| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
අධිකරණනිදානාදිවණ්‌ණනා
Adhikaraṇanidānādivaṇṇanā
342. විවාදාධිකරණං කිංනිදානන්‌තිආදීසු කිං නිදානමස්‌සාති කිංනිදානං. කො සමුදයො අස්‌සාති කිංසමුදයං. කා ජාති අස්‌සාති කිංජාතිකං. කො පභවො අස්‌සාති කිංපභවං. කො සම්‌භාරො අස්‌සාති කිංසම්‌භාරං. කිං සමුට්‌ඨානං අස්‌සාති කිංසමුට්‌ඨානං. සබ්‌බානෙතානි කාරණවෙවචනානියෙව.
342.Vivādādhikaraṇaṃ kiṃnidānantiādīsu kiṃ nidānamassāti kiṃnidānaṃ. Ko samudayo assāti kiṃsamudayaṃ. Kā jāti assāti kiṃjātikaṃ. Ko pabhavo assāti kiṃpabhavaṃ. Ko sambhāro assāti kiṃsambhāraṃ. Kiṃ samuṭṭhānaṃ assāti kiṃsamuṭṭhānaṃ. Sabbānetāni kāraṇavevacanāniyeva.
විවාදනිදානන්‌තිආදීසුපි අට්‌ඨාරසභෙදකරවත්‌ථුසඞ්‌ඛාතො විවාදො නිදානමෙතස්‌සාති විවාදනිදානං. විවාදං නිස්‌සාය උප්‌පජ්‌ජනකවිවාදවසෙනෙතං වුත්‌තං. අනුවාදො නිදානං අස්‌සාති අනුවාදනිදානං . ඉදම්‌පි අනුවාදං නිස්‌සාය උප්‌පජ්‌ජනකඅනුවාදවසෙන වුත්‌තං. ආපත්‌ති නිදානං අස්‌සාති ආපත්‌තිනිදානං. ආපත්‌තාධිකරණපච්‌චයා චතස්‌සො ආපත්‌තියො ආපජ්‌ජතීති එවං ආපත්‌තිං නිස්‌සාය උප්‌පජ්‌ජනකආපත්‌තිවසෙනෙතං වුත්‌තං. කිච්‌චයං නිදානමස්‌සාති කිච්‌චයනිදානං; චතුබ්‌බිධං සඞ්‌ඝකම්‌මං කාරණමස්‌සාති අත්‌ථො. උක්‌ඛිත්‌තානුවත්‌තිකාය භික්‌ඛුනියා යාවතතියං සමනුභාසනාදීනං කිච්‌චං නිස්‌සාය උප්‌පජ්‌ජනකකිච්‌චානං වසෙනෙතං වුත්‌තං. අයං චතුන්‌නම්‌පි අධිකරණානං විස්‌සජ්‌ජනපක්‌ඛෙ එකපදයොජනා. එතෙනානුසාරෙන සබ්‌බපදානි යොජෙතබ්‌බානි.
Vivādanidānantiādīsupi aṭṭhārasabhedakaravatthusaṅkhāto vivādo nidānametassāti vivādanidānaṃ. Vivādaṃ nissāya uppajjanakavivādavasenetaṃ vuttaṃ. Anuvādo nidānaṃ assāti anuvādanidānaṃ. Idampi anuvādaṃ nissāya uppajjanakaanuvādavasena vuttaṃ. Āpatti nidānaṃ assāti āpattinidānaṃ. Āpattādhikaraṇapaccayā catasso āpattiyo āpajjatīti evaṃ āpattiṃ nissāya uppajjanakaāpattivasenetaṃ vuttaṃ. Kiccayaṃ nidānamassāti kiccayanidānaṃ; catubbidhaṃ saṅghakammaṃ kāraṇamassāti attho. Ukkhittānuvattikāya bhikkhuniyā yāvatatiyaṃ samanubhāsanādīnaṃ kiccaṃ nissāya uppajjanakakiccānaṃ vasenetaṃ vuttaṃ. Ayaṃ catunnampi adhikaraṇānaṃ vissajjanapakkhe ekapadayojanā. Etenānusārena sabbapadāni yojetabbāni.
දුතියපුච්‌ඡාය හෙතුනිදානන්‌තිආදිම්‌හි විස්‌සජ්‌ජනෙ නවන්‌නං කුසලාකුසලාබ්‍යාකතහෙතූනං වසෙන හෙතුනිදානාදිතා වෙදිතබ්‌බා. තතියපුච්‌ඡාය විස්‌සජ්‌ජනෙ බ්‍යඤ්‌ජනමත්‌තං නානං. හෙතුයෙව හි එත්‌ථ පච්‌චයොති වුත්‌තො.
Dutiyapucchāya hetunidānantiādimhi vissajjane navannaṃ kusalākusalābyākatahetūnaṃ vasena hetunidānāditā veditabbā. Tatiyapucchāya vissajjane byañjanamattaṃ nānaṃ. Hetuyeva hi ettha paccayoti vutto.
343. මූලපුච්‌ඡාය විස්‌සජ්‌ජනෙ ද්‌වාදස මූලානීති කොධඋපනාහයුගළකාදීනි ඡ විවාදාමූලානි, ලොභදොසමොහා තයො, අලොභාදොසාමොහා තයොති ඉමානි අජ්‌ඣත්‌තසන්‌තානප්‌පවත්‌තානි ද්‌වාදස මූලානි. චුද්‌දස මූලානීති තානෙව ද්‌වාදස කායවාචාහි සද්‌ධිං චුද්‌දස හොන්‌ති. ඡ මූලානීති කායාදීනි ඡ සමුට්‌ඨානානි.
343. Mūlapucchāya vissajjane dvādasa mūlānīti kodhaupanāhayugaḷakādīni cha vivādāmūlāni, lobhadosamohā tayo, alobhādosāmohā tayoti imāni ajjhattasantānappavattāni dvādasa mūlāni. Cuddasa mūlānīti tāneva dvādasa kāyavācāhi saddhiṃ cuddasa honti. Cha mūlānīti kāyādīni cha samuṭṭhānāni.
සමුට්‌ඨානපුච්‌ඡාය විස්‌සජ්‌ජනෙ අට්‌ඨාරස භෙදකරවත්‌ථූනි සමුට්‌ඨානානි, තඤ්‌හි එතෙසු අට්‌ඨාරසසු භෙදකරවත්‌ථූසු සමුට්‌ඨාති, එතෙහි වා කාරණභූතෙහි සමුට්‌ඨාති. තෙනස්‌සෙතානි සමුට්‌ඨානානි වුච්‌චන්‌ති. එස නයො සබ්‌බත්‌ථ.
Samuṭṭhānapucchāya vissajjane aṭṭhārasa bhedakaravatthūni samuṭṭhānāni, tañhi etesu aṭṭhārasasu bhedakaravatthūsu samuṭṭhāti, etehi vā kāraṇabhūtehi samuṭṭhāti. Tenassetāni samuṭṭhānāni vuccanti. Esa nayo sabbattha.
344. විවාදාධිකරණං ආපත්‌තීතිආදිභෙදෙ එකෙන අධිකරණෙන කිච්‌චාධිකරණෙනාති ඉදං යෙන අධිකරණෙන සම්‌මන්‌ති, තං දස්‌සෙතුං වුත්‌තං, න පනෙතානි එකංසතො කිච්‌චාධිකරණෙනෙව සම්‌මන්‌ති. න හි පුග්‌ගලස්‌ස සන්‌තිකෙ දෙසෙන්‌තස්‌ස කිච්‌චාධිකරණං නාම අත්‌ථි.
344.Vivādādhikaraṇaṃ āpattītiādibhede ekena adhikaraṇena kiccādhikaraṇenāti idaṃ yena adhikaraṇena sammanti, taṃ dassetuṃ vuttaṃ, na panetāni ekaṃsato kiccādhikaraṇeneva sammanti. Na hi puggalassa santike desentassa kiccādhikaraṇaṃ nāma atthi.
න කතමෙන සමථෙනාති සාවසෙසාපත්‌ති විය න සම්‌මති. න හි සක්‌කා සා දෙසෙතුං, න තතො වුට්‌ඨාය සුද්‌ධන්‌තෙ පතිට්‌ඨාතුං.
Na katamena samathenāti sāvasesāpatti viya na sammati. Na hi sakkā sā desetuṃ, na tato vuṭṭhāya suddhante patiṭṭhātuṃ.
348. විවාදාධිකරණං හොති අනුවාදාධිකරණන්‌තිආදි නයො උත්‌තානොයෙව.
348.Vivādādhikaraṇaṃ hoti anuvādādhikaraṇantiādi nayo uttānoyeva.
349. තතො පරං යත්‌ථ සතිවිනයොතිආදිකා සම්‌මුඛාවිනයං අමුඤ්‌චිත්‌වා ඡ යමකපුච්‌ඡා වුත්‌තා, තාසං විස්‌සජ්‌ජනෙනෙව අත්‌ථො පකාසිතො.
349. Tato paraṃ yattha sativinayotiādikā sammukhāvinayaṃ amuñcitvā cha yamakapucchā vuttā, tāsaṃ vissajjaneneva attho pakāsito.
351. සංසට්‌ඨාදිපුච්‌ඡානං විස්‌සජ්‌ජනෙ සංසට්‌ඨාති සතිවිනයකම්‌මවාචාක්‌ඛණස්‌මිංයෙව ද්‌වින්‌නම්‌පි සමථානං සිද්‌ධත්‌තා සම්‌මුඛාවිනයොති වා සතිවිනයොති වා ඉමෙ ධම්‌මා සංසට්‌ඨා, නො විසංසට්‌ඨා. යස්‌මා පන කදලික්‌ඛන්‌ධෙ පත්‌තවට්‌ටීනං විය න සක්‌කා තෙසං විනිබ්‌භුජිත්‌වා නානාකරණං දස්‌සෙතුං, තෙන වුත්‌තං ‘‘න ච ලබ්‌භා ඉමෙසං ධම්‌මානං විනිබ්‌භුජිත්‌වා විනිබ්‌භුජිත්‌වා නානාකරණං පඤ්‌ඤාපෙතු’’න්‌ති. එස නයො සබ්‌බත්‌ථ.
351. Saṃsaṭṭhādipucchānaṃ vissajjane saṃsaṭṭhāti sativinayakammavācākkhaṇasmiṃyeva dvinnampi samathānaṃ siddhattā sammukhāvinayoti vā sativinayoti vā ime dhammā saṃsaṭṭhā, no visaṃsaṭṭhā. Yasmā pana kadalikkhandhe pattavaṭṭīnaṃ viya na sakkā tesaṃ vinibbhujitvā nānākaraṇaṃ dassetuṃ, tena vuttaṃ ‘‘na ca labbhā imesaṃ dhammānaṃ vinibbhujitvā vinibbhujitvā nānākaraṇaṃ paññāpetu’’nti. Esa nayo sabbattha.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi
2. අධිකරණනිදානාදි • 2. Adhikaraṇanidānādi
3. අධිකරණමූලාදි • 3. Adhikaraṇamūlādi
4. අධිකරණපච්‌චයාපත්‌ති • 4. Adhikaraṇapaccayāpatti
5. අධිකරණාධිප්‌පායො • 5. Adhikaraṇādhippāyo
6. පුච්‌ඡාවාරො • 6. Pucchāvāro
8. සංසට්‌ඨවාරො • 8. Saṃsaṭṭhavāro
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අධිකරණභෙදවණ්‌ණනා • Adhikaraṇabhedavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අධිකරණනිදානාදිවණ්‌ණනා • Adhikaraṇanidānādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අධිකරණනිදානාදිවණ්‌ණනා • Adhikaraṇanidānādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / අධිකරණනිදානාදිවණ්‌ණනා • Adhikaraṇanidānādivaṇṇanā
