesu vissajjanesu.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi
2. அதி⁴கரணனிதா³னாதி³ • 2. Adhikaraṇanidānādi
3. அதி⁴கரணமூலாதி³ • 3. Adhikaraṇamūlādi
4. அதி⁴கரணபச்சயாபத்தி • 4. Adhikaraṇapaccayāpatti
6. புச்சா²வாரோ • 6. Pucchāvāro
8. ஸங்ஸட்ட²வாரோ • 8. Saṃsaṭṭhavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணபே⁴த³வண்ணனா • Adhikaraṇabhedavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
