| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
অধিকরণনিদানাদিৰণ্ণনা
Adhikaraṇanidānādivaṇṇanā
৩৪২. কিংনিদানন্তিআদীসু ছসু পদেসু সমাসভাৰং দস্সেন্তো আহ ‘‘কিংনিদানমস্সা’’তিআদি। অস্সাতি ৰিৰাদাধিকরণস্স। ‘‘কিংনিদান’’ন্তি পদানং সতিপি সমাসভাৰে ব্যঞ্জনন্তপকতিকত্তা ‘‘কি’’ন্তি নিগ্গহিতন্তভাৰেন উচ্চারণং কাতব্বং। সব্বানেতানীতি সব্বানি নিদানন্তিআদীনি এতানি পদানি। ৰেৰচনানীতি একস্মিংযেৰ ‘‘কারণ’’ন্তি অত্থে ৰিৰিধানি ৰচনানি ৰিৰচনানি, তানিযেৰ ৰেৰচনানি। অথ ৰা ৰিৰিধং ৰচনমেতস্সত্থস্সাতি ৰিৰচনং, কারণসঙ্খাতো অত্থো, অভিধেয্যঅভিধানভাৰেন সম্বন্ধত্তা ৰিৰচনস্স এতানি ৰেৰচনানি, পদানি।
342.Kiṃnidānantiādīsu chasu padesu samāsabhāvaṃ dassento āha ‘‘kiṃnidānamassā’’tiādi. Assāti vivādādhikaraṇassa. ‘‘Kiṃnidāna’’nti padānaṃ satipi samāsabhāve byañjanantapakatikattā ‘‘ki’’nti niggahitantabhāvena uccāraṇaṃ kātabbaṃ. Sabbānetānīti sabbāni nidānantiādīni etāni padāni. Vevacanānīti ekasmiṃyeva ‘‘kāraṇa’’nti atthe vividhāni vacanāni vivacanāni, tāniyeva vevacanāni. Atha vā vividhaṃ vacanametassatthassāti vivacanaṃ, kāraṇasaṅkhāto attho, abhidheyyaabhidhānabhāvena sambandhattā vivacanassa etāni vevacanāni, padāni.
‘‘অট্ঠারসভেদকরৰত্থুসঙ্খাতো’’তি ইমিনা ৰিৰাদসরূপং দস্সেতি। ৰিৰাদন্তি অট্ঠারসভেদকরৰত্থুসঙ্খাতং ৰিৰাদং। এতন্তি ‘‘ৰিৰাদনিদান’’ন্তি এতং ৰচনং। অস্সাতি অনুৰাদাধিকরণস্স। ইদম্পীতি ‘‘অনুৰাদনিদান’’ন্তি ৰচনম্পি। অস্সাতি আপত্তাধিকরণস্স। এতন্তি ‘‘আপত্তিনিদান’’ন্তি ৰচনং। কিচ্চমেৰ ব্যঞ্জনৰড্ঢনৰসেন কিচ্চযন্তি ৰুত্তং। অস্সাতি কিচ্চাধিকরণস্স। সমনুভাসনাদীনং উপ্পজ্জনককিচ্চানন্তি সম্বন্ধো। এতন্তি ‘‘কিচ্চযনিদান’’ন্তি ৰচনং। একপদযোজনাতি একেন ‘‘নিদান’’ন্তি পদেন যোজনা। সব্বপদানীতি সব্বানি সমুদযাদীনি পদানি।
‘‘Aṭṭhārasabhedakaravatthusaṅkhāto’’ti iminā vivādasarūpaṃ dasseti. Vivādanti aṭṭhārasabhedakaravatthusaṅkhātaṃ vivādaṃ. Etanti ‘‘vivādanidāna’’nti etaṃ vacanaṃ. Assāti anuvādādhikaraṇassa. Idampīti ‘‘anuvādanidāna’’nti vacanampi. Assāti āpattādhikaraṇassa. Etanti ‘‘āpattinidāna’’nti vacanaṃ. Kiccameva byañjanavaḍḍhanavasena kiccayanti vuttaṃ. Assāti kiccādhikaraṇassa. Samanubhāsanādīnaṃ uppajjanakakiccānanti sambandho. Etanti ‘‘kiccayanidāna’’nti vacanaṃ. Ekapadayojanāti ekena ‘‘nidāna’’nti padena yojanā. Sabbapadānīti sabbāni samudayādīni padāni.
নৰন্নন্তি জাতিৰসেন ছন্নং হেতূনং নৰসু অন্তোগধত্তা তিকৰসেনেতং ৰুত্তং। ব্যঞ্জনমত্তন্তি হেতুপচ্চযৰসেন ব্যঞ্জনমেৰ। হীতি সচ্চং, যস্মা ৰা। এত্থাতি ততিযপুচ্ছাৰিস্সজ্জনে।
Navannanti jātivasena channaṃ hetūnaṃ navasu antogadhattā tikavasenetaṃ vuttaṃ. Byañjanamattanti hetupaccayavasena byañjanameva. Hīti saccaṃ, yasmā vā. Etthāti tatiyapucchāvissajjane.
৩৪৩. দ্ৰাদস মূলানীতি এত্থ দ্ৰাদসন্নং মূলানং সরূপং দস্সেন্তো আহ ‘‘কোধউপনাহযুগল়কাদীনী’’তিআদি । এত্থ (ৰিভ॰ ৮৩৩, ৯৪৪) আদিসদ্দেন মক্খপল়াসযুগল় ইস্সামচ্ছরিযযুগল় মাযাসাঠেয্যযুগল় পাপিচ্ছমিচ্ছাদিট্ঠিযুগল় সন্দিট্ঠিপরামাসিআধানগ্গাহিদুপ্পটিনিস্সগ্গিযুগল়ৰসেন পঞ্চ যুগল়ানি সঙ্গণ্হাতি। অজ্ঝত্তসন্তানপ্পৰত্তানীতি নিযকজ্ঝত্তসন্তানে পৰত্তানি।
343.Dvādasa mūlānīti ettha dvādasannaṃ mūlānaṃ sarūpaṃ dassento āha ‘‘kodhaupanāhayugaḷakādīnī’’tiādi . Ettha (vibha. 833, 944) ādisaddena makkhapaḷāsayugaḷa issāmacchariyayugaḷa māyāsāṭheyyayugaḷa pāpicchamicchādiṭṭhiyugaḷa sandiṭṭhiparāmāsiādhānaggāhiduppaṭinissaggiyugaḷavasena pañca yugaḷāni saṅgaṇhāti. Ajjhattasantānappavattānīti niyakajjhattasantāne pavattāni.
অট্ঠারসভেদকরৰত্থূনং সমুট্ঠানভাৰং নিব্বচনেন পকাসেন্তো আহ ‘‘তং হী’’তিআদি। তন্তি অনুৰাদাধিকরণং, সমুট্ঠাতীতি সম্বন্ধো। এত্থ চ ‘‘এতেসূ’’তি ইমিনা অধিকরণভাৰং দস্সেতি। ‘‘এতেহী’’তি ইমিনা করণভাৰং দস্সেতি। তেনাতি কারণেন। অস্সাতি ৰিৰাদাধিকরণস্স। এতানীতি অট্ঠারসভেদকরৰত্থূনি। সব্বত্থাতি সব্বেসং অধিকরণানং সব্বেসু সমুট্ঠানেসু।
Aṭṭhārasabhedakaravatthūnaṃ samuṭṭhānabhāvaṃ nibbacanena pakāsento āha ‘‘taṃ hī’’tiādi. Tanti anuvādādhikaraṇaṃ, samuṭṭhātīti sambandho. Ettha ca ‘‘etesū’’ti iminā adhikaraṇabhāvaṃ dasseti. ‘‘Etehī’’ti iminā karaṇabhāvaṃ dasseti. Tenāti kāraṇena. Assāti vivādādhikaraṇassa. Etānīti aṭṭhārasabhedakaravatthūni. Sabbatthāti sabbesaṃ adhikaraṇānaṃ sabbesu samuṭṭhānesu.
৩৪৪. একেন অধিকরণেন কিচ্চাধিকরণেনাতি ইদং ৰুত্তন্তি সম্বন্ধো। এতানীতি অধিকরণানি। একংসতোতি একংসেন, এককোট্ঠাসেনাতি অত্থো। হীতি সচ্চং, যস্মা ৰা।
344. Ekena adhikaraṇena kiccādhikaraṇenāti idaṃ vuttanti sambandho. Etānīti adhikaraṇāni. Ekaṃsatoti ekaṃsena, ekakoṭṭhāsenāti attho. Hīti saccaṃ, yasmā vā.
সাৰসেসাপত্তি সম্মতি ৰিয অনৰসেসাপত্তি ন সম্মতীতি যোজনা। কস্মা ন সম্মতীতি আহ ‘‘ন হী’’তিআদি। হীতি যস্মা। সাতি অনৰসেসা আপত্তি। ততোতি অনৰসেসাপত্তিতো। এত্থ চ ‘‘ন সক্কা দেসেতু’’ন্তি ইমিনা দেসনাগামিনিযা অভাৰং দীপেতি। ‘‘ন সক্কা…পে॰… পতিট্ঠাতু’’ন্তি ইমিনা ৰুট্ঠানগামিনিযা অভাৰং দীপেতি।
Sāvasesāpatti sammati viya anavasesāpatti na sammatīti yojanā. Kasmā na sammatīti āha ‘‘na hī’’tiādi. Hīti yasmā. Sāti anavasesā āpatti. Tatoti anavasesāpattito. Ettha ca ‘‘na sakkā desetu’’nti iminā desanāgāminiyā abhāvaṃ dīpeti. ‘‘Na sakkā…pe… patiṭṭhātu’’nti iminā vuṭṭhānagāminiyā abhāvaṃ dīpeti.
৩৪৯. ততোতি নযতো। যত্থ সতিৰিনযোতিআদিকা ছ যমকপুচ্ছাতি সম্বন্ধো। তাসন্তি পুচ্ছানং। পকাসিতোতি পাকটো।
349.Tatoti nayato. Yattha sativinayotiādikā cha yamakapucchāti sambandho. Tāsanti pucchānaṃ. Pakāsitoti pākaṭo.
৩৫১. দ্ৰিন্নম্পি সমথানন্তি সম্মুখাৰিনযসতিৰিনযৰসেন দ্ৰিন্নম্পি সমথানং। যস্মাতি যেন কারণেন ন সক্কাতি সম্বন্ধো। পত্তৰট্টীনং নানাকরণন্তি সম্বন্ধো। তেসন্তি সম্মুখাৰিনযসতিৰিনযানং নানাকরণন্তি সম্বন্ধো। অযং পনেত্থ যোজনা – যস্মা কদলিক্খন্ধে পত্তৰট্টীনং নানাকরণং ৰিনিব্ভুজ্জিত্ৰা দস্সেতুং ন সক্কা ৰিয তেসং নানাকরণং ৰিনিব্ভুজ্জিত্ৰা দস্সেতুং ন সক্কাতি। তেনাতি কারণেন। সব্বত্থাতি সব্বেসু ৰিস্সজ্জনেসু।
351.Dvinnampi samathānanti sammukhāvinayasativinayavasena dvinnampi samathānaṃ. Yasmāti yena kāraṇena na sakkāti sambandho. Pattavaṭṭīnaṃ nānākaraṇanti sambandho. Tesanti sammukhāvinayasativinayānaṃ nānākaraṇanti sambandho. Ayaṃ panettha yojanā – yasmā kadalikkhandhe pattavaṭṭīnaṃ nānākaraṇaṃ vinibbhujjitvā dassetuṃ na sakkā viya tesaṃ nānākaraṇaṃ vinibbhujjitvā dassetuṃ na sakkāti. Tenāti kāraṇena. Sabbatthāti sabbesu vissajjanesu.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi
২. অধিকরণনিদানাদি • 2. Adhikaraṇanidānādi
৩. অধিকরণমূলাদি • 3. Adhikaraṇamūlādi
৪. অধিকরণপচ্চযাপত্তি • 4. Adhikaraṇapaccayāpatti
৬. পুচ্ছাৰারো • 6. Pucchāvāro
৮. সংসট্ঠৰারো • 8. Saṃsaṭṭhavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অধিকরণনিদানাদিৰণ্ণনা • Adhikaraṇanidānādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণভেদৰণ্ণনা • Adhikaraṇabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণনিদানাদিৰণ্ণনা • Adhikaraṇanidānādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অধিকরণনিদানাদিৰণ্ণনা • Adhikaraṇanidānādivaṇṇanā
