| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
অধিকরণনিদানাদিৰণ্ণনা
Adhikaraṇanidānādivaṇṇanā
৩৪২. ৰিৰাদাধিকরণং কিংনিদানন্তিআদীসু কিং নিদানমস্সাতি কিংনিদানং। কো সমুদযো অস্সাতি কিংসমুদযং। কা জাতি অস্সাতি কিংজাতিকং। কো পভৰো অস্সাতি কিংপভৰং। কো সম্ভারো অস্সাতি কিংসম্ভারং। কিং সমুট্ঠানং অস্সাতি কিংসমুট্ঠানং। সব্বানেতানি কারণৰেৰচনানিযেৰ।
342.Vivādādhikaraṇaṃ kiṃnidānantiādīsu kiṃ nidānamassāti kiṃnidānaṃ. Ko samudayo assāti kiṃsamudayaṃ. Kā jāti assāti kiṃjātikaṃ. Ko pabhavo assāti kiṃpabhavaṃ. Ko sambhāro assāti kiṃsambhāraṃ. Kiṃ samuṭṭhānaṃ assāti kiṃsamuṭṭhānaṃ. Sabbānetāni kāraṇavevacanāniyeva.
ৰিৰাদনিদানন্তিআদীসুপি অট্ঠারসভেদকরৰত্থুসঙ্খাতো ৰিৰাদো নিদানমেতস্সাতি ৰিৰাদনিদানং। ৰিৰাদং নিস্সায উপ্পজ্জনকৰিৰাদৰসেনেতং ৰুত্তং। অনুৰাদো নিদানং অস্সাতি অনুৰাদনিদানং । ইদম্পি অনুৰাদং নিস্সায উপ্পজ্জনকঅনুৰাদৰসেন ৰুত্তং। আপত্তি নিদানং অস্সাতি আপত্তিনিদানং। আপত্তাধিকরণপচ্চযা চতস্সো আপত্তিযো আপজ্জতীতি এৰং আপত্তিং নিস্সায উপ্পজ্জনকআপত্তিৰসেনেতং ৰুত্তং। কিচ্চযং নিদানমস্সাতি কিচ্চযনিদানং; চতুব্বিধং সঙ্ঘকম্মং কারণমস্সাতি অত্থো। উক্খিত্তানুৰত্তিকায ভিক্খুনিযা যাৰততিযং সমনুভাসনাদীনং কিচ্চং নিস্সায উপ্পজ্জনককিচ্চানং ৰসেনেতং ৰুত্তং। অযং চতুন্নম্পি অধিকরণানং ৰিস্সজ্জনপক্খে একপদযোজনা। এতেনানুসারেন সব্বপদানি যোজেতব্বানি।
Vivādanidānantiādīsupi aṭṭhārasabhedakaravatthusaṅkhāto vivādo nidānametassāti vivādanidānaṃ. Vivādaṃ nissāya uppajjanakavivādavasenetaṃ vuttaṃ. Anuvādo nidānaṃ assāti anuvādanidānaṃ. Idampi anuvādaṃ nissāya uppajjanakaanuvādavasena vuttaṃ. Āpatti nidānaṃ assāti āpattinidānaṃ. Āpattādhikaraṇapaccayā catasso āpattiyo āpajjatīti evaṃ āpattiṃ nissāya uppajjanakaāpattivasenetaṃ vuttaṃ. Kiccayaṃ nidānamassāti kiccayanidānaṃ; catubbidhaṃ saṅghakammaṃ kāraṇamassāti attho. Ukkhittānuvattikāya bhikkhuniyā yāvatatiyaṃ samanubhāsanādīnaṃ kiccaṃ nissāya uppajjanakakiccānaṃ vasenetaṃ vuttaṃ. Ayaṃ catunnampi adhikaraṇānaṃ vissajjanapakkhe ekapadayojanā. Etenānusārena sabbapadāni yojetabbāni.
দুতিযপুচ্ছায হেতুনিদানন্তিআদিম্হি ৰিস্সজ্জনে নৰন্নং কুসলাকুসলাব্যাকতহেতূনং ৰসেন হেতুনিদানাদিতা ৰেদিতব্বা। ততিযপুচ্ছায ৰিস্সজ্জনে ব্যঞ্জনমত্তং নানং। হেতুযেৰ হি এত্থ পচ্চযোতি ৰুত্তো।
Dutiyapucchāya hetunidānantiādimhi vissajjane navannaṃ kusalākusalābyākatahetūnaṃ vasena hetunidānāditā veditabbā. Tatiyapucchāya vissajjane byañjanamattaṃ nānaṃ. Hetuyeva hi ettha paccayoti vutto.
৩৪৩. মূলপুচ্ছায ৰিস্সজ্জনে দ্ৰাদস মূলানীতি কোধউপনাহযুগল়কাদীনি ছ ৰিৰাদামূলানি, লোভদোসমোহা তযো, অলোভাদোসামোহা তযোতি ইমানি অজ্ঝত্তসন্তানপ্পৰত্তানি দ্ৰাদস মূলানি। চুদ্দস মূলানীতি তানেৰ দ্ৰাদস কাযৰাচাহি সদ্ধিং চুদ্দস হোন্তি। ছ মূলানীতি কাযাদীনি ছ সমুট্ঠানানি।
343. Mūlapucchāya vissajjane dvādasa mūlānīti kodhaupanāhayugaḷakādīni cha vivādāmūlāni, lobhadosamohā tayo, alobhādosāmohā tayoti imāni ajjhattasantānappavattāni dvādasa mūlāni. Cuddasa mūlānīti tāneva dvādasa kāyavācāhi saddhiṃ cuddasa honti. Cha mūlānīti kāyādīni cha samuṭṭhānāni.
সমুট্ঠানপুচ্ছায ৰিস্সজ্জনে অট্ঠারস ভেদকরৰত্থূনি সমুট্ঠানানি, তঞ্হি এতেসু অট্ঠারসসু ভেদকরৰত্থূসু সমুট্ঠাতি, এতেহি ৰা কারণভূতেহি সমুট্ঠাতি। তেনস্সেতানি সমুট্ঠানানি ৰুচ্চন্তি। এস নযো সব্বত্থ।
Samuṭṭhānapucchāya vissajjane aṭṭhārasa bhedakaravatthūni samuṭṭhānāni, tañhi etesu aṭṭhārasasu bhedakaravatthūsu samuṭṭhāti, etehi vā kāraṇabhūtehi samuṭṭhāti. Tenassetāni samuṭṭhānāni vuccanti. Esa nayo sabbattha.
৩৪৪. ৰিৰাদাধিকরণং আপত্তীতিআদিভেদে একেন অধিকরণেন কিচ্চাধিকরণেনাতি ইদং যেন অধিকরণেন সম্মন্তি, তং দস্সেতুং ৰুত্তং, ন পনেতানি একংসতো কিচ্চাধিকরণেনেৰ সম্মন্তি। ন হি পুগ্গলস্স সন্তিকে দেসেন্তস্স কিচ্চাধিকরণং নাম অত্থি।
344.Vivādādhikaraṇaṃ āpattītiādibhede ekena adhikaraṇena kiccādhikaraṇenāti idaṃ yena adhikaraṇena sammanti, taṃ dassetuṃ vuttaṃ, na panetāni ekaṃsato kiccādhikaraṇeneva sammanti. Na hi puggalassa santike desentassa kiccādhikaraṇaṃ nāma atthi.
ন কতমেন সমথেনাতি সাৰসেসাপত্তি ৰিয ন সম্মতি। ন হি সক্কা সা দেসেতুং, ন ততো ৰুট্ঠায সুদ্ধন্তে পতিট্ঠাতুং।
Na katamena samathenāti sāvasesāpatti viya na sammati. Na hi sakkā sā desetuṃ, na tato vuṭṭhāya suddhante patiṭṭhātuṃ.
৩৪৮. ৰিৰাদাধিকরণং হোতি অনুৰাদাধিকরণন্তিআদি নযো উত্তানোযেৰ।
348.Vivādādhikaraṇaṃ hoti anuvādādhikaraṇantiādi nayo uttānoyeva.
৩৪৯. ততো পরং যত্থ সতিৰিনযোতিআদিকা সম্মুখাৰিনযং অমুঞ্চিত্ৰা ছ যমকপুচ্ছা ৰুত্তা, তাসং ৰিস্সজ্জনেনেৰ অত্থো পকাসিতো।
349. Tato paraṃ yattha sativinayotiādikā sammukhāvinayaṃ amuñcitvā cha yamakapucchā vuttā, tāsaṃ vissajjaneneva attho pakāsito.
৩৫১. সংসট্ঠাদিপুচ্ছানং ৰিস্সজ্জনে সংসট্ঠাতি সতিৰিনযকম্মৰাচাক্খণস্মিংযেৰ দ্ৰিন্নম্পি সমথানং সিদ্ধত্তা সম্মুখাৰিনযোতি ৰা সতিৰিনযোতি ৰা ইমে ধম্মা সংসট্ঠা, নো ৰিসংসট্ঠা। যস্মা পন কদলিক্খন্ধে পত্তৰট্টীনং ৰিয ন সক্কা তেসং ৰিনিব্ভুজিত্ৰা নানাকরণং দস্সেতুং, তেন ৰুত্তং ‘‘ন চ লব্ভা ইমেসং ধম্মানং ৰিনিব্ভুজিত্ৰা ৰিনিব্ভুজিত্ৰা নানাকরণং পঞ্ঞাপেতু’’ন্তি। এস নযো সব্বত্থ।
351. Saṃsaṭṭhādipucchānaṃ vissajjane saṃsaṭṭhāti sativinayakammavācākkhaṇasmiṃyeva dvinnampi samathānaṃ siddhattā sammukhāvinayoti vā sativinayoti vā ime dhammā saṃsaṭṭhā, no visaṃsaṭṭhā. Yasmā pana kadalikkhandhe pattavaṭṭīnaṃ viya na sakkā tesaṃ vinibbhujitvā nānākaraṇaṃ dassetuṃ, tena vuttaṃ ‘‘na ca labbhā imesaṃ dhammānaṃ vinibbhujitvā vinibbhujitvā nānākaraṇaṃ paññāpetu’’nti. Esa nayo sabbattha.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
২. অধিকরণনিদানাদি • 2. Adhikaraṇanidānādi
৩. অধিকরণমূলাদি • 3. Adhikaraṇamūlādi
৪. অধিকরণপচ্চযাপত্তি • 4. Adhikaraṇapaccayāpatti
৫. অধিকরণাধিপ্পাযো • 5. Adhikaraṇādhippāyo
৬. পুচ্ছাৰারো • 6. Pucchāvāro
৮. সংসট্ঠৰারো • 8. Saṃsaṭṭhavāro
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণভেদৰণ্ণনা • Adhikaraṇabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণনিদানাদিৰণ্ণনা • Adhikaraṇanidānādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণনিদানাদিৰণ্ণনা • Adhikaraṇanidānādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অধিকরণনিদানাদিৰণ্ণনা • Adhikaraṇanidānādivaṇṇanā
